Lusadusu samu na kulongukaka mbala na mbala
NGE kekakatanaka samu na kulonguka Biblia mbala na mbala mpe kusepela na ndongokolo na nge? Na bantangu yankaka yakekuminaka beto nionso. Kasi kanisa na mambu yankaka yina beto kesalaka mbala na mbala, na kifuani kuyobila. Kuyobila kelombaka ntangu mpe bangolo, kasi beto kekukimonaka mbote na manima ya kuyobila! Kulonguka Biblia diaka lenda vuanda lokola “kuyobila maza na nzila ya mpova.” (Ef. 5:26) Beto tadila makanisi yina lenda sadisa beto:
Sala programe. Ndongokolo ya Biblia kele na kati ya “mambu yina meluta mfunu” yina beto fueti sala. (Flp. 1:10) Samu na kusadisa nge nge zitisa programe na nge, sonika kilumbu mpe ntangu yina nge kesala ndongokolo na nge na papie mpe tula yau na kisika yina nge lenda mona yau na pete nionso. To nge lenda tula alarme na apareyi na nge tekila ntangu ya ndongokolo na nge koka.
Wizanisa yau na makoki na nge. Yakevuandaka pete samu na nge kutula makanisi na nge kisika mosi samu na ntangu ya yinda to nge kemonaka mbote nge kabula ntangu ndambundambu? Nge mekukizaba mbote. Na yau bongisa programe na nge ya ndongokolo na kutadila makoki na nge. Kana nge kena kukimona ya kulemba na ntangu yina nge ponaka samu na kusala ndongokolo na nge, samu na yinki ve kusala yau ata samu na miniti 10? Na kulongukaka ata samu na mua ntangu ya nkufi, nge lenda longuka mambu mingi. Mpe kana nge mebanda, nge lenda kuma na nsatu ya kutatamana.—Flp. 2:13.
Pona na ntuala mambu yina nge kelonguka. Kana nge mevuanda mpe na manima nge mebanda kusosa mambu yina nge kelonguka, mbala yankaka nge kesadila ve “ntangu na [nge] na mutindu ya mbote mpenza.” (Ef. 5:16) Samu na yinki ve kusala liste ya masolo to ya mambu yina nge kesepela kulonguka? Kana kiuvu mosi mekuizila nge na makanisi, sonika yau na liste yango. Mpe na nsuka ya konso ndongokolo, nge lenda sonika diaka na liste yango makanisi yankaka yina nge kesepela kulonguka.
Salaka bansobolo kana yakele na mfunu. Mekaka kusala bansobolo na diambu metadila ntangu na nge, na kifuani ntangu yina nge kelutisaka na kulonguka to masolo yina nge keponaka. Diambu yina kele na mfunu kele ve—wola yina nge kesala ndongokolo na nge, ntangu yikua ndongokolo na nge kebaka, to mambu yina nge kelonguka—kasi diambu ya mfunu kele nde kulonguka mbala na mbala.
Beto kebakaka mpenza mambote na kulongukaka mbala na mbala. Beto kepusanaka penepene ya Yehova, beto kelongukaka kusala mambu na nduenga, mpe beto kekukimonaka mbote.—Yos. 1:8.
