တၢ်မၤလိ ၁
တၢ်ကတိၤအိးထီၣ်လၢ အထုးန့ၢ်ပှၤသး
မၤတၢ် ၁၇:၂၂
ဘၣ်မၤဒ်လဲၣ်– နတၢ်ကတိၤအိးထီၣ်န့ၣ် ကဘၣ်ထုးန့ၢ်ပှၤသး, ကဘၣ်ပာ်ဖျါထီၣ်တၢ်ဂ့ၢ်မိၢ်ပှၢ် ဒီးကဘၣ်ပာ်ဖျါထီၣ်လၢ ဘၣ်မနုၤအဃိ နပှၤဒိကနၣ်တၢ်ဖိတဖၣ် ကြၢးသးအိၣ်ဝဲတၢ်ဂ့ၢ်အံၤလဲၣ်.
မၤဒ်အံၤတက့ၢ်–
-
ပာ်ဖျါထီၣ်တၢ်ဂ့ၢ်လီၤတံၢ်လီၤဆဲး ဒ်သိးကထုးန့ၢ်ပှၤသး. ဃုထၢပာ်တၢ်သံကွၢ်တဖျၢၣ်, တၢ်ဂ့ၢ်တၢ်ကျိၤတမံၤမံၤ, ပှၤဂၤအတၢ်လဲၤခီဖျိတခါခါ မ့တမ့ၢ် တၢ်ကစီၣ်တခါခါ ဒ်သိးကထုးန့ၢ် နပှၤဒိကနၣ်တၢ်ဖိတဖၣ်အသးန့ၣ်တက့ၢ်.
-
ပာ်ဖျါထီၣ် နတၢ်ဂ့ၢ်ခိၣ်တီ. ဖဲနစးထီၣ်တၢ်ကတိၤအိးထီၣ်အခါ မၤစၢၤနပှၤဒိကနၣ်တၢ်ဖိတဖၣ် ဒ်သိးအဝဲသ့ၣ်ကသ့ၣ်ညါ တၢ်ဂ့ၢ်မိၢ်ပှၢ်လၢနတဲ ဒီးကနၢ်ပၢၢ်ဝဲလီၤတံၢ်လီၤဆဲးန့ၣ်တက့ၢ်.
-
ပာ်ဖျါထီၣ်လၢ ဘၣ်မနုၤအဃိ တၢ်ဂ့ၢ်မိၢ်ပှၢ်အံၤ အရ့ဒိၣ်လဲၣ်. တၢ်ဂ့ၢ်လၢနတဲတဖၣ်န့ၣ် ကဘၣ်မ့ၢ်တၢ်ဂ့ၢ်လၢ အကဲဘျုးလၢ နပှၤဒိကနၣ်တၢ်ဖိတဖၣ်အဂီၢ်လီၤ. အဝဲသ့ၣ်မ့ၢ်နၢ်ပၢၢ်ဝဲ တၢ်ဂ့ၢ်မိၢ်ပှၢ်လၢ နတဲတဖၣ်မး ကကဲဘျုးလၢအဝဲသ့ၣ်အဂီၢ်လီၤ.
