လူၤကၣ် ၄:၁-၄၄
-
မုၣ်ကီၤလံၢ် လ့ပစီယ့ၣ်ၡူး (၁-၁၃)
-
ယ့ၣ်ၡူးစံၣ်တဲၤတဲလီၤတၢ်လၢ ကၤလံၤလါအပူၤ (၁၄, ၁၅)
-
ပှၤအိၣ်လၢ ဝ့ၢ်နစၤရ့းအပူၤန့ၣ် တတူၢ်လိာ်ယ့ၣ်ၡူးဘၣ် (၁၆-၃၀)
-
လၢဝ့ၢ်ကပ့းရနီၣ် အဘူၣ်ဘျီၣ်အပူၤ (၃၁-၃၇)
-
စီၤၡံမိၣ် အမံၤပှၢ်ပိာ်မုၣ် ဒီးပှၤအဂၤတဖၣ် ဘၣ်တၢ်မၤဘျါက့ၤ (၃၈-၄၁)
-
ပှၤဂီၢ်မုၢ်တဖၣ် ထံၣ်ယ့ၣ်ၡူးအိၣ်လၢ တၢ်လီၢ်လၢ ပှၤတအိၣ်နီတဂၤဘၣ်အလီၢ် (၄၂-၄၄)
၄ ယ့ၣ်ၡူး ပှဲၤဝဲဒီးသးစီဆှံ ဒီးဟးထီၣ်ဝဲလၢ ထံကျိယၢ်ဒ့ၣ်အပူၤလီၤ. ဒီးသးစီဆှံ ဆှၢထီၣ်အီၤလၢ ပှၢ်မုၢ်ကနၢ+
၂ အသီ ၄၀ လီၤ. ဖဲန့ၣ်ဒီတကတီၢ်န့ၣ် အဝဲတအီၣ်တၢ် နီတမံၤဘၣ်. ဖဲမုၢ်နံၤတဖၣ်အံၤ ပှဲၤထီၣ်အခါ အဝဲအဲၣ်ဒိးအီၣ်တၢ် ဒီးမုၣ်ကီၤလံၢ်ဟဲလ့ပစီအီၤလီၤ.+
၃ မုၣ်ကီၤလံၢ်တဲအီၤလၢ “နမ့မ့ၢ် ကစၢ်ယွၤအဖိခွါန့ၣ် မၢလၢၢ်တဖျၢၣ်အံၤ ကဲထီၣ်ကိၣ်တလိၣ်သၢၤ.”
၄ ဘၣ်ဆၣ် ယ့ၣ်ၡူး တဲဆၢက့ၤအီၤလၢ “တၢ်ကွဲးအသးအိၣ်ဝဲလၢ ‘ပှၤဟီၣ်ခိၣ်ဖိ တမူဝဲထဲလၢ ကိၣ်အဃိဘၣ်.’”+
၅ ဒီးမုၣ်ကီၤလံၢ် လဲၤကိးအီၤလၢ ကစၢၢ်ခိၣ် ဒီးဒုးနဲၣ်အီၤလၢ ဘီမုၢ်ခဲလၢာ်လၢ အအိၣ်လၢဟီၣ်ခိၣ်ချၢ တဘျီဃီလီၤ.+
၆ ဒီးမုၣ်ကီၤလံၢ် တဲအီၤလၢ “တၢ်စိတၢ်ကမီၤအံၤခဲလၢာ် ဒီးအလၤကပီၤန့ၣ် ယကဟ့ၣ်လီၤနၤလီၤ. တၢ်သ့ၣ်တဖၣ်အံၤ တၢ်ဟ့ၣ်လီၤယၤလံ+ အဃိ ပှၤလၢ ယအဲၣ်ဒိး ဟ့ၣ်အီၤတဂၤဂၤန့ၣ် ယကဟ့ၣ်လီၤအီၤလီၤ.
၇ အဃိ နမ့ၢ်ဘါထီၣ်ယၤ ထဲတဘျီန့ၣ် တၢ်သ့ၣ်တဖၣ်အံၤ ခဲလၢာ် ကကဲထီၣ် နတၢ်လီၤ.”
