Na manima ya kusema bakala mpe nketo, Nzambi kuedisaka bau. Yandi salaka dikuela samu yavuanda nguizani mosi ya spesiale kati na bakala mpe nketo, mpe yau zolaka sala ti dikuela vuanda kisika mosi ya mbote samu na bau mpe bana na bau na bilumbu kena kuiza.—Kuyantika 1:27, 28; 2:18.

 Nzambi zola bankuelani vuanda na kiese. (Bingana 5:18) Na Biblia, yandi mepesa bansikudukusu samu na dikuela mpe bansikudukusu yina lenda sala ti dikuela nunga.

Na disolo yayi

•  Yinki bansikudukusu Nzambi mepesa samu na dikuela?

•  Yinki Biblia metuba samu na kuvambana mpe kufua dikuela?

•  Dikuela fueti sonama na Leta samu Nzambi ndima yau?

•  Yinki biyekua Biblia mepesa na babakala mpe na banketo?

•  Nzambi kena kulomba bankuelani bubu yayi bavuanda na bana?

•  Yinki mutindu Biblia lenda sadisa dikuela na munu?

•  Baverse ya Biblia yina metubila dikuela

 Banda na ebandeli, Nzambi salaka dikuela samu yasangisa bakala mpe nketo. (Kuyantika 2:24) Nzambi kendimaka ve kukuela banketo mingi, yandi kendimaka ve kusangisa nzutu babakala na babakala mpe banketo na banketo, mpe yandi kendimaka ve bakala mpe nketo zinga kisika mosi kondua ti bakuelana. (1 Bakorinto 6:9; 1 Batesalonika 4:3) Yesu longaka banlonguki na yandi bazitisa bansiku yina Nzambi tulaka na ebandeli samu na dikuela.—Marko 10:6-8.

 Na meso ya Nzambi, dikuela fueti zingila mvimbamvimba. Kana bakala mpe nketo mekuelana, bakepesanaka nsilulu ti bakevuanda ya kukuikama mosi na ntadisi yankaka mpe bakevuanda kintuadi ntangu nionso bakevuanda na luzingu. Nzambi kena kulomba bau bazitisa nsilulu yango.—Marko 10:9.

 Yalenda salama ti nketo to bakala bika muninga, na kifuani kana yamelomba mosi na bau sala vuayaje samu na kukuenda sadisa malumalu dibuta. Kasi Biblia kena kukindisa ve kuvambana samu na mambu ya mpasi yina mebima na dikuela. Kutu, yakena kukindisa bankuelani basala ngolo samu na kubongisa kana mambu ya mutindu yina mebima.—1 Bakorinto 7:10.

 Ekobo kele diambu kaka mosi yina Biblia mendima lenda kufua dikuela. (Matayo 19:9) Na yau, kana bakala mpe nketo mebaka nzengolo ya kuvambana to ya kufua dikuela samu na mfunu yankaka kondua ti yavuanda ekobo, Biblia mepesa nzila na mosi ve kati na bau na kuzolana na muntu yankaka to kukuela diaka.—Matayo 5:32; 1 Bakorinto 7:11.

 Nzambi kena kulomba Baklisto bazitisa bansiku ya Leta na diambu metadila dikuela. (Tito 3:1) Kana dikoki kele samu na bankuelani na kusonikisa dikuela na bau na Leta, kusala yau kemonisa ti bakena kuzitisa bamfumu ya Leta mpe nsiku ya Nzambi yina metuba ti dikuela fueti zingila. a

•   Biyekua ya bau zole. Bakala mpe nketo fueti salana mambu na nzola mpe luzitu. (Baefezo 5:33) Bafueti kokisa bansatu ya muninga ya kusangisa nzutu na nzola nionso mpe bafueti manga kukondua kukuikama ya mitindu nionso. (1 Bakorinto 7:3; Baebreo 13:4) Kana bakele na bana, bau nionso zole kele na kiyekua ya kuyundula bau.—Bingana 6:20.

   Biblia tuba ve mambu mingi samu na mutindu bankuelani fueti sadila kisalu ya kinsuni mpe bisalu ya yinzo. Balenda baka nzengolo kintuadi kana yinki lenda vuanda mbote samu na dibuta na bau.

•   Kiyekua ya bakala. Biblia metuba ti ‘bakala kele mfumu ya nketo na yandi.’ (Baefezo 5:23) Yandi kele mfumu na mutindu ti, yandi fueti tuadisa dibuta mpe kubaka banzengolo yina kevuanda samu na mambote ya nketo na yandi mpe bana.

   Yandi fueti sala ngolo samu na kukokisa bansatu na bau ya kinsuni, ya makanisi, mpe ya kimpeve. (1 Timoteo 5:8) Yandi kemonisaka ti yandi kesepelaka na bikadulu mpe na makoki ya nketo na yandi kana yandi kena kuyuvusa mpenza makanisi ya nketo na yandi mpe kutadila banguilu ya nketo na yandi ntangu yandi kena kubaka banzengolo. (Bingana 31:11, 28) Biblia metuba ti bakala fueti kokisa biyekua na yandi na nzola nionso.—Bakolosai 3:19.

•   Kiyekua ya nketo. Biblia metuba ti ‘nketo fueti vuanda na luzitu ya mpinda samu na bakala na yandi.’ (Baefezo 5:33) Nzambi kesepelaka ntangu nketo kena kuzitisa kiyekua yina Nzambi mepesa bakala na yandi.

   Kiyekua ya nketo kele ya kupesa bakala na yandi maboko, kusadisa bakala na yandi samu yandi baka banzengolo ya mbote mpe samu yandi tuadisa mambu mbote. (Kuyantika 2:18) Biblia kekumisaka nketo yina kekokisaka kiyekua na yandi ya mfunu na dikuela.—Bingana 31:10.

 Ve. Na ntangu ya ntama, Nzambi lombaka bisadi na yandi yankaka babuta bana. (Kuyantika 1:28; 9:1) Kasi ntumu yango tadila ve Baklisto. Yesu lombaka ata fioti ve banlonguki na yandi bavuanda na bana. Ata mosi ve na kati ya banlonguki na yandi ya ntete lombaka bankuelani bavuanda na bana. Bankuelani lenda baka nzengolo bau mosi kana bakebuta.

 Biblia kele na bansikudukusu yina lenda sadisa bankuelani samu babanda dikuela na bau mbote. Bansikudukusu ya Biblia lenda sadisa diaka bankuelani samu batina mambu ya mpasi to banunga yau.

 Bansikudukusu ya Biblia yina lenda sadisa bankuelani samu . . .

•   bamonisa nzola ya kedika.—1 Bakorinto 13:4-7; Bakolosai 3:14.

•   banunga matata.—1 Bakorinto 10:24.

•   bakuwaka muninga mbote.—Yakobo 1:19.

•   kumonisa luzitu.—Baroma 12:10.

•   bazaba kunlemvukila.—1 Piere 4:8.

•   bavuanda ya kukuikama.—Marko 10:9.

•   bavuanda na ntima yinda.—Baefezo 4:2, 3.

•   basalaka na bumosi.—Longi 4:9.

•   bakumisa nzola na bau ngolo.—Nkunga ya Salomo 8:7.