DILONGI 8
Samu na yinki Nzambi mebika nzila na yimbi mpe mpasi?
1. Yinki mutindu yimbi bandilaka?
Nzambi mebika bantu bakukiyadila mua ntangu ya yinda samu na kumonisa ti bakenunga ve kumanisa bampasi ya bantu
Yimbi bandaka awa na ntoto ntangu Satana tubaka luvunu ya ntete. Satana vuandaka mbasi ya kulunga, kansi yandi “kezingaka na mambu ya kieleka ve.” (Yoane 8:44) Yandi kudisaka nsatu ya kubaka nsambudulu yina fuana pesama kaka na Nzambi. Satana vunaka Eva, nketo ya ntete, mpe yandi ndimisaka Eva yandi zitisa yandi na kisika ya kuzitisa Nzambi. Adamu mpe landaka Eva na kumangaka kuzitisa Nzambi. Nzengolo ya Adamu nataka mpasi mpe lufua.—Tanga Kuyantika 3:1-6, 19.
Ntangu Satana tindaka Eva yandi manga kuzitisa Nzambi, yandi bandisaka butomboki samu na kutelemina luyalu ya Nzambi, yazola tuba kiyekua na yandi ya kuvuanda Yina-Meluta-Nionso. Bantu mingi melanda Satana mpe bau memanga Nzambi vuanda Mfumu na bau. Na yau, Satana mekumaka “mfumu ya nsi-ntoto.”—Tanga Yoane 14:30; 1 Yoane 5:19.
2. Bisemua ya Nzambi vuandaka ya kubeba?
Bima nionso yina Nzambi salaka kele ya kulunga. Bantu mpe bambasi yina Nzambi salaka bau vuandaka na makoki ya kuzitisa Nzambi na mambu nionso. (Kulonga 32:4, 5) Nzambi vangaka beto na kimpuanza ya kupona kusala mbote to yimbi. Kimpuanza yango kepesaka beto diluaku ya kumonisa ti beto kezolaka Nzambi.—Tanga Yakobo 1:13-15; 1 Yoane 5:3.
3. Samu na yinki Nzambi mebika nzila na bampasi tii bubu yayi?
Yehova mebika nzila ti bantu tombokila luyalu na yandi samu na mua ntangu. Samu na yinki? Samu na kumonisa ti vema nionso bantu lenda sala samu na kukiyadila bau mosi kondua lutuadusu na yandi yau lenda natina bau mambote ve. (Longi 7:29; 8:9) Bamvula 6 000 yina bantu mekukiyadila bau mosi memonisa mbotembote ti banunga ve. Luyalu ya bantu nunga ve kumanisa bamvita, kimpumbulu, kukondua lunungu mpe maladi.—Tanga Yeremia 10:23; Baroma 9:17.
Na kusuasana na luyalu ya bantu, luyalu ya Nzambi kena natina bayina mendima yau mambote. (Yezaya 48:17, 18) Ntama ve, Yehova kesukisa baguvernema nionso ya bantu. Kaka bantu yina kena ndimina luyalu ya Nzambi kevuanda na ntoto.—Yezaya 11:9; Tanga Daniele 2:44.
Tala video Samu na yinki Nzambi mebika nzila na bampasi?
4. Yinki diluaku mvibudulu ya Nzambi mepesa beto?
Satana tubaka ti muntu mosi ve kesadila Yehova na luzolo ya kedika. Nge kendima kumonisa ti Satana tubaka luvunu? Ee, nge lenda monisa yau! Mvibudulu ya Nzambi mepesa beto nionso diluaku ya kumonisa kana tokezola luyalu ya Nzambi to ya bantu. Mambu beto kesalaka na luzingu ya beto nde kemonisa yau.—Tanga Yobi 1:8-12; Bingana 27:11.
5. Yinki mutindu beto lenda pona Nzambi vuanda Mfumu na beto?
Mambu yina beto keponaka kemonisaka kana beto mezola Nzambi vuanda Mfumu ya beto to ve
Beto lenda pona Nzambi vuanda Mfumu na beto kana beto kena kusosa mpe kukipesa na nsambudulu ya kedika yina mewizana na Biblia, Mpova ya Nzambi. (Yoane 4:23) Beto lenda monisa ti beto memanga luyalu ya Satana kana beto memanga kukota na mambu ya politiki mpe na bamvita, mutindu Yesu salaka.—Tanga Yoane 17:14.
Satana kesadilaka ngolo na yandi samu na kutinda bantu na bisalu ya nsoni mpe ya yimbi. Ntangu beto kena kumanga bisalu yina, bankundi ya beto mpe bampangi ya beto yankaka balenda seka to kutemina beto. (1 Piere 4:3, 4) Samu na yau, beto fueti pona: Beto kevuanda kisika mosi na bantu yina kezolaka Nzambi? Beto kezitisa bansiku na yandi ya nduenga mpe ya nzola? Kana beto mesala mutindu yina, beto kemonisa ti Satana vunaka ntangu yandi tubaka ti muntu mosi ve kezitisa Nzambi kana yandi mekutana na banzomono.—Tanga 1 Bakorinto 6:9, 10; 15:33.
Nzola yina Nzambi kele na yau samu na bantu mendimisa beto ti yandi kemanisa yimbi mpe bampasi. Bantu yina kemonisaka ti bau kendimaka yau bakebaka luzingu ya mvula na mvula awa na ntoto.—Tanga Yoane 3:16.
