ပှၤ​တနီၤ ဆိကမိၣ်​ဝဲ​လၢ ပှၤ​က​ဘၣ်​ကွဲးကျိာ်ထံ တၢ်​ကတိၤ​တဖၣ်​လၢ လံာ်စီဆှံ​အ​ပူၤ တ​ဖျၢၣ်​ဘၣ်​တ​ဖျၢၣ် လီၤတံၢ်​လီၤဆဲး ဒီး​အဝဲသ့ၣ် ဆိကမိၣ်​လၢ ပှၤ​မ့ၢ်​မၤ​ဒ်​န့ၣ်​န့ၣ် ပှၤ​ဖးလံာ်​ဖိ​တဖၣ် က​နၢ်ပၢၢ် တၢ်ကွဲး​အသး​အ​ခီၣ်ထံး လီၤတံၢ်​ဒိၣ်​ကတၢၢ်​လီၤ. ဘၣ်ဆၣ် အ​နီၢ်ကီၢ်​န့ၣ် တမ့ၢ်​ဒ်​န့ၣ်​ထီဘိ​ဘၣ်. ပ​က​ဆိကမိၣ်​ကွၢ် တၢ်ဂ့ၢ်​လၢ​လာ်​တဖၣ်​အံၤ.

•   ကျိာ်​တ​ကျိာ်​ဘၣ်​တ​ကျိာ်​န့ၣ် အ​ကြၣ်မၢ် (grammar), အ​ဝီၢ်သြဲ (vocabulary) ဒီး​ကျိာ်​အ​တၢ်ဘျၢ​တဖၣ်​န့ၣ် တ​ဒ်သိး​ဘၣ်. S. R. Driver လၢ​အမ့ၢ် ပှၤ​ကူၣ်​ဘၣ်​ကူၣ်သ့​လၢ အ​ဘၣ်ဃး​ဒီး ဧ့ၤဘြံၤ​ကျိာ်​န့ၣ် ကွဲးဝဲ​လၢ ကျိာ်​တ​ကျိာ်​ဘၣ်​တ​ကျိာ်​န့ၣ် “အ​ကြၣ်မၢ် ဒီး​တၢ်​ကတိၤ အ​ခီၣ်ထံး​ခီၣ်ဘိ လီၤဆီ​လိာ်​အသး တကး​ဒံးဘၣ် ပှၤဘၣ်​ပာ်ဖှိၣ်​ထီၣ် တၢ်​ကတိၤ​အ​ဖျၢၣ်​တဖၣ် အလီၢ်​အကျဲ​န့ၣ် တ​ဒ်သိး​လိာ်​အသး​ဘၣ်.” ပှၤလၢ​အ​တဲ ကျိာ်​တ​ကျိာ်​ဘၣ်​တ​ကျိာ်​န့ၣ် အဝဲသ့ၣ် ဆိကမိၣ်​တၢ် တ​ဒ်သိး​လိာ်​အသး​ဘၣ်. အဃိ ပှၤ​ကူၣ်​ဘၣ်​ကူၣ်သ့ S. R. Driver တဲဝဲ​လၢ “ကျိာ်​တ​ကျိာ်​ဘၣ်​တ​ကျိာ်​န့ၣ် ပှၤ​ကွဲး​လံာ် အကျိၤ​အကျဲ တ​ဒ်သိး​လိာ်​အသး​ဘၣ်.”

•   ကျိာ်​လၢ ပှၤ​တဲ​အီၤ​လၢ မုၢ်မဆါ​တနံၤ​အံၤန့ၣ် အ​ကြၣ်မၢ် ဒီး​အ​ဝီၢ်သြဲ လီၤဆီ​လိာ်​အသး​ဒီး ဧ့ၤဘြံၤ, အရၣ်မ့း ဒီး​ကြံး​ကျိာ် အ​ကြၣ်မၢ် ဒီး​အ​ဝီၢ်သြဲ လၢ​ပှၤ​သူ​အီၤ​ဖဲ ပှၤ​ကွဲး​လံာ်စီဆှံ​အဆၢ​ကတီၢ်​လီၤ. အဃိ ပှၤ​မ့ၢ်​ကွဲးကျိာ်ထံ​အီၤ​လၢ တၢ်​ကတိၤ​တ​ဖျၢၣ်​ဘၣ်​တ​ဖျၢၣ်​န့ၣ် ပှၤ​နၢ်ပၢၢ်​အခီ​ပညီ​တ​ၡဲ​ဘၣ် ဒီး​တဘျီ​တခီၣ်​န့ၣ် ပှၤ​ဖးလံာ်​ဖိ​တဖၣ် နၢ်ပၢၢ်​ကမၣ်​အခီ​ပညီ သ့ဝဲ​လီၤ.