၈ ဒီးယ့ၣ်ၡူး တဲဘၣ်အီၤလၢ “တၢ်ကွဲးအသး အိၣ်ဝဲလၢ ‘နကဘၣ် ဘူၣ်ထီၣ်ဘါထီၣ် နကစၢ်ယဟိဝၤယွၤ* ဒီးနကဘၣ်မၤထဲ အတၢ်လီၤ.’”+
၉ ဒီးမုၣ်ကီၤလံၢ် လဲၤဆှၢအီၤလၢ ဝ့ၢ်ယရူၤၡလ့ၣ် ဒီးပာ်ထီၣ်အီၤလၢ တၢ်လုၢ်ဟံၣ်အခိၣ်စိၣ်* ဒီးတဲအီၤလၢ “နမ့မ့ၢ် ကစၢ်ယွၤအဖိခွါန့ၣ် ဖုလီၤသၢၤ.+
၁၀ တၢ်ကွဲးအသး အိၣ်ဝဲလၢ ‘အဝဲကမၤလိာ် မူခိၣ်ကလူးတဖၣ် လၢကဟဲဒီသဒၢနၤလီၤ.’
၁၁ ဒီး ‘အဝဲသ့ၣ် ကစိာ်နၤလၢအစု ဒ်သိးနခီၣ် သုတဘၣ်ထံးဒီး လၢၢ်တဂ့ၤအဂီၢ်လီၤ.’”+
၁၂ ယ့ၣ်ၡူးတဲဆၢအီၤလၢ “တၢ်ကွဲးအသးအိၣ်ဝဲလၢ ‘နတဘၣ်မၤကွၢ် နကစၢ်ယဟိဝၤယွၤတဂ့ၤ.’”+
၁၃ ဒီးမုၣ်ကီၤလံၢ် လ့ပစီအီၤဝံၤအလီၢ်ခံ ဟးထီၣ်ကွံာ်လၢအအိၣ်လီၤ. ဘၣ်ဆၣ် အဝဲဃု တၢ်ခွဲးတၢ်ယာ်လၢ ကလ့ပစီ ယ့ၣ်ၡူး လၢအသီတဘျီလီၤ.+
၁၄ ယ့ၣ်ၡူးက့ၤလၢ ကၤလံၤလါ+ ဒီးအဝဲအိၣ်ဒီးသးစီဆှံ အတၢ်စိတၢ်ကမီၤလီၤ. ဒီးယ့ၣ်ၡူးအဂ့ၢ်အကျိၤ လၢအဂ့ၤန့ၣ် ဟူထီၣ်သါလီၤလၢ တၢ်လီၢ်ဖဲန့ၣ် ဝးဝးလီၤ.
၁၅ တကးဒံးဘၣ် အဝဲသိၣ်လိတၢ်လၢ ဘူၣ်ဘျီၣ်တဖၣ်အပူၤ ဒီးပှၤခဲလၢာ် ယူးယီၣ်ပာ်ကဲအီၤလီၤ.
၁၆ ဒီးအဝဲက့ၤလၢ ဝ့ၢ်နစၤရ့း+ ဖဲအဒိၣ်ထီၣ်ဝဲ အလီၢ်လီၤ. ဒ်ယ့ၣ်ၡူး မၤညီနုၢ်ဝဲအသိး ဖဲမုၢ်အိၣ်ဘှံးနံၤန့ၣ် အဝဲလဲၤနုာ်လီၤလၢ ဘူၣ်ဘျီၣ်ပူၤ+ ဒီးဆၢထၢၣ်ဒ်သိး ကဖးလံာ်အဂီၢ်လီၤ.
၁၇ အဃိ ပှၤဟ့ၣ်လီၤအီၤလၢ ဝံယၡါယၤအလံာ်ထူ ဒီးအဝဲအိးထီၣ်ဝဲဒီး ဃုထံၣ်န့ၢ်ဝဲ တၢ်ကွဲးအသးလၢ
၁၈ “ယဟိဝၤယွၤ အသးစီဆှံ အိၣ်လၢယလိၤ ခီဖျိလၢ အဝဲဒိးဖှူယၤဒ်သိး ယကစံၣ်တဲၤတဲလီၤ တၢ်သးခုကစီၣ်လၢ ပှၤဖှီၣ်ဖိယာ်ဖိ အအိၣ်လီၤ. အဝဲဆှၢလီၤယၤဒ်သိး ယကတဲဘၣ် ပှၤလၢ အဘၣ်တၢ်ဖီၣ်န့ၢ်အီၤတဖၣ်လၢ အဝဲသ့ၣ် ကထူၣ်ဖျဲးထီၣ်အဂီၢ်ဒီး ပှၤလၢ အမဲာ်တထံၣ်တၢ်တဖၣ် လၢအက ထံၣ်ထီၣ်က့ၤတၢ်အဂီၢ်လီၤ. ဒီးအဝဲဆှၢလီၤယၤဒ်သိး ယကမၤပူၤဖျဲးထီၣ် ပှၤလၢ ဘၣ်တၢ်ဆီၣ်တံၢ်မၤနၢၤအီၤတဖၣ်အဂီၢ်+
၁၉ ဒီးဒ်သိး ယကစံၣ်တဲၤတဲလီၤ ဘၣ်ဃးဒီး တၢ်ဆၢကတီၢ်လၢ ယဟိဝၤယွၤ ကပာ်ဖျါထီၣ် အတၢ်သးအိၣ် ပှၤဟီၣ်ခိၣ်ဖိလီၤ.”+
၂၀ ဝံၤဒီးအဝဲ ထူထီၣ်က့ၤလံာ်ထူ ဒီးဟ့ၣ်လီၤဝဲလၢ ပှၤကွၢ်ထွဲတၢ်ဖိအအိၣ် ဒီးအဝဲဆ့ၣ်နီၤဝဲလီၤ. ဒီးပှၤအိၣ်လၢ ဘူၣ်ဘျီၣ်ပူၤခဲလၢာ် ကွၢ်ထံအီၤလီၤ.
