၁ ၡမူၤအ့လး ၂:၁-၃၆
၂ နီၢ်ဃးနၤ ဃ့ထုကဖၣ်ဝဲလၢ
“ယသးပှဲၤဒီး တၢ်သးခုလၢ ယဟိဝၤယွၤအဃိ,+ယဒိးန့ၢ်ဘၣ် တၢ်ဂံၢ်တၢ်ဘါ* ခီဖျိလၢ ယဟိဝၤယွၤအဃိလီၤ.
ဒ်သိးယကစံးဆၢက့ၤ ယဒုၣ်ယဒါတဖၣ်အဂီၢ် ယထးခိၣ်အိးထီၣ် အသးလံ.
ယသးခုဒိၣ်မး ခီဖျိလၢ နတၢ်အုၣ်က့ၤခီၣ်က့ၤ အဃိလီၤ.
၂ ပှၤလၢ အစီဆှံ ဒ်ယဟိဝၤယွၤအသိးန့ၣ် တအိၣ်နီတဂၤဘၣ်,ပှၤလီၤဂာ်ဒီးနၤန့ၣ် တအိၣ် နီတဂၤဘၣ်.+
ဒီးလၢၢ်လၢအကျၢၤ ဒ်ပကစၢ်ယွၤအသိးန့ၣ် တအိၣ်ဘၣ်.+
၃ တဘၣ်တဲတၢ်လၢ တၢ်ပာ်ထီၣ်ထီသး အပူၤလၢၤတဂ့ၤ.
တၢ်ပာ်ဒိၣ်ပာ်ထီသး အတၢ်ကတိၤန့ၣ် မ်အသုတဟးထီၣ်လၢ သုထးခိၣ် နီတဖျၢၣ်တဂ့ၤ.
ယဟိဝၤယွၤန့ၣ် မ့ၢ်ကစၢ်လၢ အသ့ၣ်ညါတၢ်+ဒီးတၢ်လၢ ပှၤမၤဝဲတဖၣ်န့ၣ် အဝဲသမံသမိးဝဲ တီတီလီၤ.
၄ ပှၤလၢ အဂံၢ်ဆူၣ်ဘါဆူၣ် အချံၣ်တဖၣ်န့ၣ် ကၢ်ကွံာ်လံ.
ဘၣ်ဆၣ် ပှၤလၢအဂံၢ်စၢ်ဘါစၢ်* တဖၣ်န့ၣ် န့ၢ်ဘၣ်က့ၤ တၢ်ဂံၢ်တၢ်ဘါလီၤ.+
၅ ပှၤလၢအအီၣ်ဘၣ်တၢ် ဘျဲဘျဲတဖၣ်န့ၣ် ဘၣ်ဒိးငါလီၤအသး ဒ်သိး ကန့ၢ်ဘၣ်ကိၣ်အဂီၢ်,မ့မ့ၢ်ပှၤလၢ တၢ်သၣ်ဝံၤအသးတဖၣ်န့ၣ် တၢ်တသၣ်ဝံၤအသး လၢၤဘၣ်.+
ပှၤတူာ်ဖိ အိၣ်ဖျဲၣ်ထီၣ်ဝဲ ဖိခွါနွံဂၤ,+မ့မ့ၢ်ပှၤလၢအဖိခွါ အိၣ်အါတဂၤန့ၣ် ဘၣ်အိၣ်သယုၢ်သညိ က့ၤဝဲလီၤ.
