တၢ်မၤလိ ၂၂
နတဲဘၣ်ပှၤဂၤလၢ တၢ်သးခုကစီၣ် ကသ့ဒ်လဲၣ်
ဖဲနသ့ၣ်ညါဘၣ် တၢ်မ့ၢ်တၢ်တီ သီသီအခါ နကဆိကမိၣ်ထီၣ်လၢ ‘ပှၤမ့ၢ်သ့ၣ်ညါဘၣ် တၢ်မ့ၢ်တၢ်တီအံၤ ကိးဂၤဒဲးဒု ကဂ့ၤဖးဒိၣ်ညါ.’ ပှၤကိးဂၤဒဲး ကြၢးသ့ၣ်ညါဝဲ တၢ်မ့ၢ်တၢ်တီတခါအံၤ ဘၣ်ဆၣ် တၢ်လၢ နမၤလိဘၣ်တဖၣ်န့ၣ် ဘၣ်သ့ၣ်သ့ၣ် နတဲဘၣ်ပှၤဂၤတဘူၣ်ဘၣ်. အဃိ ခဲအံၤန့ၣ် ပကတဲသကိး ဘၣ်ဃးဒီး ဒ်သိး နတဲဘၣ်ပှၤဂၤ လၢတၢ်သးခုကစီၣ် ကဘူၣ်အဂီၢ် နကဘၣ်မၤဒ်လဲၣ်.
၁. တၢ်လၢနမၤလိဘၣ်တဖၣ်န့ၣ် နတဲဘၣ်ပှၤဂၤ ကသ့ဒ်လဲၣ်.
ယ့ၣ်ၡူး အပျဲၢ်အဘီၣ်တဖၣ် တဲဝဲလၢ “တၢ်လၢပထံၣ်ဘၣ် ဒီးတၢ်လၢပနၢ်ဟူဘၣ်တဖၣ်န့ၣ် ပဘၣ်စံၣ်တဲၤတဲလီၤအီၤ ဒီးပပတုာ်တသ့ဘၣ်.” (မၤတၢ် ၄:၂၀) ယ့ၣ်ၡူး အပျဲၢ်အဘီၣ်တဖၣ်န့ၣ် ပာ်လုၢ်ပာ်ပှ့ၤ တၢ်မ့ၢ်တၢ်တီ ဒိၣ်မးအဃိ အဝဲသ့ၣ် ဂုာ်ကျဲးစၢး အဂ့ၤကတၢၢ်လၢ ကတဲဘၣ်ပှၤကိးဂၤဒဲး. နၤမီၤ နသးဆူၣ်လၢ နကတဲဘၣ်ပှၤဂၤလၢ တၢ်မ့ၢ်တၢ်တီ ဒ်ယ့ၣ်ၡူး အပျဲၢ်အဘီၣ်တဖၣ် အသိးဧါ. နသးမ့ၢ်ဆူၣ် ဒ်သိးဒီး အဝဲသ့ၣ်န့ၣ် ဃုကျဲလၢ နကတဲဘၣ် နဟံၣ်ဖိဃီဖိ, နဘူးနတံၢ် ဒီးနသကိးတဖၣ် လၢတၢ်လၢနမၤလိဘၣ်တဖၣ် ဒီးတဲအဝဲသ့ၣ်လၢ တၢ်ပာ်ကဲအပူၤ.—ဖး ကလီးစဲ ၄:၆.
တၢ်ဟ့ၣ်ကူၣ်တနီၤလၢ နကစးထီၣ်တဲဘၣ်ပှၤဂၤ တၢ်သးခုကစီၣ်
-
ဖဲနတဲသကိးတၢ်ဒီး နဘူးနတံၢ်အခါ ဒ်သိး နကတဲဘၣ်အဝဲသ့ၣ် တၢ်ဂ့ၢ်တခါခါလၢ လံာ်စီဆှံအပူၤအဂီၢ် တဲဆိအဝဲသ့ၣ်လၢ “တနွံညါအံၤ ယမၤလိဘၣ် တၢ်ဂ့ၢ်လၢအလီၤဆီတခါ.”
-
တဲဘၣ် နသကိးလၢ အအိၣ်တဆူၣ်ဘၣ် မ့တမ့ၢ် အသူၣ်ကိၢ်သးဂီၤတၢ် တဂၤဂၤလၢ လံာ်စီဆှံတဆၢဆၢ လၢအကကဲထီၣ် တၢ်ဂံၢ်တၢ်ဘါ.
