ဒီပုၢ်ဝဲၢ်​မုၣ် အလိၤ​နၤ​စံး​ဝဲ​လၢ “ဖဲ​ယ​နၢ်ဟူ တၢ်​ဟ့ၣ်ပလီၢ်​တၢ်​အ​ကလုၢ်​သီၣ်ထီၣ်​အခါ ယ​သးကနိး​ဒီး ယ​လဲၤ​ဃ့ၢ်​နုာ်​ဆူ တၢ်ပူၤ​လၢ​ပှၤ​အိၣ်​ခူသူၣ်​တၢ်​အလီၢ်​န့ၣ်​လီၤ. ဘၣ်ဆၣ် ယ​အိၣ်​လၢ​တၢ်ပူၤ​အံၤ​ဒၣ်လဲာ် ယ​သူၣ်ကိၢ်​သးဂီၤ​ဒံးဝဲ​လီၤ. မ့မ့ၢ်​ဖဲ​ယ​အိၣ်​လၢ​တၢ်ချၢ ဒီး​တၢ်အိၣ်​ခူသူၣ်​အလီၢ်​တအိၣ်​ဘၣ်​အခါ ယ​သူၣ်ကိၢ်​သးဂီၢ်​ဒိၣ်န့ၢ်​အလီၢ်လီၤ. ဘၣ်​တဘျီ ဖဲ​ယ​ဟး​လၢ​ကျဲမုၢ်ခိၣ်​အခါ ယ​ဟီၣ်​တုၤ​ဒၣ်လဲာ် ယ​က​သါ​တ​န့ၢ်​လၢၤဘၣ်​လီၤ. ဒ်သိး​ယ​သး​ကခုၣ်​လီၤ​က့ၤ​အဂီၢ် တၢ်​ဆၢကတီၢ်​ယံာ်ဝဲ​တဘျုး​နၣ်ရံၣ်​ညါ​ဘၣ်ဆၣ် တၢ်​ဟ့ၣ်ပလီၢ်​အ​ကလုၢ် က့ၤ​သီၣ်ထီၣ်​လၢ​အသီ​တဘျီ​လီၤ.”

တၢ်ဒုး​တၢ်ယၤ​န့ၣ် မ့ၢ်​စ့ၢ်ကီး​တၢ်​တခါ​လၢ အ​ဒုးအိၣ်​ထီၣ်​တၢ်​ဘၣ်ယိၣ်​ဘၣ်ဘှီ​န့ၣ်​လီၤ. အဒိ​ဖဲ​န​သ့ၣ်ညါ​ဘၣ်​လၢ​နၤ မ့တမ့ၢ် ပှၤလၢ​န​အဲၣ်ဘၣ်​အီၤ​တဂၤ​အိၣ်ဒီး တၢ်ဆါ​လၢ​တၢ်​ဘၣ်ယိၣ်​အိၣ်​လၢ သးသမူ​အဂီၢ်​အခါ န​က​တူၢ်ဘၣ်​ဒ်သိး န​ဘၣ်ဒိ​ဒီး​မ့ၣ်ပိၢ်​န့ၣ်​လီၤ. ဒီး​ပှၤ​တနီၤနီၤ​န့ၣ် ပျံၤဝဲ​တၢ်​က​မၤ​အသး​လၢ​ခါဆူညါ​အဃိ တၢ်​သူၣ်ကိၢ်​သးဂီၤ ဟဲ​အိၣ်​ထီၣ်ဝဲ​လီၤ. အဝဲသ့ၣ်​အသး​ကိၢ်​လၢ ‘မ့ၢ်​ပဖိပလံၤ ဘၣ်​အိၣ်ဝဲ​လၢ ဟီၣ်ခိၣ်​လၢ​အ​ပှဲၤဝဲ​ဒီး တၢ်ဒုး​တၢ်ယၤ, တၢ်မၤ​ကမၣ်​ပဒိၣ်​အ​တၢ်သိၣ်​တၢ်သီ, ထံ​ဒီး​ကလံၤ​တ​ကဆှီ, မူခိၣ်​ကလံၤသီၣ်ဂီၤ​ဆီတလဲ​အသး ဒီး​တၢ်ဆါ​သံသတြိာ်​န့ၣ်​ဧါ.’ တၢ်​သူၣ်ကိၢ်​သးဂီၤ​တဖၣ်​အံၤ ပ​က​ဘၣ်​ကွၢ်ဆၢၣ်မဲာ်​အီၤ​ဒ်လဲၣ်.

