Lusadisu na bantu yina kena kukutana na mambu ya kinkesi na bankuelani na bau na yinzo
Nkubukulu yina ketadilaka mavimpi na yinza ya mvimba (OMS) metuba: “Na yinza ya mvimba, bantu kena kusadila banketo mambu na kinkesi. Yamemuangana lokola kimbevo mosi ya yimbi na yinza ya mvimba. Mpe yakele na mfunu mingi na kusala diambu mosi samu na kupekisa yau.” Nkubukulu yango memona ti 30/100 ya “banketo nionso mekutanaka na kinkesi ya nzutu to na diambu metadila kusangisa nzutu” na babakala na bau. Mpe lapolo mosi ya ONU metuba ti na mosi ya bamvula meluta, banketo 137 vuandaka kufua konso kilumbu na yinza ya mvimba na maboko ya babakala na bau to na maboko ya muntu yankaka ya dibuta. a
Balapolo lenda monisa ti mutindu diambu metadila kinkesi na yinzo kena kukula, kasi balenda koka ve kutubila mpasi ya makanisi mpe ya nzutu yina muntu mosi mosi kena kuwa.
Nge me kutanaka na kinkesi ya nkuelani na yinzo? To nge mezaba muntu yina kena kukutana na yau? Kana yakele mutindu yina, kutadila mabanza yayi melanda ya Biblia lenda sadisa.
Yakele foti na nge ve kana nkuelani kena kusadila nge mambu na kinkesi
Mutindu ya kusadisa muntu yina kena kukutana na mambu ya kinkesi
Yakele foti na nge ve kana nkuelani kena kusadila nge mambu na kinkesi
Yinki Biblia metuba: ‘Konso muntu kesamba na ntuala ya Nzambi samu na yandi mosi.’—Baroma 14:12.
Kuzimbakana ve diambu yayi: Muntu yina kena kusadila nge mambu ya kinkesi kepesa mvutu na mambu yina yandi kena kusala. Kinkesi kepesa mvutu na mambu yina yandi kena kusala.
Kana nkuelani na nge kena kutemina nge samu na mambu ya kinkesi yina yandi kena kusadila nge, yandi kele na foti. Banketo mebonga bamonisa bau nzola, kasi mambu ya kinkesi ve.—Bakolosai 3:19.
Na bantangu yankaka, muntu yina kesadilaka nkuelani na yandi mambu ya kinkesi lenda vuanda na maladi ya yintu, yandi yundukaka na dibuta yina bantu vuandaka sadila bantu yankaka mambu na kinkesi to kukolua malavu. Atako yakele mutindu yina, Nzambi zimbakana ve mambu nionso yina yandi kena kusala nge. Mpe yandi kele na kiyekua ya kusala nionso yina yandi lenda samu na kusoba mavanga na yandi.
Nge lenda baka lusadisu
Yinki Biblia metuba: ‘Mambu kenungaka kana bantu yina kepesaka malongi kele mingi.’—Bingana 15:22.
Kuzimbakana ve diambu yayi: Kana nge kena kumona ti nge kele ve na lutanunu, to nge zaba ve yina nge fueti sala, bantu yankaka lenda sadisa nge.
Samu na yinki nge lenda vuanda na nsatu ya lusadisu ya bantu yankaka? Kana nge kekutanaka na mambu ya kinkesi, yakele na mambu mingi yina nge lenda yindula. Yalenda vuanda mpasi samu na kubaka nzengolo ya kusosa mutindu ya mbote ya kusala, samu nge zaba ve kati na mambu yayi melanda wapi yina meluta mfunu, na kifuani:
Lutanunu na nge mosi
Mambote ya bana na nge
Mbongo yina nge kele na yau
Nzola na nge samu na nkuelani na nge
Nge lenda mona mbote nge tanina nguizani na nge na nkuelani na nge kana yandi mesoba mavanga na yandi
Yakele yimbi ve nge kukimona ti nge kele na diambu ya kusala ve mpe nge kukimona ti luzingu na nge mesuka. Lusadusu na nge lenda katuka na nani?
Nkundi ya ntima to mpangi ya dibuta lenda vuanda na dikoki ya kupesa nge lusadisu ya kinsuni mpe ya makanisi. Kuzabisa muntu mosi yina ketudilaka nge dikebi lenda soba mambu.
Telefone samu na bantu yina mekutana na mambu ya kinkesi na yinzo lenda pesa lusadisu ya malumalu. Bantu yina nge kebokila lenda zabisa nge yina nge fueti sala samu nge kukitanina. Kana nkuelani na nge mebakusa mavanga na yandi mpe yandi zola mpenza kusoba, mosi ya bantu yina keyambaka telefone lenda vuanda na dikoki ya kusadisa nkuelani na nge na mambu yina yandi fueti sala ntete ntete.
Bisika yankaka ya kubakila lusadisu ya malumalu lenda sadisa nge kana nge kele na nsatu ya lusadisu ya malumalu. Balusadisu lenda vuanda minganga, ba infirmier, to bantu yankaka yina mezaba kupesa lusadisu.
Nge kele ve nge mosi
Yinki Biblia metuba: ‘Yehova b kele pene-pene ya bantu yina kele na kiadi; yandi kevukisaka bantu yina keniokuamaka na mabanza.’—Nkunga 34:18.
Kuzimbakana ve diambu yayi: Nzambi mepesa nsilulu ti yandi kesadisa nge.
Yehova ketudilaka nge mpenza dikebi. (1 Piere 5:7) Yandi kena kubakusa makanisi mpe banguilu na nge ya ngolo. Yandi lenda bomba nge na nzila ya Mpova na Yandi, Biblia. Mpe yandi zola nge sambila yandi. Ntangu nge kena kusambila, lomba yandi yandi pesa nge nduenga mpe ngolo yina nge kele na yau nsatu samu nge nunga bampasi na nge.—Yezaya 41:10.
Kinkesi na yinzo kemanisa
Yinki Biblia metuba: ‘Bakevuanda konso muntu na yinsi ya yinti na yandi ya vinu mpe na yinsi ya yinti na yandi ya bafigi, mpe muntu mosi ve kemonisa bau wonga.’—Mika 4:4, nyp.
Kuzimbakana ve diambu yayi: Biblia mepesa nsilulu ti yakevuanda ntangu mosi na bilumbu kena kuiza yinzo kevuanda kisika mosi ya kiyenge samu na muntu nionso.
Yehova Nzambi kele na mutindu mosi kaka ya kumanisa bampasi na beto mvimbamvimba. Biblia mepesa nsilulu yayi: ‘Yandi kepangusa mansanga nionso na meso na bau, mpe lufua kevuanda diaka ve; kiadi, bidilu, mpe mpasi kevuanda diaka ve.’ (Kusonga 21:4) Na ntangu yina, beto kebambukila diaka ve mambu ya yimbi yina mekuminaka beto kasi beto kebanda bambukila nde mambu ya mbote. (Yezaya 65:17) Yayi kele luzingu ya kiyenge yina Biblia mepesa nsilulu.