•   တၢ်​ကတိၤ​တနီၤ အခီ​ပညီ အိၣ်​ဒ်လဲၣ်​န့ၣ် ဒိးသန့ၤ​ထီၣ်​အသး​လၢ တၢ်ဂ့ၢ်​လၢ​အ​မဲာ်ညါ ဒီး​အလီၢ်​ခံ​လီၤ.

လံာ်စီဆှံ​အဆၢ​တနီၤ​န့ၣ် ပှၤ​ကွဲးကျိာ်ထံ​တၢ်​တဖၣ် ကွဲး​ကျိာ်​အီၤ လၢ​တၢ်​ကတိၤ​တ​ဖျၢၣ်​ဘၣ်​တ​ဖျၢၣ် ဒ်​တၢ်ကွဲး​အသး အ​ခီၣ်ထံး​အိၣ်ဝဲ​အသိး​သ့, ဘၣ်ဆၣ် အဝဲသ့ၣ် မ့ၢ်​မၤဝဲ​ဒ်​န့ၣ်​န့ၣ် အဝဲသ့ၣ် က​ဘၣ်​ပလီၢ်​အသး သပှၢ်တၢၢ်​လီၤ.

 တၢ်​ကွဲးကျိာ်ထံ​တၢ်​လၢ တၢ်​ကတိၤ​တ​ဖျၢၣ်​ဘၣ်​တ​ဖျၢၣ် ဒုး​နၢ်ပၢၢ်​ကမၣ် ပှၤကညီ​သ့​န့ၣ် ပ​ကကွၢ်​သကိး တၢ်​အဒိ​တနီၤ.

•   လံာ်စီဆှံ ပာ်ဖျါ​ထီၣ်ဝဲ တၢ်​ကတိၤ​လၢ​အမ့ၢ် “မံ” န့ၣ်​တဘျီ​တခီၣ် အဲၣ်ဒိး​တဲဝဲ ပှၤ​မံ​အ​နီၢ်ကီၢ် ဒီး​တဘျီ​တခီၣ်​န့ၣ် အဲၣ်ဒိး​တဲဝဲ ပှၤသံ (မံ​လၢ​တၢ်သံ​အ​ပူၤ) လီၤ. (မးသဲ ၂၈:၁၃; မၤတၢ် ၇:၆၀) ဖဲ​တၢ်​ကတိၤ​အံၤ အဲၣ်ဒိး​တဲဝဲ​လၢ ပှၤသံ​လံ​အခါ ပှၤ​ကွဲးကျိာ်ထံ​လံာ်စီဆှံ​တဖၣ်​န့ၣ် ကွဲးကျိာ်ထံ​က့ၤဝဲ​လၢ “မံ​လၢ​တၢ်သံ​အ​ပူၤ” မ့တမ့ၢ် ကွဲးဝဲ​ယိယိ​လၢ “သံ​လံ” သ့​စ့ၢ်ကီး​လီၤ. ခီဖျိ​လၢ အဝဲသ့ၣ် မၤဝဲ​ဒ်​န့ၣ်​အဃိ ပှၤ​ဖးလံာ်​ဖိ​တဖၣ် တ​နၢ်ပၢၢ်​ကမၣ်​လၢၤဘၣ်.​—⁠၁ ကရံၣ်သူး ၇:၃၉; ၁ သ့းစၤလနံ ၄:၁၃; ၂ ပ့းတရူး ၃:⁠၄.