ပ​သ့ၣ်ညါ​လၢ ဖဲ​တၢ်​တဂ့ၤ​တဘၣ်​သ့ၣ်​တဖၣ် ကဲထီၣ်​အသး​အခါ​န့ၣ် “ပှၤကူၣ်တၢ်​ဘၣ်​န့ၣ် ထံၣ်ဘၣ်​တၢ်အၢ, ဒီး​ပာ်တဒၢ​အသး​လီၤ.” (ကတိၤဒိ ၂၇:၁၂) ဒ်​ပ​ဂုာ်ကျဲးစၢး​ဒီသဒၢ ပ​နီၢ်ခိ​အ​တၢ်​အိၣ်ဆူၣ်​အိၣ်​ချ့​အသိး ပ​က​ဘၣ်​ဒီသဒၢ​စ့ၢ်ကီး ပ​တၢ်​ဆိကမိၣ်​ဒီး​ပ​သး​န့ၣ်​လီၤ. တၢ်ဂီၤမူ​ဒီး တၢ်ကစီၣ်​တဖၣ် ပှဲၤဝဲ​ဒီး​တၢ်မၤ​ဆူၣ်​မၤစိး​အဂီၤ​တဖၣ်​အဃိ ဒုးအိၣ်​ထီၣ် တၢ်​သူၣ်ကိၢ်​သးဂီၤ​လၢ ပဝဲ​ဒီး​ပဖိပလံၤ​တဖၣ်​သ့​န့ၣ်​လီၤ. တၢ်​ဟးဆှဲး​တၢ်ဂီၤ​တဖၣ်​အံၤန့ၣ် အခီပညီ​တမ့ၢ်​လၢ ပ​ကွၢ်ကပာ် တၢ်အိၣ်​အသး​နီၢ်နီၢ်​န့ၣ်​ဘၣ်. ကစၢ်​ယွၤ​တ​တ့လီၤ​ပ​ခိၣ်နူာ်​လၢ ပ​က​ဆိကမိၣ်​ထဲ တၢ်အၢ​သ့ၣ်​တဖၣ်​န့ၣ်​ဘၣ်. လၢတၢ်န့ၣ်​အလီၢ် ပ​ကြၢး​မၤပှဲၤ​ပ​တၢ်​ဆိကမိၣ်​ဒီး “ဖဲဒၣ်​တၢ်မ့ၢ်​တၢ်တီ, . . . တၢ်တီ တၢ်လိၤ, . . . တၢ်စီတၢ်ဆှံ, . . . တၢ်​လၢ​တၢ်အဲၣ်​အီၤ” လီၤ. ပ​မ့ၢ်​မၤ​ဒ်​န့ၣ်​ဒီး “တၢ်ဃူ​တၢ်ဖိး​အ​ကစၢ်” က​ဟ့ၣ်​ပှၤ တၢ်ဃူ​တၢ်ဖိး​ဒီး တၢ်​သူၣ်မံ​သးမုာ်​လီၤ.—ဖံ​လံၤ​ပံၤ ၄:၈, ၉.

တၢ်စူၢ်​တၢ်နာ် လၢ​အဂၢၢ်​အ​ကျၢၤ​န့ၣ် က​မၤစၢၤ​ပှၤ​ဒ်သိး ပ​လဲၤခီဖျိ​တၢ်​သူၣ်ကိၢ်​သးဂီၤ က​န့ၢ်​အဂီၢ်​န့ၣ်​လီၤ. လံာ်စီဆှံ​ဆီၣ်ထွဲ​ပှၤလၢ “ဆိးသီ​လၢ​တၢ်ဘါ​ထုကဖၣ်​အဂီၢ်​တက့ၢ်.” (၁ ပ့းတရူး ၄:၇) ပ​ဃ့ကညး​ကစၢ်​ယွၤ​လၢ က​ဟ့ၣ်​ပှၤ​တၢ်ကူၣ်သ့​ဒီး တၢ်​သူၣ်ဒူ​သးဒူ ဒ်သိး​ပ​လဲၤခီဖျိ တၢ်ကီ​တၢ်ခဲ​က​န့ၢ်​အဂီၢ်​လီၤ. ပ​နာ်​သပှၢ်​ကတၢၢ်​သ့​လၢ “ဖဲဒၣ်​ပ​ဃ့​တၢ်​တမံၤမံၤ​န့ၣ်, . . . အ​ဒိကနၣ်​ပှၤ” လီၤ.—၁ ယိၤဟၣ် ၅:၁၅.

