Yuvu Y’atangi

Paulu wa ntumwa wavova vo ‘Isaele yawonso bevuluzwa.’ (Roma 11:​26) Nga edi kazola vova vo Ayuda awonso bekituka Akristu?

Ve, ke diau ko kazola vova Paulu. Ndonga muna mbongo a Abarayama babembola Yesu wa Masia. Muna mvu mialandila lufwa lwa Yesu, e ziku kiatoma moneka vo ke Ayuda awonso ko bakituka Akristu. Kana una vo i wau, dina kavova o Paulu vo ‘Isaele yawonso bevuluzwa’ dialudi. Mu nkia mpila?

Yesu wavovesa afidi a nsambil’a Kiyuda a lumbu yandi vo: “E kintinu kia Nzambi kikatulwa kwa yeno, kiavanwa kwa zula kiyima mbongo andi.” (Mat. 21:​43) Wau vo e zula kia Isaele kiabembola Yesu, Yave wasola zula kiampa, kia wantu ana bekuswa muna mwanda. Paulu wayikila zula kiaki vo “Isaele a Nzambi.”​—⁠Ngal. 6:⁠16.

Tini yakaka ya Sono ya Kingerekia ya Kikristu isonganga vo 144.000 m’Akristu akuswa bena muna buka kia “Isaele a Nzambi.” (Roma 8:​15-17; Lus. 7:⁠4) E sono kia Lusengomono 5:​9, 10 kisonganga vo awana bena vo ke Ayuda ko bekala mpe muna buka kiaki, kadi kiyikanga vo Akristu akuswa betuka “muna makanda mawonso, ye ndinga, ye nsi, ye zula.” Ana bena muna Isaele ya mwanda basolwa mu kituka “se kintinu ye nganga . . . , beyal’ova nza.” Kana una vo Yave wabembola e zula kia Isaele kina kasola, akaka muna yau balenda kwau kala ye ngwizani ambote yo yandi. I diau bavanga antumwa ye Akristu akaka muna tandu kiantete. Kansi, nze dina divangamanga kwa wantu akaka, Ayuda awaya bafwete sumbilwa muna menga ma Yesu Kristu.​—⁠1 Tim. 2:​5, 6; Ayib. 2:9; 1 Pet. 1:​17-19.

Kanele vo Ayuda ayingi muna tandu kiantete bavidisa elau dia yala kumosi yo Yesu, ekani dia Nzambi ke diasoba ko. Ediadi ke dilendi vangama ko, kadi muna ngunz’andi Yave wavova vo: “I una diambu diame divaika mu nu’ame: ke dikumputukila nkatu ko, divanga kaka edi nzolele, disikila mun’edi ntwikidi dio.”​—⁠Yes. 55:⁠11.

Ekani dia Nzambi dia sola 144.000 ma wantu mu kwenda yala kumosi yo Mwan’andi kun’ezulu dilungana. O Nkand’a Nzambi usonganga e ziku vo Nzambi olungisa lutangu lwawonso lwa 144.000 m’awana bekuswa muna mwanda. Ke vekondwa mosi ko.​—⁠Lus. 14:​1-5.

Muna kuma kiaki, vava Paulu kasoneka vo ‘Isaele yawonso bevuluzwa,’ kayika ko vo Ayuda awonso bekituka Akristu. Edi kazola vova vo, ekani dia Nzambi dia sola 144.000 ma Aneyisaele a mwanda mu kwenda yala yo Mwan’Andi Yesu Kristu kun’ezulu, dilungana. Muna ntangwa kasikidisa o Nzambi, lutangu lwawonso, i sia vo, “Isaele awonso” bevuluzwa mu kwenda yala nze atinu ye nganga muna Kintinu kia Masia.​—⁠Ef. 2:⁠8.

[Mafoto zina muna lukaya lwa 28]

Akristu akuswa ‘mu makanda mawonso, ye ndinga, ye nsi, ye zula’ betuka