•   ဖဲ အ့းဖ့းစူး ၄:၁၄ အ​ပူၤ​န့ၣ် တၢ်မၢဖိ​ပီလူး သူဝဲ​တၢ်​ကတိၤ​တ​ဖျၢၣ်​လၢ အခီ​ပညီ​လိၤလိၤ မ့ၢ်ဝဲ “ဂဲၤ​လိာ်ကွဲ​ဒီး ပှၤ​ဟီၣ်ခိၣ်​ဖိ အ​လွံၢ်​ဘီ​ကျီ (dice)” လီၤ. ပှၤ​မ့ၢ်​ကွဲးကျိာ်ထံ​အီၤ လိၤလိၤ​ဒ်အံၤ​န့ၣ် ပှၤ​တ​နၢ်ပၢၢ် အခီ​ပညီ​ဘၣ်. တၢ်​ကတိၤ​တ​ဖျၢၣ်​အံၤန့ၣ် မ့ၢ်​တၢ်​ကတိၤဒိ​လၢပျၢၤ​တခါ လၢ​အဲၣ်ဒိး​တဲဝဲ ပှၤ​လံၣ်အီၣ်​လီအီၣ် ပှၤဂၤ​ဖဲ အဝဲသ့ၣ် လိာ်ကွဲ​ဝဲ လွံၢ်​ဘီ​ကျီ လၢ​အမ့ၢ် တၢ်​လိာ်ကွဲ​အ​ဖျၢၣ်​တခါ​လၢ အနၢၣ်​အိၣ်​လွံၢ်​နၢၣ်​လီၤ. အဃိ ပှၤ​မ့ၢ်​ကွဲးကျိာ်ထံ တၢ်​ကတိၤဒိ​တ​ဖျၢၣ်​အံၤ​လၢ “ပှၤ​ဟီၣ်ခိၣ်​ဖိ အ​တၢ်​ကွဲန့ၢ်​လွဲန့ၢ်” န့ၣ်​အခီ​ပညီ ဖျါ​ၡဲၡဲ​လီၤ.

•   ဖဲ ရိမ့ၤ ၁၂:၁၁ အ​ပူၤ​န့ၣ် ကြံး​အ​တၢ်​ကတိၤ အိၣ်ဝဲ​တ​ဖျၢၣ်​လၢ အခီ​ပညီ​လိၤလိၤ​မ့ၢ်ဝဲ “သး​ကလာ်​ထီၣ်” လီၤ. ပှၤ​မ့ၢ်​ကွဲးကျိာ်ထံ​အီၤ ဒ်အံၤ​န့ၣ် အခီ​ပညီ​တဖျါ​ဘၣ်. အဃိ လၢ​တၢ်​ကွဲးကျိာ်ထံ လံာ်စီဆှံ​တ​ဘ့ၣ်​အံၤ​အ​ပူၤ ပှၤ​ကွဲးကျိာ်ထံ​ဝဲ တၢ်​ကတိၤ​တ​ဖျၢၣ်​န့ၣ်​လၢ “ပျဲ​သးစီဆှံ မၤဆူၣ်​ထီၣ်​သု​သး” လီၤ.