-
ပှၤလၢ အမၤသကိးတၢ်ဒီးနၤတဂၤ မ့ၢ်သံကွၢ်နၤ ဘၣ်ဃးဒီး နတၢ်အိၣ်သး မၤသးဒ်လဲၣ်န့ၣ် တဲဘၣ်အီၤ တၢ်ဂ့ၢ်တခါခါ လၢနမၤလိဘၣ်လၢ လံာ်စီဆှံအပူၤ မ့တမ့ၢ် တၢ်လၢနမၤလိဘၣ်လၢ တၢ်အိၣ်ဖှိၣ်.
-
ဒုးနဲၣ် နသကိးတဖၣ်လၢ jw.org ပှာ်ယဲၤသန့ (ဝဲးဘ်ဆးထ်).
-
ဖဲနမၤလိလံာ်စီဆှံအခါ မၢနသကိးတဂၤဂၤ ဟဲဆ့ၣ်နီၤဒိကနၣ် မ့တမ့ၢ် ဒုးနဲၣ်အီၤ jw.org ဒ်သိး အကဃ့ထီၣ်ဝဲလၢ ပှၤတဂၤဂၤ ကမၤလိလံာ်စီဆှံဒီးအီၤ.
၂. ဘၣ်မနုၤအဃိ နကြၢးပာ်လီၤဖီတၢၣ် လၢနကဟးစံၣ်တဲၤတဲလီၤ သကိးတၢ်ဃုာ်ဒီး တၢ်အိၣ်ဖှိၣ်ဖိတဖၣ်လဲၣ်.
ယ့ၣ်ၡူး အပျဲၢ်အဘီၣ်တဖၣ် တဲဘၣ်ပှၤလၢအဝဲသ့ၣ် သ့ၣ်ညါဝဲတဖၣ် လၢတၢ်သးခုကစီၣ်. တကးဒံးဘၣ် ယ့ၣ်ၡူး “ဆှၢလီၤဆိ အဝဲသ့ၣ် ခံဂၤခံဂၤ . . . လၢဝ့ၢ်ကိးဖျၢၣ်ဒဲး” ဒ်သိးကစံၣ်တဲၤတဲလီၤတၢ်. (လူၤကၣ် ၁၀:၁) ယ့ၣ်ၡူး ရဲၣ်လီၤကျဲၤလီၤဝဲ တၢ်စံၣ်တဲၤတဲလီၤတၢ်မၤ ဒ်အံၤအဃိ ပှၤအါဂၤ နၢ်ဟူဘၣ်ဝဲ တၢ်သးခုကစီၣ်. ဒီးခီဖျိလၢ ယ့ၣ်ၡူး အပျဲၢ်အဘီၣ်တဖၣ် စံၣ်တဲၤတဲလီၤသကိးတၢ် အဃိ အဝဲသ့ၣ် အိၣ်ဒီး တၢ်သးခုအါမး. (လူၤကၣ် ၁၀:၁၇) နၤမီၤ နအဲၣ်ဒိး ပာ်လီၤဖီတၢၣ်လၢ နကစံၣ်တဲၤတဲလီၤ သကိးတၢ်ဃုာ်ဒီး တၢ်အိၣ်ဖှိၣ်ဖိတဖၣ်ဧါ.
ဃုသ့ၣ်ညါအါထီၣ်
ခဲအံၤ ပကတဲသကိး ဘၣ်ဃးဒီး နကတဲဘၣ်ပှၤဂၤလၢ တၢ်သးခုကစီၣ်အဂီၢ် နတဲမ့ၢ်တဘူၣ်ဘၣ်န့ၣ် နကဘၣ်မၤဒ်လဲၣ် ဒီးနမ့ၢ်တဲဘၣ် ပှၤဂၤလၢ တၢ်သးခုကစီၣ်န့ၣ် နကဒိးန့ၢ်ဘၣ် တၢ်သးခုဒ်လဲၣ်.
၃. ယဟိဝၤယွၤ ကအိၣ်ဒီးနၤ
ပှၤတနီၤအဲၣ်ဒိး စံၣ်တဲၤတဲလီၤတၢ် ဘၣ်ဆၣ် အဝဲသ့ၣ် ဘၣ်ယိၣ်ဝဲလၢ ပှၤကထံၣ်အီၤဒ်လဲၣ် ဒီးဘၣ်ယိၣ်ဝဲလၢ ပှၤတဒိကနၣ်အီၤဘၣ်.
