Ntangu beto kena kukibongisa samu na kulonguka, beto lenda kukiyuvusa, ‘Yinki munu zola longuka?’ Kasi, yakevuanda mbote kuluta beto kenga ti mambu yina beto kele na nsatu ya kulonguka pekisa beto kumona mambu yina Yehova kena kulonga beto. Yinki mutindu beto lenda tatamana kuvuanda na makanisi ya mbote ntangu beto kena kulonguka?

Sambila samu na kulomba nduenga. Lomba Yehova sadisa nge samu nge bakusa mambu yina yandi zola nge longuka na ntangu yango. (Yak. 1:5) Manga kutula ntima kaka na mbakusulu na nge ya ntama.​—Mas. 3:5, 6.

Bika kilendo ya Mpova ya Nzambi sala na luzingu na nge. “Mpova ya Nzambi kele na luzingu.” (Ebr. 4:12) “Mpova” ya Nzambi yina kele na luzingu lenda vuanda na bupusi na zulu na beto na mitindu ya kusuasana konso ntangu yina beto kena kutanga Biblia​—kasi yakesalama mutindu yina kaka kana beto kena kuzaba ti beto kele na nsatu ya kulonguka mambu yina Nzambi kena kulonga beto.

Sepela na konso kima yina kele na meza ya Yehova. Madia na yandi ya kimpeve kele lokola “feti mosi ya madia ya kitoko mpenza.” (Yis. 25:6) Manga kusote “madia” yina nge kena kukanisa ti nge kesepela na yau ve. Nge kesuka kaka ve na kubaka mambote kasi nge kesepela mpenza na malongi yina Nzambi kena kupesa nge!