Solola Etininu Vana Vena Nkangu a Nzambi

“Ikuvana matondo muna nkutakani ayingi.”​—NKU. 35:⁠18.

1-3. (a) Adieyi dilenda fila Akristu akaka mu vonza kia mwanda? (b) O nkangu a Nzambi akweyi balenda sololwela etininu?

VAVA Joe yo nkaz’andi bakala mu lumbu ya vundu, bayenda siensia kuna mbu vana vakala ye mbizi za mpila mu mpila, zakete ye zampwena. Bayenda kwandá kimana batoma mona e mbizi za mbu. Vava kamona vo kizalu kisakidi, o nkaz’a Joe wavova vo: “Tukeba, kadi se kwandá twakala.” Joe wamvutula vo: “Kutokani ko, nzeye edi ivanganga.” Ke vavioka kolo ko, Joe wamona diambu diasivi yo vova vo: ‘E mbizi zawonso akweyi zele?’ I bosi wabakula e kuma. Ekolo kakala muna mbu, wamona e mbizi ampwena yayizanga kuna kakala. E zingu kiandi mu vonza kiakala. Vava mbizi yayi yafinama tezo kia meta mosi, yavutuka yo vila.

² O Nkristu olenda vukumunwa kwa lekwa ina mu nza ya Satana, nze nsaka, salu ye mavwa yo lembi bakula vo e zingu kiandi mu vonza se kina. Joe una vo nkuluntu wavova vo: “Dina diambwila diandonga diambu mu kuma ki’awana tuvanganga yau kikundi. Siensia vana fulu kiambote ye kia luvuvamu, i sia vo, muna nkutakani.” Kuyambula ko vo nza yayi yavukumuna yo kuyisia mu vonza kia vambuka e nkutakani. Avo mwene vo mu vambuka una e nkutakani, vana vau vutuka muna nkutakani. Avo ke wau ko, ngwizani aku yo Yave osia mu vonza.

³ O unu, e nza fulu kia vonza kuna kw’Akristu. (2 Tim. 3:​1-5) Satana ozeye wo vo lumbu yakete kaka kasidi yau, ozolele vempola awana ke beyingilanga ko. (1 Pet. 5:8; Lus. 12:​12, 17) Kansi, tuna y’etininu. Yave wakubika e nkutakani y’Akristu mu tanina nkangu andi muna mwanda.

4, 5. Wantu ayingi aweyi bemonanga mu kuma kia zingu kiau kia kusentu? Ekuma?

⁴ E nza yayi luvuvamu lwa kolo kiakete kaka ivananga, kiakala muna nitu yovo muna ngindu. Ndonga bemonanga vo zingu kiau mu vonza kina mu kuma kia umpumbulu, nsoki, mpasi za zingu ye lufwasu lwa kalu kia wantu. Akaka benwananga ye mpasi za kinunu ye mayela. Kw’awana bena ye salu, nzo, nzimbu ye mavimpi mambote balenda kala ye wonga wa zingu kiau kia kusentu.

⁵ Ndonga ke bena ye ngindu zavuvama ko. Diankenda kikilu vo, wantu ayingi bakala ye vuvu kia solola luvuvamu muna longo ye muna zingu kia esi nzo, kansi vuvu kiau ke kialungana ko. Muna kuma kia vava luvuvamu lwa mwanda, asambidi ayingi betungianiswanga yo katikisa luludiku bevewanga. Musungula vava bemonanga mavangu masafu ye malongi maluvunu belongwanga kwa mfumu zau za mabundu. Muna kuma kiaki, ndonga ke bemonanga diaka ko dina balenda vanga avo ke bund’e vuvu muna ngangu za nza ko yovo muna wantu akwa luzolo lwambote. Ke dianzenza ko, mu mona vo wantu ayingi bena ye wonga yovo ke bezolanga yindula zingu kiau kia kusentu ko.

6, 7. (a) Nkia mambu meswaswanesanga ana besadilanga Nzambi y’ana ke bekunsadilanga ko? (b) Adieyi tubadika mun’elongi diadi?

