Yuvu Y’atangi

Kele vo mwana wafwa kawutukidi, nga vena ye vuvu kia lufuluku?

Dilenda kala diampasi kw’awana ke bawutidi mwana wafwa ko yovo katukw’e vumu, mu zay’e mpasi za ntima zimonanga ana babwila diambu diadi. O katukw’e vumu yovo wuta mwana wafwa, nkenda kikilu ditwasanga kwa se ye ngudi. Ngudi mosi wafwilwa wana tanu muna vumu, i bosi, wawuta wana wole bena yo vimpi wambote, yamu wau wakinu sungamena wana awaya. Ekolo kezinganga, ozayanga e mvu miadi kala konso mwana wafwila mu vumu, kele vo kawutuka wamoyo. Akristu awaya nga balenda kala ye vuvu vo wan’au ana bawutuka bafwa besinga fuluka?

E mvutu za sazu tulenda vana muna kiuvu kiaki i zazi: Ka tulendi zaya ko. Nkand’a Nzambi ke uvovanga diambu dia lufuluku lwa wana bafwila mu vumu ko yovo lwa vumu yakatuka. Kansi, Nkand’a Nzambi una ye nsiku miamfunu mu kuma kia diambu diadi, emi milenda kutuvana lufiaulwisu.

Yambula twafimpa yuvu yole in’e ngwizani ye diambu diadi. Kiantete, kuna kwa Yave, e zingu kia mwana nkia ntangwa kiyantikanga​—⁠vava kekalanga muna vumu ovo vava kewutukanga? Kiazole, o Yave aweyi kebadikilanga mwana una muna vumu​—⁠nze muntu kibeni ovo nze menga mankatu mena muna vumu kia ngudi? Nkand’a Nzambi uvananga mvutu zakiá za yuvu yole yayi.

Nsiku a Mose utoma kiesesanga vo zingu kia muntu kiyantikanga una nkutu kawutukidi ko. Mu nkia mpila? O nsiku wayikanga vo, kele vo muntu ovondele mwana una muna vumu, yandi mpe kafwete vondwa. Nsiku wavovanga vo, kafwete ‘vana moyo mu moyo.’ * (Luv. 21:​22, 23) Ediadi disonganga vo mwana una muna vumu, muntu amoyo kikilu. O zay’e ludi kiaki disadisanga Akristu ayingi mu venga evangu dia katula vumu yo badikila dio vo esumu diampwena vana meso ma Nzambi.

Wau vo mwana una muna vumu muntu amoyo, aweyi o Yave kebadikilanga moyo wau? Nsiku una tuyikidi kala usonganga vo, avo muntu ovondele mwana una muna vumu, yandi mpe kafwete vondwa. Elo, o moyo a mwana una muna vumu wantalu vana meso ma Nzambi. Vana ntandu, sono yayingi ya Nkand’a Nzambi isonganga vo kuna kwa Yave, mwana una muna vumu, muntu kikilu. Kasikil’owu, Davidi wa Ntinu wavumunwinwa mu vova mu kuma kia Yave vo: “Umfukidi muna vumu kia ngw’ame. . . . O meso maku mambona una kiavangamene ko, e yikwa yame yawonso yasonama muna nkand’aku, e lumbu ina ke yabumbwa ko.”​—⁠Nku. 139:​13-16; Yobi 31:​14, 15.

Kuna kwa Yave, o mwana una muna vumu ovwidi fu, ina kalenda songa kuna sentu. Ekolo Rebeka wa nkaz’a Isaki kakala ye vumu kiakala ye nsimba, Yave wayika ungunza mu kuma kia wana wole banwananga muna vumu. Ediadi diasonga vo Yave wazaya e fu bekala yau eyi isinga moneka kuna sentu.​—⁠Etu. 25:​22, 23; Roma 9:​10-13.

E nona kia Yoane wa Mvubi kiamfunu mpe. Nsangu Zambote zasoneka Luka ziyikanga vo: “O Elisabete vava kaw’e mbianganiswa kamianganisu kwa Maria, o mwan’odukwidi muna vumu kiandi; ozele yo mwand’avelela.” (Luka 1:​41) Vava kayika diambu diadi, Luka wa ngang’a wuka, wasadila mvovo wa Kingerekia ulenda yika mwana una muna vumu yovo wawutuka kala. Mvovo wau umosi kasadila vava kayika Yesu ekolo kalekeswa muna dikilwa kia twelezi.​—⁠Luka 2:​12, 16; 18:⁠15.

