ကတိၤဒိ ၆:၁-၃၅
၆ ဖိခွါဧၢ, နမ့ၢ်အၢၣ်လီၤပာ်စၢၤလၢ နကဟံးန့ၢ်မူဒါ လၢပှၤတဂၤဂၤ အဒ့ၣ်ကမၢ်အဂီၢ်,+နမ့ၢ် မၤပာ်စၢၤ တၢ်အၢၣ်လီၤဒီး ပှၤလၢ နတသ့ၣ်ညါအီၤဘၣ်တဂၤ+
၂ ဒီးနတၢ်အၢၣ်လီၤ မ့ၢ်ကဲထီၣ် ပျံၤသကွီၤလၢနဂီၢ်ဒီးနမ့ၢ်ဘျးကဒါက့ၤလၢ နနီၢ်ကစၢ် အတၢ်ကတိၤအဃိန့ၣ်+
၃ အခီပညီမ့ၢ်ဝဲ နလီၤဘၣ်လၢ ပှၤတဂၤန့ၣ် အစုပူၤလံ.
အဃိ ဖိခွါဧၢ, ဒ်သိး နကမၤပူၤဖျဲးထီၣ်နသးအဂီၢ် မၤဒ်အံၤတက့ၢ်.
ဆီၣ်လီၤနသး ဒီးလဲၤဃ့ကညးအီၤ မ့ၢ်ချ့တက့ၢ်.+
၄ နမၤဒ်န့ၣ် မ့ၢ်တဝံၤဘၣ်န့ၣ် တဘၣ်ဘံၣ်လီၤ နမဲာ်ချံတဂ့ၤဒီးတဘၣ်မံတဂ့ၤ.
၅ မၤပူၤဖျဲးထီၣ်က့ၤနသး ဒ်တၤဟိလၢ ပှၤခးတၢ်ဖိ အစုပူၤဒီးဒ်ထိၣ်လၢ ပှၤဖီၣ်ထိၣ်ဖိ အစုပူၤတက့ၢ်.
၆ ပှၤကၢၣ်ဖိဧၢ, လဲၤမၤလိန့ၢ်တၢ်လၢ တၢၢ်တဖၣ်အအိၣ်တက့ၢ်.+
ကွၢ်တၢ်လၢ တၢၢ်တဖၣ်မၤဝဲ ဒီးကဲထီၣ် ပှၤကူၣ်တၢ်သ့တက့ၢ်.
၇ တၢၢ်တဖၣ်န့ၣ် အသုးခိၣ်မ့ၢ်ဂ့ၤ, အခိၣ်အနၢ်မ့ၢ်ဂ့ၤ, အပှၤပၢတၢ်မ့ၢ်ဂ့ၤ တအိၣ်ဘၣ် သနာ်က့
၈ ဖဲတၢ်ကိၢ်ခါ အဆၢကတီၢ်န့ၣ် အဝဲသ့ၣ် ထၢဖှိၣ်ဝဲ အတၢ်အီၣ်တၢ်အီ+ဒီးဖဲပှၤကူးတၢ် အဆၢကတီၢ်န့ၣ် အဝဲသ့ၣ် ပာ်ဖှိၣ်ဝဲ အတၢ်အီၣ် တၢ်အီတဖၣ်လီၤ.
၉ ပှၤကၢၣ်ဖိဧၢ, နကမံနီၤ ယံာ်ဒံးထဲလဲၣ်.
နကပၢၢ်ထီၣ် ဆံးယံာ်လဲၣ်.
၁၀ နမံတစဲးစဲး, မံခ့တစဲးစဲး,သံၣ်ထီၣ်စုဒီး အိၣ်ဘှံးတစဲးစဲးဒု+
၁၁ တၢ်ဖှီၣ်တၢ်ယာ် ကချုးန့ၢ်နၤဒ်တမျိၤတမျာ် လၢအအိၣ်ဒီး စုကဝဲၤအသိးလီၤ.+
၁၂ ပှၤအၢပှၤသီလၢ အဘျုးတအိၣ်ဘၣ်တဂၤန့ၣ် ဟးတဲက့ၣ် တဲကူတၢ်လီၤ.+
၁၃ အဝဲဖျးဆံးအမဲာ်+ ဒီးနဲၣ်စု နဲၣ်ခီၣ်လီၤ.
