နတၢ်ရ့လိာ်သးဒီး ယဟိဝၤယွၤန့ၣ် ဂၢၢ်ကျၢၤထဲလဲၣ်
“သုးဘူးသုသးဆူ ယွၤအအိၣ်တက့ၢ်, ဒီးကသုးဘူးအသးဆူသုအိၣ်လီၤ.”—ယၤကိာ် ၄:၈.
၁. ဘၣ်မနုၤအဃိ ပတၢ်ရ့လိာ်သးဒီး ယဟိဝၤယွၤန့ၣ် ကဘၣ်ဂၢၢ်ကျၢၤဝဲထီဘိလဲၣ်.
နမ့မ့ၢ် ယဟိဝၤပှၤအုၣ်အသး လၢအဒိးဘျၢထံဝံၤတဂၤန့ၣ် နအိၣ်ဒီးတၢ်လၢ အလုၢ်ဒိၣ်ပှ့ၤဒိၣ်တမံၤလီၤ. နအိၣ်ဒီးတၢ်ရ့လိာ်သးဒီး ယဟိဝၤယွၤလီၤ. ဘၣ်ဆၣ်, နတၢ်ရ့လိာ်သးဒီး ယဟိဝၤယွၤန့ၣ် အဂံၢ်စၢ်လီၤဝဲသ့ ခီဖျိလၢမုၣ်ကီၤလံၢ် အတၢ်ဆီၣ်သနံးဒီးနနီၢ်ကစၢ် အတၢ်ဂံၢ်စၢ်ဘါစၢ်တဖၣ်အဃိလီၤ. လၢတၢ်န့ၣ်အဃိ ပဝဲဒၣ်ခဲလၢာ် ပကဘၣ်ဂုာ်ကျဲးစၢး မၤဂၢၢ်ကျၢၤထီၣ် ပတၢ်ရ့လိာ်သးဒီး ယဟိဝၤယွၤန့ၣ်လီၤ.
၂. (က) တၢ်ရ့လိာ်သးန့ၣ် မ့ၢ်တၢ်မနုၤလဲၣ်. (ကွၢ်တၢ်ဂ့ၢ်အဘျဲၣ်တက့ၢ်.) (ခ) နတၢ်ရ့လိာ်သးဒီး ကစၢ်ယဟိဝၤယွၤ ကဂၢၢ်ကျၢၤအဂီၢ် နကဘၣ်မၤဒ်လဲၣ်.
၂ ယဟိဝၤမ့ၢ် ယွၤနီၢ်နီၢ်တဂၤလၢနဂီၢ်ဧါ. မ့ၢ်နဆိကမိၣ်လၢ အဝဲမ့ၢ်နတံၤသကိးတံၢ်နီၢ်ဧါ. မ့ၢ်နအဲၣ်ဒိးလၢ နတၢ်ရ့လိာ်သးဒီးယွၤန့ၣ် ကဂၢၢ်ကျၢၤဒိၣ်န့ၢ်ဒံးအလီၢ်ဧါ. ယၤကိာ် ၄:၈ တဲဘၣ်ပှၤလၢ တၢ်လၢပကဘၣ်မၤမ့ၢ်ဝဲ– “သုးဘူးသုသးဆူယွၤအအိၣ်တက့ၢ်, ဒီးကသုးဘူးအသးဆူသုအိၣ်လီၤ.” နတၢ်ရ့လိာ်သးဒီး ယဟိဝၤယွၤန့ၣ် ဘၣ်ထွဲလိာ်အသးဒီးနၤဒီးယဟိဝၤယွၤခံဂၤလီၤ. * နမ့ၢ်စးထီၣ်သုးဘူးနသးဆူ ယဟိဝၤယွၤအအိၣ်န့ၣ် အဝဲစ့ၢ်ကီးကသုးဘူးအသးဆူ နအိၣ်လီၤ. နမ့ၢ်မၤဒ်န့ၣ်ဒီး အဝဲကမ့ၢ် ပှၤနီၢ်ကီၢ်တဂၤလၢနဂီၢ် ဒီးနတၢ်ရ့လိာ်သးဒီးအီၤ ကဘူးထီၣ်အါထီၣ် ဒ်ကစၢ်ယ့ၣ်ၡူးစံးတ့ၢ်ဝဲလၢ “ပှၤလၢအမၢလီၤယၤမ့ၢ်အမ့ၢ်အတီ” ဒီး “ယသ့ၣ်ညါအီၤ” အသိးန့ၣ်လီၤ. (ယိၤဟၣ် ၇:၂၈, ၂၉) ဘၣ်ဆၣ်, ဒ်သိးနကဘူးထီၣ်ဒီး ယဟိဝၤယွၤအဂီၢ် တၢ်လၢနမၤသ့န့ၣ် ကမ့ၢ်မနုၤလဲၣ်.
