“Belandang’o Mwan’ememe”
“Belandang’o Mwan’ememe”
“Awana i yau belandang’o Mwan’ememe konso kuna kekwenda.”—LUS. 14:4.
1. Ekuma alongoki akieleka a Yesu bazindalela kunlanda?
UNA vavioka mvu miole ye ndambu muna salu kiandi, Yesu wayenda ‘longela kuna Kafanau.’ Wau balembi bakula e mvovo miandi, ‘engi mun’alongoki andi bavutuka ku nima, ke bakangala yandi diaka ko.’ Vava Yesu kayuvula antumwa zandi 12 kana vo yau mpe bazolele kwenda, Simone Petelo wavutula vo: “E Mfumu, kwa nani tukwenda? o mambu ma moyo a mvu ya mvu, nge una mau. Oyeto tuvwidi kwikila, tuzeye mpe vo ngeye i Mveledi a Nzambi.” (Yoa. 6:48, 59, 60, 66-69) Alongoki akieleka a Yesu ke bayambula kunlanda ko. Kana nkutu vava bakuswa yo mwand’avelela, bazindalala sakalela wisa kia Yesu.—Mav. 16:7-10.
2. (a) Nani i “ntaudi akwikizi yo lulungalalu,” yovo “selo kiakwikizi”? (b) E ntaudi akwikizi aweyi kesongelanga mbandu ambote ya ‘landa Mwan’ememe’?
2 Adieyi tuvova mu kuma kia Akristu akuswa mu tandu kieto? Muna ungunza wandi mu kuma kia ‘sinsu kia ngiz’andi, ye mbaninu a tandu,’ Yesu wayikila e buka ki’alandi andi akuswa muna mwanda, bena ova ntoto vo “ntaudi akwikizi yo lulungalalu,” yovo “selo kiakwikizi.” (Mat. 24:3, 45; Luka 12:42) Buka kiaki kia ntaudi akwikizi mbandu ambote kisonganga ya ‘landa Mwan’ememe konso kuna kekwenda.’ (Tanga Lusengomono 14:4, 5.) Akristu akuswa bena se mienze muna mwanda, muna lembi kisafula muna malongi ye mavangu ma “Babele Anene,” ina vo i kintwadi kia nsambila zawonso za luvunu ova nza. (Lus. 17:5) “Muna nua miau” ke mwawanuka malongi ma luvunu ko yo “kondwa twangu” mu nza ya Satana. (Yoa. 15:19) Kuna sentu, e nsadiswa y’akuswa in’ova ntoto ‘belanda’ Mwan’ememe kun’ezulu.—Yoa. 13:36.
3. Ekuma tufwete bundila ntaudi akwikizi e vuvu?
3 Yesu wasia ntaudi akwikizi yo lulungalalu e kiyekwa “kia nzo andi,” isia vo, ana bena muna buka kia ntaudi akwikizi, “kabavana madia muna ntangw’andi.” Wasia mpe ntaudi akwikizi kiyekwa “kia salanganu yandi yawonso.” (Mat. 24:45-47) Muna “salanganu” yayi, muna ye “ndong’ayingi” ya “mameme makaka.” (Lus. 7:9; Yoa. 10:16) Akristu akuswa ye “mameme makaka” bafwete bundang’e vuvu muna ntaudi akwikizi ona wasiwa kiyekwa muna yau. Tuna ye kuma yayingi tufwete bundilanga e vuvu muna ntaudi akwikizi yo lulungalalu. Ekuma yole isundidi iyayi: (1) Yave obundanga ntaudi akwikizi e vuvu. (2) Yesu mpe obundanga ntaudi e vuvu. Yambula twafimpa e ziku kisonganga vo Yave wa Nzambi yo Yesu Kristu bebundanga ntaudi akwikizi yo lulungalalu e vuvu.
