တၢ်ဟ့ၣ်ကူၣ်လၢ တၢ်မၤလိအဂီၢ်
ဃုထၢတၢ်လီၢ်လၢ နသးစၢၢ်ဆၢ နနီၢ်ကစၢ် တၢ်မၤလိလံာ်စီဆှံ ကန့ၢ်အဂီၢ်
• ဖဲနမၤ နီၢ်ကစၢ် တၢ်မၤလိလံာ်စီဆှံအခါ ဒ်သိး နကန့ၢ်ဘၣ်အါထီၣ် အဘျုးအဂီၢ် နကဘၣ် မၤဒ်လဲၣ်. ဒ်သိး နသးစၢၢ်ဆၢတၢ် ကန့ၢ်အဂီၢ် တၢ်ဟ့ၣ်ကူၣ်တဖၣ်အံၤ မၤစၢၤနၤသ့.
-
ဃုထၢတၢ်လီၢ်လၢအဂ့ၤ. မ့ၢ်သ့န့ၣ် ဃုထၢတၢ်လီၢ်လၢ အကဆှီ ဒီးတၢ်လီၢ်လၢ အအိၣ်ဒီး တၢ်ကပီၤဂ့ၤဂ့ၤ. နဆ့ၣ်နီၤလၢ လီၢ်ဆ့ၣ်နီၤလိၤ ဒီးမၤလိတၢ်လၢ စီၢ်နီၤခိၣ်သ့. မ့တမ့ၢ် နဆ့ၣ်နီၤလၢ တၢ်ချၢ ဒီးမၤလိတၢ်သ့. ဃုထၢ တၢ်လီၢ်လၢ ကမၤစၢၤနၤဒ်သိး နမၤလိတၢ်ကမုာ်.
-
ဃုထၢတၢ်လီၢ်လၢ အဘှ့ၣ်အဘှီၣ်. ယ့ၣ်ၡူး ဃုထၢ တၢ်ဆၢကတီၢ်လၢ အကဃ့ထုကဖၣ် “ဖဲဂီၤခီဂီၤဂီၤ” ဒီးတၢ်လီၢ် “လၢပှၤတအိၣ် နီတဂၤဘၣ်အလီၢ်.” (မၢ် ၁:၃၅) လၢနဟံၣ် တၢ်လီၢ်လၢ အဘှ့ၣ်အဘှီၣ် မ့ၢ်တအိၣ်ဘၣ်န့ၣ် တဲဘၣ် နဟံၣ်ဖိဃီဖိ မ့တမ့ၢ် ပှၤလၢအအိၣ်ဟံၣ် တဖျၢၣ်ဃီဒီးနၤလၢ နကမၤ နီၢ်ကစၢ် တၢ်မၤလိလံာ်စီဆှံ အဆၢကတီၢ်. ဒီးဖဲနမၤလိတၢ်အခါ တဲအဝဲသ့ၣ်လၢ တဘၣ်မၤတံာ်တာ် နၤတဂ့ၤ.
-
သးစၢၢ်ဆၢ နတၢ်မၤလိ. တဘၣ်ပျဲ တၢ်မၤတံာ်တာ်နၤ နီတမံၤတဂ့ၤ. နမ့ၢ်မၤ နီၢ်ကစၢ် တၢ်မၤလိလံာ်စီဆှံလၢ နလီတဲစိ မ့တမ့ၢ် ထဲးဘလဲး အပူၤန့ၣ် ဒ်သိး တၢ်မၤတံာ်တာ်နၤ တဟဲနုာ်လီၤ နီတမံၤတဂ့ၤအဂီၢ် ပံးဃာ်အကလုၢ်. ဖဲနမၤ နီၢ်ကစၢ် တၢ်မၤလိလံာ်စီဆှံအခါ နမ့ၢ်သ့ၣ်နီၣ်ထီၣ် တၢ်လၢ နကဘၣ်မၤ တမံၤမံၤန့ၣ် ကွဲးနီၣ်ဃာ်ဆိ ဒီးမၤအီၤလၢခံ. ဒီးဖဲနမၤ နီၢ်ကစၢ် တၢ်မၤလိလံာ်စီဆှံအခါ နသးစၢၢ်ဆၢတၢ် မ့ၢ်တန့ၢ်လၢၤဘၣ်န့ၣ် အိၣ်ပတုာ် တစိၢ်ဖိ. မၤဟူးမၤဂဲၤနသး မ့တမ့ၢ် ဟးဝ့ၤဝီၤ တစဲးဖိ.