၂၁ ယ့ၣ်ၡူးတဲဘၣ် အဝဲသ့ၣ်လၢ “တနံၤအံၤ လံာ်စီဆှံအဆၢလၢ သုနၢ်ဟူဘၣ်န့ၣ် လၢထီၣ်ပှဲၤထီၣ်လံ.”+
၂၂ ဒီးပှၤခဲလၢာ် အုၣ်အသးဘၣ်ဃးဒီးအီၤ လၢအဂ့ၤတခီ ဒီးအဝဲသ့ၣ် ကမၢကမၣ်ဝဲ ခီဖျိ တၢ်ကတိၤလၢ အလီၤထုးန့ၢ်သူၣ် ထုးန့ၢ်သးတဖၣ်လၢ အဟဲထီၣ်လၢ အထးခိၣ် အဃိလီၤ.+ ဒီးအဝဲသ့ၣ် တဲဝဲလၢ “အဝဲ မ့ၢ်စီၤယိၤသး အဖိခွါ တမ့ၢ်ဧီၤ.”+
၂၃ ဒီးယ့ၣ်ၡူးတဲဘၣ် အဝဲသ့ၣ်လၢ “ယသ့ၣ်ညါလၢ သုကတဲယၤလၢ ‘ကသံၣ်သရၣ်ဧၢ, မၤဘျါလီၤက့ၤနသးသၢၤ.’” ဒီးသုကတဲယၤလၢ “တၢ်လၢပနၢ်ဟူလၢ နမၤအီၤလၢ ဝ့ၢ်ကပ့းရနီၣ်+ အပူၤန့ၣ် မၤစ့ၢ်ကီးအီၤလၢ နတၢ်လီၢ်တက့ၢ်.”
၂၄ ဒီးအဝဲတဲဝဲလၢ “ယကတဲဘၣ်သု တီတီလၢ တၢ်လၢဝံန့ၣ် လၢအနီၢ်ကစၢ် အဟီၣ်ကဝီၤအပူၤ ပှၤတတူၢ်လိာ်အီၤဘၣ်.+
၂၅ အဒိ ယကတဲဘၣ်သုတီတီလၢ ဖဲဝံအ့ၤလံယၤအစိၤန့ၣ် မုၣ်ကမဲလၢ ကီၢ်အံၣ်စရ့လးအပူၤ အိၣ်ဝဲအါမးလီၤ. ဒီးဖဲမူခိၣ်တစူၤဘၣ် သၢနံၣ်ဒီးဃုလါအခါ တၢ်သၣ်ဝံၤလီၤဒိဖးဒိၣ် အိၣ်ထီၣ်လၢ ကီၢ်ဒီတဘ့ၣ်ညါ အပူၤလီၤ.+
၂၆ ဘၣ်ဆၣ် ကစၢ်ယွၤတဆှၢလီၤ ဝံအ့ၤလံယၤ လၢကလဲၤလၢ ပိာ်မုၣ်တဖၣ်န့ၣ်အအိၣ် နီတဂၤဘၣ်. ကစၢ်ယွၤ မၢအလဲၤလၢ မုၣ်ကမဲလၢ စၤရဖၤသး လၢအအိၣ်လၢ စံဒိၣ်ဘီမုၢ်အပူၤလီၤ.+
၂၇ တကးဒံးဘၣ် ဖဲဝံအလံၤၡါအစိၤန့ၣ် ပှၤဘၣ်တၢ်ဆါအၢအိၣ်လၢ ကီၢ်အံၣ်စရ့လးအပူၤ အါမးလီၤ. ဘၣ်ဆၣ် အဝဲသ့ၣ် တကဆှီထီၣ်* နီတဂၤဘၣ်. ကဆှီထီၣ်ထဲ ပှၤစူၤရံဖိ စီၤနဧၤမၣ်တဂၤလီၤ.”+
၂၈ ဒီးဖဲပှၤအိၣ်လၢ ဘူၣ်ဘျီၣ်ပူၤကိးဂၤဒဲး နၢ်ဟူဝဲဒ်န့ၣ်အခါ အဝဲသ့ၣ် သးဒိၣ်ထီၣ်တၢ် ဒိၣ်မးလီၤ.+
၂၉ ဒီးအဝဲသ့ၣ် တွံၢ်ထီၣ်ယ့ၣ်ၡူးလၢ ဝ့ၢ်ချၢတဘျီဃီ ဒီးလဲၤကိးအီၤလၢ ကစၢၢ်လၢ အဝဲသ့ၣ်အဝ့ၢ် အိၣ်သူၣ်ထီၣ်အသးလၢအလိၤ ဒ်သိးကကွံာ်လီၤ ဆှိခိၣ်အီၤ အဂီၢ်လီၤ.