၆ ယဟိဝၤယွၤ မၤသံတၢ်သ့ ဒီးမၤမူတၢ်သ့,အဝဲဆှၢလီၤပှၤလၢ တၢ်သွၣ်ခိၣ်* အပူၤသ့ ဒီးမၤသမူထီၣ်က့ၤပှၤ သ့လီၤ.+
၇ ယဟိဝၤယွၤ ဒုးဖှီၣ်လီၤတၢ်သ့ ဒီးဒုးထူးဒုးတီၤတၢ်သ့,+အဝဲဆီၣ်လီၤပှၤသ့ ဒီးအဝဲ ပာ်ထီၣ်ထီပှၤသ့လီၤ.+
၈ အဝဲဝံၣ်ဆၢထၢၣ် ပှၤလၢအပတီၢ်ဖုၣ်တဖၣ်လၢ အအိၣ်လၢ ဟီၣ်ခိၣ်ကမူၣ်အကျါဒီးအဝဲစိာ်ထီၣ် ပှၤဖှီၣ်ဖိယာ်ဖိလၢ အအိၣ်လၢ တၢ်ကမှံၤအကျါ+ဒ်သိး ကဒုးဆ့ၣ်နီၤအဝဲသ့ၣ်လၢ ပှၤဒိၣ်ပှၤပှၢ်တဖၣ်အကျါဒီးဟ့ၣ်လီၤအဝဲသ့ၣ် အလီၢ်အလၤလၢ အပှဲၤဒီးတၢ်လၤကပီၤလီၤ.
ဟီၣ်ခိၣ်အထူၣ်တဖၣ်န့ၣ် မ့ၢ်ယဟိဝၤယွၤအတၢ်+ဒီးလၢတၢ်သ့ၣ်တဖၣ်အံၤ အဖီခိၣ်န့ၣ် ယွၤသူၣ်ထီၣ်ဟီၣ်ခိၣ်လီၤ.
၉ အဝဲ ဟံးစုနဲၣ်ကျဲ ပှၤလၢအသးတီဒီးအီၤတဖၣ် အခီၣ်ခါ,+မ့မ့ၢ် ပှၤအၢပှၤသီန့ၣ် ကဘၣ်တၢ်မၤဟးဂီၤအီၤလၢ တၢ်ခံးကျါလီၤ.+
ပှၤတဂၤ မၤနၢၤတၢ်လၢ အနီၢ်ကစၢ် အဂံၢ်အဘါ တသ့ဘၣ်.+
၁၀ ယဟိဝၤယွၤ ကမၤလီၤကလဲ ပှၤလၢအထီဒါအီၤတဖၣ်,+အဝဲဒုးသီၣ်ထီၣ်လီ ထီဒါအဝဲသ့ၣ်လၢမူခိၣ်လီၤ.+
ယဟိဝၤယွၤ ကစံၣ်ညီၣ် ဟီၣ်ခိၣ်ဒီဘ့ၣ်ညါ,+အဝဲကဟ့ၣ် တၢ်စိတၢ်ကမီၤလၢ အစီၤပၤလၢ အပာ်ထီၣ်ဝဲ တဂၤ အအိၣ်+ဒီးကဟ့ၣ် အပှၤဒိးဖှူသးတဂၤလၢ တၢ်ဂံၢ်တၢ်ဘါလီၤ.”*+
၁၁ ဒီးစီၤအ့လကါနၤ က့ၤကဒါလၢအဟံၣ် လၢဝ့ၢ်ရၤမါန့ၣ်လီၤ. မ့မ့ၢ်အဖိခွါန့ၣ် မၤတၢ်လၢ ယဟိဝၤယွၤအဂီၢ်+ လၢပှၤလုၢ်တၢ်ဒိၣ် စီၤဧ့လံၤ အတၢ်ဟံးစုနဲၣ်ကျဲ အဖီလာ်လီၤ.
၁၂ စီၤဧ့လံၤ အဖိခွါတဖၣ်န့ၣ် မ့ၢ်ပှၤအၢပှၤသီလီၤ.+ အဝဲသ့ၣ် တပာ်ကဲ ယဟိဝၤယွၤ နီတစဲးဘၣ်.