 ⁶ Ekwe nswaswani ina vana vena awana bena muna nkutakani y’Akristu y’awana bena kuna mbazi! Kana nkutu i yeto tuna vo tu nkangu a Yave, mpasi zau zimosi tunwananga zau ye mfinangani zeto, kansi e mpila tubadikilanga mambu yaswaswana. (Tanga Yesaya 65:​13, 14; Malaki 3:18.) Ekuma? E kuma kadi o Nkand’a Nzambi utoma kutusasilanga e kuma o wantu bemwenanga e mpasi. Tulongwanga mpe una tulenda sundila e mpasi za zingu. Muna kuma kiaki, ke tukalanga ye wonga wa zingu kia kusentu ko. Wau vo tu asambidi a Yave, tutaninwanga muna ngindu zalembi songa, mavangu masafu ye mfwilu metwasanga. Ana bena muna nkutakani y’Akristu bena ye luvuvamu lutila wantu akaka.​—⁠Yes. 48:​17, 18; Fili. 4:​6, 7.

⁷ Vena ye nona ilenda kutusadisa mu zaya luvuvamu bena lwau ana besadilanga Yave y’ana ke bekunsadilanga ko. E nona yayi ilenda kutufila mu badika e ngindu ye mavangu meto yo fimpa kana vo tutoma sadilanga luludiku kekutuvananga Nzambi muna kututanina.​—⁠Yes. 30:⁠21.

“O Malu Mame, Fiakete Fisidi nga Mavengele”

8. Adieyi selo ya Yave bafwete vanganga ntangwa zawonso?

⁸ Tuka kuna nz’ankulu, awana besolanga sadila Yave yo kunlemvokela bevenganga vanga kikundi y’awana ke bekunsadilanga ko. Elo, Yave wavova vo kitantu kikala vana vena asambidi andi ye alandi a Satana. (Etu. 3:​15) Wau vo nkanikinu miandi belemvokelanga, o nkangu a Nzambi waswaswana ye wantu akaka. (Yoa. 17:​15, 16; 1 Yoa. 2:​15-​17) Kansi, ezak’e ntangwa diampasi dikalanga mu lemvokela nkanikinu mia Nzambi. Elo, vekalanga ye ntangwa ina selo yakaka ya Yave bekatikisanga lemvokelanga nkanikinu mia Nzambi muna zingu kiau.

9. Yika mpasi kanwana zau o nsoneki a Nkunga 73.

 ⁹ Mosi muna selo ya Yave wayantika tokana kana vo nzengo zambote kabaka i nsoneki a Nkunga 73, nanga mosi muna wan’a Asafi. O ntozi a nkunga wayuvula e kuma yimpumbulu benena ye zingu kiambote, kiakiese, ye mavwa, ekolo akaka mun’awana besadilanga Nzambi bemonanga e mpasi.​—⁠Tanga Nkunga 73:​1-13.

10. E diambu kayika o ntozi a nkunga, ekuma dinina diamfunu kwa ngeye?

¹⁰ Nga wakiyuvula kala e kiuvu nze kina kayuvula ntozi a nkunga? Avo i wau, kutokani kwayingi ko yo banza vo lukwikilu lwaku mu yoya luna. Ndonga muna selo ya Yave, kumosi y’akaka mun’awana kasadila Yave mu soneka Nkand’a Nzambi, bakala mpe ye ngindu zazi. (Yobi 21:​7-13; Nku. 37:1; Yer. 12:1; Kab. 1:​1-4, 13) Muna kuma kiaki, awonso bazolele sadila Yave bafwete toma badika yo vava e mvutu za kiuvu eki: O sadila Nzambi yo kunlemvokela, nga i diambu disundidi o wete mu vanga? Ediadi diamfunu mu kuma kia mpaka kafidisa Satana muna mpatu a Edene. Disonga mpe esambu twina muna diambu dia kimfumu kia Nzambi kia nza yawonso. (Etu. 3:​4, 5) Muna kuma kiaki, diamfunu kwa yeto awonso mu badika dina ntozi a nkunga kavova. Nga tufwete mwena yimpumbulu kimpala mu kuma kia zingu kiambote bena kiau? Nga tufwete ‘venga’ sadila Yave yo kubatanginina? I diau kikilu o Satana kazolele vo twavanga.

11, 12. (a) Ntozi a nkunga aweyi kasundila lukatikisu kakala lwau? Ediadi adieyi ditulongele? (b) Adieyi dilenda kusadisa kele vo olwakilu kwa ngindu nze za ntozi a nkunga?

