ကတိၤဒိ ၃၀:၁-၃၃
၃၀ တၢ်ဂ့ၢ်အရ့ဒိၣ် လၢလာ်အံၤန့ၣ် မ့ၢ်ဝဲ စီၤယၤက့ၣ်အဖိခွါ စီၤအၤကူၢ် အတၢ်ကတိၤတဖၣ်လၢ အတဲဘၣ် စီၤအံၤသအ့လး ဒီးစီၤအူးကါလးလီၤ.
၂ ယတၢ်နၢ်ပၢၢ် စှၤန့ၢ်ဒံးပှၤဂၤခဲလၢာ်+ဒီးတၢ်လၢ ပှၤတဂၤ ကြၢးသ့ၣ်ညါနၢ်ပၢၢ်ဝဲန့ၣ် ယတသ့ၣ်ညါနၢ်ပၢၢ်ဘၣ်.
၃ ယတမၤလိဘၣ် တၢ်ကူၣ်သ့ဘၣ်,ဒီးယတအိၣ်ဒီး တၢ်စီဆှံဒိၣ်ကတၢၢ်တဂၤ အတၢ်သ့ၣ်ညါဘၣ်.
၄ မ့ၢ်မတဂၤ လဲၤထီၣ်လၢမူခိၣ် ဝံၤဒီး ဟဲက့ၤလီၤဝဲလဲၣ်.+
မ့ၢ်မတဂၤ ဖီၣ်န့ၢ်ဝဲ ကလံၤလၢ အစုညါသးခံခီလၢာ်လဲၣ်.
မ့ၢ်မတဂၤ ဘိၣ်ထီၣ် ထံလၢ အတၢ်ကူတၢ်ကၤ အပူၤလဲၣ်.+
မ့ၢ်မတဂၤ ပာ်လီၤ ဟီၣ်ခိၣ် အဆၢလဲၣ်.+
အမံၤဒ်လဲၣ်. အဖိခွါအမံၤဒ်လဲၣ်. မ့ၢ်နသ့ၣ်ညါဧါ.
၅ ကစၢ်ယွၤ အတၢ်ကတိၤ ကိးထံၣ်ဒဲးန့ၣ် စီဆှံဝဲလီၤ.*+
အဝဲမ့ၢ်ကတီၤတဘ့ၣ်လၢ ပှၤလၢအသန့ၤအသးလၢအီၤ ကိးဂၤဒဲး အဂီၢ်လီၤ.+
၆ တဘၣ်မၤအါထီၣ် အတၢ်ကတိၤ နီတစဲးတဂ့ၤ.+
နမ့ၢ်မၤဒ်န့ၣ်န့ၣ် အဝဲကသိၣ်ဃီၣ်နၤဒီးအကပာ်ဖျါထီၣ်လၢ နမ့ၢ် ပှၤလံၣ်တၢ်လီတၢ်ဖိတဂၤလီၤ.
၇ အိ ကစၢ်ယွၤဧၢ, တချုးလၢ ယသံဒံးဘၣ်န့ၣ် ယတလီကီ တၢ်အဂၤ နီတမံၤဘၣ်.
ယကဃ့နၤ ထဲတၢ်ခံမံၤအံၤလီၤ.
၈ ဒ်သိး ယသုတတဲ တၢ်တမ့ၢ်တတီ ဒီးတၢ်လံၣ်တၢ်လီတဂ့ၤအဂီၢ် မၤစၢၤယၤတက့ၢ်.+
ဒီးတၢ်ဖှီၣ်တၢ်ယာ်မ့ၢ်ဂ့ၤ, တၢ်ထူးတၢ်တီၤမ့ၢ်ဂ့ၤ ဟ့ၣ်လီၤယၤတဂ့ၤ.