လံာ်စီဆှံ တဲ​နၢ်ပၢၢ်​ပှၤလၢ မုၣ်ကီၤလံၢ်​မ့ၢ် “ဟီၣ်ခိၣ်​အခိၣ်” ဒီး “ဟီၣ်ခိၣ်​ခဲလၢာ် မံလီၤ​ဝဲ​လၢ​တၢ်အၢ​တၢ်သီ​တဂၤ​န့ၣ်​အ​ပူၤ​လီၤ.” (ယိၤဟၣ် ၁၂:၃၁; ၁ ယိၤဟၣ် ၅:၁၉) လၢတၢ်န့ၣ်​အဃိ ဖဲ​ယ့ၣ်ၡူး​သိၣ်လိ​ပှၤ တၢ်​ထုကဖၣ်​အခါ အဝဲ​စံး​ဝဲ​လၢ– “ထုးထီၣ်​ကွံာ်​လၢ်​ပှၤလၢ တၢ်အၢ​တၢ်သီ​အ​ပူၤ​တက့ၢ်.” (မးသဲ ၆:၁၃) ဒီပုၢ်ဝဲၢ်​မုၣ်​အလိၤ​နၤ​စံး​ဝဲ​လၢ “ဖဲ​တၢ်​ဟ့ၣ်ပလီၢ်​အ​ကလုၢ်​သီၣ်ထီၣ်​တဘျီ​လၢ်လၢ်​အခါ ယ​ဃ့​ဘါ​ထုကဖၣ် ဆူ​ယဟိဝၤ​ယွၤ​အ​အိၣ် ဒ်သိး​ယ​ပၢၤဃာ် ယ​တၢ်​သူၣ်ကိၢ်​သးဂီၤ က​န့ၢ်​အဂီၢ်​န့ၣ်​လီၤ. အခါ​ဖဲ​န့ၣ်​ယဝၤ​စ့ၢ်ကီး ကိး​ယၤ​လၢ​လီတဲစိ ဒီး​ဃ့​ဘါ​ထုကဖၣ်​တၢ်​ဒီး​ယၤ​လီၤ. တၢ်​ထုကဖၣ်​အဝဲ​န့ၣ် မၤစၢၤ​ယၤ​သပှၢ်​ကတၢၢ်​လီၤ.” လံာ်စီဆှံ​စံး​ဝဲ​လၢ– “ကယဲၢ်​ပှၤလၢ အ​ကိးထီၣ်​ယွၤ, ကယဲၢ်​ပှၤလၢ အ​ကိးထီၣ်​ဝဲ​လၢ တၢ်မ့ၢ်​တၢ်တီ​ခဲလၢာ်​န့ၣ် ယွၤ​အိၣ်ဘူး​ဒီး​အီၤ​လီၤ.”—စံးထီၣ်​ပတြၢၤ ၁၄၅:၁၈.