ပဆဲးကျိးဒီးကစၢ်ယွၤကသ့ဒ်လဲၣ်. (ကွၢ်လံာ်အဆၢ ၃)
၃. ပဆဲးကျိးလိာ်ပသး ဒီးယဟိဝၤယွၤ ကသ့ဒ်လဲၣ်.
၃ နမ့ၢ်အဲၣ်ဒိးသုးဘူးနသးဆူ ယဟိဝၤယွၤအအိၣ်န့ၣ် အရ့ဒိၣ်လၢ နကဘၣ်ဆဲးကျိးလိာ်သးဒီးအီၤထီဘိလီၤ. ဘၣ်ဆၣ် နမၤကသ့ဒ်လဲၣ်. ဆိကမိၣ်ကွၢ် နၤဒီးနတံၤသကိး ဖဲသုအိၣ်ယံၤလိာ်သးအခါ နဆဲးကျိးဒီးအီၤလၢကျဲဒ်လဲၣ်. နကွဲးန့ၢ်အီၤလံာ်မ့ၢ်ဂ့ၤ, နတဲသကိးတၢ်ဒီးအီၤ လၢလီတဲစိအပူၤမ့ၢ်ဂ့ၢ် သ့ဝဲလီၤ. ဒ်န့ၣ်အသိး နတဲသကိးတၢ်ဒီး ယဟိဝၤယွၤသ့ ခီဖျိလၢတၢ်ထုကဖၣ်န့ၣ်လီၤ. (ဖး စံးထီၣ်ပတြၢၤ ၁၄၂:၂ တက့ၢ်.) ဘၣ်ဆၣ် နပျဲယဟိဝၤယွၤ ကတိၤတၢ်ဒီးနၤကသ့ဒ်လဲၣ်. နပျဲအီၤသ့ခီဖျိ နဖးအကလုၢ်ကထါ လံာ်စီဆှံဒီး ဆိကမိၣ်ထံ တၢ်လၢနဖးအဂ့ၢ်န့ၣ်လီၤ. (ဖး ယၡါယၤ ၃၀:၂၀, ၂၁ တက့ၢ်.) တၢ်ရ့လိာ်သး ဒ်အံၤန့ၣ် မၤဂၢၢ်ကျၢၤထီၣ် နတၢ်ရ့လိာ်သးဒီး ယဟိဝၤယွၤသ့ဒ်လဲၣ်, ဒီးဒုးကဲထီၣ်ယဟိဝၤယွၤလၢ နတံၤသကိးနီၢ်နီၢ်သ့ဒ်လဲၣ်န့ၣ် ပကကွၢ်သကိးတက့ၢ်.
ပျဲယဟိဝၤယွၤ တဲတၢ်ဒီးနၤဖဲနဖးလံာ်စီဆှံအခါ
၄, ၅. ဖဲနဖးလံာ်စီဆှံအခါ မ့ၢ်ယဟိဝၤယွၤ တဲတၢ်ဒီးနၤဒ်လဲၣ်. ဟ့ၣ်တၢ်အဒိတက့ၢ်.
၄ ပသ့ၣ်ညါလၢ လံာ်စီဆှံအံၤမ့ၢ် ယွၤအတၢ်ကစီၣ်လၢ ပှၤကိးဂၤဒဲးအဂီၢ်လီၤ. ဘၣ်ဆၣ် လံာ်စီဆှံမၤစၢၤနၤလၢ နကသုးဘူးနသးဆူ ယဟိဝၤယွၤအအိၣ်သ့ဧါ. သ့လီၤ. ဖဲနဖးဒီးမၤလိ ကစၢ်ယွၤအကလုၢ်ကထါအခါ ဆိကမိၣ်ထံ တၢ်ဂ့ၢ်လၢနဖးန့ၣ်တက့ၢ်. ဆိကမိၣ်စ့ၢ်ကီးတၢ်လၢနဖးအီၤတဖၣ်န့ၣ် နကဘၣ်မၤထွဲအီၤဒ်လဲၣ်န့ၣ်တက့ၢ်. ဖဲနမၤဒ်အံၤအခါ မ့ၢ်ဒၣ်နပျဲ ကစၢ်ယဟိဝၤယွၤ ကတိၤတၢ်ဒီးနၤလီၤ. အဝဲကကဲထီၣ် နတံၤသကိးလၢ အကမၤစၢၤနၤဒီး နကဘူးထီၣ်ဒီးအီၤလီၤ.—ဧ့ၤဘြံၤ ၄:၁၂; ယၤကိာ် ၁:၂၃-၂၅.
