AVO ngeye yovo yitu kiaku wabakama kala kimbevo kiangolo, ka lukatikisu ko vo ozeye e ntokani ditwasanga. Vana ntandu a mpasi za mayela, olenda lwakilwa kwa ngindu zayingi. O wonga ye ntokani zilenda wokela mu kuma kia zaya vo ofwete kwendanga nkumbu miayingi kwa dotolo, kondwa kwa nzimbu za sumbila e nlongo, nkakalakani za solola mawuku mambote ye mpasi za nua e nlongo. Kimbevo kiangolo kilenda twasa ntokani zayingi.

Akweyi tulenda sololwela lusadisu? Ayingi bevovanga vo edi ditoma kubasadisanga i samba kwa Nzambi yo tanga sono ya lufiaulwisu ina muna Nkand’a Nzambi. E diambu diankaka dilenda sadisa i zola ye lufiaulwisu lwa yitu ye akundi.

Robert una ye kimbuta kia mvu 58 wavova vo: “Vava onuananga ye mpasi za mayela, kala ye lukwikilu vo Nzambi okusadisa mu zizidila e mpasi. Sambanga kwa Yave yo kunzayisa e ntokani zaku. Unlomba mwand’avelela. Unlomba kasadisa kimana wakasakesanga yitu yaku yo kala ye luvuvamu lwa ntima.”

Robert wakudikila vo: “Lusadisu ye lukasakeso lwa yitu mfunu kikilu lwina. E lumbu yawonso tezo kia wantu wole bekumbokelanga muna telefone mu kungiuvula vo: ‘Una kiambote?’ Ikasakeswanga mpe kwa akundi ame bezingilanga mu fulu yayingi. Bekunsadisanga mu lembi vidisa e kiese kiame. Ediadi dikunsadisanga mu zizidila e mpasi.”

Adieyi olenda vanga avo nkundi aku una vo mbevo ozolele kwenda kingula? Tala e ngindu zambote kasonga o Linda: “Ambevo bezolanga vo bakala ye mpil’a zingu kina wantu ankaka bena kiau. Muna kuma kiaki, ke ntangwa zawonso ko bezolanga vovela oma ma kimbevo kiau. Ozevo, nulenda vovela e mambu mana numokenanga kala.”

Muna ngolo za Nzambi ye muna lufiaulwisu lwa Nkand’a Nzambi, kumosi ye lusadisu lwa yitu ye akundi, tulenda kwamanana badikilanga e zingu vo mfunu kikilu kina, kana nkutu vava tunuananga ye kimbevo kiangolo.