Nkand’a Nzambi nga nswaswani usonganga ya mwana una muna vumu ye ndiona  owutukidi? Ve. Ediadi ngwizani dina ye dina divovanga akwa ngangu o unu. Kasikil’owu, akwa ngangu bevovanga vo mwana una muna vumu onikukanga yovo tona maka mambu mevangamanga ku mbazi. Muna kuma kiaki, ka diesivi ko mu mona vo ngudi wayimita okalanga ye kikundi yo mwana una muna vumu.

Kolo kiayingi kiviokanga tuka kina kevangamanga muna vumu kia ngudi, yavana mwana kewutuka. Badika nona eki: Ngudi mosi owutidi mwana walembi lungil’e ngonde, ke vioka lumbu yayingi ko ofwidi. Wakaka, mwana walungisa ngonde vwa, kansi ofwidi una kawutukidi ko. Nga nkento antete lenda kala ye vuvu vo mwan’andi osinga fuluka wau vo wamoyo kawutuka, kana una vo kalungisa ngonde vwa ko? Nga nkento wakaka kalendi kala ye vuvu kiaki ko?

Nkand’a Nzambi utoma kiesesanga vo zingu kia mwana mu vumu kiyantikilanga. Kuna kwa Yave o mwana una muna vumu, muntu kikilu, wantalu vana meso mandi. Muna kuma kia ludi kiaki kia Nkand’a Nzambi, akaka balenda yindula vo ke diansongi ko mu vova vo ke vena ye vuvu kia lufuluku ko mu kuma kia wana bewutukanga bafwa. Balenda yindula vo diambu diadi lukatikisu ditwasanga mu kuma kia umbakuzi weto wa Nkand’a Nzambi usimanga evangu dia katula vumu.

Entete, Eyingidilu diavaikisa yuvu mu kuma kia lufuluku lwa wana befwilanga mu vumu. E yuvu yayi lukatikisu yatwasa mu kuma kia lufuluku lwa wana awaya. Kasikil’owu, muna Paradiso, Nzambi nga osia diaka e menga ma mwana muna vumu kia ngudi? Kansi, muna toma longoka Nkand’a Nzambi yo samba, e Buka kia Selo Yambuta bamwene vo yuvu yayi ke ina mfunu ko mu kuma kia vuvu kia lufuluku. Yesu wavova vo: “Kuna kwa Nzambi, mawonso melendakana.” (Maku 10:​27) Dina diavangama muna Yesu disonganga e ziku kia mvovo miami. O moyo andi wakatulwa kun’ezulu yo filwa muna vumu kia mwenze. Kuna kwa wantu, ediadi ka dilendakana ko.

Nga diadi disonganga vo mun’owu wa Nkand’a Nzambi, wana ana bafwa una ke bawutukidi ko, fuluka besinga fuluka? Tulenda vova ye sikididi kiawonso vo Nkand’a Nzambi ke uvananga mvutu zakiá ko muna kiuvu kiaki. Muna kuma kiaki, wantu ke bafwana vova ko kana wana awaya befuluka yovo lembi fuluka. Diambu diadi dilenda vaikisa yuvu yayingi. Diambote dialembi vova dina ke tutomene zay’e ziku ko. Edi tuzeye i diadi: Yave kaka ozeye e ziku kia diambu diadi, una vo i Nzambi a zola ye walakazi. (Nku. 86:​15) Ka lukatikisu ko, Nzambi una y’etima dia fula ana bafwa. (Yobi 14:​14, 15) Tulenda kala ye vuvu vo mawonso kevanganga mansongi. Okutuwuka muna mpasi zawonso zikutukendelekanga mu nza yayi yambi, vava ketuma Mwan’andi mu ‘fwasa mavangu ma Nkadi Ampemba.’​—⁠1 Yoa. 3:⁠8.

[Mvovo Vana Yand’a lukaya]

[Foto ina muna lukaya lwa 13]

Yave okutuwuka muna mpasi zawonso zikutukendelekanga