၅ အဒိ, ဖဲနဖးယ့ၣ်ၡူးအတၢ်ကတိၤလၢအမ့ၢ် “သုတပာ်ဖှိၣ်သုတၢ်လုၢ်ဒိၣ်ပှ့ၤဒိၣ်လၢ ဟီၣ်ခိၣ်ချၢ” တဂ့ၤအခါ နတူၢ်ဘၣ်ဒ်လဲၣ်. နမ့ၢ်မၤအဂ့ၤကတၢၢ် ဒ်သိးနကပာ် ယဟိဝၤယွၤလၢ နီၣ်ဂံၢ်တၢ လၢနတၢ်အိၣ်မူပူၤန့ၣ် နကတူၢ်ဘၣ်လၢ နမၤတၢ်ဘၣ်ယွၤအသးလီၤ. ဘၣ်ဆၣ် ဖဲနဖးယ့ၣ်ၡူးအတၢ်ကတိၤအခါန့ၣ် ဘၣ်သ့ၣ်သ့ၣ်နကသ့ၣ်ညါလီၤနသးလၢ နကဘၣ်ပာ်နတၢ်အိၣ်မူ ယိယိဖိဒီး ဂုာ်ကျဲးစၢးမၤအါထီၣ်ယွၤအတၢ်မၤလီၤ. လၢတၢ်န့ၣ်အဃိ ယဟိဝၤယွၤ ကမၤစၢၤနၤလၢ နကနၢ်ပၢၢ်ထီၣ်ကျဲလၢ နကသုးဘူးနသးဆူအအိၣ်လီၤ.—မးသဲ ၆:၁၉,၂၀.
၆, ၇. (က) ဖဲပဖးလံာ်စီဆှံအခါ ပတၢ်အဲၣ်ယဟိဝၤယွၤ ဒီးကစၢ်အတၢ်အဲၣ်ပှၤန့ၣ် ကကဲထီၣ်အသးဒ်လဲၣ်. (ခ) ဖဲပဖးလံာ်စီဆှံအခါ ပတၢ်တိာ်ပာ်လၢအရ့ဒိၣ်န့ၣ် ကြၢးမ့ၢ်တၢ်မနုၤလဲၣ်.
၆ ဖဲပဖးလံာ်စီဆှံအခါ ပကသ့ၣ်ညါဘၣ် တၢ်လၢပကြၢးဆီတလဲ ဒ်သိးပမၤအါထီၣ် ယဟိဝၤယွၤ အတၢ်မၤကသ့အဂီၢ်လီၤ. ဘၣ်ဆၣ် ပသ့ၣ်ညါဘၣ်စ့ၢ်ကီး တၢ်လၢကစၢ်ယွၤမၤဝဲတဖၣ် ဒီးအတၢ်ဂ့ၤတၢ်ဝါလၢအဃံလၤတဖၣ်အဃိ ပတၢ်အဲၣ်အီၤအါထီၣ်ဝဲလီၤ. ဒ်ပတၢ်အဲၣ်အီၤအါထီၣ်ဝဲအသိး အတၢ်အဲၣ်ပှၤစ့ၢ်ကီးအါထီၣ်အဃိ ပတၢ်ရ့လိာ်သးဒီးအီၤ ဂၢၢ်ကျၢၤဒိၣ်ထီၣ်ဝဲလီၤ.—ဖး ၁ ကရံၣ်သူး ၈:၃ တက့ၢ်.
၇ နမ့ၢ်အဲၣ်ဒိးသုးဘူးနသးဆူ ယွၤအအိၣ်န့ၣ် နကဘၣ်မၤလိလံာ်စီဆှံလၢ တၢ်သူၣ်အိၣ်သးအိၣ်နီၢ်နီၢ်အပူၤလီၤ. ယ့ၣ်ၡူးစံးဝဲလၢ “တၢ်မူအထူအယိာ်န့ၣ် မ့ၢ်တၢ်သ့ၣ်ညါနၤ ယွၤနီၢ်နီၢ်တဂၤဃီ, ဒီးယ့ၣ်ၡူးခရံာ်လၢ နမၢလီၤအီၤန့ၣ်လီၤ.” (ယိၤဟၣ် ၁၇:၃) ဖဲပဖးလံာ်စီဆှံအခါ ပကသ့ၣ်ညါဘၣ်တၢ်ဂ့ၢ်လၢအသီဒီး တၢ်လၢအလီၤသးစဲအိၣ်အါမးလီၤ. ဘၣ်ဆၣ် ပတၢ်တိာ်ပာ်လၢအရ့ဒိၣ် ကြၢးမ့ၢ်ဝဲလၢ ပကသ့ၣ်ညါအါထီၣ် ယဟိဝၤယွၤ ဒ်ကစၢ်တဂၤအသိးလီၤ.—ဖး ၂ မိၤၡ့ ၃၃:၁၃ တက့ၢ်; စံးထီၣ်ပတြၢၤ ၂၅:၄.