-
တၢ်လၢနမၤလိဘၣ်တဖၣ်န့ၣ် နကတဲဘၣ်ပှၤဂၤအဂီၢ် နသးတနီးဧါ. ဘၣ်မနုၤအဃိလဲၣ်.
ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.
-
ယဟိဝၤပှၤအုၣ်အသး လၢအမ့ၢ်ပှၤသးစၢ်တဖၣ်အံၤ အဝဲသ့ၣ် မၤနၢၤကွံာ် အတၢ်ပျံၤတၢ်ဖုးဒ်လဲၣ်.
ဖး ယၡါယၤ ၄၁:၁၀ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
နလဲၤစံၣ်တဲၤတဲလီၤတၢ် မ့ၢ်တဘူၣ်ဘၣ်န့ၣ် ဘၣ်မနုၤအဃိ နကြၢးဃ့ထုကဖၣ်လဲၣ်.
မ့ၢ်နသ့ၣ်ညါဧါ
ယဟိဝၤပှၤအုၣ်အသး အါဂၤန့ၣ် လၢညါ အဝဲသ့ၣ် ဆိကမိၣ်ဝဲလၢ အဝဲသ့ၣ် စံၣ်တဲၤတဲလီၤတၢ် တဘူၣ်ဘၣ်. အဒိ ပိာ်ခွါတဂၤ လၢအမံၤမ့ၢ်စၤက့ န့ၣ်အတၢ်သးဒူ တအိၣ်ဘၣ် ဒီးအတဲတၢ်ဒီးပှၤဂၤ တဘူၣ်ဘၣ်. ဘၣ်ဆၣ် လၢခံ အဝဲမၤလိလံာ်စီဆှံ ဒီးအတဲဝဲလၢ “ယပျံၤတၢ်သနာ်က့ ယစးထီၣ် တဲဘၣ်ပှၤဂၤလၢ တၢ်လၢယမၤလိဘၣ်တဖၣ်. ယတဲဘၣ်ပှၤဂၤ ဘၣ်ဃးဒီး လံာ်စီဆှံအဂ့ၢ်အဃိ ယတၢ်သးဒူ အိၣ်အါထီၣ်. ယကမၢကမၣ်ညါ. ဒီးယတဲဘၣ်ပှၤဂၤလၢ ယတၢ်စူၢ်တၢ်နာ် အဂ့ၢ်အဃိ အမၤဂၢၢ်ကျၢၤထီၣ် ယတၢ်နာ်.”
၄. တဲတၢ်လၢ တၢ်ပာ်ကဲအပူၤ
တချုးလၢ နတဲဘၣ်ပှၤဂၤလၢ တၢ်သးခုကစီၣ်ဒံးဘၣ်န့ၣ် နကဘၣ် ဆိကမိၣ်ပာ်စၢၤ တၢ်လၢနကတဲတဖၣ်. ဘၣ်ဆၣ် အရ့ဒိၣ်စ့ၢ်ကီးလၢ နကဘၣ်တဲတၢ်သ့သ့ဘၣ်ဘၣ် ဒီးတဲတၢ်လၢ တၢ်ပာ်ကဲအပူၤ. ဖး ၂ တံၤမသ့း ၂:၂၄ ဒီး ၁ ပ့းတရူး ၃:၁၅ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
-
ဖဲနတဲဘၣ်ပှၤဂၤလၢ လံာ်စီဆှံအဂ့ၢ်အခါ နမၤထွဲ လံာ်စီဆှံအဆၢတဖၣ်အံၤ ကသ့ဒ်လဲၣ်.
-
နဘူးနတံၢ် ဒီးနသကိးတနီၤ မ့ၢ်တအဲၣ်ဒိးတူၢ်လိာ် တၢ်လၢနတဲဘၣ်န့ၣ် နကဘၣ်မၤဒ်လဲၣ်. နတကြၢးမၤ မနုၤဘၣ်လဲၣ်.
-
တဘၣ်တဲပှၤဂၤလၢ အတၢ်စူၢ်တၢ်နာ် တဘၣ်ဘၣ်န့ၣ်တဂ့ၤ. ပမ့ၢ်သံကွၢ် အဝဲသ့ၣ်တၢ်သံကွၢ် ဒီးတဲတၢ် သ့သ့ဘၣ်ဘၣ် လၢတၢ်ပာ်ကဲအပူၤန့ၣ် ဘၣ်မနုၤအဃိ အဂ့ၤဒိၣ်လဲၣ်.