၁၃ ဘၣ်ဃးဒီး တၢ်လုၢ်တၢ်ပာ် အကူာ်အခီလၢ ပှၤလုၢ်တၢ်ဒိၣ်တဖၣ် ကဘၣ်ဒိးန့ၢ်ဘၣ်လၢ ပှၤဂၤအအိၣ်န့ၣ် အဝဲသ့ၣ်မၤဝဲ ဒ်အံၤလီၤ.+ ပှၤတဂၤဂ့ၤ တဂၤဂ့ၤ မ့ၢ်ဟ့ၣ်လုၢ်ထီၣ် တၢ်လုၢ်တၢ်ပာ်န့ၣ် ဖဲတၢ်ညၣ် ဘၣ်တၢ်ချီထီၣ်အီၤအခါ ပှၤလုၢ်တၢ်ဒိၣ် အပှၤမၤစၢၤတၢ်တဂၤ ဟဲစိာ်ဒီး နီၣ်ဆဲးဖးဒိၣ်လၢ အမဲအိၣ်သၢဘိလီၤ.
၁၄ ဒီးဆဲးလီၤဝဲလၢ သပၢၤတဖျၢၣ်ဂ့ၤ တဖျၢၣ်ဂ့ၤအပူၤလီၤ. ဒီးတၢ်လၢ နီၣ်ဆဲး ဆဲးဘၣ်ဝဲ တလိၣ်လိၣ်န့ၣ် အထုးထီၣ်ဝဲ ဒီးပှၤလုၢ်တၢ်ဒိၣ် ဟံးန့ၢ်ဝဲလၢ အနီၢ်ကစၢ်အဂီၢ်လီၤ. ဒီးအဝဲသ့ၣ်မၤ ပှၤအံၣ်စရ့လးဖိ လၢအလဲၤဝဲလၢ ဝ့ၢ်ၡံလိၤ ကိးဂၤဒဲး ဒ်န့ၣ်လီၤ.
၁၅ တကးဒံးဘၣ် ထီဘိန့ၣ် တချုးလၢ ပှၤလၢအဟ့ၣ် လုၢ်ထီၣ်တၢ်တဂၤ ဒွဲၣ်အူထီၣ် တၢ်လုၢ်တၢ်ပာ်အသိ ဒံးဘၣ်န့ၣ်+ ပှၤလုၢ်တၢ်ဒိၣ် အပှၤမၤစၢၤတၢ်တဂၤ ဟဲတဲအီၤလၢ “နကဘၣ်ဟ့ၣ်လီၤ တၢ်ညၣ်သံသိလၢ ပှၤလုၢ်တၢ်ဒိၣ် ကကၣ်ဝဲအဂီၢ်. တၢ်ညၣ်လၢ ပှၤချီပာ်စၢၤဝဲန့ၣ် အဝဲတဟံးဝဲဘၣ်. အကဟံးန့ၢ်ဝဲ ထဲတၢ်ညၣ်သံသိလီၤ.”
၁၆ ဒီးပိာ်ခွါတဂၤန့ၣ် တဲအီၤလၢ “ပျဲပှၤလုၢ်ထီၣ်ဆိ တၢ်လုၢ်တၢ်ပာ်အသိ+ ဝံၤမး ဟံးန့ၢ်တၢ်လၢ နလီကီမီၤ.” ဖဲန့ၣ်အခါ ပှၤမၤစၢၤတၢ်တဂၤန့ၣ် တဲဝဲလၢ “တန့ၢ်ဘၣ်. ဟ့ၣ်လီၤယၤခဲအံၤ. နမ့ၢ်တဟ့ၣ်ယၤဘၣ်န့ၣ် ယကဟံးန့ၢ်ဆူၣ် နတၢ်လီၤ.”
