ခ၁
လံာ်စီဆှံ အတၢ်ကစီၣ်
ယဟိဝၤယွၤ အိၣ်ဒီးတၢ်ခွဲးတၢ်ယာ်လၢ ကပၢတၢ် ဒီးအတၢ်ပၢန့ၣ် ဂ့ၤကတၢၢ်လီၤ. ဒီးအတၢ်တိာ်ပာ်လၢ ဟီၣ်ခိၣ်ဒီးပှၤကညီအဂီၢ်န့ၣ် ကလၢပှဲၤထီၣ်ဝဲလီၤ.
ချ.ခ.န ၄၀၂၆ အလီၢ်ခံ “ဂုၢ်” ဒုးအိၣ်ထီၣ်တၢ်သံကွၢ် ဘၣ်ဃး ယဟိဝၤယွၤ အတၢ်ခွဲးတၢ်ယာ်လၢ ကပၢတၢ် ဒီးအတၢ်ပၢ အကျိၤအကျဲလီၤ. ယဟိဝၤယွၤ တဲဆိပာ်ဝဲလၢ အကဒုးအိၣ်ထီၣ် ‘ချံသၣ်’ လၢကမၤသဘှံးဝဲဂုၢ် လၢအမ့ၢ်မုၣ်ကီၤလံၢ်လီၤ. (၁ မိၤၡ့ ၃:၁-၅, ၁၅) ဘၣ်ဆၣ် ယဟိဝၤယွၤ ဟ့ၣ်တၢ်ဆၢကတီၢ်လၢ ပှၤဟီၣ်ခိၣ်ဖိတဖၣ် ကပၢလီၤအသး လၢမုၣ်ကီၤလံၢ် အဖီလာ်လီၤ. |
ချ.ခ.န ၁၉၄၃ ယဟိဝၤယွၤ တဲဘၣ် စီၤအၤဘြၤဟၣ်လၢ တၢ်စံးပာ် ‘အချံအသၣ်’ န့ၣ်ကမ့ၢ် အဝဲအစၢၤအသွဲၣ်တဂၤလီၤ.—၁ မိၤၡ့ ၂၂:၁၈. |
ချ.ခ.န ၁၀၇၀ အလီၢ်ခံ ယဟိဝၤယွၤ တဲဘၣ်စီၤဒၤဝံးဒီး အဖိခွါ စီၤၡလိၤမိၤလၢ တၢ်စံးပာ် ‘အချံအသၣ်’ န့ၣ်ကဟဲလီၤစၢၤလီၤသွဲၣ်လၢ အဝဲသ့ၣ်လီၤ.—၂ ၡမူၤအ့လး ၇:၁၂, ၁၆; ၁ စီၤပၤ ၉:၃-၅; ယၡါယၤ ၉:၆, ၇. |
ခ.န ၂၉ ယဟိဝၤယွၤ ပာ်ဖျါထီၣ်ဝဲလၢ ယ့ၣ်ၡူးမ့ၢ် တၢ်စံးပာ် “အချံအသၣ်” လၢအကန့ၢ်သါဘၣ် စီၤဒၤဝံး အလီၢ်ပစိာ်လီၤ.—ကလၤတံ ၃:၁၆; လူၤကၣ် ၁:၃၁-၃၃; ၃:၂၁, ၂၂. |
ခ.န ၃၃ ဂုၢ်လၢအမ့ၢ် မုၣ်ကီၤလံၢ်န့ၣ် မၤဘၣ်ဒိ တၢ်စံးပာ် “အချံအသၣ်” တစိၢ်ဖိ ခီဖျိလၢမၤသံယ့ၣ်ၡူးလီၤ. ယဟိဝၤယွၤ မၤမူထီၣ်က့ၤယ့ၣ်ၡူးဆူ မူခိၣ် ဒီးတူၢ်လိာ်ဝဲ ယ့ၣ်ၡူးအသးသမူအလၢအပှဲၤ အလုၢ်အပှ့ၤလီၤ. လၢတၢ်န့ၣ်အဃိ စီၤအၤဒၣ်အစၢၤအသွဲၣ်တဖၣ် အတၢ်ဒဲးဘး ကဘၣ်တၢ်ပျၢ်ကွံာ်အီၤ ဒီးအဝဲသ့ၣ် ဒိးန့ၢ်ဘၣ် တၢ်မူအထူအယိာ်သ့လီၤ.—၁ မိၤၡ့ ၃:၁၅; မၤတၢ် ၂:၃၂-၃၆; ၁ ကရံၣ်သူး ၁၅:၂၁, ၂၂. |
ခ.န ၁၉၁၄ ဃၣ်ဃၣ် ယ့ၣ်ၡူးကွံာ်လီၤ ဂုၢ်လၢအမ့ၢ် မုၣ်ကီၤလံၢ် လၢဟီၣ်ခိၣ်ချၢ ဒီးပာ်အီၤဖဲန့ၣ် တစိၢ်ဖိလီၤ.—လီၣ်ဖျါ ၁၂:၇-၉, ၁၂. |
ခါဆူညါ ယ့ၣ်ၡူးကစၢဃာ်မုၣ်ကီၤလံၢ် လၢဃိာ်ပူၤအနံၣ် ၁၀၀၀ ဝံၤအလီၢ်ခံ ကမၤသဘှံးဝဲအခိၣ် ခီဖျိလၢအကမၤသံကွံာ်အီၤလီၤ. ယဟိဝၤယွၤ အတၢ်တိာ်ပာ်အခီၣ်ထံး လၢဟီၣ်ခိၣ် ဒီးပှၤကညီအဂီၢ်န့ၣ် ကလၢပှဲၤထီၣ်ဝဲ, ကစၢ်ယွၤ အမံၤကပူၤဖျဲးဒီး တၢ်ဒုၣ်ဒွဲၣ်စံးအၢ ဒီးအတၢ်ပၢ အကျိၤအကျဲ မ့ၢ်တၢ်လၢအဘၣ်န့ၣ် ကအိၣ်ဖျါထီၣ်ဝဲလီၤ.—လီၣ်ဖျါ ၂၀:၁-၃, ၁၀; ၂၁:၃,၄. |