Yave Obundanga Ntaudi Akwikizi e Vuvu
4. Ekuma tulenda bundila e vuvu muna madia ma mwanda tuvewanga kwa ntaudi akwikizi yo lulungalalu?
4 Badika dina disadisanga ntaudi akwikizi yo lulungalalu mu kutuvana madia ma mwanda muna ntangw’andi. Yave wavova vo: “Ikulonga yo kusonga nzil’okwenda, ikulongesela, yo kusia meso.” (Nku. 32:8) Kieleka, Yave ofilanga ntaudi akwikizi. Muna kuma kiaki, tulenda bunda e vuvu muna umbakuzi yo zayi ye luludiku lwa Nkand’a Nzambi tuvewanga kwa ntaudi akwikizi.
5. Nki kisonganga vo mwand’a Nzambi ufilanga ntaudi akwikizi?
5 Yave ovananga mpe mwand’andi avelela kwa ntaudi akwikizi. Kanele vo mwand’a Yave ke umonekanga ko, mana uvanganga mun’awana befilwanga kwa mwanda wau memonekanga. Yindula e salu kisalanga ntaudi akwikizi yo lulungalalu kia sia umbangi mu nza yawonso mu kuma kia Yave wa Nzambi, Mwan’andi ye Kintinu. Asambidi a Yave besamunanga nsangu za Kintinu y’etima diawonso muna vioka 230 ma nsi ye sanga. Nga diadi ke disonganga ko vo Mwand’a Nzambi ufilanga ntaudi akwikizi? (Tanga Mavangu 1:8.) Ntaudi akwikizi osikidisanga yo kubika madia ma mwanda yo vana mo muna ntangw’andi kwa nkangu a Yave mu nza yawonso. Vava kesalanga e salu kiaki, ntaudi akwikizi osonganga zola, lembama ye mbongo yakaka ya mwanda.—Ngal. 5:22, 23.
6, 7. Yave nkia tezo kebundilanga ntaudi akwikizi e vuvu?
6 Muna zaya e tezo kin’o Yave kebundilang’e vuvu muna ntaudi akwikizi, badika nsilu kasila Akristu akuswa. Paulu wa ntumwa wasoneka vo: ‘Vava kivova mpungi, o mafwa mefulwa, ke malendi wola diaka ko, oyeto mpe kitulwa tukitulwa. Okala vo kadi, e wolezia kiaki kiavwat’owu ulembi wola, o mfwe mpe wau wavwat’owu ulembi fwa.’ (1 Kor. 15:52, 53) Alandi akuswa a Kristu, ana besadilanga Nzambi ye kwikizi kiawonso yo fwa muna nitu a kimuntu, befulwanga ye nitu a kimwanda yo vwa moyo a mvu ya mvu. Moyo ulembi fwa bevewanga, isia vo, una ke ulendi fwaswa ko. Vana ntandu, betambula nitu ilembi wola, i sia vo, ke bevava diaka lusadisu lwakaka ko muna zinga. Muna Lusengomono 4:4, awana bafulukidi kala beyikilwanga nze yau bavwende vana kunda ye kolowa za wolo vana ntu miau. Akristu akuswa betambula nkembo a kintinu. Kansi vena diaka ye ziku kiakaka kisonganga vo Yave obundanga ntaudi akwikizi e vuvu.
7 Muna Lusengomono 19:7, 8 tutanganga vo: “O sompa kwa Mwan’ememe kulueke, o nkaz’andi wiyikubikidi. Oveno wo, owu wa vwat’o nlele a lino, wakengomoka yo velela: kadi o nlele a lino i mavangu ma ndungidi m’aveledi.” Yave wasola Akristu akuswa mu kala ndumb’a Mwan’andi. Nitu ilembi wola yo moyo ulembi fwa, ye kintinu, yo ‘sompwa kwa Mwan’ememe,’ i nsendo betambula Akristu akuswa. Ekiaki i ziku kisonganga vo Nzambi obundanga akuswa e vuvu, ana “belandang’o Mwan’ememe konso kuna kekwenda.”
