နအိၣ်မူလီၤထူလီၤယိာ်လၢ ဟီၣ်ခိၣ်အံၤသ့
တၢ်မုၢ်လၢ်လၢအဂ့ၤကတၢၢ်. ပတၢ်ဘၣ်တ့ကစၢ် အၢၣ်လီၤပှၤလၢ အဝဲကဟ့ၣ်ပှၤတၢ်မူ လီၤထူလီၤယိာ်လၢ ဟီၣ်ခိၣ်လီၤ. ဘၣ်ဆၣ် ပှၤအါဂၤန့ၣ် တနာ်ဝဲဘၣ်. အဝဲသ့ၣ်တဲဝဲလၢ ‘ပှၤခဲလၢာ် ကဘၣ်သံဝဲလီၤ.’ ဒီးအဝဲသ့ၣ်တဲကဒီးဝဲလၢ ‘ပကဘၣ်အိၣ်ဖျဲၣ်ထီၣ် ဒီးပကဘၣ်သံန့ၣ် မ့ၢ်တၢ်လၢအကဘၣ် ဟဲကဲထီၣ်အသးလီၤ.’ မ့မ့ၢ် ပှၤအဂၤတနီၤန့ၣ် နာ်ဝဲလၢ ပအိၣ်မူဘၣ်လီၤထူလီၤယိာ်သ့ ဘၣ်ဆၣ် တမ့ၢ်ဖဲ ဟီၣ်ခိၣ်အံၤဘၣ်. အဝဲသ့ၣ်နာ်ဝဲလၢ ပကန့ၢ်ဘၣ် တၢ်မူအထူအယိာ်လၢမူခိၣ်န့ၣ်လီၤ. မ့မ့ၢ်နၤန့ၣ် နဆိကမိၣ်ဒ်လဲၣ်.
တချုးလၢ နပာ်ဖျါထီၣ် နတၢ်ထံၣ်ဒံးဘၣ်န့ၣ် ဆိကမိၣ်ထံ တၢ်သံကွၢ်သၢဖျၢၣ်အံၤ အတၢ်စံးဆၢလၢ လံာ်စီဆှံပူၤတက့ၢ်. ပှၤဟီၣ်ခိၣ်ဖိတဖၣ်န့ၣ် တၢ်တ့လီၤအဝဲသ့ၣ်လၢ ကအိၣ်မူဘၣ်ဝဲ အနံၣ်ယံာ်ထဲလဲၣ်. ကစၢ်ယွၤအတၢ်တိာ်ပာ် အခီၣ်ထံးခီၣ်ဘိလၢ ဟီၣ်ခိၣ်ဒီး ပှၤဟီၣ်ခိၣ်ဖိအဂီၢ်န့ၣ် အိၣ်ဒ်လဲၣ်. ဒီးဘၣ်မနုၤအဃိ ပှၤဟီၣ်ခိၣ်ဖိတဖၣ် ဘၣ်သံလဲၣ်.
ပှၤဟီၣ်ခိၣ်ဖိန့ၣ် ဘၣ်တၢ်တ့အီၤလီၤဆီ
ပှၤဟီၣ်ခိၣ်ဖိန့ၣ် ဘၣ်တၢ်တ့လီၤအီၤ လီၤဆီန့ၢ်ဒံး ကယဲၢ်တၢ်ဘၣ်တ့လၢ အအိၣ်လၢဟီၣ်ခိၣ်ချၢန့ၣ်လီၤ. လီၤဆီလၢကျဲဒ်လဲၣ်. လံာ်စီဆှံပာ်ဖျါန့ၢ်ပှၤလၢ ကစၢ်ယွၤ တ့လီၤပှၤကညီ “ဒ်အဂီၤဒၣ်ဝဲအသိး” ဒီး ‘ဒ်အကစၢ်ဒၣ်ဝဲအသိး’ န့ၣ်လီၤ. (၁ မိၤၡ့ ၁:၂၆, ၂၇) ဖဲအံၤအဲၣ်ဒိးတဲဝဲ အခီပညီဒ်လဲၣ်. အဲၣ်ဒိးတဲဝဲလၢ ဖဲကစၢ်ယွၤတ့လီၤ ပှၤဟီၣ်ခိၣ်ဖိအခါ အဝဲတ့လီၤပှၤဃုာ်ဒီး အတၢ်ဂ့ၤတၢ်ဝါတဖၣ် ဒ်သိးဒီး တၢ်အဲၣ်တၢ်ကွံ ဒီးတၢ်တီတၢ်လိၤန့ၣ်လီၤ.