၃၀ ဘၣ်ဆၣ် အဝဲဟးထီၣ်ကွံာ်လၢ ပှၤဂီၢ်မုၢ်အကဆူး ဒီးဆဲးလဲၤတၢ်လီၤ.+
၃၁ ဝံၤဒီး အဝဲလဲၤလီၤလၢ ဝ့ၢ်ကပ့းရနီၣ် လၢအအိၣ်လၢ ကၤလံၤလါအပူၤ ဒီးဖဲမုၢ်အိၣ်ဘှံးနံၤန့ၣ် အဝဲသိၣ်လိ ပှၤဖဲန့ၣ်တဖၣ်လီၤ.+
၃၂ ဒီးမ့ၢ်လၢအတဲတၢ် ဒ်သိးဒီး ပှၤတဂၤလၢအအိၣ်ဒီး တၢ်စိတၢ်ကမီၤအဃိ ပှၤဖဲန့ၣ်တဖၣ် ကမၢကမၣ်ဝဲလၢ အတၢ်သိၣ်လိနဲၣ်လိ+ အဃိလီၤ.
၃၃ လၢဘူၣ်ဘျီၣ်ပူၤန့ၣ် ပှၤလၢ တၢ်ဝံတၢ်နါ အိၣ်လၢအလိၤ အိၣ်ဝဲတဂၤလီၤ. ဒီးအဝဲ ကိးပသူထီၣ်လၢ အကလုၢ်ဖးဒိၣ်လၢ+
၃၄ “ပှၤနစၤရ့းဖိ ယ့ၣ်ၡူးဧၢ,+ နမၤကီမၤခဲပှၤ ဘၣ်လဲၣ်. နဟဲလၢ နကမၤဟးဂီၤပှၤ အဂီၢ်ဧါ. နမ့ၢ် ကစၢ်ယွၤ အပှၤစီဆှံတဂၤန့ၣ်+ ယသ့ၣ်ညါ လီၤတံၢ်လီၤဆဲးလီၤ.”
၃၅ ဘၣ်ဆၣ် ယ့ၣ်ၡူး ဟ့ၣ်လီၤအီၤတၢ်ကလုၢ်လၢ “အိၣ်ဘှ့ၣ် ဒီးဟးထီၣ်ကွံာ် လၢအပူၤန့ၣ်.” ဒီးတၢ်ဝံတၢ်နါ မၤလီၤဃံၢ်ပှၤတဂၤန့ၣ် လၢအဝဲသ့ၣ် အမဲာ်ညါ ဒီးဟးထီၣ်ကွံာ်လၢအလိၤ ဘၣ်ဆၣ် တမၤဘၣ်ဒိအီၤဘၣ်.
၃၆ အဃိ အဝဲသ့ၣ်ခဲလၢာ် ကမၢကမၣ်ဝဲဒီး တဲလိာ်အသး ကဒဲကဒဲလၢ “အတၢ်ကတိၤန့ၣ် အိၣ်ဒီးအစိကမီၤ ဒိၣ်မးလီၤ. အဝဲမၤလိာ် တၢ်ဝံတၢ်နါလၢ တၢ်စိတၢ်ကမီၤ ဒီးတၢ်ဝံတၢ်နါတဖၣ် ဟးထီၣ်ကွံာ်ဝဲလီၤ.”
၃၇ ဒီးယ့ၣ်ၡူးအဂ့ၢ်န့ၣ် ရၤလီၤအသးလၢ ကီၢ်အဃၢၤဝးဝးလီၤ.