၈. (က) ဘၣ်ဃးဒီး ယဟိဝၤယွၤ စံၣ်ညီၣ် စီၤပၤဧစၤရယၤအဂ့ၢ်န့ၣ် ပှၤတနီၤနီၤ ဆိကမိၣ်ဝဲဒၣ်ဒ်လဲၣ်. (ခ) နမ့ၢ်သ့ၣ်ညါ ယဟိဝၤယွၤန့ၣ် တၢ်လၢအမၤဝဲတဖၣ် နကဆိကမိၣ်ဒ်လဲၣ်.
၈ ဖဲပသ့ၣ်ညါထီၣ် ယဟိဝၤယွၤ ဒ်တံၤသကိးနီၢ်နီၢ်တဂၤအခါ လံာ်စီဆှံမ့ၢ်တပာ်ဖျါထီၣ်ဝဲလၢ ဘၣ်မနုၤအဃိ ကစၢ်ယွၤဘၣ်မၤဝဲဒ်အံၤလဲၣ်န့ၣ် ပဘၣ်ယိၣ်တၢ်အလီၢ်တအိၣ်ဘၣ်. အဒိ ဖဲစီၤပၤဧစၤရယၤ ကဲယူဒၤအစီၤပၤအခါ ပှၤအဂၤသ့ၣ်တဖၣ် ဘူၣ်ထီၣ်ဘါထီၣ် ယွၤလၢအကမၣ်လီၤ. မ့မ့ၢ်စီၤဧစၤရယၤန့ၣ် တပၣ်ဃုာ်လၢ အဝဲသ့ၣ်အကျါဘၣ်ဒီး “မၤဝဲလၢတၢ်အဂ့ၤလၢ ယွၤအမဲာ်” လီၤ. (၂ စီၤပၤ ၁၅:၁-၅) ဘၣ်ဆၣ် ယဟိဝၤယွၤ စံၣ်ညီၣ်အီၤလၢ တၢ်ဆါအၢလီၤ. ဘၣ်မနုၤအဃိလဲၣ်. လံာ်စီဆှံတတီၤအံၤ တပာ်ဖျါထီၣ်န့ၢ်ပှၤဘၣ်. ကစၢ်ယဟိဝၤယွၤ စံၣ်ညီၣ်အီၤဒ်အံၤန့ၣ် မ့ၢ်နဆိကမိၣ်ဒ်လဲၣ်. ခီဖျိလၢ ကစၢ်ယွၤမၤအီၤဒ်အံၤအဃိ နဆိကမိၣ်လၢ အဝဲမ့ၢ်ကစၢ်လၢ စံၣ်ညီၣ်တၢ်တတီဘၣ်ဧါ. နမ့ၢ်သ့ၣ်ညါ ယဟိဝၤယွၤအဂ့ၢ်ဂ့ၤဂ့ၤန့ၣ် တမ့ၢ်နကဆိကမိၣ်ဒ်န့ၣ်ဘၣ်. မ့ၢ်လၢနသ့ၣ်ညါလၢ ယဟိဝၤယွၤ အတၢ်သိၣ်က့ၤသီက့ၤတဖၣ်န့ၣ် ဘၣ်ဝဲထီဘိအဃိလီၤ. အဝဲသိၣ်က့ၤသီက့ၤတၢ် “ဒ်တၢ်တီတၢ်လိၤအသိး” ထီဘိန့ၣ်လီၤ. (ယံးရမံယၤ ၃၀:၁၁) ဘၣ်မနုၤအဃိ ယဟိဝၤယွၤ စံၣ်ညီၣ်စီၤပၤဧစၤရယၤလဲၣ်န့ၣ် နမ့ၢ်တသ့ၣ်ညါဒၣ်လဲာ် နနာ်သ့သပှၢ်ကတၢၢ်လၢ ယဟိဝၤယွၤ မၤတၢ်အဘၣ်ထီဘိလီၤ.
၉. ဘၣ်မနုၤအဃိ ကစၢ်ယဟိဝၤယွၤ စံၣ်ညီၣ်စီၤပၤ ဧစၤရယၤ လၢတၢ်ဆါအၢန့ၣ်လဲၣ်.