၁၇ မ့ၢ်လၢ ပှၤပိာ်ခွါတဖၣ်န့ၣ် တပာ်ကဲ တၢ်လုၢ်လၢ ပှၤလုၢ်ထီၣ်ဝဲလၢ ယဟိဝၤယွၤ အဂီၢ်ဘၣ်အဃိ ယဟိဝၤယွၤ ထံၣ်ဝဲလၢ ပှၤလုၢ်တၢ်ဒိၣ် အပှၤမၤစၢၤတၢ်တဖၣ်န့ၣ် အတၢ်ဒဲးဘး ဒိၣ်မးလီၤ.+
၁၈ ဒီးစီၤၡမူၤအ့လး မ့ၢ်ဖိသၣ်ပိာ်ခွါဖိတဂၤ လၢအမၤတၢ်လၢ+ ယဟိဝၤယွၤ အမဲာ်ညါလီၤ. အဝဲကၤဝဲဒီး အ့ဖိးလၢအညၣ်ဂ့ၤ တဘ့ၣ်လီၤ.+
၁၉ ဒီးတနံၣ်ဘၣ်တနံၣ်န့ၣ် အမိၢ်ထါန့ၢ်အီၤ ဆ့ကၤ လၢအစုဒုၣ်တအိၣ်ဘၣ် တဘ့ၣ်လီၤ. ဒီးဖဲအမိၢ် ဒီးအပၢ်လဲၤဝဲ ဒ်သိး ကဟ့ၣ်လုၢ်ထီၣ်ဝဲ တနံၣ်တဘျီ အတၢ်လုၢ်တၢ်ပာ်အခါ+ အမိၢ်ဟဲစိာ်န့ၢ်အီၤ ဆ့ကၤတဘ့ၣ်လီၤ.
၂၀ စီၤဧ့လံၤ ဆိၣ်ဂ့ၤ စီၤအ့လကါနၤ ဒီးအမါ ဒီးတဲဝဲလၢ “ဖိခွါလၢ နမါဒုးလိၢ်ဝဲလၢ ယဟိဝၤယွၤအအိၣ်န့ၣ် မ်ယဟိဝၤယွၤ ဟ့ၣ်နၤ ဖိတဂၤလၢအလီၢ် ခီဖျိလၢ နမါတဂၤအံၤ န့ၣ်တက့ၢ်.”+ ဒီးအဝဲသ့ၣ် က့ၤကဒါက့ၤဝဲလၢ အဟံၣ်လီၤ.
၂၁ ယဟိဝၤယွၤ နီၣ်ဘၣ်က့ၤ နီၢ်ဃးနၤအဃိ နီၢ်ဃးနၤဒၢထီၣ်ဝဲလီၤ.+ ဒီးအဝဲအိၣ်ဖျဲၣ် အါထီၣ်ကဒီး ဖိခွါသၢဂၤ ဒီးဖိမုၣ်ခံဂၤလီၤ. ဒီးဖိသၣ် စီၤၡမူၤအ့လး ဆဲးဒိၣ်ထီၣ်လၢ ယဟိဝၤယွၤ အမဲာ်ညါလီၤ.+
၂၂ စီၤဧ့လံၤ အသးပှၢ် ဒိၣ်မးလံ. ဒီးတၢ်လၢ အဖိခွါတဖၣ် မၤဝဲလၢ ပှၤအံၣ်စရ့လးဖိ အဖီခိၣ်+ ဒီးအဖိခွါတဖၣ် မံဃုာ်ဒီး ပိာ်မုၣ်တဖၣ်လၢ အမၤတၢ်လၢ တၢ်အိၣ်ဖှိၣ်အဒဲ* အတၢ်နုာ်လီၤအလီၢ် အဂ့ၢ်န့ၣ်+ အနၢ်ဟူဘၣ်ဝဲ ခဲလၢာ်လီၤ.
၂၃ စီၤဧ့လံၤ တဲဘၣ်အဝဲသ့ၣ်လၢ “ဘၣ်မနုၤအဃိ သုဆဲးမၤ တၢ်ဒ်အံၤလဲၣ်. သုဂ့ၢ်သုကျိၤလၢ ယနၢ်ဟူဘၣ်လၢ ပှၤကိးဂၤဒဲးအအိၣ်န့ၣ် အတဂ့ၤဘၣ်.
