DILONGI 59
Nge lenda kanga ntima na banzomono
Yavuanda bubu to bilumbu kekuiza, Baklisto nionso kekutana na bantu yina ketelemina bau, ata mpe kuniokola bau. Yau fueti bangisa beto?
1. Samu na yinki beto kezabaka ti kilumbu kele beto kekutana na banzomono?
Biblia metubila yau puelele ti: ‘Bantu nionso yina kezola kuzinga na kukangama na Nzambi na bumosi na Klisto Yesu, bakemonisa bau mpe mpasi.’ (2 Timoteo 3:12) Baniokolaka Yesu samu yandi kotaka na mambu ya yinza ya Satana ve. Beto diaka beto kekotaka ve na mambu ya yinza yayi, na yau beto kekamuaka ve ntangu bakeniokolaka beto na bamfumu ya Leta mpe na mabundu.—Yoane 15:18, 19.
2. Yinki mutindu beto lenda kukibongisa samu na banzomono?
Beto fueti kumisa kiminu na beto na Yehova ngolo banda bubu yayi. Sosa ntangu konso kilumbu samu na kusambila yandi mpe kutanga mua kitini ya Mpova na yandi. Kuendaka na balukutakanu ya kimvuka mbala na mbala. Mambu nionso yayi kepesa nge ngolo ya kununga konso nzomono na kibakala nionso, ata kana yamekatuka na mpangi na beto ya dibuta. Ntumua Paulo, yina vuandaka kutana mbala na mbala na banzomono, sonikaka: ‘Yehova kele nsadisi na munu; mukemona wonga ve.’—Baebreo 13:6.
Beto diaka beto kumisa ngolo kibakala na beto na kusamunaka mbala na mbala. Kisalu ya kusamuna kesadisa beto beto tudila Yehova ntima mpe yakesadisa beto beto nunga kubanga bantu. (Bingana 29:25) Kana nge mekudisa kibakala na kisalu ya kusamuna bubu yayi, nge kekukibongisa mbote samu na kutatamana kusamuna ata ntangu bamfumu ya Leta kepekisa kisalu na beto.—1 Batesalonika 2:2.
3. Yinki mambote beto kebaka kana beto mekanga ntima ntangu beto mekutana na banzomono?
Ya kedika, beto kezolaka ve banzomono, kasi kana beto mekanga ntima na banzomono, kiminu na beto kekuma ngolo. Beto kepusanaka penepene na Yehova samu beto kemonaka lusadusu na yandi na luzingu na beto ntangu beto kemonaka ti beto mesuka. (Tanga Yakobo 1:2-4.) Yau kesalaka diaka Yehova mpasi na ntima kana beto kena kumona mpasi, kasi yandi kesepelaka kana beto kena kukangila yau ntima. Biblia metuba ti: ‘Kasi kana beno kena kukanga ntima na bampasi samu beno kena kusala mambu ya mbote, yakele diambu yina Nzambi kezolaka.’ (1 Piere 2:20) Kana beto mebikana ya kukuikama na Yehova yandi kepesa beto luzingu ya mvula na mvula na yinza ya yimpa kisika bantu nionso kesambila Yehova kukondua batelemina bau.—Matayo 24:13.
KOTA NA MPINDA
Longuka kuzaba samu na yinki nge lenda vuanda na dikoki ya kubikana ya kukuikama na Yehova mpe mambote yina nge kebaka atako nge kena kukutana na banzomono.
4. Nge lenda kanga ntima na banzomono ya dibuta
Yesu zabaka ti yalenda salama ti dibuta na beto telemina nzengolo na beto ya kusambila Yehova. Tanga Matayo 10:34-36, mpe na manima tadila kiuvu yayi:
-
Yinki lenda salama kana muntu mosi na kati ya dibuta mebaka nzengolo ya kusadila Yehova?
Samu na kumona kifuani mosi ya diambu yango, tula VIDEO, mpe na manima tadila kiuvu yayi melanda.
-
Yinki nge kesala kana mpangi na nge to nkundi na nge kena kumeka kulembisa nge nzutu samu na kusadila Yehova?
