O NSIKU a Mose wavananga e lau kwa wantu mu sia nsilu muna vova nze: “ndidi e ndofi muna Yave.” yovo “ndidi e ndofi muna nkumbu a Nzambi.” Kansi, muna lumbu ya Yesu, e fu kia dia ndofi kiasayana kikilu. Ayuda badianga ndofi muna konso diambu bavovanga. Bavanganga wo mu songa kwa wantu vo mana bavovanga maludi. Kansi, Yesu nkumbu miole katumba e fu kiaki. Wavova vo: “Yambula e mpov’eno ‘Elo’ yakala elo, ‘Ve,’ ve.”​—Matai 5:33-37; 23:16-22.

Mun’owu wa Dicionário Teológico do Novo Testamento, o nkanda Talmud ukutusadisanga mu zaya una e fu kia dia ndofi kiasayanena kwa Ayuda mu songa vo dina bavovele dialudi. Ediadi diavangamanga kadi o nkanda Talmud wasasilanga e ndofi zina ke zifwete kululwa ko ye zina zilenda kululwa.

Ke Yesu kaka ko watumba e vangu diadi diambi. Kasikil’owu, Flavio Josefo wa nsoneki a lusansu lwa Kiyuda, wayika buka kimosi kia Ayuda ana ke badianga ndofi ko. Kuna kwa esi buka kiaki, ndiona odidi e ndofi osundidi o bi ke mu ndiona ovunini ko. Bamonanga vo avo muntu odidi e ndofi kimana wantu bakwikilanga muna mvovo miandi, disongele vo muntu ndioyu nkwa luvunu. Nkanda umosi wa Kiyuda (Wisdom of Sirach) uvovanga vo: “O muntu una ye fu kia dia ndofi kimpumbulu kikilu.” Yesu wasima e fu kia dia ndofi muna mambu makondwa o mfunu. Avo ludi tuvovanga, ke dina mfunu ko mu dia ndofi kimana wantu bakwikila mana tuvovanga.