Vwa e Nsambu Zitwasa Ntinu Ofilwanga kwa Mwand’a Nzambi!
Vwa e Nsambu Zitwasa Ntinu Ofilwanga kwa Mwand’a Nzambi!
“O mwand’a Yave ukunyitalelela.”—YES. 11:2.
1. Akaka adieyi bavova mu kuma kia mambu mampasi mevangamanga ova nza?
“WAU vo e nza yayi yazala ye mavwanga ma nkangu ye luyalu, nga ekanda dia wantu dilenda diaka zinga 100 mvu?” Ekiaki i kiuvu kiayuvula Stephen Hawking, wa nkwa ngangu za nza muna mvu wa 2006. A mwangi a nsangu a zulunalu ya New Statesman basoneka vo: “Vana fulu kia manisa usukami yovo sikidisa luvuvamu mu nza, vita ye usukami kaka tuwokesanga. Kansi, ediadi ke kani dieto ko. Tutezanga vanga wawonso, tuka luyalu lwa comunismo yakuna luyalu lwa capitalismo; tuka Liga das Nações yasikidiswa y’ekani dia vengesa e vita yaku ngwizani ya vanga nwaninwa yangolo mu fokola e vita. Vita zayingi tunwene mu vava fokola e vita, yo banza vo tuzeye una tulenda fokolwela vita.”
2. Ke kolo ko Yave adieyi kevanga mu songa wisa kiandi kia yala nza?
2 Mambu mama ke mesivikisanga selo ya Yave ko. Nkand’a Nzambi ukutuvovesanga vo wantu ke basemwa ko kimana bakiyala yau kibeni. (Yer. 10:23) Yave kaka ofwete kala Mfumu eto. Muna kuma kiaki, una yo nswa wa kutuvana nkanikinu, sikidisa ekani tufwete kala diau muna zingu yo kutufila mu lungisa ekani diadi. Vana ntandu, ke kolo ko osadila wisa kiandi mu sukisa luyalu lwa wantu. Muna kolo kiakina, ofwasa mpe awonso ana bebembolanga kimfumu kiandi yo kituka s’abundu esumu ye a “nzambi a tandu kiaki,” i sia vo, Nkadi Ampemba wa Satana.—2 Kor. 4:4.
3. Yesaya adieyi kavova mu kuma kia Masia?
3 Muna nz’ampa ikituka se Paradiso, Yave osadila Kintinu kia Masia mu yala o wantu. (Dan. 7:13, 14) Mu kuma kia Ntinu ndioyo, Yesaya wavova vo: “Muvaika nsungu muna nti a Yisai, e ntombo a mianzi miandi iyima mbongo: o mwand’a Yave ukunyitalelela, o mwand’a ngangu yo mbakula, o mwand’a ndongesela yo nkuma, o mwand’a zayi yo vumi wa Yave.” (Yes. 11:1, 2) Aweyi o mwand’avelela a Nzambi wavanina wisa kwa Yesu Kristu wa “nsungu muna nti a Yisai” mu yala wantu? Nkia nsambu zitwasa luyalu lwandi? Adieyi tufwete vanga mu vwa e nsambu zazi?
Nzambi Wavana Yesu e Wisa kia Yala
4-6. Nkia zayi kavwidi Yesu ukunsadisa mu yala nze Ntinu angangu ye nkwa nkenda, Ngang’ambuta ye Mfundisi?
4 I luzolo lwa Yave vo selo yandi ova ntoto bavwa kiwuntu kialunga muna mfil’a Ntinu angangu ye nkwa nkenda, wa Ngang’ambuta ye Mfundisi. Kiaki i kuma Nzambi kasolela Yesu Kristu yo kumfwanisa muna mwand’avelela kimana kalungisa salu yayi yamfunu. Badika e kuma yisonganga vo Yesu olungisa una ufwene kiyekwa kavewa kwa Nzambi.
5 Yesu otomene zaya Nzambi. O Mwan’amosi otomene zaya S’andi ke mu muntu akaka ko, mu tezo kia mazunda ye mazunda ma mvu. Muna mvu miami, Yesu watoma tanginina Yave yo yikilwa vo “fwaniswa kia Nzambi walembi monakana.” (Kol. 1:15) Yesu yandi kibeni wavova vo: “Ona wambona, wamona Se.”—Yoa. 14:9.