ဟ့ၣ်လီၤယၤ တၢ်အီၣ်ဖဲ အယၢအီၣ်တက့ၢ်.*+
၉ ယမ့ၢ်န့ၢ်ဘၣ် တၢ်လၢယလီကီခဲလၢာ်န့ၣ် ယကပာ်တ့ၢ်ဘၣ်ဖုးနၤ ဒီးတဲလၢ “ယဟိဝၤယွၤ မ့ၢ်မတဂၤလဲၣ်.”+
ယကစၢ်ယွၤဧၢ, တဘၣ်ပျဲလၢ ယကဖှီၣ်လီၤဒီး ဟုၣ်တၢ်ဒီး မၤဘၣ်ဒိ နမံၤတဂ့ၤ.
၁၀ တဘၣ်တဲဟးဂီၤ ကုၢ်တဂၤအဂ့ၢ်လၢ အကစၢ်အမဲာ်ညါတဂ့ၤ,
ကုၢ်တဂၤန့ၣ် ကဆိၣ်အၢဘၣ်ဖုးနၤ ဒီးပှၤကထံၣ်နၤလၢ နတၢ်ကမၣ်အိၣ်လီၤ.+
၁၁ ပှၤလၢအဆိၣ်အၢအပၢ်ဒီးတဆိၣ်ဂ့ၤအမိၢ်ဘၣ်န့ၣ် အိၣ်ဝဲတဒူၣ်လီၤ.*+
၁၂ ပှၤလၢအထံၣ်လီၤအသးလၢ အကဆှီ+ဘၣ်ဆၣ် အတမၤကဆှီထီၣ်အသးလၢ အတၢ်ဘၣ်အၢ* ဒံးဘၣ်န့ၣ် အိၣ်ဝဲတဒူၣ်လီၤ.
၁၃ ပှၤလၢ အပာ်ထီၣ်ထီအသးဒိၣ်မးဒီးအဝဲသ့ၣ် ထံၣ်ဆံးပှၤဂၤ သပှၢ်တၢၢ်န့ၣ် အိၣ်ဝဲတဒူၣ်လီၤ.+
၁၄ ပှၤလၢအမဲ လီၤဂာ်ဒ်သိးဒီးနးဒီးအခၣ် လီၤဂာ်ဒ် ဒီတဖၣ်န့ၣ် အိၣ်ဝဲတဒူၣ်လီၤ.
ဒီးပှၤလၢအပတီၢ်ဖုၣ်လၢ ဟီၣ်ခိၣ်ချၢဒီးပှၤဖှီၣ်ဖိယာ်ဖိလၢ ပှၤဟီၣ်ခိၣ်ဖိ အကျါန့ၣ် အဝဲသ့ၣ် ယူၢ်လီၤကွံာ်ဝဲလီၤ.+
၁၅ တလံၤတဖၣ် အဖိမုၣ်အိၣ်ဝဲခံဘိလၢ အကိးထီၣ်ဝဲလၢ “ဟ့ၣ်ယၤသၢၤ, ဟ့ၣ်ယၤသၢၤ.”
တၢ်လၢအသးတမံ နီတဘျီဘၣ်န့ၣ် အိၣ်ဝဲသၢမံၤဒီးတၢ်လၢအတတဲဝဲလၢ “ပှဲၤန့ၣ်ဘၣ်လံ” နီတဘျီဘၣ်န့ၣ် အိၣ်ဝဲ လွံၢ်မံၤလီၤ.
၁၆ တၢ်လွံၢ်မံၤအံၤန့ၣ် မ့ၢ်ဝဲ တၢ်သွၣ်ခိၣ်,*+ ပှၤတူာ်ဖိအဒၢလီၢ်,ကီၢ်လၢအဃ့ထီ
ဒီးမ့ၣ်အူလၢ အတတဲဝဲလၢ “ပှဲၤန့ၣ်ဘၣ်လံ” နီတဘျီဘၣ်လီၤ.