၉ စီၤပၤဧစၤရယၤ ဘၣ်တၢ်ကိးစ့ၢ်ကီးအီၤလၢ စီၤပၤစီၤဧူးစံယါန့ၣ် လံာ်စီဆှံပာ်ဖျါအါထီၣ်န့ၢ်ပှၤအဂ့ၢ်လီၤ. (၂ စီၤပၤ ၁၅:၇, ၃၂) ၂ ကွဲးနီၣ်တၢ် ၂၆:၃-၅, ၁၆-၂၁ စံးဘၣ်ပှၤလၢ အဝဲ “မၤဝဲတၢ်အလိၤလၢ ယွၤအမဲာ်” လီၤ. ဘၣ်ဆၣ် လၢခံန့ၣ်ဘၣ်တၢ်ပာ်ဖျါထီၣ်န့ၢ်ပှၤလၢ “အသးပာ်ထီၣ်ထီအသး တုၤအတုၤလၢတၢ်ဟးဂီၤ” လီၤ. အဝဲအဲၣ်ဒိးမၤဝဲ တၢ်လၢထဲဒၣ်ပှၤလုၢ်တၢ်အဒိၣ်တဖၣ် ကဘၣ်မၤဝဲလီၤ. ပှၤလုၢ်တၢ်အဒိၣ် ၈၁ ဂၤတြီအီၤဒီးတဲအီၤလၢ အဝဲမၤတၢ်န့ၣ်တကြၢးဝဲဘၣ်ဝဲဘၣ်. အဝဲဒိကနၣ်ဝဲဧါ. တဒိကနၣ်ဝဲဘၣ်. အဝဲပာ်ထီၣ်ထီအသးဒီးသးထီၣ် ပှၤလုၢ်တၢ်အဒိၣ်တဖၣ်န့ၣ်လီၤ. တၢ်ဂ့ၢ်သ့ၣ်တဖၣ်အံၤ မၤစၢၤပှၤလၢ ပကနၢ်ပၢၢ်ထီၣ်က့ၤတၢ်ဂ့ၢ်လၢ ဘၣ်မနုၤအဃိ ယဟိဝၤယွၤ စံၣ်ညီၣ်အီၤလၢ တၢ်ဆါအၢတခါအံၤလဲၣ်န့ၣ်လီၤ.
၁၀. ဘၣ်မနုၤအဃိ ပတလိၣ်သ့ၣ်ညါ တၢ်ဂ့ၢ်ကိးမံၤဒဲးလၢ ယဟိဝၤယွၤမၤဝဲတဖၣ်န့ၣ်လဲၣ်. ကစၢ်ယဟိဝၤယွၤ မၤတၢ်အဘၣ်ထီဘိန့ၣ် ပပာ်ဖျါအါထီၣ် ပတၢ်နာ်န့ၢ်အီၤကသ့ဒ်လဲၣ်.
၁၀ ပဒိးန့ၢ်ဘၣ် တၢ်မၤလိအရ့ဒိၣ်မနုၤတခါလဲၣ်. ပသ့ၣ်ညါအါထီၣ်ဘၣ် စီၤပၤဧစၤရယၤအဂ့ၢ်ဒီး ဘၣ်မနုၤအဃိလၢ ယဟိဝၤယွၤ စံၣ်ညီၣ်အီၤလဲၣ်န့ၣ် ပနၢ်ပၢၢ်ထီၣ်လီၤ. ဘၣ်ဆၣ် ဖဲလံာ်စီဆှံတပာ်ဖျါထီၣ် တၢ်ဂ့ၢ်လီၤတံၢ်လီၤဆဲးအခါ နကမၤဒ်လဲၣ်. နကဆိကမိၣ်လၢ ယဟိဝၤယွၤန့ၣ် မ့ၢ်အမၤတၢ်ဘၣ်စ့ၢ်ကီးဧါ. မ့တမ့ၢ် နနာ်လၢလံာ်စီဆှံန့ၣ် အိၣ်ဒီးတၢ်ဂ့ၢ်အလၢအပှဲၤ လၢနကနာ်ယဟိဝၤယွၤ မၤတၢ်တဖၣ်ဘၣ်ဝဲထီဘိန့ၣ်ဧါ. (၅ မိၤၡ့ ၃၂:၄) နမ့ၢ်သ့ၣ်ညါအါထီၣ် ယဟိဝၤယွၤဒ်ကစၢ်တဂၤအသိးန့ၣ် နတၢ်အဲၣ်အီၤဒီး နတၢ်နာ်န့ၢ်အီၤကအါထီၣ်ဝဲလီၤ. မ့မ့ၢ်ဒ်န့ၣ်ဒီး ဘၣ်မနုၤအဃိ ကစၢ်ယွၤဘၣ်မၤဝဲဒ်အံၤလဲၣ်န့ၣ် တလိၣ်နကဘၣ်သ့ၣ်ညါ တၢ်ဂ့ၢ်တၢ်ကျိၤခဲလၢာ်ဘၣ်. ဒ်နမၤလိအါထီၣ် လံာ်စီဆှံအသိး ယဟိဝၤယွၤ ကမ့ၢ်ကစၢ်နီၢ်ကီၢ်တဂၤလၢနဂီၢ်ဒီး နကဘူးထီၣ်ဒီးအီၤသပှၢ်တၢၢ်လီၤ.—စံးထီၣ်ပတြၢၤ ၇၇:၁၂, ၁၃.
ဖဲနဃ့ဘါထုကဖၣ်တၢ်အခါ မ့ၢ်နတဲတၢ်ဒီးယဟိဝၤယွၤ
၁၁–၁၃. ယဟိဝၤယွၤ ဒိကနၣ် နတၢ်ထုကဖၣ်န့ၣ် နနာ်သ့ဒ်လဲၣ်. (ကွၢ်တၢ်ဂီၤလၢ တၢ်မၤလိအံၤအခီၣ်ထံးန့ၣ်တက့ၢ်.)
