Esi Nzo ke Bezitisanga Diaka Muntu yo Nkwandi Ko

WINIKINA MU

EKUMA ESI NZO BAFWETE ZITISILANGA MUNTU YO NKWANDI?

Vava esi nzo bezitisanga muntu yo nkwandi, yau awonso muna nzo mu luvuvamu bekalanga.

O nkanda Sete Princípios para o Casamento Dar Certo uvovanga vo, vava yakala yo nkento bezitisanga muntu yo nkwandi, besongaziananga o zola “ke mu mambu manene kaka ko, kansi yamuna mambu makete ma lumbu ke lumbu.”
Lufimpu lumosi lusonganga vo o wana ana balongoka zitisa akaka, bekuyimwenanga vo mfunu bena, bekalanga ye ngwizani ambote ye mase mau ye ke bekalanga ye ntokani zayingi ko.

AWEYI OLENDA ZITISILA AKAKA MUNA NZO?

Sikidisa makani mana nufwete lungisa muna nzo. Entete, vava zaya kana vo awonso muna nzo bebakulanga o mfunu wa songa “luzitu.” Dianzole, soneka e fu ina bafwete songanga awonso muna nzo ye ina bafwete venga. Diantatu, mokena ye esi nzo aku muna zaya dina konso muntu kafwete vanga muna zitisanga akaka.

“E makani ma nkwa fululu nluta metwasanga.”—Ngana 21:5.

Songanga mbandu ambote. Nga yitu yaku ovovelanga e mbi mu kuma kia mpilakanu zau? Nga ngindu zau ovezanga yovo kubazenga e mvovo ekolo bemokenanga yaku?

Dina ofwete vanga: Songanga luzitu kwa nkaz’aku ye kwa wan’aku, kiakala vo lubafwanukini yovo ve.

“Nuvitanga o ntu muna zitisa muntu yo nkwandi.”—Roma 12:10.

Zitisanga akaka kana nkutu vo kutondele ngindu zau ko. Vava omokenanga ye akaka, venga e mvovo emi: “Ongeye ntangwa zawonso” yovo “ongeye kuvanganga diambu kingandi ko.” E mvovo miami milenda lweka yovo kendeleka esi nzo aku ye milenda kitula e diambu dia fioti se diambu dianene.

“E mvutu za malembe nganzi zilembekanga, kansi, e mvovo milwekanga makasi misakisanga.”—Ngana 15:1.

DINA MBANGI ZA YAVE BEVANGANGA

Mbangi za Yave bekasakesanga esi nzo bazitisanga muntu yo nkwandi. Nkumbu miayingi bevovelanga e diambu diadi muna malongi, muna nkanda ye video zina bevaikisanga yo kayanesa mu ngovo.

KUNA KWA AWANA BASOMPA: Malongi mevaikiswanga vana kunku, Ajuda para a Família, malenda sadisa yakala yo nkento mu . . .

toma winikinanga
venga e fu kia yambula mokena
yambula ntantani

(Ziula vana, “Ajuda para a Família” muna jw.org)

KWA MASE: Malongi mevaikiswanga vana kunku, Ajuda para a Família, malenda sadisa mase mu longa wan’au mu . . .

songanga o nlemvo
salanga e salu ya nzo
vovanga vo, “dodokolo” ye “ntondele”

(Ziula vana, “Sansa Wana” ye “Criar adolescentes” muna jw.org)

Tala mpe Apêndice, “Os pais perguntam” muna nkanda Os Jovens Perguntam—Respostas Práticas, Volume 1. (Vavulula o ntu a diambu, “Os pais perguntam” muna jw.org)

KWA ALEKE: Vana kunku, Aleke yo Matoko vena ye malongi ye vídeo zilenda sadisa aleke mu . . .

kadilanga mu mpila yambote yo mase ye akwau muna nzo
mokenanga kuna luzitu yo mase mu kuma kia nsiku
bundwa e vuvu kwa mase

(Vavulula o ntu a diambu “Aleke yo Matoko” muna jw.org)

Ke divavanga ko wafuta e nzimbu muna sadila e nzil’eto jw.org. Ke divavanga mpe ko vo wakisonekesa ngatu lombwa vo wasoneka nkumbu aku, lumbu kina wawutuka, mvu ye fulu kina ozingilanga.

SIKAMA!