၅. ပမ့ၢ်တဲဘၣ်ပှၤဂၤလၢ တၢ်သးခုကစီၣ်န့ၣ် ပကဒိးန့ၢ်ဘၣ် တၢ်သးခု
ယဟိဝၤယွၤ ဟ့ၣ်လီၤယ့ၣ်ၡူး မူဒါတခါလၢ အကတဲဘၣ်ပှၤဂၤ လၢတၢ်သးခုကစီၣ်. မူဒါတခါအံၤ ယ့ၣ်ၡူးထံၣ်ဝဲဒ်လဲၣ်. ဖး ယိၤဟၣ် ၄:၃၄ ဝံၤဒီး တဲသကိး တၢ်သံကွၢ် လၢလာ် တဖၣ်အံၤ–
-
ပမ့ၢ်အီၣ်တၢ်အီၣ် လၢအန့ၢ်ဂံၢ်န့ၢ်ဘါန့ၣ် ပကဆဲးအိၣ်မူဘၣ် ဒီးပကအိၣ်ဒီး တၢ်သးခု. ယ့ၣ်ၡူး တဲဝဲလၢ ပမၤကစၢ်ယွၤ အတၢ်ဘၣ်သး လၢအပၣ်ဃုာ်ဒီး ပတဲဘၣ်ပှၤဂၤလၢ တၢ်သးခုကစီၣ်န့ၣ် အလီၤဂာ်ဒ်သိးဒီး ပအီၣ်တၢ်အီၣ် လၢအန့ၢ်ဂံၢ်န့ၢ်ဘါ. ဘၣ်မနုၤအဃိ ယ့ၣ်ၡူးတဲဝဲ ဒ်န့ၣ်လဲၣ်.
-
နမ့ၢ်တဲဘၣ်ပှၤဂၤလၢ တၢ်သးခုကစီၣ်န့ၣ် နဆိကမိၣ် နကဒိးန့ၢ်ဘၣ် တၢ်သးခု ဒ်လဲၣ်တကလုာ်လဲၣ်.
တၢ်ဟ့ၣ်ကူၣ်
-
နကဘၣ် စးထီၣ်တဲတၢ်ဒီး ပှၤဂၤဒ်လဲၣ်န့ၣ် မၤထွဲ တၢ်ဟ့ၣ်ကူၣ် လၢနမၤလိဘၣ်အီၤ လၢနွံဖးဖီတၢ်အိၣ်ဖှိၣ်.
-
ဟ့ၣ်ထီၣ်နမံၤလၢ နကပၣ်ဃုာ်လၢ ကၠိဖိတၢ်ရဲၣ်တၢ်ကျဲၤ လၢနွံဖးဖီတၢ်အိၣ်ဖှိၣ်. ကၠိဖိမူဒါတဖၣ်အံၤ ကမၤစၢၤနၤဒ်သိး နကအိၣ်ကတဲာ်ကတီၤသးလၢ နကတဲဘၣ်ပှၤဂၤ တၢ်လၢနမၤလိဘၣ်တဖၣ်.
-
တၢ်ဂ့ၢ်ခိၣ်တီ လၢအမ့ၢ် “ပှၤတနီၤတဲဝဲလၢ” မ့တမ့ၢ် “ပှၤတနီၤ သံကွၢ်ဝဲလၢ” န့ၣ်အိၣ်ဒီး တၢ်သံကွၢ်လၢ ပှၤသံကွၢ်ညီနုၢ်ဝဲ ဒီးတၢ်ကတိၤလၢ အပာ်ဖျါထီၣ် ပှၤဂၤ အတၢ်ထံၣ်. သူတၢ်သ့ၣ်တဖၣ်အံၤ လၢကမၤစၢၤနၤဒ်သိး နကတဲတၢ်ဒီးပှၤဂၤ.
ပှၤတနီၤ သံကွၢ်ဝဲလၢ– “နအိၣ်ဆူၣ်ဧါ, နတၢ်အိၣ်သးမၤသးဒ်လဲၣ်.”
-
ပှၤမ့ၢ်သံကွၢ်နၤ ဒ်အံၤန့ၣ် နသူတၢ်ခွဲးတၢ်ယာ်အံၤ လၢကတဲဘၣ်အီၤ ဘၣ်ဃးဒီး တၢ်လၢနမၤလိဘၣ် လၢလံာ်စီဆှံပူၤ ကသ့ဒ်လဲၣ်.