6 Katula Yave, Yesu kaka otomene zay’e vangwa yawonso, kumosi ye wantu. Muna Kolosai 1:16, 17 tutanganga vo: “Muna yandi [Mwan’a Nzambi] mwasemenwa lekwa yawonso mun’ezulu y’ova nza, ina imonakana, ina mpe ilembi monakana, . . . yandi i wavita lekwa yawonso, yawonso muna yandi i ina.” Yindula diambu edi. Nze “mbuta mbangu” a Nzambi, Yesu wasadilwa mu vanga lekwa yakaka. Muna kuma kiaki, otomene zaya mawonso ma nsema, tuka ma yakete-kete yaku tomfo twa muntu. Kieleka, Kristu nkwa ngangu kikilu.—Nga. 8:12, 22, 30, 31.
7, 8. O mwand’a Nzambi aweyi wasadisila Yesu muna salu kiandi ova ntoto?
7 Yesu wakuswa muna mwand’avelela a Nzambi. Yesu wavova vo: “O mwand’a Yave wina yame, e kuma kadi, mazi kankusila yateleka nsangu zambote kw’asukami: Kakuntuma yasamun’e ngyambula kwa nkole, e mbweno kwa mpofo, yasindik’ana bafungumunwa, benda kwau, yasamun’o mvu edienga dia Yave.” (Luka 4:18, 19) Vava Yesu kavubwa, mwand’avelela nanga wansungamesa mawonso kalongoka ekolo kakala kun’ezulu kumosi ye mana Nzambi kazola vo kavanga muna salu kiandi ova ntoto nze Masia.—Tanga Yesaya 42:1; Luka 3:21, 22; Yoane 12:50.
8 Wau vo wakumikwa kwa mwand’avelela yo kala walunga mu nitu ye ngindu, Yesu kakala kaka muntu ona wasunda nene ko wazinga kala ova ntoto, kansi Nlongi anene mpe kakala. Kiaki i kuma, wantu ‘bayizengenekenanga mun’elongi diandi.’ (Mat. 7:28) Diantete, Yesu wasonganga etuku dia mpasi za wantu, i sia vo, esumu, lembi lunga ye kondwa kwa zayi mu kuma kia Nzambi. Vana ntandu, wazayanga una wakala ntima mia wantu yo kadila yau mun’owu wa mavangu mau.—Mat. 9:4; Yoa. 1:47.
9. O yindula e zingu kia Yesu ova ntoto aweyi diwokeselanga e vuvu kiaku muna yandi vava keyala se Ntinu?
9 Yesu wazinga ova ntoto nze muntu. Mana kamona ekolo kakala ova ntoto ye una kakadilanga ye wantu alembi lunga diasadisa Yesu mu kala se Ntinu ambote. Paulu wa ntumwa wasoneka vo: “[Yesu] kafwete kadil’e mfwanani y’abunzi andi muna mambu mawonso, kakala ngang’ambut’ankenda yo kwikizi muna mambu ma Nzambi, kasil’e lembeka muna diambu dia masumu ma wantu. Kadi wau vo oyandi kibeni wavukumunwa muna mpasi zina kamwene, win’owu kabasàdis’awana bevukumunwanga.” (Ayib. 2:17, 18) Wau vo Yesu ‘wavukumunwa’ muna mpasi, olenda fwila awana bemonanga mpasi e nkenda. Yesu wasonganga e nkenda kwa wantu ekolo kakala ova ntoto. Ambevo, avanguki, awana babangikwanga, kana nkutu yingyana-ngyana ke bakalanga ye wonga wakumfinama ko. (Maku 5:22-24, 38-42; 10:14-16) Alembami ye awana bakala y’etima dia zaya e ludi mu kuma kia Nzambi bamfinamanga mpe. Kuna diak’esambu, akwa lulendo y’awana ‘ke bakala ye zola muna Nzambi ko,’ babembola Yesu, kumenga yo kunsia e kitantu.—Yoa. 5:40-42; 11:47-53.
10. Ayeyi mpila isundidi ina Yesu kasongela zola kwandi muna yeto?
10 Yesu wavana moyo andi muna wete dieto. E ziku kisundidi kisonganga vo ke vena ntinu ofwananene yo Yesu ko i luzolo lwandi lwa fwa mu kuma kieto. (Tanga Nkunga 40:6-10.) Kristu wavova vo: “Ke vena muntu wina ye nzola isundidi nzola yayi ko, ovo muntu oyekwele makangu mandi o moyo.” (Yoa. 15:13) Elo, nswaswani y’atinu alembi lunga, ana bevwaminanga muna nzimbu zitukanga kw’awana beyalanga, Yesu wavana moyo andi muna wete dia wantu awonso.—Mat. 20:28.