Yesu Obundanga Ntaudi Akwikizi e Vuvu
8. Yesu aweyi kasongela vo vuvu kesianga kw’alandi andi akuswa?
8 Nkia ziku kisonganga vo Yesu obundanga vuvu muna alandi andi akuswa muna mwanda? Muna fuku wansuka wa zingu kiandi ova ntoto, Yesu wasia nsilu kwa ntumwa zandi 11 za kwikizi. Wabavovesa vo: “I yeno yaya nunzizididi muna mpukumunwa zame; omono inuyekele e kintinu, kontwa kw’Es’ame wangyeka, nwadia nwanua kuna meza mame muna kintinu kiame; nwavwanda vana kunda, nwafundis’o makanda kumi ye zole ma Isaele.” (Luka 22:28-30) Awonso, 144.000 ma Akristu akuswa bena mun’ekangu kakanga o Yesu ye ntumwa zandi 11. (Luka 12:32; Lus. 5:9, 10; 14:1) Nga Yesu wadi kanga ekangu dia yala yau muna Kintinu kele vo ke kubasianga vuvu ko?
9. Ayeyi i ‘salanganu ya Kristu’?
9 Vana ntandu, Yesu Kristu wasia ntaudi akwikizi yo lulungalalu kiyekwa kia “salanganu yandi yawonso,” i sia vo, mawonso ma Kintinu ova ntoto. (Mat. 24:47) Eyaka muna salanganu yayi i vula dia sina ye mavula ma Mbangi za Yave muna nsi zakaka, Maseka ma Kintinu, Maseka ma Lukutakanu Lwampwena mu nz’amvimba kumosi ye salu kia samun’e nsangu za Kintinu ye kia kitula wantu s’alongoki. Ke vena muntu ko lenda vana kiyekwa kia lunga-lunga lekwa yandi yantalu kwa muntu kalembi bundang’e vuvu.
10. Nki kisonganga vo Yesu Kristu okalanga ye alandi andi akuswa?
10 Una katombokele ko kun’ezulu, Yesu ona wafulwa wamoneka kw’alongoki andi akwikizi yo kubasila o nsilu. Wabavovesa vo: “Tala, ngina yeno e lumbu yawonso, yakuna nsuk’a tandu.” (Mat. 28:20) Nga Yesu olungisanga nsilu wau? Muna mvu 15 miviokele, e lutangu lwa nkutakani za Mbangi za Yave mu nza yawonso luwokele. Mu mvu miviokele, tezo kia 70.000 ma nkutakani zakala, owau se 100.000. Adieyi tuvova mu kuma kia wokela kw’alongoki ampa? Muna mvu 15 miami, tezo kia mazunda mayá ye ndambu m’alongoki bavubwa, i sia vo, vioka 800 za wantu bevubwanga konso lumbu. O wokela kwaku i ziku kisonganga vo Kristu ofilanga alandi andi akuswa muna nkutakani zau yo kubasadisa muna salu kiau kia kitula wantu s’alongoki.
Ntaudi Akwikizi yo Lulungalalu
11, 12. E ntaudi aweyi kesongelanga vo nkwa kwikizi yo lulungalalu?
11 Wau vo Yave wa Nzambi yo Yesu Kristu bebundanga e vuvu muna ntaudi akwikizi yo lulungalalu, nga ke wau ko mpe tufwete vanga oyeto? E ntaudi osonganga vo nkwa kwikizi kadi osalanga e salu kavewa. Kasikil’owu, tuka kiayantikila vaikiswa Eyingidilu se mvu 130 miviokele kala. Tukutakanu twakete ye twampwena twa Mbangi za Yave twakinu kutukumika muna mwanda.