၁၇ ပှၤလၢအတဲဆဲးအဲးအပၢ် ဒီးတဒိကနၣ် အမိၢ်အကလုၢ်ဘၣ်န့ၣ်+စိးဝၣ်ဃးလၢ တၢ်တြီၤပူၤတဖၣ် ကစိးခွဲးထီၣ်အမဲာ်ချံဒီးလံာ်ကြီကြာ်ဖိတဖၣ် ကအီၣ်ကွံာ်ဝဲလီၤ.+
၁၈ တၢ်လၢ ယနၢ်ပၢၢ်အီၤတသ့ဘၣ်န့ၣ်* အိၣ်ဝဲသၢမံၤဒီးတၢ်လၢ ယတနၢ်ပၢၢ်အီၤဘၣ်န့ၣ် အိၣ်ဝဲလွံၢ်မံၤလီၤ.
၁၉ တၢ်လွံၢ်မံၤန့ၣ် မ့ၢ်ဝဲ လံာ်ကြီကြာ်လၢ အယူၤလၢမူခိၣ်,ဂုၢ်လၢအဘျိၣ်လၢ လၢၢ်အလိၤ,
ကဘီလၢ အလဲၤတၢ်လၢ ပီၣ်လဲၣ်အပူၤဒီးပှၤပိာ်ခွါတဂၤ အတၢ်အိၣ်ထီၣ် အိၣ်လီၤ ဖဲအအိၣ်ဒီး ပိာ်မုၣ်တဂၤ အခါလီၤ.
၂၀ အဝဲအံၤ မ့ၢ်ဝဲ တၢ်လၢပိာ်မုၣ်လၢ အအဲၣ်ဘၢတၢ်တဂၤ မၤဝဲလီၤ.
အဝဲအီၣ်တၢ်, ထွါကွံာ် အထးခိၣ်ဝံၤဒီးအတဲဝဲလၢ “ယတမၤကမၣ်တၢ် နီတမံၤဘၣ်.”+
၂၁ တၢ်လၢအဒုးကနိး ဟီၣ်ခိၣ်န့ၣ် အိၣ်ဝဲသၢမံၤဒီးတၢ်လၢ ပှၤဟီၣ်ခိၣ်ဖိ တူၢ်တကဲဘၣ်န့ၣ် အိၣ်ဝဲလွံၢ်မံၤလီၤ.
၂၂ တၢ်လွံၢ်မံၤန့ၣ် မ့ၢ်ဝဲ ဖဲကုၢ်တဂၤ ပၢတၢ်ဒ်စီၤပၤအခါ,+ဖဲပှၤဟးဂီၤဖိ အီၣ်တၢ်အါတလၢအခါ,
၂၃ ဖဲပိာ်မုၣ်လၢ ပှၤသးဟ့အီၤတဂၤ န့ၢ်အဝၤအခါဒီးဖဲကုၢ်မုၣ်တဂၤ ထီၣ်အကစၢ်မုၣ် အလီၢ်အခါလီၤ.+
၂၄ လၢဟီၣ်ခိၣ်ချၢန့ၣ် အိၣ်ဝဲဒီး တၢ်လွံၢ်မံၤလၢ အဆံးဒိၣ်မးဘၣ်ဆၣ် အကူၣ်တၢ်သ့ဒိၣ်မးလီၤ.+
၂၅ တၢၢ်သ့ၣ်တဖၣ်န့ၣ် အဂံၢ်အဘါ တဆူၣ်ဘၣ်ဘၣ်ဆၣ် အဝဲသ့ၣ် ကတဲာ်ကတီၤပာ်စၢၤ အတၢ်အီၣ်လၢ တၢ်ကိၢ်ခါလီၤ.+
၂၆ ယုၢ်ၡဖၣ်တဖၣ်န့ၣ်*+ အဂံၢ်အဘါ တဆူၣ်ဘၣ်ဘၣ်ဆၣ် အဝဲသ့ၣ် တ့ထီၣ်အဟံၣ်လၢ လ့တဖၣ်အပူၤလီၤ.+
၂၇ ဒွဲၣ်တဖၣ်န့ၣ်+ အစီၤပၤတအိၣ်ဘၣ်ဘၣ်ဆၣ် အဝဲသ့ၣ်လဲၤတၢ် တကရူၢ်ဘၣ်တကရူၢ်လီၤ.+
၂၈ တိတဲာ်န့ၣ်+ အစုအခီၣ် ဖီၣ်တၢ်ဘုးတာ်ဒီးလဲၤနုာ်လီၤဝဲလၢ စီၤပၤ အနီပူၤလီၤ.