တကးဒံးဘၣ် ပှၤဟီၣ်ခိၣ်ဖိတဖၣ်န့ၣ် အိၣ်ဒီးတၢ်သ့တၢ်ဘၣ်လၢ ကသ့ပဲာ်ထံနီၤဖး တၢ်ဂ့ၤဒီးတၢ်အၢ ဒီးဃုသ့ၣ်ညါ ဘၣ်ဃးဒီး ကစၢ်ယွၤအဂ့ၢ်သ့ဝဲလီၤ. အဃိ ဖဲပဆိကမိၣ်ထံ ဆၣ် ဒီးတၢ်အိၣ်လၢမူခိၣ်, ကွၢ်တၢ်ဂီၤလၢအဃံအလၤ, ဒိကနၣ်တၢ်သးဝံၣ် ဒီးဖးထါအခါ ပနၢ်ပၢၢ်အတၢ်ဃံတၢ်လၤသ့ဝဲလီၤ. အဂၤတမံၤန့ၣ် ပအိၣ်စ့ၢ်ကီးဒီး တၢ်သ့တၢ်ဘၣ်လၢ ပကဒုးအိၣ်ထီၣ် ပတၢ်ရ့လိာ်သးဒီး တၢ်ဘၣ်တ့ကစၢ်သ့ဝဲလီၤ. အဃိ ပှၤဟီၣ်ခိၣ်ဖိန့ၣ် လီၤဆီန့ၢ်ဒံး တၢ်ဘၣ်တ့အဂၤလၢ အအိၣ်လၢဟီၣ်ခိၣ်ချၢန့ၣ်လီၤ.
ဆိကမိၣ်ကွၢ် ကစၢ်ယွၤ မ့ၢ်တ့လီၤပှၤဟီၣ်ခိၣ်ဖိလၢ ကအိၣ်မူဘၣ် ထဲတစိၢ်တလီၢ်န့ၣ် မ့ၢ်အဝဲကဟ့ၣ်လီၤ ပှၤဟီၣ်ခိၣ်ဖိလၢ တၢ်သ့တၢ်ဘၣ် ဒ်အံၤတဖၣ်ဧါ. ပမ့ၢ်တဲလိၤလိၤန့ၣ် ကစၢ်ယွၤဟ့ၣ်လီၤဝဲ ပှၤဟီၣ်ခိၣ်ဖိတဖၣ် တၢ်သ့တၢ်ဘၣ် ဒီးတၢ်ဂ့ၤတၢ်ဝါတဖၣ်န့ၣ် ဒ်သိးအဝဲသ့ၣ် ကအိၣ်ဒီး တၢ်သူၣ်ဖှံသးညီ ဒီးအိၣ်မူဘၣ်လၢ ဟီၣ်ခိၣ်အံၤ လီၤထူလီၤယိာ်အဂီၢ်လီၤ.
ကစၢ်ယွၤအတၢ်တိာ်ပာ်လၢအခီၣ်ထံး
ပှၤတနီၤတဲဝဲလၢ ကစၢ်ယွၤန့ၣ် တတိာ်ပာ်ဝဲလၢ ပှၤဟီၣ်ခိၣ်ဖိတဖၣ် ကအိၣ်မူ လီၤထူလီၤယိာ်လၢ ဟီၣ်ခိၣ်ချၢအံၤဘၣ်. အဝဲသ့ၣ်နာ်ဝဲလၢ ဟီၣ်ခိၣ်အံၤမ့ၢ်ဝဲ တၢ်လီၢ်လၢ ပှၤဟီၣ်ခိၣ်ဖိတဖၣ် ကဘၣ်အိၣ်ဝဲထဲ တစိၢ်တလီၢ်လီၤ. ဒီးဖဲအဝဲသ့ၣ်အိၣ်လၢ ဟီၣ်ခိၣ်အခါ ကစၢ်ယွၤ ကမၤကွၢ်အီၤလၢ မ့ၢ်အဝဲသ့ၣ် ကြၢးထီၣ်ဘၣ်လၢမူခိၣ် ဒီးအိၣ်မူဘၣ် လီၤထူလီၤယိာ်ဒီးအီၤဧါန့ၣ်လီၤ. အဝဲသ့ၣ်အတၢ်ထံၣ် မ့ၢ်ဘၣ်နီၢ်ကီၢ်န့ၣ် ကဖျါလၢ ကစၢ်ယွၤ ဒုးအိၣ်ထီၣ်ဝဲ ကယဲၢ်တၢ်အၢတၢ်သီ လၢအကဲထီၣ်အသးလၢ ဟီၣ်ခိၣ်ချၢအံၤလီၤ. ဘၣ်ဆၣ် လံာ်စီဆှံပာ်ဖျါထီၣ်န့ၢ်ပှၤ လီၤတံၢ်လီၤဆဲးလၢ ကစၢ်ယွၤ တဒုးအိၣ်ထီၣ်ဝဲ တၢ်အၢတၢ်သီနီတမံၤဘၣ်. လံာ်စီဆှံ တဲစ့ၢ်ကီးဝဲလၢ ကစၢ်ယွၤန့ၣ် “လၢဝဲပှဲၤဝဲဒီး တီဝဲလိၤဝဲလၢ ကယဲၢ်အကျဲခဲလၢာ်အပူၤန့ၣ်လီၤ. သုကစၢ်ယွၤမ့ၢ်ပှၤလၢ အသူၣ်တီသးရၤ ဒီးမ့ၢ်ဝဲတီဝဲ, အဝဲမၤတၢ်လၢ အဘၣ်ဒီးအတီန့ၣ်လီၤ.”—၅ မိၤၡ့ ၃၂:၄, ခ့ခါစှီၤကျိာ်.
