Yuvu Y’atangi

Muna Nekemiya 8:​10, Ayuda bavoveswa vo ‘badia mazi,’ kansi o Nsiku wasonama muna Fuka 3:17 uvovanga vo: ‘Ke nudie mazi ko.’ Nkia ngwizani ina vana vena sono yayi?

Muna ndinga Kiyibere, e mvovo wasekolwa vo “mazi” muna Nekemiya 8:10 ye una wa Fuka 3:17 nswaswani mina. E mvovo wa Kiyebere cheʹlev, wasekolwa vo mazi muna Fuka 3:​17, mazi ma bulu yovo ma wantu uyikanga. (Fuka 3:3; Afu. 3:​22) E sono yivitidi eki kia 17 isonganga vo Aneyisaele ke bafwete dia mazi makati ko yovo mana mafukanga nguba za bulu yakelwanga kimenga ngatu dia mazi ma luketo, e kuma kadi “o mazi mawonso ma Yave.” (Fuka 3:​14-​16) Muna kuma kiaki, e mazi ke mafwete diwa ko i mazi ma bulu yavewanga se lukau kwa Yave.

Kuna diak’e sambu, e mvovo wasekolwa vo “mazi” muna Nekemiya 8:10 mash·man·nimʹ. Mvovo wau mu tini kiaki kaka wasonama muna Sono ya Kiyibere. Mu mvovo sha·menʹ  watuka, una ye nsasa vo “kala wavonga.” E mvovo wa sina wasadilwa mu sono kiaki ulenda yika wete yovo nkal’ambote. (Tezanesa ye Yesaya 25:⁠6.) O mvovo utoma sadilwanga, mu mvovo sheʹmen wabongelwa, usekolwanga nkumbu miayingi vo “mazi ma olive.” (Nsi. 8:8; Fuka 24:⁠2) Muna Nekemiya 8:​10, e mvovo mash·man·nimʹ  nanga madia malambilwa mu mazi mayingi. Madia mama malenda kala vo nsuni a mbizi una ye fimazi, kansi ke tini kia mazi ma bulu ko.

Kana una vo Aneyisaele bakanikinwa balembi dia tini ya mazi ma bulu, ke basimwanga dia madia mantomi ko. Emaka madia nze mbolo yanzenzi yavangilwa mu mfumfu a masa, ke zalambilwanga mu mazi ma bulu ko, kansi ezak’e ntangwa mu mazi ma olive. (Fuka 2:⁠7) Muna kuma kiaki, o nkanda Estudo Perspicaz das Escrituras usonganga vo e “mazi” meyikwanga mu sono kiaki “lekwa yambote meyikanga, ke lekwa yatanda ko yovo yayuma, kansi madia manzenzo kumosi ye madia malambilwa mu mazi ma lekwa ya mpata-nsengo.”

Akristu bafwete sungamena vo nkanikinu wa lembi dia mazi mu Nsiku wakala. Akristu ke bena kunsi a Nsiku ko, kumosi ye nkanikinu mu kuma kia yimenga ya bulu.​—⁠Roma 3:20; 7:​4, 6; 10:4; Kol. 2:​16, 17.