၂၄ ဖိခွါသ့ၣ်ဧၢ, မၤဒ်န့ၣ်လၢၤတဂ့ၤ. တၢ်ကစီၣ်လၢ ယနၢ်ဟူဘၣ် လၢအရၤလီၤအသး လၢယဟိဝၤယွၤ အပှၤဂီၢ်မုၢ်အကျါန့ၣ် တဂ့ၤဘၣ်.
၂၅ ပှၤတဂၤ မ့ၢ်မၤကမၣ်ဘၣ် ပှၤအဂၤတဂၤန့ၣ် ပှၤတဂၤဂၤ ဃ့န့ၢ်တၢ်လၢအဂီၢ် လၢယဟိဝၤယွၤ အအိၣ်သ့လီၤ. ဘၣ်ဆၣ် ပှၤတဂၤ မ့ၢ်မၤ တၢ်ဒဲးဘး လၢအထီဒါ ယဟိဝၤယွၤန့ၣ်+ မတၤကဃ့န့ၢ်တၢ်လၢ အဂီၢ်လဲၣ်.” ဘၣ်ဆၣ် ခီဖျိလၢ ယဟိဝၤယွၤ ဆၢတဲာ်လီၤပာ်စၢၤအသးလၢ အကမၤသံ အဝဲသ့ၣ်အဃိ+ အဝဲသ့ၣ် တဒိကနၣ် အပၢ်ကလုၢ်ဘၣ်.
၂၆ ဒီးဖိသၣ်စီၤၡမူၤအ့လး ဆဲးဒိၣ်ထီၣ်ဝဲလီၤ. ယဟိဝၤယွၤ ဒီးပှၤကညီ ဘၣ်သူၣ်ဘၣ်သးအီၤ ဒံးယံာ်ဒံးဒိၣ်ထီၣ်လီၤ.+
၂၇ ပှၤလၢ ကစၢ်ယွၤဆှၢလီၤအီၤတဂၤ ဟဲလၢ စီၤဧ့လံၤအအိၣ် ဒီးတဲအီၤလၢ “ယဟိဝၤယွၤ တဲဝဲလၢ ‘ဖဲနဖုဖးဒိၣ် အဒူၣ်ဖိထၢဖိတဖၣ် အိၣ်လၢ ကီၢ်အဲၤကူပတူးအပူၤ ဒီးမၤတၢ်ဒ် ကုၢ်တဖၣ်လၢ ဖၤရိၤအဂီၢ်အခါ မ့ၢ်ယတလီၣ်ဖျါထီၣ်ယသး လၢအဝဲသ့ၣ် အအိၣ်ဘၣ်ဧါ.+
၂၈ ဒီးနဖုဖးဒိၣ် ဘၣ်တၢ်ဃုထၢထီၣ်အီၤလၢ ပှၤအံၣ်စရ့လးဖိ အဒူၣ်ခဲလၢာ်အကျါ+ ဒ်သိး အကကဲထီၣ် ယပှၤလုၢ်တၢ်ဒိၣ်, ကဟ့ၣ်လုၢ်ထီၣ်တၢ်လၢ ယတၢ်လုၢ်လီၢ် အဖီခိၣ်,+ ကဒွဲၣ်ထီၣ်တၢ်နၢမူ ဒီးကသိးဝဲ အ့ဖိးတဘ့ၣ်လၢ ယမဲာ်ညါလီၤ. အဃိ တၢ်လုၢ်တၢ်ပာ် ခဲလၢာ်လၢ ပှၤအံၣ်စရ့လးဖိ ဟဲစိာ်ဝဲလၢယအိၣ် ဒ်သိးအဝဲသ့ၣ် ကဒွဲၣ်အူထီၣ်အီၤ ဒ်တၢ်လုၢ်တၢ်ပာ် အသိးန့ၣ် ယဟ့ၣ်လီၤ နဖုဖးဒိၣ် ဒီးအစၢၤအသွဲၣ်တဖၣ် တၢ်ခွဲးတၢ်ယာ် လၢအကဟံးန့ၢ်ဝဲ တကူာ်လီၤ.+