၁၁ ဖဲပဃ့ဘါထုကဖၣ်တၢ်အခါ မ့ၢ်ပသုးဘူးပသးဆူ ယဟိဝၤယွၤအအိၣ်လီၤ. ပစံးထီၣ်ပတြၢၤအီၤ, ပစံးဘျုးအီၤဒီး ပဃ့တၢ်မၤစၢၤလၢအအိၣ်လီၤ. (စံးထီၣ်ပတြၢၤ ၃၂:၈) နမ့ၢ်အဲၣ်ဒိးကဲထီၣ် ယဟိဝၤယွၤ အတံၤသကိးနီၢ်နီၢ်န့ၣ် နကဘၣ်နာ်လၢ အဝဲဒၣ်န့ၣ် နၢ်ဟူနတၢ်ထုကဖၣ်လီၤ.
၁၂ ပှၤတနီၤနီၤ စံးဝဲလၢ ကစၢ်ယွၤတဒိကနၣ် တၢ်ထုကဖၣ်ဘၣ် ဒီးစံးစ့ၢ်ကီးဝဲလၢ တၢ်ထုကဖၣ်န့ၣ်မ့ၢ်ဒၣ်တၢ်တမံၤလၢ အမၤမုာ်ထီၣ်ပှၤသးန့ၣ်လီၤ. အဝဲသ့ၣ်နာ်ဝဲလၢ တၢ်ထုကဖၣ်န့ၣ် မၤစၢၤနၤထဲဒၣ်လၢ နကဆိကမိၣ်က့ၤ နတၢ်ကီတၢ်ခဲလီၤတံၢ်လီၤဆဲးဒီး နနီၢ်ကစၢ်ဒၣ်နဲ နကထံၣ်န့ၢ်က့ၤတၢ်အစၢအဂီၢ်လီၤ. တၢ်ထုကဖၣ်မၤစၢၤနၤလၢ ကျဲဒ်အံၤကသ့စ့ၢ်ကီးန့ၣ်လီၤ. ဘၣ်ဆၣ် ဖဲနဃ့ဘါထုကဖၣ်ဆူ ယဟိဝၤယွၤအိၣ်အခါ အဝဲဒိကနၣ် နတၢ်ထုကဖၣ် သပှၢ်တၢၢ်လီၤ. အဝဲကဒိကနၣ်ဝဲန့ၣ် နသ့ၣ်ညါကသ့ဒ်လဲၣ်.
၁၃ ဆိကမိၣ်ကွၢ်တၢ်အံၤတက့ၢ်- တချုးယ့ၣ်ၡူး ဟဲဆူဟီၣ်ခိၣ်ချၢအခါ အဝဲထံၣ်ဘၣ်ဝဲလၢ အပၢ်ယဟိဝၤယွၤ စံးဆၢဝဲအခ့အပှၤတဖၣ်လၢ ဟီၣ်ခိၣ်ချၢအတၢ်ထုကဖၣ်န့ၣ်လီၤ. ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ ဃ့ဘါထုကဖၣ်ဝဲဆူအပၢ်အအိၣ် ဘၣ်ဃးဒီး အတၢ်ဆိကမိၣ် ဒီးအတၢ်တူၢ်ဘၣ်န့ၣ်လီၤ. ဘၣ်တဘျီန့ၣ် အဝဲဃ့ဘါထုကဖၣ်တၢ် ဒီတနၤညါလီၤ. (လူၤကၣ် ၆:၁၂; ၂၂:၄၀-၄၆) ယ့ၣ်ၡူးမ့ၢ်ဆိကမိၣ်ဝဲလၢ ယဟိဝၤယွၤ တဒိကနၣ် အတၢ်ထုကဖၣ်ဘၣ်န့ၣ် မ့ၢ်အဝဲကဃ့ဘါထုကဖၣ်တၢ်ဆူ အပၢ်အအိၣ်စ့ၢ်ကီးဧါ. ယ့ၣ်ၡူးသိၣ်လိစ့ၢ်ကီး အပျဲၢ်အဘီၣ်တဖၣ်လၢ ကဘၣ်ဃ့ဘါထုကဖၣ်တၢ်ဆူ ယဟိဝၤယွၤအအိၣ်ဒ်လဲၣ်န့ၣ်လီၤ. အဝဲမ့ၢ်ဆိကမိၣ်ဝဲလၢ ယဟိဝၤယွၤ မ့ၢ်တဒိကနၣ်တၢ်ထုကဖၣ်ဘၣ်န့ၣ် မ့ၢ်အဝဲကသိၣ်လိအပျဲၢ်အဘီၣ်လၢ တၢ်ထုကဖၣ်စ့ၢ်ကီးဧါ. ဖျါတြၢၢ်ကလာ်လၢ ယ့ၣ်ၡူးသ့ၣ်ညါဝဲလၢ ယဟိဝၤယွၤ ဒိကနၣ်တၢ်ထုကဖၣ်န့ၣ်လီၤ. ယ့ၣ်ၡူးတဲဝဲလၢ “ပၢ်ဧၢ ယစံးထီၣ်ပတြၢၤနဘျုးနဖှိၣ်, လၢနကနၣ်ယကလုၢ်လီၤ. ဒီးယသ့ၣ်ညါလၢ နကနၣ်ဒၣ်ယကလုၢ်တဘိယူၢ်ဃီလီၤ.” ပဝဲစ့ၢ်ကီးပနာ်သ့လၢ ယဟိဝၤယွၤ ဒိကနၣ်ဝဲပတၢ်ထုကဖၣ်လီၤ.—ယိၤဟၣ် ၁၁:၄၁, ၄၂; စံးထီၣ်ပတြၢၤ ၆၅:၂.
