ယၡါယၤ ၆၁:၁-၁၁
၆၁ တၢ်ပၢကစၢ် ယဟိဝၤယွၤ အသးစီဆှံ အိၣ်လၢယလိၤ+ခီဖျိလၢ ယဟိဝၤယွၤ ဒိးဖှူယၤဒ်သိး ယကစံၣ်တဲၤတဲလီၤ တၢ်သးခုကစီၣ်လၢ ပှၤလၢအဆီၣ်လီၤသး အအိၣ်လီၤ.+
အဝဲဆှၢလီၤယၤ ဒ်သိး ယကမၤမုာ်ထီၣ်က့ၤ* ပှၤလၢအသးသ့ၣ်ဖးတဖၣ်,ဒ်သိး ယကတဲဘၣ် ပှၤလၢ အဘၣ်တၢ်ဖီၣ်န့ၢ်အီၤတဖၣ်လၢ အဝဲသ့ၣ် ကထူၣ်ဖျဲးထီၣ်,ဒ်သိး ယကတဲဘၣ် ပှၤဃိာ်ဖိတဖၣ်လၢ အမဲာ်ကထံၣ်ထီၣ်က့ၤတၢ်အဂီၢ်,+
၂ ဒ်သိး ယကတဲဖျါထီၣ် ဘၣ်ဃးဒီး တၢ်ဆၢကတီၢ်လၢ ယဟိဝၤယွၤ ကပာ်ဖျါထီၣ် အတၢ်သးအိၣ်,ဒီးပကစၢ်ယွၤ ကဟ့ၣ်ကၣ်က့ၤတၢ် အမုၢ်နံၤ,+ဒ်သိး ယကမၤမုာ်ထီၣ်က့ၤ ပှၤလၢ အသူၣ်အုးသးအုး ခဲလၢာ်+
၃ ဒီးဒ်သိး ယကအံးထွဲကွၢ်ထွဲ ပှၤလၢ အဟီၣ်ဝဲယၢၤဝဲလၢ ဝ့ၢ်စံယိၣ် အဃိလီၤ.
ဒီးလၢဖၣ်ဆါကမူၣ်အလီၢ်န့ၣ် ယကဟ့ၣ်လီၤအဝဲသ့ၣ်လၢ ခိၣ်ဖၢၣ်,လၢတၢ်ဟီၣ်တၢ်ယၢၤအလီၢ်န့ၣ် ယကဟ့ၣ်အဝဲသ့ၣ်လၢ တၢ်သးခုအသိဒီးလၢတၢ်သးဟးဂီၤအလီၢ်န့ၣ် ယကဟ့ၣ်အဝဲသ့ၣ်လၢ တၢ်စံးထီၣ်ပတြၢၤ အဆ့ကၤလီၤ.
ဒီးပှၤကကိး အဝဲသ့ၣ်လၢ တၢ်တီ တၢ်လိၤ အသ့ၣ်ထူၣ်ဖးဒိၣ်တဖၣ်လၢယဟိဝၤယွၤ သူၣ်လီၤဝဲ ဒ်သိးကကဲထီၣ် တၢ်လၤကပီၤ လၢအဂီၢ်လီၤ.+
၄ အဝဲသ့ၣ် ကသူၣ်ထီၣ်က့ၤ တၢ်လၢအဟးဂူာ်ဟးဂီၤ ယံာ်တ့ၢ်လံတဖၣ်ဒီးတၢ်လီၢ်လၢ အအိၣ်သယုၢ် လၢညါလံၤလံၤန့ၣ် အဝဲသ့ၣ် ကဘှီထီၣ်က့ၤအီၤလီၤ.+
အဝဲသ့ၣ် ကတ့ထီၣ်က့ၤဝ့ၢ်လၢ အဟးဂီၤတဖၣ်+လၢအမ့ၢ် တၢ်လီၢ်လၢ အအိၣ်လီၤဟိလီၤဃီ ဖးယံာ်လံတဖၣ်လီၤ.+
၅ “ပှၤလၢ သုတသ့ၣ်ညါဘၣ်တဖၣ် ကဟဲကွၢ်ထွဲ သုသိအဖုတဖၣ်ဒီးပှၤထံဂၤကီၢ်ဂၤဖိ+ ကကဲ သုပှၤမၤစံာ်ဖိ ဒီးသုပှၤမၤစပံးကျီးဖိ တဖၣ်လီၤ.+
၆ မ့မ့ၢ်သုန့ၣ် သုကဘၣ် တၢ်ကိးသုလၢ ယဟိဝၤယွၤ အပှၤလုၢ်တၢ်ဒိၣ်တဖၣ်+
ဒီးပှၤကကိးသုလၢ ကစၢ်ယွၤ အခ့အပှၤတဖၣ်လီၤ.