၂၉ ယတၢ်လုၢ်တၢ်ပာ် ဒီးယတၢ်ဟ့ၣ်လုၢ်ထီၣ်တဖၣ်လၢ ယမၤလိာ်လၢ အကဘၣ် တၢ်ဟ့ၣ်လုၢ်ထီၣ်အီၤလၢ ယဟံၣ်ပူၤန့ၣ် ဘၣ်မနုၤအဃိ သုတပာ်ကဲအီၤဘၣ်လဲၣ်.+ ဘၣ်မနုၤအဃိ နပာ်ကဲ နဖိခွါတဖၣ် ဒိၣ်န့ၢ်ဒံး နပာ်ကဲယၤလဲၣ်. ဘၣ်မနုၤအဃိ သုမၤဘီၣ်ထီၣ်သုသးလၢ ယပှၤဂီၢ်မုၢ် ပှၤအံၣ်စရ့လးဖိ အတၢ်လုၢ်တၢ်ပာ် အကူာ်အခီလၢ အဂ့ၤကတၢၢ်တဖၣ်လဲၣ်.+
၃၀ “‘လၢတၢ်န့ၣ်အဃိ အံၣ်စရ့လးအကစၢ် ယဟိဝၤယွၤ ကတဲဝဲဒ်အံၤလီၤ. “နီၢ်ကီၢ်န့ၣ် လၢညါ ယတဲလၢ နဖုဖးဒိၣ်အစၢၤအသွဲၣ်တဖၣ် ဒီးနစၢၤနသွဲၣ်တဖၣ် ကလဲၤတၢ်လၢ ယမဲာ်ညါထီဘိလီၤ.”+ ဘၣ်ဆၣ် ခဲအံၤန့ၣ် ယဟိဝၤယွၤ တဲဝဲလၢ “လ့ၤတက့ၤ တၢ်တကဲထီၣ်အသး ဒ်န့ၣ်လၢၤဘၣ်. ပှၤလၢအပာ်ဖျါထီၣ် တၢ်ပာ်ကဲလၢ ယဖီခိၣ်န့ၣ် ယကပာ်ဖျါထီၣ် တၢ်ပာ်ကဲလၢ အဝဲသ့ၣ်အဖီခိၣ်လီၤ.+ မ့မ့ၢ်ပှၤလၢ အဆိကမိၣ်ဆံးယၤန့ၣ် ယတပာ်လုၢ်ပာ်ပှ့ၤ အဝဲသ့ၣ်ဘၣ်.”
၃၁ ဒိကနၣ်တက့ၢ်. ဆၢကတီၢ်ကဘၣ် ဖဲယကမၤလီၤမၢ်ကွံာ် နစိနကမီၤ ဒီးနဖုဖးဒိၣ် အစၢၤအသွဲၣ်တဖၣ် အစိအကမီၤ အဃိ လၢနစၢၤနသွဲၣ်တဖၣ်အကျါ ပှၤလၢအကအိၣ်မူ တုၤလၢ အသးပှၢ်ထီၣ်န့ၣ် တအိၣ်နီတဂၤလၢၤဘၣ်.+
၃၂ ပှၤအံၣ်စရ့လးဖိ ကဒိးန့ၢ်ဘၣ် တၢ်လၢအဂ့ၤအါမး ဘၣ်ဆၣ် နကထံၣ်ဒုၣ်ဒါတဂၤ လၢယဟံၣ်ပူၤလီၤ.+ ဒီးလၢ နစၢၤနသွဲၣ်တဖၣ်အကျါ ပှၤလၢအကအိၣ်မူ တုၤလၢ အသးပှၢ်ထီၣ်န့ၣ် တအိၣ်နီတဂၤလၢၤဘၣ်.