•   ဖဲ​ယ့ၣ်ၡူး စံၣ်တဲၤ​တဲလီၤ​တၢ်​လၢ ကစၢၢ်​ခိၣ်​အခါ အ​သူဝဲ တၢ်​ကတိၤ​တထံၣ်​လၢ ပှၤ​အါဂၤ ကွဲးကျိာ်ထံ​အီၤ​လၢ “ပှၤလၢ​အသး​ဖှီၣ်​တဖၣ်​န့ၣ် ဘၣ်​ဆိၣ်ဂ့ၤ​ဝဲ​လီၤ.” (မးသဲ ၅:​၃, မ့ၤစံၣ်​လံာ်စီဆှံ) ဘၣ်ဆၣ် ပှၤ​မ့ၢ်​ကွဲးကျိာ်ထံ​အီၤ​လၢ “ပှၤလၢ​အသး​ဖှီၣ်” န့ၣ်​ပှၤ​နၢ်ပၢၢ်​ကမၣ် အခီ​ပညီ​သ့ဝဲ​လီၤ. ဖဲ​အံၤန့ၣ် ယ့ၣ်ၡူး​တ​အဲၣ်ဒိး​တဲဝဲ ဘၣ်ဃး​ဒီး ပှၤလၢ​အသး​ဘၣ်ဖှီၣ် အ​နီၢ်ကီၢ်​ဘၣ်. လၢ​တၢ်ကွဲး​အသး အ​ခီၣ်ထံး​အ​ပူၤ​န့ၣ် ယ့ၣ်ၡူး အဲၣ်ဒိး​တဲဝဲ​လၢ ဒ်သိး​ပှၤ​က​သးခု​အဂီၢ် ပှၤ​က​ဘၣ်​သ့ၣ်ညါ​လီၤ အသး​လၢ အ​လိၣ်ဘၣ် ကစၢ်​ယွၤ အ​တၢ်​ဟံးစု​နဲၣ်ကျဲ ဒီး​ပ​တၢ်​သးခု​န့ၣ် တ​သန့ၤ​ထီၣ်​အသး​လၢ ပ​မၤ​လၢပှဲၤ ပ​တၢ်လိၣ်​ဘၣ်​လၢ နီၢ်ခိ​တခီ​ဘၣ်. (လူၤကၣ် ၆:၂၀) အဃိ ပှၤ​မ့ၢ်​ကွဲးကျိာ်ထံ​လၢ “ပှၤလၢ အ​သ့ၣ်ညါ​လီၤ​အသး​လၢ အ​လိၣ်ဘၣ် ကစၢ်​ယွၤ အ​တၢ်​ဟံးစု​နဲၣ်ကျဲ” မ့တမ့ၢ် “ပှၤလၢ အ​သ့ၣ်ညါ​လီၤ​အသး​လၢ အ​လိၣ်ဘၣ် ကစၢ်​ယွၤ” န့ၣ်​ယ့ၣ်ၡူး အ​တၢ်​ကတိၤ​တထံၣ်​အံၤ အခီ​ပညီ ဖျါ​လီၤတံၢ်​ဒိၣ်​တစဲး​လီၤ.​—⁠မးသဲ ၅:⁠၃.

•   လၢ​လံာ်စီဆှံ​အါ​ဆၢ​အ​ပူၤ ဧ့ၤဘြံၤ​အ​တၢ်​ကတိၤ qin·ʼahʹ န့ၣ် အဲၣ်ဒိး​တဲဝဲ တၢ်​သူၣ်က့ၣ်​သးကါ လၢ​အမ့ၢ် တၢ်​သူၣ်ဒိၣ်​သးဖျိး​တၢ် ခီဖျိ​လၢ ပှၤလၢ ပှၤ​ရ့​အီၤ​ဘူးဘူး​တဂၤ တအိၣ်​ဒီး တၢ်​သးတီ​ဘၣ် မ့တမ့ၢ် တၢ်​သူၣ်က့​သးကါ​ပှၤဂၤ ခီဖျိ တၢ်​လၢ​အ​အိၣ်ဒီး အဝဲသ့ၣ် အဃိ​လီၤ. (ကတိၤဒိ ၆:၃၄; ယၡါယၤ ၁၁:၁၃) ဘၣ်ဆၣ် တဘျီ​တခီၣ် ဧ့ၤဘြံၤ​အ​တၢ်​ကတိၤ​တ​ဖျၢၣ်​အံၤ  အဲၣ်ဒိး​တဲဝဲ တၢ်​လၢ​အဂ့ၤ​တမံၤ​လီၤ. အဒိ တဘျီ​တခီၣ် အ​အဲၣ်ဒိး​တဲဝဲ ‘တၢ်​သးဆူၣ်’ လၢ​ယဟိဝၤ​ယွၤ ပာ်ဖျါ​ထီၣ်ဝဲ​လၢ က​ဒီသဒၢ အခ့​အပှၤ​တဖၣ်​အဂီၢ် ဒီး​တဘျီ​တခီၣ် အ​အဲၣ်ဒိး​တဲဝဲ​လၢ ယဟိဝၤ​ယွၤ “မၤလိာ်​ဝဲ​လၢ ပှၤ​က​ဘၣ် တီ​ဒီး​အီၤ​လၢ သး​ဒီဖျၢၣ်​လီၤ.” (၂ မိၤၡ့ ၃၄:၁၄; ၂ စီၤပၤ ၁၉:၃၁; ယဃ့းစက့လး ၅:၁၃; စကၤရယၤ ၈:၂) ဒီး​တဘျီ​တခီၣ် တၢ်​ကတိၤ​တ​ဖျၢၣ်​အံၤ အဲၣ်ဒိး​တဲဝဲ “တၢ်​သးဆူၣ်” လၢ​ကစၢ်​ယွၤ အခ့​အပှၤ​လၢ အသး​တီ​တဖၣ် ပာ်ဖျါ​ထီၣ်ဝဲ​လၢ ကစၢ်​ယွၤ ဒီး​အ​တၢ်ဘူၣ်​တၢ်ဘါ​အဂီၢ် ဒီး​အဲၣ်ဒိး​တဲ​စ့ၢ်ကီး​ဝဲ​လၢ ပှၤ​တ​တူၢ်လိာ် တၢ်​လၢ​အ​ထီဒါ ကစၢ်​ယွၤ နီတမံၤ​ဘၣ်.​—⁠စံးထီၣ်​ပတြၢၤ ၆၉:၉; ၁၁၉:၁၃၉; ၄ မိၤၡ့ ၂၅:၁၁.

