03 MARS, 2020
BANSANGU YA BABUALA NIONSO

Lapolo ya Coronavirus mpe yina beto lenda sala samu na kukitanina

KUWA NA

Buro ya nene ya Bambangi ya Yehova kena kulandila mbotembote maladi yayi ya yimbi ya coronavirus (yina mezabana na nkumbu ya COVID-19). Beto mezaba ti na kutadila bambikudulu ya Biblia maladi yayi kele na kati ya kidimbu ya bilumbu ya nsuka. (Luka 21:11) Ntangu maladi ya yimbi mebima, beto kemonisa nduenga kana beto mebaka bankubukulu yina mebonga samu na kukitanina mpe kutanina bantu yankaka.—Bingana 22:3.

Bantu yankaka lenda kukiyuvusa yinki mutindu bampangi na beto kena kusala na bisika yina maladi yango kele. Maladi yango ya COVID-19 mesoba mambu mingi na Babetele mpe bimvuka mingi ya Italie, Japon, Coree du sud mpe babuala yankaka. Bafiliale yankaka mepekisa bantu ya nganda bakuiza tala Betele. Na bisika yankaka bamfumu ya Leta mepekisa balukutakanu yina kesangisaka bantu mingi kisika mosi, yazola monisa balukutakanu ya kizungidila kesalama ntete ve na babuala yango. Diaka, bimvuka mingi mesoba baprograme ya kisalu ya kusamuna mpe ya balukutakanu. Atako mikakatano yina, bampangi na beto kena kutatamana kukindasana na kimpeve.—Yude 20, 21.

Na kutadila mambu yina, bampangi na beto memona ti yakele na mfunu beto landa malongi yayi kele na yinsi awa. Malongi yango lenda vuanda na mfunu samu na beno mpe dibuta na beno nionso kana maladi mosi ya yimbi mebima kisika beno kevuandaka.

Kubanga ve. Atako yakele na mfunu kulandela bansangu samu na kusosa kukitanina, beto fueti vuanda na bukatikati mpe kutadila mambu mbotembote na kisika ya kubanga banga.—Bingana 14:15; Yezaya 30:15.
Zitisa malako mpe mambu yina bamfunu melomba bantu sala. Na bisika mingi bamfumu ya Leta kena kulomba bantu mambu ya kusala to bakena kupesa malako samu na mavimpi. Yakele mbote kuzaba mambu yango mpe kuzitisa yau.—Baroma 13:1.
Vuanda bunkete. Yakele na mfunu kusukulaka ntangu nionso maboko na maza mpe na sabuni to kisi yina kekufuaka mikrobe. Beto fueti tula diaka bunkete na bisika yina beto kesimbaka mbala mingi, yavuanda na yinzo na beto to na yinzo ya Kimfumu. Diaka, bantu ya mayele na diambu metadila mavimpi memona ti kupesana mbote na maboko yau diaka kena kusala ti maladi yango ya yimbi muangana na bantu mingi. Nkubukulu ya ONU yina ketadilaka mavimpi ya nzutu mepesa malongi mingi na bantu nionso samu na maladi ya coronavirus.
Monisa nzola na bantu yankaka. Beto manga ve, yakele mbote kukuenda na balukutakanu mpe na kisalu ya kusamuna, kasi kana nge kena kubela yakele mbote nge vuanda na yinzo samu na kutanina bantu yankaka. Kusala mutindu yina, kesala ti beto tanina bampangi na beto Baklisto mpe beto kemonisa ti beto kezolaka bau, yavuanda mpe bafinangani na beto yina kele Bambangi ya Yehova ve—Matayo 22:39.
Zitisa bankubukulu ya yimpa yina mepesama samu na balukutakanu mpe kisalu ya kusamuna. Bafiliale yina kele kisika maladi ya coronavirus kele lenda pekisa balukutakanu ya kimvuka, balukutakanu ya nene to mambu yankaka ya nsambudulu na beto yabika salama. Yau nde mesalama na bisika yina maladi yango kele mingi na kifuani na Italie, Japon, mpe Coree du sud. Na bisika ya mutindu yina, bankulutu lenda sala ti bansamuni balanda balukutakanu na bayinzo na bau na nzila ya video. Samu na kisalu ya kusamuna, bansamuni lenda sadila telephone, message, Internet to kutinda baletre.