၁၄, ၁၅. (က) ဖဲပဃ့ဘါထုကဖၣ် လၢပတၢ်လိၣ်ဘၣ်လီၤတံၢ်လီၤဆဲးအခါ ပဒိးန့ၢ်ဘၣ် တၢ်ဘျုးတၢ်ဖှိၣ်ဒ်လဲၣ်. (ခ) ဒီပုၢ်ဝဲၢ်မုၣ် ခဲသံၣ်အတၢ်ထုကဖၣ် မၤစၢၤအီၤလၢ ကသုးဘူးအသးဆူ ယဟိဝၤယွၤအအိၣ်ဒ်လဲၣ်.
၁၄ နတၢ်ထုကဖၣ်အတၢ်စံးဆၢန့ၣ် တမ့ၢ်ကဖျါတြၢၢ်ကလာ်ထီဘိဘၣ်. ဘၣ်ဆၣ် နမ့ၢ်ဃ့တၢ်လၢနလိၣ်ဘၣ်လီၤတံၢ်လီၤဆဲးန့ၣ် နကထံၣ်ဘၣ်ကစၢ်ယဟိဝၤယွၤ စံးဆၢနၤဒ် နတၢ်လိၣ်ဘၣ်အသိး ဒီးနတၢ်နာ်ယွၤကဒိၣ်န့ၢ်ဒံးအလီၢ်လီၤ. နမ့ၢ်ပာ်ဖျါထီၣ် နတၢ်ဘၣ်ယိၣ်ဘၣ်ဘီခဲလၢာ် ဆူယွၤအအိၣ်န့ၣ် အဝဲကသုးဘူးအသးဆူနအိၣ်လီၤ.
၁၅ အဒိ, ဒီပုၢ်ဝဲၢ်မုၣ်ခဲသံၣ်မ့ၢ်ပှၤလၢ ညီနုၢ်ဟးစံၣ်တဲၤတဲလီၤတၢ်ဘၣ်ဆၣ် အဝဲတသူၣ်ဖှံသးညီဘၣ်. * အဝဲတဲဝဲလၢ “လၢညါန့ၣ်ယတအဲၣ်ဒိး ဟးစံၣ်တဲၤတဲလီၤတၢ်ဘၣ်. ယမ့ၢ်တဲတီတီန့ၣ် ယဟးတမုာ်နီတစဲးဘၣ်.” ဖဲအဝဲတမၤလၢၤတၢ်မၤအခါ တၢ်အိၣ်ဖှိၣ်သးပှၢ်တဂၤ ဟ့ၣ်ဂံၢ်ဟ့ၣ်ဘါအီၤလၢ ကမၤပှၤလဲၤလၢညါအတၢ်မၤလီၤ. အဝဲစံးဝဲ– “တၢ်အိၣ်ဖှိၣ်သးပှၢ် ဟ့ၣ်ယၤလံာ်ပတံထီၣ်လီၤ. ဒီးယပာ်လီၤယသးလၢ ယကမၤပှၤလဲၤလၢညါအတၢ်မၤ, ဘၣ်ဆၣ် ယဃ့ဘါထုကဖၣ် ကိးနံၤဒဲးလၢ ယဟိဝၤယွၤကမၤစၢၤယၤ ဒ်သိးယကအိၣ်ဒီး တၢ်သးခုလၢ တၢ်စံၣ်တဲၤတဲလီၤတၢ်မၤအပူၤန့ၣ်လီၤ.” မ့ၢ်ယဟိဝၤယွၤ စံးဆၢအတၢ်ထုကဖၣ်ဧါ. ဖဲမၤဝဲပှၤလဲၤလၢညါ တၢ်မၤသၢနံၣ်ဝံၤအလီၢ်ခံ စံးဝဲဒ်အံၤလီၤ– “ဖဲယသူအါထီၣ် ယတၢ်ဆၢကတီၢ်လၢ တၢ်စံၣ်တဲၤတဲလီၤတၢ်မၤ ဒီးမၤလိန့ၢ်တၢ်လၢ ဒီပုၢ်ဝဲၢ်မုၣ်အဂၤတဖၣ်အအိၣ်အခါ ယတၢ်သ့တၢ်ဘၣ်လၢ တၢ်စံၣ်တဲၤတဲလီၤတၢ်မၤအဂီၢ်န့ၣ် ဂ့ၤထီၣ်ဝဲကယီကယီလီၤ. အခဲအံၤ ယအိၣ်ဒီး တၢ်သးခုလၢ တၢ်စံၣ်တဲၤတဲလီၤတၢ်မၤအပူၤ တကးဒံးဘၣ် ယအဲၣ်တၢ်စံၣ်တဲလီၤတၢ်မၤဒိၣ်မးလီၤ. ယတၢ်ရ့လိာ်သးဒီး ယဟိဝၤယွၤစ့ၢ်ကီးဂ့ၤဒိၣ်န့ၢ်ဒံးလၢညါလီၤ.” ဒီပုၢ်ဝဲၢ်မုၣ် အတၢ်ထုကဖၣ် မၤစၢၤအီၤနီၢ်နီၢ်လၢ အဝဲကဘူးထီၣ်ဒီး ယဟိဝၤယွၤလီၤ.