•   ဧ့ၤဘြံၤ​အ​တၢ်​ကတိၤ လၢ​ညီနုၢ်​အဲၣ်ဒိး​တဲဝဲ ပှၤကညီ​အ​စု​န့ၣ် အခီ​ပညီ အိၣ်ဖး​အါ​ညါ. တဘျီ​တခီၣ် ပှၤ​ကွဲးကျိာ်ထံ တၢ်​ကတိၤ​တ​ဖျၢၣ်​အံၤ​လၢ ‘တၢ်​သးအိၣ်​ဟ့ၣ်​တၢ်,’ ‘တၢ်​တီခိၣ်ရိၤမဲ​တၢ်’ မ့တမ့ၢ် “တၢ်စိ​တၢ်ကမီၤ” လီၤ. (၁ စီၤပၤ ၁၀:၁၃; ၂ ကွဲးနီၣ်​တၢ် ၁၇:၁၅; ကတိၤဒိ ၁၈:၂၁) နီၢ်ကီၢ်​န့ၣ်​လၢ ဟီၣ်ခိၣ်​သီ တၢ်​ကွဲးကျိာ်ထံ​လံာ်စီဆှံ လၢ​ကီၤလၤဝါ​ကျိာ် အ​ပူၤ​န့ၣ် ပှၤ​ကွဲးကျိာ်ထံ တၢ်​ကတိၤ​တ​ဖျၢၣ်​အံၤ လၢ​တၢ်​ကတိၤ​အဂၤ အ​ဖျၢၣ် ၄၀ ညါ.

လၢ​တၢ်ဂ့ၢ်​တဖၣ်​အံၤ​အဃိ ဖဲ​ပှၤ​ကွဲးကျိာ်ထံ လံာ်စီဆှံ​အခါ တၢ်​ကတိၤ​တ​ဖျၢၣ်​ဂ့ၤ​တ​ဖျၢၣ်​ဂ့ၤ​န့ၣ် တမ့ၢ်​ထဲ ပှၤ​ဟံသံဃာ် တၢ်​ကတိၤ​တ​ဖျၢၣ်​လီၢ်​လီၢ် လၢ​ပှၤ​က​ကွဲးကျိာ်ထံ​အီၤ​အဂီၢ် ဒီး​ကွဲးကျိာ်ထံ​အီၤ ဒ်​န့ၣ်​ကိးဘျီ​ဒဲး​ဘၣ်. ပှၤ​ကွဲးကျိာ်ထံ​တၢ်​တဂၤ က​ဘၣ်​ပဲာ်ထံ​နီၤဖး​တၢ် ဒီး​ဃုထၢ​တၢ်​ကတိၤ​လၢ အ​နီၢ်ကစၢ်​အကျိာ် ဒ်သိး တၢ်ကွဲး​အသး​လၢ​အ​ခီၣ်ထံး​န့ၣ် အခီ​ပညီ​က​ဖျါထီၣ် ၡဲၡဲ​အဂီၢ်​လီၤ. တကး​ဒံးဘၣ် ဖဲ​ပှၤ​ကွဲးကျိာ်ထံ​တၢ်​အခါ ပှၤ​က​ဘၣ်​ရဲၣ်လီၤ တၢ်​ကတိၤ​အ​ဖျၢၣ်​တဖၣ် လၢ​အလီၢ်​အကျဲ ဒ်​အ​နီၢ်ကစၢ်​ကျိာ် အ​ကြၣ်မၢ်​အိၣ်ဝဲ​အသိး​လီၤ. ပှၤ​မ့ၢ်​မၤ​ဒ်​န့ၣ်​န့ၣ် ပှၤ​ကနၣ်​က​လိၤ ဒီး​ပှၤ​ဖးဘၣ်​အီၤ ကညီ​ဝဲ​လီၤ.

