Yesu wasonga una tulenda zayila vo “Kintinu kia Nzambi kifinamene.” (Luka 21:31) Wasakula vo, vekala ye vita zampwena, nzakama za ntoto, mvengele ye vuku. Tumonanga mambu mama mawonso mevangamanga o unu.—Luka 21:10-17.

Vana ntandu, e Bibila kisonganga vo e “lumbu yambaninu” ya luyalu lwa wantu, izayakana muna kadilu kia wantu, i sia vo, kadilu kiambi. Olenda tanga e diambu diadi muna 2 Timoteo 3:1-5. Vava omonanga e fu ye mavangu ma wantu o unu, kalukatikisu ko vo okwikilanga vo ungunza wau wa Bibila ngwizani wina ye mana mevangamanga o unu.

Ediadi aweyi disongele? Disongele vo ke kolo ko Kintinu kia Nzambi kivanga nsobani zampwena zitomesa e zingu kia wantu ova ntoto. (Luka 21:36) Muna Bibila, Nzambi wasia nsilu vo ovanga mambu mambote ova ntoto ye kwa awana bezingila vo. Tala maka mambu kevanga.

“Oveno e wisa, nkembo ye kintinu mpasi vo nkangu, zula ye ndinga zawonso zansadila. E kintinu kiandi i kintinu kiakwele mvu, ke kisuka ko, e kintinu kiandi ke kifwaswa ko.”—DANIELE 7:14.

Ediadi aweyi disongele? Disongele vo olenda kala ye zingu kiakiese kuna nsi a wisa kia luyalu lusundidi mu nza yawonso luna Nzambi kasikidisa, o Mwan’andi i Ntinu muna luyalu lwalu.

“Ana bezingila mo, ke mosi ko ovova vo: ‘Yayela ngina.’”—YESAYA 33:24.

Ediadi aweyi disongele? Disongele vo kuyela diaka ko, ozinga yakwele mvu lembi fwa.

“Osukisanga e vita muna nza yawonso.”—NKUNGA 46:9.

Ediadi aweyi disongele? Disongele vo ke vekala diaka vita ko ye mawonso metwasanga e mpasi.

“Yimpumbulu ke bekala diaka ko . . . Alembami bevua nza.”—NKUNGA 37:10, 11.

Ediadi aweyi disongele? Disongele vo ke vekala diaka wantu ambi ko, awana kaka belemvokelanga Nzambi bekala mo.

“Betunga nzo yo zingila mo, bekuna mpatu za vinyu yo dia e bundu yau.”—YESAYA 65:21, 22.

Ediadi aweyi disongele? Disongele vo ntoto ukituka se fulu kiambote. Nzambi ovana e mvutu za sambu kieto vo, luzolo lwandi lwavangama “ova ntoto.”—Matai 6:10.