၃၈ ယ့ၣ်ၡူး ဟးထီၣ်လၢ ဘူၣ်ဘျီၣ်ပူၤဝံၤဒီး အလဲၤနုာ်လီၤလၢ စီၤၡံမိၣ်အဟံၣ်ပူၤလီၤ. ဒီးစီၤၡံမိၣ် အမံၤပှၢ်ပိာ်မုၣ်န့ၣ် အလိၤကိၢ်ဒိၣ်မးအဃိ အဝဲသ့ၣ် ဃ့ကညးယ့ၣ်ၡူးလၢ ကမၤစၢၤအီၤလီၤ.+
၃၉ အဃိ ယ့ၣ်ၡူးလဲၤဆၢထၢၣ်လၢ အကပၤ ဒီးမၤဘျါက့ၤအီၤ ဒီးအတၢ်ကိၢ် ခုၣ်လီၤက့ၤဝဲလီၤ. ဒီးအဝဲ ဂဲၤဆၢထၢၣ်တဘျီဃီ ဒီးကတဲာ်ကတီၤဝဲ တၢ်အီၣ်တၢ်အီလၢ အဝဲသ့ၣ်အဂီၢ်လီၤ.
၄၀ ဖဲမုၢ်လီၤနုာ် အဆၢကတီၢ် ကယဲၢ်ပှၤလၢအအိၣ်ဒီး တၢ်ဆါအကလုာ်ကလုာ်န့ၣ် ပှၤလဲၤကိး အဝဲသ့ၣ်လၢ ယ့ၣ်ၡူးအအိၣ်လီၤ. ဒီးအဝဲပာ်လီၤအစုလၢ အဝဲသ့ၣ် တဂၤစုာ်စုာ်အလိၤ ဒီးမၤဘျါက့ၤ အဝဲသ့ၣ်လီၤ.+
၄၁ ဒီးတၢ်ဝံတၢ်နါတဖၣ် ဟးထီၣ်လၢ ပှၤအါဂၤအလိၤ ဒီးကိးပသူထီၣ်ဝဲလၢ “နမ့ၢ် ကစၢ်ယွၤအဖိခွါလီၤ.”+ ဘၣ်ဆၣ် မ့ၢ်လၢအဝဲသ့ၣ် သ့ၣ်ညါဝဲလၢ အမ့ၢ်ခရံာ်အဃိ+ ယ့ၣ်ၡူးဟ့ၣ်လီၤအဝဲသ့ၣ် တၢ်ကလုၢ် ဒီးတပျဲ အဝဲသ့ၣ်တဲတၢ်ဘၣ်.+
၄၂ ဖဲမုၢ်ဝါထီၣ်အခါ ယ့ၣ်ၡူးဟးထီၣ် ဒီးလဲၤဝဲလၢ တၢ်လီၢ်လၢ ပှၤတအိၣ် နီတဂၤဘၣ်လီၤ.+ ဘၣ်ဆၣ် ပှၤဂီၢ်မုၢ်တဖၣ် ဟးဃုယ့ၣ်ၡူး ဒီးလဲၤလၢ အအိၣ်ဝဲအလီၢ် ဒီးဂုာ်ကျဲးစၢး တြီအီၤ ဒ်သိးအသု တဟးထီၣ်ကွံာ်လၢ အဝဲသ့ၣ်အအိၣ်တဂ့ၤ အဂီၢ်လီၤ.
၄၃ ဘၣ်ဆၣ် ယ့ၣ်ၡူးတဲဘၣ် အဝဲသ့ၣ်လၢ “မ့ၢ်လၢ ကစၢ်ယွၤ မၢလီၤယၤလၢ ယကစံၣ်တဲၤတဲလီၤ ယွၤအဘီအမုၢ် တၢ်သးခုကစီၣ်အဃိ+ ယကဘၣ် လဲၤစံၣ်တဲၤတဲလီၤတၢ်လၢ ဝ့ၢ်အဂၤတဖၣ်စ့ၢ်ကီးလီၤ.”
၄၄ အဃိ ယ့ၣ်ၡူး လဲၤစံၣ်တဲၤတဲလီၤတၢ်လၢ ဘူၣ်ဘျီၣ်တဖၣ်လၢ ယူဒၤအဟီၣ်ကဝီၤအပူၤလီၤ.
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ မ့ၢ်စ့ၢ်ကီး “တၢ်လီၢ်လၢ အထီကတၢၢ်.”
^ မ့ၢ်စ့ၢ်ကီး “ဘျါက့ၤ.”