ဘၣ်ဆၣ် ပှၤ​ကွဲးကျိာ်ထံ​တၢ်​တဖၣ် တဘၣ်​ဆီတလဲ တၢ်ဂ့ၢ်​ဖဲ​အသး​ဘၣ်. ပှၤ​ကွဲးကျိာ်ထံ​တၢ်​တဂၤ မ့ၢ်​ကွဲးဖုၣ်​လီၤ တၢ်ဂ့ၢ်​လၢ လံာ်စီဆှံ​ပူၤ လၢ​အ​တၢ်​နၢ်ပၢၢ်​အ​ဖီခိၣ်​န့ၣ် အ​ကွဲးကျိာ်ထံ ကမၣ်​ဘၣ် အခီ​ပညီ သ့ဝဲ​လီၤ. အဒိ ဘၣ်​သ့ၣ်​သ့ၣ် ပှၤ​ကွဲးကျိာ်ထံ​တၢ်​တဂၤ က​ပၢ​နုာ်လီၤ​ကမၣ်​ဘၣ် အ​နီၢ်ကစၢ်​အ​တၢ်​ထံၣ် ဘၣ်ဃး​ဒီး တၢ်ကွဲး​အသး​အ​ခီၣ်ထံး အခီ​ပညီ မ့တမ့ၢ် က​ထုး​လီၤ​စှၤ​ဘၣ် တၢ်ဂ့ၢ်​အရ့ဒိၣ်​လၢ အ​အိၣ်​လၢ တၢ်ကွဲး​အသး အ​ခီၣ်ထံး​အ​ပူၤ​လီၤ. အဃိ တၢ်ကွဲး​ဖုၣ်လီၤ လံာ်စီဆှံ​န့ၣ် ပှၤ​ဖးဘၣ်​အီၤ​ညီ သနာ်က့ ခီဖျိ​လၢ အဝဲသ့ၣ် ကွဲး​ဘျ့​ထီၣ် တၢ်ဂ့ၢ်​လၢ အဝဲသ့ၣ် အ​တၢ်​နၢ်ပၢၢ်​အ​ဖီခိၣ် အဃိ အ​တ​ဒုး​နၢ်ပၢၢ် ပှၤ​ဖးလံာ်​ဖိ​လၢ တၢ်ကွဲး​အသး​အ​ခီၣ်ထံး အခီ​ပညီ တီတီ​လိၤလိၤ​လၢၤဘၣ်.

အဂၤ​တမံၤ​န့ၣ် ပှၤ​ကွဲးကျိာ်ထံ​တၢ်​တဂၤ အသး​မ့ၢ်​ဆူၣ်​တလၢ လၢ​အ​တၢ်စူၢ်​တၢ်နာ် အ​ဖီခိၣ်​န့ၣ် ဘၣ်​သ့ၣ်​သ့ၣ် အ​က​ကွဲးကျိာ်ထံ ကမၣ်​ဘၣ်​တၢ် စ့ၢ်ကီး​လီၤ. အဒိ မးသဲ ၇:၁၃ တဲဝဲ​လၢ “ကျဲ​လၢ​အလဲၢ်​န့ၣ် ဆှၢ​ပှၤလၢ​တၢ်​ဟးဂီၤ” လီၤ. ဘၣ်​သ့ၣ်​သ့ၣ် ပှၤ​ကွဲးကျိာ်ထံ​တၢ်​တနီၤ အ​သးဆူၣ်​တလၢ လၢ​အ​တၢ်စူၢ်​တၢ်နာ်​အ​ဖီခိၣ် အဃိ ဖဲ​အံၤန့ၣ် အဝဲသ့ၣ် ကွဲးကျိာ်ထံ​ဝဲ တၢ်​ကတိၤ​လၢ​အမ့ၢ် တၢ်​ဟးဂီၤ​န့ၣ်​လၢ “လရာ်” လီၤ. နီၢ်ကီၢ်​န့ၣ် ကြံး​အ​တၢ်​ကတိၤ​တ​ဖျၢၣ်​အံၤ အဲၣ်ဒိး​တဲဝဲ ယိယိ​လၢ “တၢ်​ဟးဂီၤ” လီၤ.

