Vava o yakala yo nkento betatidilanga o nsilu basilana muna longo, bemwenanga e kangu diau vo diakwele mvu. Ediadi luvuvamu ditwasanga kwa akazi. Bebundanga e vuvu vo konso muntu muna yau ozitisa e kangu dia longo kana nkutu bawananene ye mambu mampasi.

Akazi akaka bekwamanananga zinga entwadi mu kuma kia sia vo komekenua bekomekenuanga kwa yitu ye akundi au. Kansi, diambote akazi bazinga entwadi mu kuma kia zola yo luzitu bena lwau muna muntu yo nkwandi.

DINA BIBILA KIVOVANGA: “O yakala kafwete yambula nkaz’andi ko.”—1 Korinto 7:11.

“Avo ozitisanga o nsilu wasia muna longo lwaku, kufunga makasi mu nzaki-nzaki ko, diasazu mpe dikala mu vilakana yo loloka e mbi ovangilu. O mambu mebwa muna longo mekala kaka nze finkaku kuna kwa ngeye, kansi ke mekufila ko mu vonda o longo.”—Micah.

Avo akazi ke bezitisanga nsilu basilana ko, vava vebwanga e diambu kana nkutu diakete kaka, vana vau beyindulanga: ‘Nanga o muntu yasola ke yandi ko umfwanukini.’ I bosi, bevavanga e vakuba kimana bavonda o longo.

“Wantu ayingi bekazalanga ye ngindu za sia vo ‘avo mambu ke masikidi ko muna longo, mfwete lo vonda.’ Vava o muntu kekazalanga ye ngindu za vonda o longo, muntu ndioyo ke lendanga zitisa ko o nsilu kasia muna longo.”—Jean.

UKIYUVULA:

Vava vebwanga e ntantani . . .

• Nga okuyibazanga wau wakazala yo yakala yovo nkento aku?

• Nga oyindulanga una wadi kala o longo lwaku kele vo wakazala yo muntu ankaka?

• Nga oyikanga e mvovo nze, “kwa mono imene!” yovo “mfwete vava muntu ankaka ona okunzitisa”?

Avo ovovele vo elo mu kiuvu kimosi yovo yole muna yuvu yayi, disongele vo ofwete kumika diaka e kangu dia longo lwaku.

MOKENA YO NKAZ’AKU

• Nga e ngwizani eto muna longo iyantikidi kuluka? Avo iwau, vava zaya e kuma?

• Adieyi tufwete vanga muna kumika e ngwizani eto muna longo?

LUSADISU

• Ezak’e ntangwa sonekenanga o nkento yovo yakala diaku e mensagem mia nzola

• Songa vo wakinu zitisa o nsilu nuasilana muna sia e foto ya nkento yovo yakala diaku vana meza maku ma salu

• Lumbu yawonso bokelanga o nkento yovo yakala diaku muna telefone, avo ku salu wina yovo ku fulu kiankaka

DINA BIBILA KIVOVANGA: “Kina kiayikakeswa kwa Nzambi, o muntu kavambanisa ko.”—Matai 19:6.