၂၉ တၢ်လၢ ပှၤကွၢ်အီၤဂ့ၤဖဲ အဟးအခါန့ၣ် အိၣ်ဝဲသၢမံၤဒီးတၢ်လၢအဖျါ လီၤထုးန့ၢ်သူၣ်ထုးန့ၢ်သး ဖဲအဟးအခါန့ၣ် အိၣ်ဝဲလွံၢ်မံၤလီၤ.
၃၀ တၢ်သ့ၣ်တဖၣ်န့ၣ်မ့ၢ်ဝဲ ခ့ယုၢ်လၢ အဂံၢ်ဆူၣ်ဘါဆူၣ် ဒိၣ်ကတၢၢ်လၢ ဆၣ်ဖိကီၢ်ဖိအကျါလၢအတဃၣ်ကွံာ်အသးလၢ တၢ်နီတမံၤဘၣ်,+
၃၁ ထွံၣ်လၢအဃ့ၢ်ချ့, မဲာ်တဲးလဲးဖါဒီးစီၤပၤတဂၤလၢ အသုးမုၢ် အိၣ်ဒီးအီၤလီၤ.
၃၂ နမ့ၢ်ပာ်ထီၣ်ထီသး ဒ်ပှၤနါစိၤဖိ မၤဝဲအသိး+မ့တမ့ၢ် နမ့ၢ်ကူၣ်ထီၣ်လၢ နကမၤဒ်န့ၣ်န့ၣ်ပံးနထးခိၣ် ဒီးအိၣ်ဘှ့ၣ်တက့ၢ်.+
၃၃ ပှၤမ့ၢ်ဝ့ၤတၢ်နုၢ်ထံန့ၣ် အကဲထီၣ် ထီပးလီၤ.
ပှၤမ့ၢ်ဘံး ပှၤနါဒ့န့ၣ် အသွံၣ် ကလီၤဝဲလီၤ.
ဒ်န့ၣ်အသိး ပှၤမ့ၢ်ထိၣ်ဂဲၤထီၣ် တၢ်သးထီၣ်န့ၣ် တၢ်အ့ၣ်လိာ်သး ကအိၣ်ထီၣ်ဝဲလီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ဘၣ်တၢ်မၤကွၢ်အီၤလၢ မ့ၣ်အူ.”
^ မ့ၢ်စ့ၢ်ကီး “လၢအီၣ်.”
^ အခီပညီလိၤလိၤ “ပှၤအိၣ်ဝဲတစိၤ.”
^ အခီပညီလိၤလိၤ “တၢ်အ့ၣ်.”
^ လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.
^ မ့ၢ်စ့ၢ်ကီး “တၢ်လၢအလီၤကမၢကမၣ် ဒိၣ်တလၢ လၢယဂီၢ်.”
^ ယုၢ်ၡဖၣ်န့ၣ် မ့ၢ်ဝဲ ဆၣ်ဖိကီၢ်ဖိ တကလုာ် လၢအလီၤဂာ်ဒ် ပဒဲအသိး ဒီးအခံမဲၢ်တအိၣ်ဘၣ် ဒီးအဝဲသ့ၣ်အိၣ်လၢ လၢၢ်ကဆူးလ့ကဆူး.