 ပှၤလၢ​က​ကွဲးကျိာ်ထံ လံာ်စီဆှံ​န့ၣ် က​ဘၣ်​သ့ၣ်နီၣ်​ထီၣ်ဝဲ​လၢ လၢ​အ​ခီၣ်ထံး​န့ၣ် ပှၤ​ကွဲး​လံာ်စီဆှံ​လၢ မုၢ်ဆ့ၣ်​မုၢ်ဂီၤ အ​တၢ်​ကတိၤ​လၢ ပှၤ​ထူစံာ်​ဖိ, ပှၤ​ကွၢ်​သိဖိ ဒီး​ပှၤ​မၤ​ညၣ်ဖိ​တဖၣ် တဲဝဲ​လီၤ. (နဃ့မယၤ ၈:​၈, ၁၂; မၤတၢ် ၄:၁၃) ပှၤ​မ့ၢ်​ကွဲးကျိာ်ထံ လံာ်စီဆှံ​မူာ်မူာ်​နီၢ်နီၢ်​န့ၣ် ပှၤ​သူၣ်ဘျၢ​သးဘျၢ မ့ၢ်​အိၣ်​ဟဲ​လၢ တၢ်လီၢ်​ဖဲလဲၣ် ဒီး​အမ့ၢ် ပှၤ​ဒ်လဲၣ်​တဂၤ​လဲၣ် သနာ်က့ အ​က​နၢ်ပၢၢ် လံာ်စီဆှံ​အ​တၢ်​ကစီၣ် ဂ့ၤဂ့ၤ​လီၤ. အဃိ ဖဲ​ပှၤ​ကွဲးကျိာ်ထံ​တၢ်​အခါ ပှၤ​မ့ၢ်​ဃုထၢ တၢ်​ကတိၤ​လၢ အခီ​ပညီ​ဖျါ​ၡဲ ဒီး​တၢ်​ကတိၤ​လၢ ပှၤ​နၢ်ပၢၢ်​ဘၣ်​အီၤ​ညီ​န့ၣ် ဂ့ၤဒိၣ်​န့ၢ်ဒံး တၢ်​ကတိၤ​လၢ ပှၤ​မုၢ်ဆ့ၣ်​မုၢ်ဂီၤ​ဖိ တ​တဲဝဲ​ကြီကြီ​ဘၣ်​တဖၣ်​လီၤ.

ကစၢ်​ယွၤ​အ​မံၤ ယဟိဝၤ​န့ၣ် အိၣ်ဝဲ​လၢ တၢ်ကွဲး​ကူ​က့ၤ လံာ်စီဆှံ​လၢပျၢၤ​တဖၣ်​အ​ပူၤ ဘၣ်ဆၣ် ပှၤလၢ​အ​ကွဲးကျိာ်ထံ​တၢ် လၢ​ပစိၤ​ခဲအံၤ​အါဂၤ​န့ၣ် တ​ကွဲး​နုာ်လီၤ​ဝဲ ကစၢ်​ယွၤ အ​မံၤ​ဘၣ်​အဃိ မ့ၢ်​တၢ်​လၢ အ​တ​ကြၢး​တဘၣ်​ဘၣ်. (ကွၢ် တၢ်ဂ့ၢ်​ဘၣ်ထွဲ​လိာ်သး က​၄.) လၢ​ကစၢ်​ယွၤ အ​မံၤ​အလီၢ်​န့ၣ် ပှၤ​ကွဲးကျိာ်ထံ​တၢ်​အါဂၤ ကွဲးလီၤ​က့ၤ​လၢ မံၤလၤ​သၣ်ကပီၤ တခါခါ ဒ်သိး​ဒီး “ကစၢ်” လီၤ. ဒီး​ကစၢ်​ယွၤ အိၣ်ဒီး​အ​မံၤ​န့ၣ် ပှၤ​ကွဲးကျိာ်ထံ​တၢ်​တနီၤ တ​ပာ်ဖျါ​ထီၣ်ဝဲ​ဘၣ်. အဒိ လၢ​လံာ်စီဆှံ တနီၤ​အ​ပူၤ​န့ၣ် ပှၤ​ကွဲးကျိာ်ထံ​ဝဲ ယ့ၣ်ၡူး​အ​တၢ်​ထုကဖၣ်​လၢ ယိၤဟၣ် ၁၇:၂၆ လၢ “ယ​ဒုး​သ့ၣ်ညါ​တ့ၢ် အဝဲသ့ၣ်​လၢ​နၤ” ဒီး ယိၤဟၣ် ၁၇:၆ လၢ “ပှၤလၢ​န​ဟ့ၣ်​လီၤ​ယၤ . . . ယ​ဒုး​သ့ၣ်ညါ​လံ အီၤ​လၢ​နၤ​လံ.” ဘၣ်ဆၣ် ပှၤ​မ့ၢ်​ကွဲးကျိာ်ထံ ယ့ၣ်ၡူး​အ​တၢ်​ထုကဖၣ်​အံၤ တီတီ​လိၤလိၤ​န့ၣ် က​ကွဲးဝဲ​လၢ “ယ​ဒုး​သ့ၣ်ညါ အဝဲသ့ၣ်​လၢ​န​မံၤ​လံ” ဒီး “ပှၤလၢ . . . န​ဟ့ၣ်​လီၤ​ယၤ​န့ၣ် ယ​ပာ်ဖျါ​ထီၣ်​န့ၢ်​အဝဲသ့ၣ်​လၢ န​မံၤ​လံ.”