12 E ntaudi akwikizi wa lungalala mpe wau kezayanga e tezo kiandi, ke vitanga Yave ku ntwala ko ngatu sala manima vava Nzambi kesengomonanga mambu. Kasikil’owu, ekolo afidi a nsambila za luvunu bezimanga o meso yovo yambulwila mavangu mambi, ntaudi akwikizi olukisanga wantu mu kuma kia vonza kia kuyisia mu mavangu mambi ma nza ya Satana. E ntaudi akwikizi ovananga luludiku lwamfunu muna ntangw’andi wau vo una ye nsambu za Yave wa Nzambi yo Yesu Kristu. Muna kuma kiaki tufwete kumbunda kikilu e vuvu. Aweyi tulenda songela vo vuvu kieleka tusianga muna ntaudi akwikizi yo lulungalalu?
‘Twenda Kumosi’ Y’akuswa Ekolo Belandanga Mwan’ememe
13. Aweyi tulenda bundila e vuvu muna ntaudi akwikizi yo lulungalalu nze una wasonama muna ungunza wa Zakariya?
13 O nkanda Zakariya uyikanga “wantu kumi” ana bafinama “Nyuda” yo vova vo: “Kwenda tukwenda yeno.” (Tanga Zakariya 8:23.) Wau vo o “Nyuda” wayikilwa vo “yeno,” ediadi disonganga vo ke muntu mosi ko, kansi buka kia wantu. Mu tandu kieto, o Nyuda i nsadiswa Akristu akuswa muna mwanda, i sia vo, ndambu a “Isaele a Nzambi.” (Ngal. 6:16). O “wantu kumi muna ndinga zawonso za zula” i ndong’ayingi ya mameme makaka. Nze una Akristu akuswa belandilanga Yesu konso kuna kekwenda, e ndong’ayingi ‘bekwendanga kumosi’ ye ntaudi akwikizi yo lulungalalu. E ndong’ayingi ke bafwete monanga nsoni ko za kangala kumosi ye ‘awana bena ye kunku muna nsum’ezulu.’ (Ayib. 3:1) Yesu ke monanga nsoni ko za yikila akuswa vo “abunzi.”—Ayib. 2:11.
14. Aweyi tulenda sadisila mpangi za Kristu?
14 Yesu obadikilanga lusadisu luvanwanga kw’abunzi andi nze kwa yandi luvewanga. (Tanga Matai 25:40.) Awana bena ye vuvu kia zingila ova ntoto, nkia mpila balenda sadisila mpangi za Kristu zakuswa muna mwanda? Imosi muna mpila balenda kubasadisila i kubayikama muna salu kia samuna nsangu za Kintinu. (Mat. 24:14; Yoa. 14:12) Ekolo lutangu lw’Akristu akuswa lukulukanga, olu lwa mameme makaka mu wokela kaka lwina. Vava awana bena ye vuvu kia zingila ova ntoto beyikamanga e salu kia umbangi, yo kuyivana ezak’e ntangwa muna salu kia ntangwa ke ntangwa, besadisanga Akristu akuswa mu lungisa salu kiau kia kitula wantu s’alongoki. (Mat. 28:19, 20) Eyaka mpila beyikamenanga salu kiaki i vananga tukau.
15. Aweyi Akristu bafwete badikila madia ma mwanda tuvewanga ye nzengo zibakanga ntaudi akwikizi?
15 Aweyi Akristu bebadikilanga madia ma mwanda kevananga ntaudi akwikizi muna nkanda misadisanga mu bakula Nkand’a Nzambi ye muna tukutakanu tw’Akristu? Nga tulongokanga mio yo sadila mo vana vau? Aweyi tubadikilanga nzengo zibakanga ntaudi akwikizi za mpila ifwete vangilwa mambu? Vava tulemvokelanga luludiku tuvewanga kwa ntaudi akwikizi, tusonganga lukwikilu lweto muna mpila ina o Yave kekutufidilanga.—Yak. 3:17.