တၢ်ဂ့ၢ်လၢအရ့ဒိၣ်
နမ့ၢ်တဲဘၣ်ပှၤဂၤလၢ တၢ်သးခုကစီၣ်န့ၣ် နကဒိးန့ၢ်ဘၣ် တၢ်သးခု ဒီးနမ့ၢ်မၤကွၢ်န့ၣ် အတကီ ဒ်သိးဒီး နဆိကမိၣ်ဘၣ်.
တၢ်ကွၢ်ကဒါက့ၤ
-
ဘၣ်မနုၤအဃိ ပဘၣ်တဲဘၣ်ပှၤဂၤလၢ တၢ်သးခုကစီၣ်လဲၣ်.
-
ဖဲနတဲဘၣ်ပှၤဂၤလၢ တၢ်သးခုကစီၣ်အခါ နတဲအီၤသ့သ့ဘၣ်ဘၣ် လၢတၢ်ပာ်ကဲအပူၤ ကသ့ဒ်လဲၣ်.
-
နစံၣ်တဲၤတဲလီၤတၢ် မ့ၢ်တဘူၣ်ဘၣ်န့ၣ် နကဘၣ်မၤဒ်လဲၣ်.
ဃုသ့ၣ်ညါ
ကွၢ်တၢ်ဂီၤမူ လၢအပာ်ဖျါထီၣ်ဝဲ တၢ်ဟ့ၣ်ကူၣ်လွံၢ်ခါ လၢကမၤစၢၤနၤဒ်သိး နကသူ jw.org ခးက့ ဒီးတဲဘၣ်ပှၤဂၤ လၢတၢ်သးခုကစီၣ်.
ဖးတၢ်ဂ့ၢ် လၢအပာ်ဖျါထီၣ်ဝဲ တၢ်ဂ့ၤတၢ်ဝါလွံၢ်ခါ လၢအကမၤစၢၤနၤဒ်သိး နကတဲဘၣ်ပှၤဂၤလၢ တၢ်သးခုကစီၣ်.
“နကဲထီၣ် ပှၤမၤညၣ်ပှၤကညီ လၢအဂ့ၤကတၢၢ် တဂၤလံဧါ” (တၢးထီခိးတၢ်, လါစဲးပတ့ဘၢၣ် ၂၀၂၀)
နမ့ၢ်ကဲဖိသၣ်သနာ်က့ ဒ်သိး နကတဲဘၣ်ပှၤဂၤလၢ တၢ်သးခုကစီၣ် ဒူဒူအဂီၢ် ကွၢ်တၢ်ဂီၤမူ လၢအပာ်ဖျါထီၣ် ပှၤလၢအအိၣ်လၢ လံာ်စီဆှံအပူၤ အဒိအတဲာ်.
နဟံၣ်ဖိဃီဖိ လၢအတမၤလိဘၣ် ယဟိဝၤယွၤ အဂ့ၢ်ဒံးဘၣ်န့ၣ် ဒ်သိးနတဲဘၣ် အဝဲသ့ၣ်လၢ လံာ်စီဆှံတၢ်မ့ၢ်တၢ်တီ ကသ့အဂီၢ် ဖးကွၢ်တၢ်ဂ့ၢ် လၢလာ်အံၤ.
“ဂုာ်ကျဲးစၢးဒ်သိး ကထုးန့ၢ် နဘူးနတံၢ်လၢ တစူၢ်တနာ်တၢ်ဘၣ်တဖၣ် အသး” (တၢးထီခိးတၢ်, လါမၢ်ၡး ၁၅, ၂၀၁၄)
တၢ်ဂ့ၤအဂၤလၢ နကဘၣ်သး
တၢ်သံကွၢ်လၢ ညီနုၢ်ပှၤသံကွၢ်တဖၣ်
ယဟိဝၤပှၤအုၣ်အသးတဖၣ် မၤလိလံာ်စီဆှံဒီးပှၤဂၤန့ၣ် မ့ၢ်မနုၤလဲၣ်
ယဟိဝၤပှၤအုၣ်အသးတဖၣ် ကွဲးမုာ်ပှၤဂၤလၢ ကမၤလိလံာ်စီဆှံ အတၢ်ရဲၣ်တၢ်ကျဲၤလၢ တလိၣ်ဟ့ၣ်အပှ့ၤဘၣ်န့ၣ် နသူ လံာ်စီဆှံလၢ နဘၣ်သးအီၤ တဘ့ၣ်ဘ့ၣ်သ့လီၤ. နကွဲမုာ် နဟံၣ်ဖိဃီဖိ ဒီးနတံၤသကိးတဖၣ်သ့လီၤ.