ဟီၣ်ခိၣ်​သီ တၢ်​ကွဲးကျိာ်ထံ​လံာ်စီဆှံ လၢ​ကီၤလၤဝါ​ကျိာ် လၢ​အ​ခီၣ်ထံး​တ​ဘ့ၣ် အ​တၢ်​ကတိၤ​အိးထီၣ်​န့ၣ် တဲဝဲ​လၢ “ပ​တ​ကွဲးဖုၣ်​လီၤ လံာ်စီဆှံ အ​တၢ်ကွဲး​အသး​တဖၣ်​ဘၣ်. စးထီၣ်​လၢ​အ​ခီၣ်ထံး ဖဲ​ပ​ကွဲးကျိာ်ထံ​တၢ်​အခါ ပ​ကွဲးကျိာ်ထံ တၢ်ကွဲး​အသး အ​ခီၣ်ထံး​လိၤလိၤ တ​ဖျၢၣ်​ဘၣ်​တ​ဖျၢၣ်​မ့ၢ်​သ့ ဒီး​ပှၤ​ကနၣ်​မ့ၢ်​လိၤ ဒီး​အခီ​ပညီ​မ့ၢ်​ၡဲ​န့ၣ် ပ​ကွဲးကျိာ်ထံ​အီၤ​ဒ်​န့ၣ်​ထီဘိ​လီၤ.” အဃိ ဟီၣ်ခိၣ်​သီ တၢ်​ကွဲးကျိာ်ထံ​လံာ်စီဆှံ ကမံးတံာ် ဂုာ်ကျဲးစၢး သူ​တၢ်​ကတိၤ​လၢ အ​လီၤဂာ်​ဒီး တၢ်ကွဲး​အသး​အ​ခီၣ်ထံး ဒီး​တ​ကတီၢ်ဃီ​န့ၣ် အဝဲသ့ၣ် ဟးဆှဲး​တၢ်​လၢ အသီၣ်​တလိၤ​ဘၣ် ဒီး​တၢ်​ကတိၤ​လၢ ပှၤနၢ်​တ​ပၢၢ်​ဘၣ်​လီၤ. လၢ​တၢ်န့ၣ်​အဃိ ပှၤ​ဖးဘၣ်​လံာ်စီဆှံ​ညီဝဲ ဒီး​ပှၤ​ကွဲးကျိာ်ထံ လံာ်စီဆှံ​တ​ဘ့ၣ်​အံၤ တီတီ​လိၤလိၤ​န့ၣ် ပှၤ​နာ်န့ၢ်​အီၤ​သ့ လၢ​လၢပှဲၤ​ပှဲၤလီၤ.​—⁠၁ သ့းစၤလနံ ၂:⁠၁၃.