Hulda kokisaka lukanu na yandi
NA INDONÉSIE, na Ile mosi ya fioti ya Sangir Besar, bampangi na beto tatu kezingaka kuna. Yameluta mua bamvula bavuandaka sala kintuadi na plaje. Bamezabana mbote na Ile yango samu na kisalu na bau ya kusamuna—kusadisa bantu babakusa Biblia. Kasi, bavuandaka sala diaka kisalu yankaka.
Ile ya Sangir Besar na nord ya Indonésie
Ya ntete, bavuandaka tambula na maza samu na kubaka mabanga ya kilo, mpe kunata yau na plaje. Mabanga yankaka vuandaka nene lokola bale. Na manima, banketo yango vuandaka vuanda na bakiti ya fioti ya mabaya mpe bavuandaka sadila bamarto samu na kupanza mabanga yango na bitini ya fiotifioti lokola diaki ya nsusu. Na manima na yau, bavuandaka tula mabanga yango ya fiotifioti na bakantini ya plastiki mpe bavuandaka monte na yau na eskalie mosi yina vuandaka nata tii kisika yinzo na bau kele. Mpe bavuandaka tula mabanga yango na basaki ya nene samu na kukotisa yau na bantomabilu mpe kusadila yau samu na kutunga banzila.
Hulda kena kulokota mabanga na plaje
Mosi ya bampangi yango ya banketo kele Hulda. Mambu ya luzingu na yandi vuandaka sala ti yandi lutisa ntangu mingi na kisalu yango kuluta bayankaka. Yandi vuandaka sadila mbote mbongo yina yandi vuandaka baka samu na kusumba bima yina dibuta na yandi vuandaka na yau nsatu samu na konso kilumbu. Kasi mbala yayi, yandi vuandaka diaka na nsatu ya kulunda ndambu ya mbongo samu na diambu yankaka. Yandi vuandaka na nsatu ya tableti samu yandi vuanda na dikoki ya kusadila aplikasion JW Library®. Hulda mezaba ti bavideo mpe bima yankaka yina kele na aplikasion yango lenda bongisa kisalu na yandi ya kusamuna mpe mbakusulu na yandi ya Biblia.
Hulda salaka ngonda mosi na ndambu na kusalaka bawola zole konso sunka na kupanzaka mabanga mingi samu na kufulusa wagon ya ntomabilu ya fioti. Nsukansuka yandi kumaka na mbongo mingi samu na kusumba tableti.
Hulda na tableti na yandi
Hulda tubaka: “Atako munu vuandaka lemba nzutu mpe mabibi na nzutu, munu zimbakanaka na nsualu mpasi mpe mabibi yango nionso ntangu munu bandaka kusadila tableti yango ya yimpa samu yasadisa munu na kusala diaka mbote kisalu na munu ya kusamuna mpe samu munu kukibongisaka samu na balukutakanu ya Buklisto na pete nionso.” Yandi tubaka diaka ti tableti sadisaka yandi na ebandeli ya maladi ya Covid-19, samu mambu nionso ya kimvuka kumaka kusalama na nzila ya zoom. Beto mesangana na kiese ya Hulda samu yandi kokisaka lukanu na yandi.