Yesu Wavewa Wisa kia Sadila Nluta mia Lukûlu
11. Ekuma tulenda kadila ye vuvu muna Yesu nze Nkûdi eto?
11 Nze Ngang’ambuta, Yesu osadila e nluta mia kimenga kiandi kia lukûlu muna wete dieto. Kieleka, ekolo kakala ova ntoto, Yesu wasonga mana kesinga vanga nze Nkûdi muna Luyalu lwandi lw’Ezunda dia Mvu, luna lukutuyala kele vo tusikila ye kwikizi. Wawuka ambevo ye avanguki, wafula mafwa, wadikila ulolo wa wantu yo ningamesa tembwa ye maza ma mbu. (Mat. 8:26; 14:14-21; Luka 7:14, 15) Vana ntandu, Yesu wavanga mambu mama ke mu songa wisa ye nkum’andi ko, kansi mu songa nkenda ye zola kwandi. Vava nkwa wazi kandodokela vo kamwuka, Yesu wamvovesa vo: “Nzolele wo.” (Maku 1:40, 41) Muna Luyalu lwandi lw’Ezunda dia Mvu, Yesu osonga mpe nkenda zandi kwa nkangu mu nza yawonso.
12. E mvovo miasonama muna Yesaya 11:9, aweyi milunganena?
12 Kristu kumosi y’awana keyala yau bekwamanana sala e salu kia longa wantu oma ma Nzambi, kina Yesu kayantika se vioka 2.000 ma mvu. Muna kolo kiakina, e mvovo mia Yesaya 11:9 milungana: “Ke bevanga mbi yovo fwantakesa ko muna mongo ame avauka: kadi e nza izala yo zayi wa Yave, una mefuka kalunga o maza.” Wantu besinga longwa mpe una bafwete lunga-lunga e ntoto ye vangwa yawonso, nze una Nzambi kakanikina Adami mu vanga. Kuna mfoko a 1.000 dia mvu, e mvovo mia Nzambi miasonama mun’Etuku 1:28 milungana emvimba. Wantu bevwa emvimba e nluta mia kimenga kia lukûlu.
Yesu Wavewa Wisa kia Fundisa
13. Yesu aweyi kasongela vo unsongi kazolanga?
13 Kristu yandi “watumbw’e kimfundisi kwa Nzambi ki’awana ben’o moyo yo mafwa.” (Mav. 10:42) Muna kuma kiaki, dia lufiaulwisu mu zaya vo Yesu kesinga vanga vilwa ko, kadi unsongi ye ziku kiandi kikala nze mponda yatoma kangwa muna luketo lwandi. (Yes. 11:5) Wamenganga eloko, umpuki ye fu yakaka yambi yo tumba awana ke basonganga nkenda ko kw’awana bamonang’e mpasi. (Mat. 23:1-8, 25-28; Maku 3:5) Vana ntandu, Yesu wasonga vo kavunwanga kwa mpw’a muntu ko, ‘kadi yandi kibeni wazayanga mawonso ma ntim’a muntu.’—Yoa. 2:25.
14. O Yesu aweyi kesongelanga vo wakinu zola unsongi? Nkia yuvu tufwete kiyuvula?
14 Yesu wakinu zola unsongi kadi ofilanga e salu kia umbangi ye kia longa wantu muna mpila ina ke kisidi sadilwa ko muna lusansu lwa wantu. Ke vena muntu ko, yovo luyalu ngatu mwand’ambi ulenda sima e salu kiaki kialembi lungiswa mun’owu wa luzolo lwa Nzambi. Muna kuma kiaki, tulenda kala ye ziku vo vava kifokoka vita ya Armangedo, unsongi uwokela ova nza. (Tanga Yesaya 11:4; Matai 16:27.) Ukiyuvula: ‘Nga itangininanga Yesu muna salu kiame kia umbangi? Nga isianga ngolo za sadila Yave una ufwene kana nkutu vo vimpi wame yovo mambu makaka ma zingu malenda kunsimba mu vanga dina ndenda?’
15. Adieyi tufwete sungamena dilenda kutusadisa mu sadila Nzambi ye nsi a ntima wawonso?
15 Tulenda sadila Nzambi ye nsi a ntima wawonso avo tusungamene vo e salu kia umbangi tusalanga i kiandi. Yandi watutuma twasala e salu kiaki, ofilanga kio muna Mwan’andi, osadilanga mwand’andi avelela mu kumika awana besalanga salu kiaki. Nga oyangalelanga elau una diau dia kala nkundi a salu a Nzambi yo Mwan’andi ofilwanga kwa mwand’andi? Nani diaka avo ke Yave ko olenda fila vioka mazunda nsambwadi za mazunda ma wantu, ayingi muna yau bebadikilwanga vo ‘wantu balembi longwa yo lembi zay’o tanga,’ mu zayisa nsangu za Kintinu kwa wantu mu 236 ma nsi?—Mav. 4:13.