၁၄ အသးအၢ,အကူၣ်ထီၣ်တၢ်အၢ+ ဒီးအဒုးအိၣ်ထီၣ် တၢ်အ့ၣ်လိာ်ဆိးက့ ထီဘိလီၤ.+
၁၅ အဃိ တၢ်နးတၢ်ဖှီၣ် ကဟဲဘၣ်အီၤ သတူၢ်ကလာ်ဒီးလၢတစိၢ်ဖိ အတီၢ်ပူၤန့ၣ် အကဟးဂီၤကွံာ် ဒီးအပူၤဖျဲး တသ့လၢၤဘၣ်.+
၁၆ တၢ်လၢ ယဟိဝၤယွၤ သးဟ့ဝဲန့ၣ် အိၣ်ဝဲဃုခါဒီးတၢ်လၢ ကစၢ်ယွၤ သးဘၣ်အၢဝဲန့ၣ် အိၣ်ဝဲနွံခါလီၤ.
၁၇ တၢ်သ့ၣ်တဖၣ်န့ၣ် မ့ၢ်ဝဲ မဲာ်ချံလၢ အပာ်ထီၣ်ထီအသး,+ ပျ့ၤလၢအလံၣ်တၢ်လီတၢ်,+ စုလၢ အလူလီၤ ပှၤလၢ အတၢ်ကမၣ် တအိၣ်ဘၣ် အသွံၣ်,+
၁၈ သးလၢ အကူၣ်ထီၣ်တၢ်အၢ,+ ခီၣ်လၢ အလဲၤဃ့ၢ်ချ့ချ့ဆူ တၢ်အၢအအိၣ်,
၁၉ ပှၤအုၣ်အသးလၢ အတဲထဲ တၢ်လံၣ်တၢ်လီတဖၣ်+ဒီးပှၤလၢအဖှံလီၤ တၢ်အ့ၣ်လိာ်ဆိးက့ လၢဒီပုၢ်ဝဲၢ်တဖၣ် အကျါလီၤ.+
၂၀ ဖိခွါဧၢ, နပၢ်အတၢ်မၤလိာ်န့ၣ် အိၣ်မူမၤထွဲအီၤတက့ၢ်.
ဒီးနမိၢ် အတၢ်ဟံးစုနဲၣ်ကျဲန့ၣ်* တဘၣ်ပာ်တ့ၢ်အီၤတဂ့ၤ.+
၂၁ တိၢ်နီၣ်ဃာ်အီၤလၢ နသးပူၤထီဘိဒီးစၢထီၣ်အီၤလၢ နကိာ်ဘိလိၤတက့ၢ်.
၂၂ ဖဲနဟးအခါ တၢ်သ့ၣ်တဖၣ်န့ၣ် ကဆှၢနၤ,ဖဲနမံနီၤအခါ တၢ်သ့ၣ်တဖၣ်န့ၣ် ကဒီသဒၢနၤ
ဒီးဖဲနမံပၢၢ်ထီၣ်အခါ တၢ်သ့ၣ်တဖၣ်န့ၣ် ကတဲတၢ်ဒီးနၤလီၤ.*
၂၃ တၢ်မၤလိာ်န့ၣ် မ့ၢ်ဝဲ မ့ၣ်အူဒၢတဖျၢၣ်,+တၢ်သိၣ်တၢ်သီန့ၣ် မ့ၢ်ဝဲ တၢ်ကပီၤ,+တၢ်သိၣ်ဃီၣ် ဒီးတၢ်သိၣ်က့ၤသီက့ၤန့ၣ် မ့ၢ်ဝဲ တၢ်မူအကျဲလီၤ.+
၂၄ တၢ်သ့ၣ်တဖၣ်န့ၣ် ကဒီသဒၢနၤလၢ ပိာ်မုၣ်လၢအတဂ့ၤဘၣ်,+
ပိာ်မုၣ်လၢ အသကဲာ်ပဝးတဂ့ၤဘၣ် လၢအတဲတၢ် ဒ်သိးကကွဲန့ၢ်လွဲန့ၢ် ပှၤသးလီၤ.+
၂၅ တဘၣ်လီကီအီၤ ခီဖျိလၢ အဒိၣ်တၢ်ဂ့ၤ အဃိတဂ့ၤ.+
ဒီးတဘၣ်ပျဲ အမဲာ်ချံ လၢအဃံလၤ ထုးန့ၢ်နသးတဂ့ၤ.