ဖဲ​ယ့ၣ်ၡူး​စံၣ်တဲၤ​တဲလီၤ​တၢ်​လၢ တၢ်လူၢ်ခိၣ်​အခါ​န့ၣ် အဝဲ​သိၣ်လိ​ဝဲ​အပျဲၢ်​အဘီၣ်​လၢ က​ဃ့​တၢ်​ဒ်အံၤ– “န​ဘီ​န​မုၢ်​န့ၣ် မ်​အ​ဟဲ​တက့ၢ်.” (မးသဲ ၆:၉) ယွၤ​အဘီ​အမုၢ် က​မၤ​လီၤမၢ်​ကွံာ် ကယဲၢ်​တၢ်​လၢ အ​မၤ​သူၣ်ကိၢ်​သးဂီၤ​ပှၤ လီၤစိၤ​လီၤထီ​လီၤ. ခီဖျိ “တၢ်ဃူ​တၢ်ဖိး အ​ပဒိၣ်​ဖးဒိၣ်​တဂၤ” လၢ​အမ့ၢ်​ယ့ၣ်ၡူး​အဃိ ကစၢ်​ယွၤ​က “ဒုးအိၣ်​ကတီၢ် တၢ်ဒုး​တၢ်ယၤ​တဖၣ် တုၤလၢ​ဟီၣ်ခိၣ်​အ​ကတၢၢ်​လီၤ.” (ယၡါယၤ ၉:၆; စံးထီၣ်​ပတြၢၤ ၄၆:၉) ယွၤ “က​စံၣ်ညီၣ် ပှၤ​ဂီၢ်မုၢ်​တဖၣ်​အကွီၢ် . . . ပှၤတကလုာ်​တ​ယၤ​ထီၣ်​လၢၤဘၣ်​နး​လၢ ပှၤတကလုာ်​အဖီခိၣ်​ဘၣ်, ဒီး​တ​မၤလိ​ဒုး​သုး​တၢ်​လၢၤဘၣ်​လီၤ. . . တၢ်​တ​မၤပျံၤ​ဘၣ်​အီၤ နီ​တဂၤ​ဘၣ်.” (မံကၤ ၄:၃, ၄) ဟံၣ်ဖိ​ဃီဖိ​လၢ အိၣ်ဒီး​တၢ်​သူၣ်ဖှံ​သးညီ​တဖၣ် “က​သူၣ်​အဟံၣ်, ဒီး​က​အိၣ်ဝဲ​ဆိးဝဲ​လၢ​အ​ပူၤ, ဒီး​က​သူၣ်​စပံး​အလီၢ်, ဒီး​က​အီၣ်​အ​တၤသၣ်​လီၤ.” (ယၡါယၤ ၆၅:၂၁) “ဒီး​ပှၤ​အိၣ်ဝဲ​ဆိးဝဲ​တဖၣ်​န့ၣ်​တ​စံး, ယ​မၤ​တကဲ​ဘၣ်​န့ၣ်​ဘၣ်.”—ယၡါယၤ ၃၃:၂၄.

မုၢ်မဆါ​တနံၤညါအံၤ န​မ့ၢ်​ပ​လီၢ်​န​သး​ထဲလဲၣ်​သနာ်က့ န​တြီဆၢဝဲ “တၢ်ဘၣ်​အတီၤ” မ့တမ့ၢ် န​ဟးဆှဲး တၢ်​ကဲထီၣ်​အသး​သတူၢ်​ကလာ် လၢ​တၢ်လီၢ်​ဒီး​တၢ်​ဆၢကတီၢ်​လၢ န​တ​ပလီၢ်သး​ဘၣ်​အခါ​န့ၣ် တ​သ့​ဘၣ်. (စံၣ်တဲၤ​တဲလီၤ ၉:၁၁) ပူၤကွံာ် အ​နံၣ်​လၢ​အ​ကယၤ​တဖၣ် တုၤလၢ​ပစိၤ​ခဲအံၤ​န့ၣ် တၢ်ဒုး​တၢ်ယၤ, တၢ်မၤ​ဆူၣ်​မၤစိး, တၢ်ဆူး​တၢ်ဆါ​တဖၣ် မၤသံဝဲ​ပှၤလၢ အဂ့ၤ​တဖၣ်​န့ၣ်​လီၤ. လၢ​ပှၤ​သ့ၣ်​တဖၣ်​အံၤ​အဂီၢ်​န့ၣ် တၢ်​မုၢ်လၢ်​မနုၤ​အိၣ်ဒံး​လဲၣ်.