၃၃ ပှၤပိာ်ခွါလၢ အလီၤစၢၤလီၤသွဲၣ်လၢနၤ လၢယကပျဲ အဆဲးမၤတၢ်မၤလၢ ယတၢ်လုၢ်လီၢ်န့ၣ် ကအိၣ်ဝဲတဂၤ* ဒီးလၢအဝဲဒၣ်အဃိန့ၣ် နမဲာ်ချံကဟးဂီၤ ဒီးနသးကဘၣ်ဖှီၣ်လီၤ. ဘၣ်ဆၣ် နစၢၤနသွဲၣ် အါတက့ၢ် ကသံဝဲလၢ ပှၤကညီ အနးလီၤ.+
၃၄ ဒီးတၢ်လၢ အကမၤအသးဒီး နဖိခွါခံဂၤ လၢအမ့ၢ် စီၤဃၤဖနံ ဒီးစီၤဖံၤနဃၣ်န့ၣ် ကမ့ၢ်ဝဲ တၢ်ပနီၣ်လၢနဂီၢ်လီၤ. အဝဲသ့ၣ် ခံဂၤလၢာ် ကသံဝဲ တနံၤဃီလီၤ.+
၃၅ ဝံၤဒီး ယကဃုထၢထီၣ် ပှၤလုၢ်တၢ်ဒိၣ် လၢအသးတီတဂၤ လၢယဂီၢ်+ ဒီးအကမၤဝဲဒ် ယတၢ်ဘၣ်သး အသိးလီၤ. အစၢၤအသွဲၣ်န့ၣ် ယကဒုးကဲ အီၤလၢ ပှၤလုၢ်တၢ်ဒိၣ်တဖၣ် ထီဘိလီၤ. ဒီးအကမၤတၢ်ဒ် ပှၤလုၢ်တၢ်ဒိၣ်တဂၤ လၢပှၤလၢ ယဒိးဖှူအီၤ တဂၤအဂီၢ် ထီဘိလီၤ.
၃၆ ပှၤတဂၤဂ့ၤ တဂၤဂ့ၤလၢ အအိၣ်တ့ၢ်ဒံးလၢ နစၢၤနသွဲၣ်တဖၣ် အကျါန့ၣ် ကချံးလီၤအခီၣ်လၢ ပှၤလုၢ်တၢ်ဒိၣ် တဂၤန့ၣ်အအိၣ် ဒ်သိး ကဃ့တၢ်မၤလၢ အန့ၢ်စ့တစဲး ဒီးကိၣ်တလိၣ်အဂီၢ်လီၤ. ဒီးအကတဲဝဲလၢ “ဝံသးစူၤ ဟ့ၣ်ယၤမူဒါ ဒ်ပှၤလုၢ်တၢ်ဒိၣ်အသိး ဒ်သိး ယကအီၣ်ဘၣ်ကိၣ် တစဲးအဂီၢ်မီၤ.”’”+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ယနၢၤတဘိ ဘၣ်တၢ်ပာ်ထီၣ်ထီအီၤ ခီဖျိလၢယဟိဝၤယွၤအဃိ.”
^ မ့ၢ်စ့ၢ်ကီး “ပှၤလၢအလီၤဃံၢ်.”
^ လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.
^ အခီပညီလိၤလိၤ “ကပာ်ထီၣ်ထီအနၢၤတဘိ.”
^ အဲၣ်ဒိးတဲဝဲ ဒဲစီဆှံ.
^ ဘၣ်သ့ၣ်သ့ၣ် ကအါန့ၢ်ဒံး ပိာ်ခွါတဂၤ.