¹¹ Adieyi diasadisa ntozi a nkunga mu sunda lukatikisu kakala lwau? Kanele vo wavova vo fioti fiasala nga wavengomoka muna nzil’a unsongi, e ngindu zandi zasoba vava kakota muna “nzo avauk’a Nzambi,” i sia vo, vava kakalanga muna tempelo a Nzambi y’akaka ana basianga mambu ma nsambila va fulu kiantete yo badika ekani dia Nzambi. Ntozi a nkunga wabakula vo oyandi kafwete baka tumbu ko nze kina kibaka yimpumbulu. Wabakula mpe vo e mpila zingu basola kiakala nze yau bena “vana va nlelo.” Ntozi a nkunga wazaya wo vo, awonso ana babembola Yave yo kuyivana muna mavangu mambi, e mbaninu au ikwiza muna “nday’a meso,” kansi awana besadilanga Yave betaninwa kwa yandi. (Tanga Nkunga 73:​16-19, 27, 28.) Ka lukatikisu ko vo omonanga e ziku kia mvovo miami. E zingu kia lembi landa nsiku mia Nzambi kilenda moneka vo kiambote kwa wantu ayingi, kansi mfwilu kaka kitwasanga.​—⁠Ngal. 6:​7-9.

¹² Adieyi tulenda longoka muna diambu diabwila ntozi a nkunga? Wasolola etininu ye ngangu vana vena nkangu a Nzambi. Wayantika toma badika o mambu vava kayenda vana fulu kia nsambil’a Yave. Diau adimosi mpe o unu, tulenda solola aludiki ambote yo yangalela madia ma mwanda tuvanwanga muna tukutakanu. Ekiaki i kuma Yave kevoveselanga selo yandi vo bendanga muna tukutakanu tw’Akristu. Muna tukutakanu twatu, bekasakeswanga yo vwa ngangu.​—⁠Yes. 32:​1, 2; Ayib. 10:​24, 25.

Kala ye Ngangu Muna Sola Akundi

13-15. (a) Adieyi diabwila Dina? Adieyi tulongokele? (b) O vanga kikundi ye mpangi zeto Akristu ekuma dinina dia lutaninu?

¹³ Dina, wa mwan’a Yakobo, wayisia mu mpasi mu kuma kia vanga yikundi yambi. Lusansu lwandi lwasonama muna nkanda Etuku lukutusonganga vo, Dina wakalanga ye fu kia vanga kikundi ye wan’amakento a esi Kenani bakala muna zunga kina bazingilanga. Esi Kenani ke bakala ye fu yambote ko nze ina yakala ye selo ya Yave. Lekwa yayingi yankulu isololwanga kw’asatuludi isonganga vo, esi Kenani bayivana mu sambu ya  teke, mavangu ma zumba, sambila kiyakala ye kikento ye nsoki. (Luv. 23:23; Fuka 18:​2-25; Nsi. 18:​9-​12) Badika mfwilu kabaka Dina muna vanga kikundi ye wantu awaya.

¹⁴ Sekeme, ‘wazitiswanga mu nzo es’andi yawonso,’ wa mwisi zunga kiakina, vava kamona Dina, “umbongele, olele yandi, unsafwidi.” (Etu. 34:​1, 2, 19) Ekwe mpila sumbula! Dina kazaya wo ko vo ediadi dilenda kunlwakila. Nanga Dina akundi kaka kayenda kingulanga, ana kabadikilanga vo wantu ambote. Kansi, Dina vuna kayivuna.

¹⁵ Adieyi tulenda longoka muna lusansu lwalu? Tulongokele vo o vanga kikundi ye mindembi kwikila mfwilu ditwasanga. Muna Nkand’a Nzambi tutanganga vo “e yikundi yambi ifwasa fu yambote.” (1 Kor. 15:​33) Kuna diak’esambu, e kikundi y’awana bena yaku lukwikilu lumosi, yo lemvokela nsiku mia nkal’ambote yo zola Yave nze una ovanganga, tanina ditaninanga. Akundi ambote balenda kukasakesa mu vanga edi diangangu.​—⁠Nga. 13:20.

“Nwasukuka”

16. Paulu wa ntumwa adieyi kavova mu kuma ki’akaka muna nkutakani ya Korinto?

¹⁶ E nkutakani y’Akristu isadisanga wantu ayingi mu kuyivelelesa muna mavangu masafu. Vava Paulu wa ntumwa kasoneka nkand’andi antete kwa esi Korinto, wayika e nsobani bavanga Akristu muna mbanza yayi kimana bazingila ngwizani ye nsiku mia Nzambi. Akaka muna yau minta-zumba, asambidi a teke, akala balekanga y’akwau akala, mivi ye nduvu za malavu bakala. Paulu wabavovesa vo: “Kansi kadi nwasukuka.”​—⁠Tanga 1 Korinto 6:​9-11.