ပှၤ​အ​ကကွဲၢ်​တဖၣ် က​ဂဲၤဆၢထၢၣ်​သမူထီၣ်​က့ၤ​လီၤ. ထဲဒၣ်​ယဟိဝၤ​ယွၤ​တဂၤဧိၤ​သ့ၣ်ညါ​ဝဲ အဝဲသ့ၣ်​အ​နီၣ်ဂံၢ်​န့ၣ်​လီၤ. မ့မ့ၢ်​ခဲအံၤ​န့ၣ် အဝဲသ့ၣ်​မံ​ဝဲ​အဆၢ​ကတီၢ်​န့ၣ်​လီၤ. အဝဲသ့ၣ်​အိၣ်​ဒံးဝဲ​လၢ ယွၤ​အ​တၢ်မၤနီၣ်​မၤဃါ​အ​ပူၤ တုၤ​အဆၢ​ကတီၢ်​ဘၣ်​လၢ “ကယဲၢ်​ပှၤ​အိၣ်​လၢ တၢ်သွၣ်ခိၣ်​အ​ပူၤ​ခဲလၢာ်​န့ၣ်, က​ဂဲၤဆၢထၢၣ်​ဝဲ” လီၤ. (ယိၤဟၣ် ၅:၂၈, ၂၉) ဘၣ်ဃး​ဒီး​တၢ်​ဂဲၤဆၢထၢၣ်​သမူထီၣ်​က့ၤ​န့ၣ် လံာ်စီဆှံ​ဟ့ၣ်ဂံၢ်​ဟ့ၣ်ဘါ​ပှၤလၢ “ပ​အိၣ်ဒီး​တၢ်​မုၢ်လၢ်​အံၤ, ဒ်​သး​အ​နီၣ်သက့ၤ​အသိး, လၢ​အ​စဲဘူး​ဃာ်​ဒီး အိၣ်ဂၢၢ်​ဆိးကျၢၤ” န့ၣ်​လီၤ. (ဧ့ၤဘြံၤ ၆:၁၉) ဒီး​ကစၢ်​ယွၤ​မၤဝဲ “ဒ်သိး​ပှၤ​ခဲလၢာ် က​စူၢ်က့ၤ​နာ်က့ၤ​တၢ်​န့ၣ်​ဒီး, ဒုး​ဂဲၤဆၢထၢၣ် အဝဲဒၣ် [ယ့ၣ်ၡူး] န့ၣ်​လၢ တၢ်သံ​န့ၣ်​လီၤ.”—မၤတၢ် ၁၇:၃၁.

မ့မ့ၢ်​အ​ခဲအံၤ ပဝဲဒၣ်​သ့ၣ်​တဖၣ် ပ​ဂုာ်ကျဲးစၢး​မၤ တၢ်ဘၣ်​ကစၢ်​ယွၤ​အသး​ဘၣ်ဆၣ် ပ​က​ဘၣ်​ကွၢ်ဆၢၣ်မဲာ်​ဒံး တၢ်​သူၣ်ကိၢ်​သးဂီၤ​တဖၣ်​လီၤ. စီၤဖီ, ကၠဲနဲး ဒီး​အလိၤ​နၤ​သ့ၣ်​တဖၣ် လဲၤခီဖျိ​ဝဲ​အ​တၢ်​သူၣ်ကိၢ်​သးဂီၤ​န့ၢ်ဝဲ ဂ့ၤဂ့ၤ​ဘၣ်​ဘၣ်​ခီဖျိ​လၢ အဝဲသ့ၣ်​ဟံးန့ၢ် တၢ်ဟ့ၣ်ကူၣ်​လၢ​အဘျုး​အိၣ်​တဖၣ်, သုးဘူး​အသး​ဆူ ယဟိဝၤ​ယွၤ​အ​အိၣ်​လၢ တၢ်​ထုကဖၣ် ဒီး​မၤဂၢၢ်​ကျၢၤထီၣ် အ​တၢ်စူၢ်​တၢ်နာ် ဘၣ်ဃး ခါဆူညါ​တၢ်​မုၢ်လၢ် လၢ​လံာ်စီဆှံ​အ​ပူၤ​အဃိ​လီၤ. ဒ်​ကစၢ်​ယွၤ မၤစၢၤ​အဝဲသ့ၣ်​အသိး “မ်​တၢ်​မုၢ်လၢ်​အ​ကစၢ်, မၤပှဲၤ​သု​ဒီး ကယဲၢ်​တၢ်သးခု ဒီး​တၢ်ဃူ​တၢ်ဖိး လၢ​တၢ်နာ်​အဃိ” န့ၣ်​တက့ၢ်. —ရိမ့ၤ ၁၅:၁၃.