Vwa Nsambu Zitwasa Kristu
16. E mvovo miasonama mun’Etuku 22:18, nkia nsambu miyikanga?
16 Yave wavovesa Abarayama vo: “Muna mbongo aku i musambwilwa zula yawonso ya nza; kadi owididi nding’ame.” (Etu. 22:18) E mvovo miami misonganga vo, awana beyangalelanga sadila Nzambi ye Mwan’andi balenda kala ye vuvu vo betambula nsambu zitwasa Masia wa Mbongo. Ekolo besalanga y’etima diawonso o unu, besungamenanga e nsambu zandi.
17, 18. Nkia nsilu a Yave tutanganga muna Nsiku 28:2? Nkia nsasa wina kwa yeto?
17 Kwa mbongo ya Abarayama, i sia vo, e zula kia Isaele, Nzambi wavova vo: “E nsambu zazi zawonso [zasonamana mun’ekangu dia Nsiku] zikwiz’oko wina, yo kuluakila, ovo owila nding’a Yave wa Nzambi aku.” (Nsi. 28:2) E mvovo miami milenda mpe sadilwa mu kuma kia selo ya Nzambi o unu. Muna vwa nsambu za Yave, ofwete ‘wila nding’andi.’ Muna mpila yayi, e nsambu zandi ‘zikwiz’oku wina yo kulwakila.’ Adieyi divavwanga muna ‘wila’ nding’a Nzambi?
18 O wá disongele vo sia sungididi mu mana mevovwanga muna Diambu dia Nzambi ye madia ma mwanda kevananga. (Mat. 24:45) Disongele mpe vo lemvokela Nzambi yo Mwan’andi. Yesu wavova vo: “Ke yandi ko okumpovesanga vo, e Mfumu, e Mfumu, i yun’okota muna kintinu ki’ezulu; ndiona kak’ovangang’o luzolo lu’Es’ame wina kun’ezulu.” (Mat. 7:21) O wila Nzambi disongele vo sakalela nkubika za nkutakani y’Akristu kumosi y’akuluntu bena vo ‘tukau twa wantu.’—Ef. 4:8.
19. Adieyi tufwete vanga muna vwa nsambu?
19 Akaka muna ‘tukau twa wantu’ i mpangi bena muna Buka kia Selo Yambuta, ana besunzulanga e nkutakani yawonso y’Akristu. (Mav. 15:2, 6) Elo, e mpila tubadikilanga mpangi za mwanda za Kristu diambu ivanga muna mpila tufundisilwa muna mpasi zayingi zikwizanga. (Mat. 25:34-40) Muna kuma kiaki, imosi muna mpila tulenda vwila nsambu i yikama ye kwikizi kiawonso e kuswa ya Nzambi.
20. (a) Akieyi i kiyekwa kiantete kia ‘tukau twa wantu’? (b) Aweyi tulenda songela vo tuyangalelanga mpangi zazi?
20 Akaka diaka muna ‘tukau twa wantu’ i mpangi bevitang’o ntu muna mavula, akengi a zunga ye akuluntu muna nkutakani. Yau awonso mu lusadisu lwa mwand’avelela besolelwanga. (Mav. 20:28) Kiyekwa kiantete kia mpangi zazi i kasakesa nkangu a Nzambi ‘yavana awonso beluaka muna untwadi wa lukwikilu ye visa kia zay’o Mwan’a Nzambi, yamuna zikuk’e kimbuta, yamuna tezo kia ntel’a luzalu lua Kristu.’ (Ef. 4:13) Dialudi vo e mpangi zazi, wantu alembi lunga nze yeto. Kansi, tusambulwa kele vo tukubalemvokela yo vutula matondo muna zola kwau nze avungudi.—Ayib. 13:7, 17.
21. Ekuma tufwete sakalela Mwan’a Nzambi owau?
21 Ke kolo ko, Kristu ofwasa nza yayi ya Satana. Vava ediadi divangama, e zingu kieto va moko ma Yesu kikala, kadi yandi wavewa wisa kwa Nzambi kia fila “ndong’ayingi” kuna “nto za maza ma moyo.” (Lus. 7:9, 16, 17) Muna kuma kiaki, yambula twasia ngolo za sakalela yo vutula matondo kwa Ntinu ofilwanga kwa mwand’a Yave.
Adieyi Olongokele Muna . . .
• Etuku 22:18?
[Yuvu ya Longoka]
[Foto ina muna lukaya lwa 17]
Nkenda za Yesu zamoneka vava kafula mwan’a Yairo
[Mafoto zina muna lukaya lwa 18]
Yesu Kristu ofilanga e salu kia umbangi muna mpila ina ke kisidi sadilwa ko muna lusansu lwa wantu