17. O zingila ngwizani ye nsiku mia Nkand’a Nzambi aweyi kusobelanga zingu kia wantu ayingi?

¹⁷ O wantu ana bakondelo lukwikilu ke bena ye nsiku ko mikubafilanga. Belandanga nzila za yau kibeni yovo kuyivana muna mavangu ma zumba, nze una wavanganga esi Korinto vitila bakituka Akristu. (Ef. 4:​14) Kansi, o zayi wa Diambu dia Nzambi ye makani mandi uvwidi nkuma wa soba zingu ki’awana belemvokelanga nsiku mia nkand’a Nzambi. (Kol. 3:​5-10; Ayib. 4:​12) Ayingi o unu bena muna nkutakani y’Akristu, balenda kuzayisa e mpila zingu bakala kiau una ke bayantikidi lemvokela nsiku miansongi mia Yave ko. Muna kuma kiaki, ke bakalanga ye kiese ko. Vava kaka bayantika lungana yo nkangu a Nzambi yo zingila ngwizani ye nsiku mia Nkand’a Nzambi, i basolola luvuvamu lwakieleka.

18. Adieyi diabwila mpangi mosi ankento? Ediadi nkia ziku disonganga?

¹⁸ Nswaswani ye wantu awaya, ayingi ana babembola nkutakani y’Akristu owau bekuyibanzanga mu kuma kia nzengo babaka. Mpangi mosi ankento ona tuyikila muna nkumbu a Tanya, wavova vo mu “ludi kasansukila,” kansi vava kalungisa kimbuta kia 16, wabembola nkutakani yo “kuyivana muna nkembo mia nza.” Mimosi muna mfwilu kabaka i yimita lembi wo zola yo katula vumu. Owau edi kavova: “E mvu ntatu yakala kuna mbazi a nkutakani miansisa ye ngindu zambi muna ntima ezi kivilakananga ko. Dimosi ke dikatukanga mu nyindu ko i vumu yakatula. . . . Nzolele zayisa aleke awonso ana bazolele ‘yeleka’ e nza kana nkutu mu fikolo vo: ‘Ke nutezi nkutu  wo vanga ko.’ Kuna lubantiku dilenda moneka vo diambote, kansi e mfoko yambi yikalanga. O land’e nza mpasi kaka ditwasanga. Ntomene wo zaya kadi diakumbwila. Nusikila muna nkubik’a Yave. I muna kaka nulenda vwila zingu kiakiese.”

19, 20. Nkutakani y’Akristu aweyi ikututaninanga?

¹⁹ Yindula una wadi kala zingu kiaku kele vo wabembola nkutakani y’Akristu ina vo i fulu kia luvuvamu. Ayingi ke bezolanga nkutu yindula ko e zingu kiambi banatanga una ke balongokele ludi ko. (Yoa. 6:​68, 69) Kele vo okwamanana vanga kikundi ye mpangi zaku z’akala ye z’akento bena vo Akristu, okala ye luvuvanu yo venga tâtu ye mpasi zimonanga wantu ayingi ova nza iyalwanga kwa Satana. O lungana ye mpangi zaku muna tukutakanu tw’Akristu, dikusungamesa vo diangangu dia lemvokela e nsiku miansongi mia Yave. Okala ye kuma yayingi ya ‘vana matondo kwa Yave muna nkutakani ayingi,’ nze una kavanga ntozi a nkunga.​—⁠Nku. 35:⁠18.

²⁰ Kansi, ezak’e ntangwa diampasi dikalanga kw’Akristu awonso mu sikila ye kwikizi mu kuma kia mambu ma mpila mu mpila mekubabwilanga. Divavanga vo muntu akaka kabasonga edi diambote bafwete vanga. Adieyi ongeye lenda vanga kumosi ye mpangi zawonso muna nkutakani mu sadisa mpangi zeto vava bekalanga mu mpasi? Elongi dilanda disonga una olenda ‘kasakesela yo kumika’ mpangi zaku.​—⁠1 Tes. 5:⁠11.

Nkia Mvutu Ovana?

• Adieyi tulongokele muna nona kia nsoneki a Nkunga 73?

• Adieyi tulongokele muna dina diabwila Dina?

• Ekuma olenda sololwela etininu muna nkutakani y’Akristu?

[Yuvu ya Longoka]

[Foto ina muna lukaya lwa 7]

Siensia vana fulu kiambote ye kia luvuvamu, i sia vo, muna nkutakani