၂၆ ခီဖျိလၢ ပိာ်မုၣ်ဆါလီၤအီၣ်သးတဂၤအဃိ ပိာ်ခွါတဂၤ ကဖှီၣ်လီၤယာ်လီၤ တုၤလၢ တၢ်လၢအကအိၣ်တ့ၢ်က့ၤဒီးအီၤန့ၣ် အိၣ်ထဲကိၣ် တလိၣ်လီၤ.+
မ့မ့ၢ် ပိာ်မုၣ်လၢ အအဲၣ်ဘၢတၢ်တဂၤန့ၣ် ကဲထီၣ်ပျံၤသကွီၤ လၢပှၤပိာ်ခွါတဂၤ အသးသမူအဂီၢ်လီၤ.
၂၇ ပှၤတဂၤ မ့ၢ်ပာ်လီၤမ့ၣ်အူလၢ အသးနါပှၢ်လိၤန့ၣ် အဆ့ကၤ တအူအီၣ်ဧီၤ.+
၂၈ ပှၤတဂၤ မ့ၢ်ဟးလၢ မ့ၣ်အူအ့ၣ်လၢအကဲၤအဖီခိၣ်န့ၣ် အခီၣ် တအူအီၣ်ဧီၤ.
၂၉ ပှၤလၢ အမံဃုာ်ဒီး ပှၤဂၤအမါန့ၣ် တၢ်ကမၤအသးဒီးအီၤ ဒ်န့ၣ်လီၤ.
ပှၤလၢ အမၤကမၣ်မုၣ်ကမၣ်ခွါဒီး ပှၤဂၤအမါန့ၣ် တပူၤဒီးတၢ်စံၣ်ညီၣ် နီတဂၤဘၣ်.+
၃၀ တၢ်ဘျၣ်တဂၤ မ့ၢ်ဟုၣ်တၢ် ခီဖျိလၢ အလီၤဘဲအဃိန့ၣ်ပှၤတသးဟ့အီၤဘၣ်.
၃၁ ဘၣ်ဆၣ် ပှၤမ့ၢ်ချုးအီၤန့ၣ် အဝဲကဘၣ်ဟ့ၣ်က့ၤဝဲ နွံစးလီၤ.
အကဘၣ်ဟ့ၣ်လီၤ တၢ်လၢအလုၢ်ဒိၣ်ပှ့ၤဒိၣ်လၢ အအိၣ်ဒီးအီၤလၢ အဟံၣ်ပူၤခဲလၢာ်လီၤ.+
၃၂ ပှၤလၢအအဲၣ်ဘၢမါအဲၣ်ဘၢဝၤန့ၣ်* အသးတဆးနီတစဲးဘၣ်.
ပှၤလၢအမၤဝဲဒ်န့ၣ်န့ၣ် မ့ၢ်ဒၣ်အမၤဟးဂီၤ အနီၢ်ကစၢ်လီၤ.+
၃၃ အဝဲကဘၣ်ကီဘၣ်ခဲ ဒီးအကဒိးန့ၢ်ဘၣ် တၢ်မဲာ်ဆှး+ဒီးအတၢ်မဲာ်ဆှးန့ၣ် တလီၤမၢ်ကွံာ် နီတဘျီဘၣ်.+
၃၄ ဝၤတဂၤ အတၢ်သးက့ၣ်န့ၣ် မၤဒိၣ်ထီၣ်အသးတုၤဒၣ်လဲာ် ဖဲအဝဲဟ့ၣ်ကၣ်တၢ်အခါ အတၢ်သးကညီၤ တအိၣ်လၢၤဘၣ်.+
၃၅ ပှၤမ့ၢ်ဟ့ၣ်အီၤစ့ ဘၣ်ဆၣ် အဝဲတတူၢ်လိာ်ဝဲဘၣ်.
ပှၤမ့ၢ်ဟ့ၣ်အီၤ တၢ်ဟ့ၣ်လၢ အလုၢ်ဒိၣ်ပှ့ၤဒိၣ်ဘၣ်ဆၣ် အဝဲတအဲၣ်ဒိး မၤတၢ်ဃူတၢ်ဖိးဘၣ်.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “တၢ်သိၣ်တၢ်သီ.”
^ မ့ၢ်စ့ၢ်ကီး “ကဟံးစုနဲၣ်ကျဲနၤ.”
^ အခီပညီလိၤလိၤ “ပှၤလၢအဲၣ်ဘၢအမါ.”