Tanga Nkunga 27:10 mpe Marko 10:29, 30. Na manima ya kutanga konso verse, tadila kiuvu yayi:
-
Yinki mutindu nsilulu yango kesadisa nge kana dibuta to nkundi na nge kena kutelemina nge?
5. Tatamana kusambila Yehova atako banzomono kele
Yakelombaka kibakala samu na kusambila Yehova ntangu bantu yankaka kena kutelemina beto samu na kusala yau. Tula VIDEO, mpe na manima tadila kiuvu yayi melanda.
-
Yinki mutindu bifuani kele na video yayi mekumisa diaka kiminu na nge ngolo?
Tanga Bisalu 5:27-29 mpe Baebreo 10:24, 25. Na manima ya kutanga konso verse, tadila kiuvu yayi:
-
Samu na yinki yakele mfunu kutatamana kusambila Yehova ata kana kisalu ya kusamuna mpe balukutakanu na beto mepekisama?
6. Yehova kesadisa nge nge kanga ntima
Bambangi ya Yehova ya bamvula mpe bankanda nionso ketatamanaka kusadila Yehova na kukuikama nionso atako bakena kukutana na banzomono. Samu na kumona yina sadisaka bau, tula VIDEO. Mpe tadila kiuvu yayi melanda.
-
Na video yayi, yinki sadisaka Bambangi yayi samu bakanga ntima?
Tanga Baroma 8:35, 37-39 mpe Bafilipi 4:13. Na manima ya kutanga konso verse, tadila kiuvu yayi:
-
Yinki mutindu baverse yayi lenda ndimisa nge ti nge lenda nunga bampasi ya mitindu nionso?
Tanga Matayo 5:10-12, mpe na manima tadila kiuvu yayi:
-
Samu na yinki nge lenda vuanda na kiese atako banzomono kele?
Bamilion ya bisadi ya Yehova nungaka banzomono. Nge diaka nge lenda nunga!
BANTU YANKAKA METUBA: “Munu lenda ve kukanga ntima na banzomono.”
-
Yinki baverse lenda kindisa kiminu na bau?
BUNKUFI
Yehova kebakaka na valere bangolo yina beto kesalaka samu na kusadila yandi ata kana banzomono kele. Na lusadusu na yandi, beto lenda nunga kukanga ntima!
Mvutukulu
-
Samu na yinki Baklisto kezabaka ti kilumbu kele bakekutana na banzomono?
-
Yinki nge lenda sala banda bubu yayi samu na kukibongisa na banzomono yina kena kuiza?
-
Yinki lenda sadisa nge nge ndima ti nge kele na dikoki ya kusadila Yehova atako banzomono kele?
SOSA
Tala mutindu mpangi mosi ya bakala ya ntuenia sasilaka mutindu Yehova sadisaka yandi na kukanga ntima ntangu bakangaka yandi na buloko lokola yandi mangaka kukota na mambu ya yinza.
Tala yina sadisaka bankuelani mosi basadila Yehova na kukuikama nionso bamvula mingi atako bateleminaka bau.
Longuka mutindu ya kununga banzomono na kibakala nionso.
“Omibongisa banda sikoyo mpo na minyoko” (Linɔ́ngi ya Mosenzeli ya Juillet 2019)
Yinki mutindu beto fueti tadila banzomono ya dibuta, mpe yinki beto fueti sala samu na kutanina kiyenge kondua kubebisa kiminu na beto na Yehova?
“Solo ememaka ‘kimya te, kasi mopanga’” (Linɔ́ngi ya Mosenzeli ya Octobre 2017)
Tala diaka...
BIUVU YINA BANTU KEYUVUSAKA MINGI
Yinki mutindu Bambangi ya Yehova kelongukaka Biblia na bantu?
Na nzila ya programe ya ndongokolo ya kusolola ofele na Bambangi ya Yehova, nge lenda sadila konso mbangudulu ya Biblia. Nge kele na yinsua ya kubokidisa dibuta na nge ya mvimba to bankundi na nge bakuiza sangana na nge.