မၤတၢ်လၢနကဘၣ်မၤ
၁၆, ၁၇. (က) ပတၢ်ရ့လိာ်သးဒီး ယဟိဝၤယွၤကဂၢၢ်ကျၢၤအဂီၢ် ပကဘၣ်မၤတၢ်မနုၤလဲၣ်. (ခ) တၢ်မၤလိလၢခံတခါန့ၣ် ပကတဲသကိးတၢ်မနုၤလဲၣ်.
၁၆ ပသုးဘူးပသးဆူ ယဟိဝၤယွၤအအိၣ်သ့ဝဲထီဘိလီၤ. မ်ပကဒိကနၣ် ကစၢ်ယွၤအကလုၢ် ခီဖျိတၢ်ဖးလံာ်စီဆှံ ဒီးမ်ပကတဲတၢ်ဒီးကစၢ်ယွၤ လၢတၢ်ထုကဖၣ်ထီဘိန့ၣ်တက့ၢ်. ပမ့ၢ်မၤဒ်န့ၣ်န့ၣ် ပတၢ်ရ့လိာ်သးဒီး ယဟိဝၤယွၤ ကဂၢၢ်ကျၢၤဒိၣ်ထီၣ်ဝဲလီၤ. ခီဖျိအတၢ်မၤစၢၤအဃိ ပတူၢ်တၢ်မၤကွၢ်သ့ၣ်တဖၣ်ကကဲဝဲလီၤ.
သုးဘူးနသးဆူ ယဟိဝၤယွၤအအိၣ်ထီဘိတက့ၢ် (ကွၢ်လံာ်အဆၢ ၁၆, ၁၇)
၁၇ ဘၣ်ဆၣ် ပဃ့ဘါထုကဖၣ်တၢ်ဆူ ယဟိဝၤယွၤအအိၣ်ထီဘိသနာ်က့ တဘျီတခီၣ် ပတၢ်ကီတၢ်ခဲအိၣ်ဒံးလီၤ. ဖဲန့ၣ်အဆၢကတီၢ် ပတၢ်နာ်ယဟိဝၤယွၤ လီၤစှၤဝဲသ့လီၤ. ပကဆိကမိၣ်ဘၣ်လၢ ယဟိဝၤယွၤ တဒိကနၣ်ပတၢ်ထုကဖၣ် ဒီးအဝဲဘၣ်ကမ့ၢ် ပတံၤသကိးနီၢ်နီၢ်ဒံးဧါန့ၣ်လီၤ. နမ့ၢ်ဆိကမိၣ်ဘၣ်ဒ်အံၤန့ၣ် နကဘၣ်မၤတၢ်မနုၤလဲၣ်. တၢ်မၤလိလၢခံတခါကမၤစၢၤနၤလီၤ.
^ လံာ်အဆၢ. 2 တၢ်ရ့လိာ်သးန့ၣ် မ့ၢ်တၢ်တခါလၢ ပှၤခံဂၤပာ်ဖျါထီၣ် သးအတၢ်တူၢ်ဘၣ် ဒီးအတၢ်မၤလၢတဂၤဒီးတဂၤအဖီခိၣ်လီၤ. ဒ်သိးအတၢ်ရ့လိာ်သး ကဂၢၢ်ကျၢၤထီၣ်အဂီၢ် အဝဲသ့ၣ်ခံဂၤလၢာ် ကဘၣ်မၤတၢ်တမံၤမံၤလီၤ.
^ လံာ်အဆၢ. 15 အမံၤဘၣ်တၢ်ဆီတလဲအီၤလီၤ.