16. Ekuma Akristu awonso bafwete wila mpangi za Kristu?
16 Yesu wavova vo: “Omame mameme mewanga nding’ame, omono nzeye mo, mekundandanga.” (Yoa. 10:27) I diau bevanganga Akristu akuswa. Adieyi tuvova mu kuma ki’awana ‘bekwendanga’ yau kumosi? Yau mpe bafwete wanga nding’a Yesu. Bafwete mpe wilang’e mpangi zandi. Bafwete wo vanga kadi yau bavewa e kiyekwa kia lunga-lunga nkangu a Nzambi. Aweyi tulenda songela vo tuwilanga mpangi za Kristu?
17. Aweyi tulenda songela vo tuwilanga ntaudi akwikizi?
17 O unu, e ntaudi akwikizi yo lulungalalu osunzulwanga kwa Buka kia Selo Yambuta, ana bevitang’o ntu yo sikidisa e salu kia samun’e nsangu zambote za Kintinu omu nza yawonso. Ampangi bena muna Buka kia Selo Yambuta, akuluntu azikuka akuswa muna mwanda. Bafwana yikilwa vo ‘awana bena ye wisa’ muna yeto. (Ayib. 13:7) Muna lunga-lunga tezo kia 7.000.000 m’ateleki a Kintinu bena muna tezo kia 100.000 ma nkutakani, akuluntu awaya akuswa ‘salu kiayingi bena kiau muna Mfumu.’ (1 Kor. 15:58) Tulenda songa vo tuwilanga ntaudi akwikizi, muna lemvokelanga luludiku lwa Buka kia Selo Yambuta.
Awana Bewilanga Ntaudi Akwikizi Besambulwa
18, 19. (a) Nkia nsambu bevwa awana bewilanga ntaudi akwikizi yo lulungalalu? (b) Adieyi tufwete kwamanana vanga?
18 Tuka kavaninwa kiyekwa, ntaudi akwikizi yo lulungalalu ‘ovilulanga ayingi yamuna unsongi.’ (Dan. 12:3) Akaka muna yau i awana bena ye vuvu kia sala yo moyo vava kifwaswa e nza yayi yambi. Ekwe nsambu za kala ye ngwizani ambote yo Nzambi!
19 Kuna sentu, vava ‘mbanz’avauka, Yerusaleme ampa [144.000], ikulumuka kun’ezulu tuka kwa Nzambi, yakubama nze ndumba yaviengela mu nkaz’andi,’ aweyi ukala e zingu ki’awana bewilanga ntaudi akwikizi? Muna Nkand’a Nzambi tutanganga vo: ‘Nzambi yandi kibeni okala yau, se Nzambi au. Okunguna mansanga mawonso muna meso mau; o lufwa, ke lukala diaka ko; musungula kala diaka dilu, yovo kazu, ngatu mpasi: oma mantete maviokele.’ (Lus. 21:2-4) Muna kuma kiaki, yambula twawilanga Kristu ye mpangi zandi zakuswa ana kebundang’e vuvu.
Adieyi Olongokele?
• Nkia ziku kisonganga vo Yave obundanga ntaudi akwikizi yo lulungalalu e vuvu?
• Adieyi disonganga vo Yesu Kristu osianga ntaudi akwikizi e vuvu?
• Ekuma tufwete sila selo kia kwikizi e vuvu?
• Aweyi tusongelanga vo vuvu tusianga muna ntaudi akwikizi?
[Yuvu ya Longoka]
[Foto ina muna lukaya lwa 25]
Ng’ozeye nani kasola o Yave mu kala ndumb’a Mwan’andi?
[Mafoto zina muna lukaya lwa 26]
Yesu Kristu wasia ntaudi akwikizi yo lulungalalu e kiyekwa kia “salanganu” yandi
[Foto ina muna lukaya lwa 27]
Tusadisanga Akristu akuswa vava tuyikamanga e salu kia umbangi