သုကသူ ပှၤကလုာ်တဖၣ် အတၢ်ထူးတၢ်တီၤ+ဒီးသုကသးခု ခီဖျိလၢ သုဒိးန့ၢ်ဘၣ် တၢ်ထူးတၢ်တီၤတဖၣ်အံၤလၢ အဝဲသ့ၣ် အအိၣ်လီၤ.
၇ လၢသုကဘၣ်တၢ်မဲာ်ဆှးအလီၢ် သုကန့ၢ်ဘၣ် ဟီၣ်ခိၣ်လီၢ်ခံစးဒီးလၢပှၤကမၤမဲာ်ဆှးသု အလီၢ်န့ၣ် သုကကိးပသူထီၣ်လၢ တၢ်သးခု အပူၤ ခီဖျိ တၢ်လၢသုန့ၢ်ဘၣ် အဃိလီၤ.
မ့ၢ်လံ, လၢသုကီၢ်ပူၤန့ၣ် သုကန့ၢ်ဘၣ် ဟီၣ်ခိၣ်ကဝီၤခံစး+ဒီးသုကသးခု လီၤစိၤလီၤထီလီၤ.+
၈ ယၤ, ယဟိဝၤယွၤအံၤ အဲၣ်တၢ်စံၣ်ညီၣ်တီ+ဒီးယသးဟ့ တၢ်ဟုၣ်တၢ် ဒီးတၢ်တတီတလိၤတဖၣ်လီၤ.+
ယမ့ၢ်ပှၤလၢ အသးတီအဃိ ယကဟ့ၣ် ယပှၤဂီၢ်မုၢ်လၢ ခိၣ်ဖးဒီးယကမၤတၢ်အၢၣ်လီၤအီလီၤ အထူအယိာ်ဒီး အဝဲသ့ၣ်လီၤ.+
၉ အဝဲသ့ၣ် အဖိအလံၤတဖၣ်န့ၣ် ကဘၣ်တၢ်သ့ၣ်ညါအီၤလၢ ပှၤကလုာ်တဖၣ်အကျါ+ဒီးအဝဲသ့ၣ် အစၢၤအသွဲၣ်တဖၣ်န့ၣ် ကဘၣ်တၢ်သ့ၣ်ညါအီၤလၢ ပှၤဂီၢ်မုၢ်တဖၣ်အကျါလီၤ.
ပှၤခဲလၢာ်လၢ အထံၣ်ပှၤသ့ၣ်တဖၣ်န့ၣ် ကသ့ၣ်ညါဝဲလၢအဝဲသ့ၣ်မ့ၢ် တၢ်အစၢၤအသွဲၣ်လၢ ယဟိဝၤယွၤ ဆိၣ်ဂ့ၤတ့ၢ်ဝဲလီၤ.”+
၁၀ ယကသူၣ်ဖှံသးညီလၢ ယဟိဝၤယွၤ အပူၤဖးဒိၣ်ဒီးလၢကစၢ်ယွၤအဃိ ယကသးခုလၢ ယသးဒီဖျၢၣ်လီၤ.+
အဝဲဒုးကၤထီၣ်ယၤ တၢ်အုၣ်က့ၤခီၣ်က့ၤ အဆ့ကၤ,+ဒုးလုးထီၣ်ယၤ တၢ်တီတၢ်လိၤ အဆ့ဖးထီ,ယလီၤဂာ်ဒီး တလးမူးပိာ်ခွါလၢ အဖၢၣ်ဝဲခိၣ်ဖၢၣ် ဒ်ပှၤလုၢ်တၢ်ဒိၣ် ဖၢၣ်ဝဲအသိး+ဒီးဒ်တလးမူးပိာ်မုၣ်လၢ အမၤဃံမၤလၤထီၣ်အသးလၢ တၢ်ဃံတၢ်လၤတဖၣ် အသိးလီၤ.
၁၁ ဒ်ဟီၣ်ခိၣ် ဒုးမဲထီၣ်တၢ်အသိးဒီးဒ်တၤသၣ်အလီၢ် ဒုးမဲထီၣ် တၢ်လၢပှၤဖှံလီၤပာ်စၢၤ လၢအပူၤ အသိးန့ၣ်တၢ်ပၢကစၢ် ယဟိဝၤယွၤ ကဒုးမဲထီၣ်တၢ်တီတၢ်လိၤ+ ဒီးတၢ်စံးထီၣ်ပတြၢၤလၢ+ ပှၤကလုာ်ခဲလၢာ် အမဲာ်ညါ ဒ်န့ၣ်အသိး စ့ၢ်ကီးလီၤ.
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ဘိၣ်ထီၣ်.”
