E Ngolo Ovanganga Nluta Zitwasa!

ELONGI dia Nkand’a Nzambi ye Nsambila ya Esi Nzo mfunu ina muna ‘tongonona wana muna ndonga yo lusansu lua Yave.’ (Ef. 6:4) Avo u se, ozeye wo vo aleke nzaki beyoyanga. Aweyi olenda kubasadisila kimana basianga sungididi muna Nsambila ya Esi Nzo? Badika dina bevanganga mase makaka.

George, kuna California, Estados Unidos wavova vo: “Vava wan’eto bakala aleke, mono yo nkaz’ame twavanganga mawonso kimana elongi dia Nkand’a Nzambi dia esi nzo diakala dia kiese. Ezak’e ntangwa, twavwatilanga nze una wavwatila wantu ana tutanganga muna Tusansu twa Nkand’a Nzambi yo vanga nsongesela za dina bavanga. Twavanga nkutu salanganu nze nsosolo, nkau, mbangu ye yakaka mpe. Twatanga mpe savu ya Nkand’a Nzambi nze eki, ‘mono i nani.’ Twavanga babu kina twasoneka yuvu yayingi ya Nkand’a Nzambi yampimpita ye yaleboka. Salu yayingi mpe twasalanga nze tunga nzaza a Noa yovo vava zaya e mvu miavangama tusansu tuyikwanga mu Nkand’a Nzambi. Ezak’e ntangwa, twavanganga mpe nsongesela za wantu yovo tusansu tuyikwanga mu Nkand’a Nzambi. Owau, tukubamanga mu vanga nwaninwa ya mwanda iyikwanga muna Efeso 6:11-17, konso muntu mu yeto osasila konso nwaninwa. E ndekwa zazi zikutusadisanga mu yangalela elongi dieto dia esi nzo.”

Debi una vo ngudi kuna Michigan, Estados Unidos, wavova vo: “Mono yo nkaz’ame mpasi zayingi twakala zau mu sadisa mwan’eto ankento kimana kasianga e sungididi mun’elongi vava kakala ye mvu ntatu. Lumbu kimosi, vava twatanganga lusansu lwa Isaki ye Rebeka muna Tusansu twa Nkand’a Nzambi, yasadila wana popi wole (boneco). Vava yayikanga mvovo mia Isaki, yansonganga popi kia Isaki, vava yayikanga mvovo mia Rebeka, yansonganga mpe popi kia Rebeka. Owau otoma sianga sungididi mun’elongi. Muna ngonde zalanda, twasadila wana popi awaya muna kunlonga wantu ayingi beyikwanga muna Nkand’a Nzambi. Vava tutanganga lusansu, mwan’eto ovavanga wana popi muna nzo yovo lekwa kiakaka tulenda sadila muna kunsonga lusansu. Diakala nze yandi wavavanga lusalu lwantalu. Muna songa nzo a Rakabi yasiwa nsing’ambwaki, twasadila nkele a nsapatu ye mponda ambwaki. Muna toma sasila nioka a nsongo yiyikwanga muna Ntalu 21:4-9 twasadila e popi kia nioka wa meta mosi ye ndambu wazingwa mu nti a sesa. Twalundanga popi zazi muna nkutu ampwena. Diatoma kutuyangidikanga mu mona mwan’eto wavwandanga vana eseka yo vava nkand’andi wa ‘Tusansu twa Nkand’a Nzambi’ muna nkutu. Ekwe kiese tumonanga vava kesasilanga tusansu muna mpil’andi!”

Sansa wana una ufwene ke diambu diakete ko, mayingi mevavwanga muna kubalonga kimana bakala ye luzolo lwa sadila Yave. Elongi dia Nkand’a Nzambi ye nsambila ya esi nzo i nkubika ilenda sadisa muna kubalonga. Ka lukatikisu ko, e ngolo ovanganga nluta zitwasa!