လံာ်စီဆှံ ပာ်ဖျါထီၣ်န့ၢ်ပှၤ လီၤတံၢ်လီၤဆဲးလၢ ကစၢ်ယွၤ အတၢ်တိာ်ပာ် အခီၣ်ထံးခီၣ်ဘိ လၢဘၣ်ဃးဒီးဟီၣ်ခိၣ်န့ၣ် အိၣ်ဝဲဒ်အံၤလီၤ. “မူခိၣ်န့ၣ် မ့ၢ်ယွၤအမူခိၣ်လီၤ. မ့မ့ၢ်ဟီၣ်ခိၣ်အံၤ ဟ့ၣ်လီၤဝဲလၢပှၤကညီလီၤ.” (စံးထီၣ်ပတြၢၤ ၁၁၅:၁၆) ကစၢ်ယွၤ တ့လီၤဟီၣ်ခိၣ်အံၤ ဃံဃံလၤလၤဒ်သိး ကကဲထီၣ်ဝဲ ပှၤဟီၣ်ခိၣ်ဖိတဖၣ်အတၢ်အိၣ်တၢ်ဆိးအလီၢ် လီၤထူလီၤယိာ်အဂီၢ်လီၤ. ဒီးတၢ်လၢပှၤဟီၣ်ခိၣ်ဖိ လိၣ်ဘၣ်အီၤတဖၣ်န့ၣ် အဝဲဟ့ၣ်လီၤဝဲဒ်သိး အဝဲသ့ၣ်ကအိၣ်မူဘၣ် လီၤထူလီၤယိာ်ပှဲၤဒီး တၢ်သူၣ်ဖှံသးညီအဂီၢ်လီၤ.—၁ မိၤၡ့ ၂:၈, ၉.
“မူခိၣ်န့ၣ် မ့ၢ်ယွၤအမူခိၣ်လီၤ. မ့မ့ၢ်ဟီၣ်ခိၣ်အံၤ ဟ့ၣ်လီၤဝဲလၢပှၤကညီလီၤ.””—စံးထီၣ်ပတြၢၤ ၁၁၅:၁၆
တကးဒံးဘၣ် ဘၣ်ဃးဒီး ကစၢ်ယွၤ အတၢ်တိာ်ပာ်လၢ ပှၤဟီၣ်ခိၣ်ဖိအဂီၢ်န့ၣ် လံာ်စီဆှံ ပာ်ဖျါထီၣ်ဝဲ လီၤတံၢ်လီၤဆဲးလီၤ. ကစၢ်ယွၤ တဲဘၣ်ပှၤဟီၣ်ခိၣ်ဖိ အဆိကတၢၢ်ခံဂၤလၢ “မၤပှဲၤထီၣ်ဟီၣ်ခိၣ်ဒီးမၤနၢၤအီၤ, ဒီးပၢ . . . ကယဲၢ်တၢ်အသး လၢအဟူးအဂဲၤလၢဟီၣ်ခိၣ်ချၢန့ၣ်တက့ၢ်.” (၁ မိၤၡ့ ၁:၂၈) အဆိကတၢၢ် ကစၢ်ယွၤဟ့ၣ်လီၤ အဝဲသ့ၣ်မူဒါလၢ ကဒုးကဲထီၣ်ဝဲ ဟီၣ်ခိၣ်ဒီဘ့ၣ်လၢ ပၤရဒံစူးန့ၣ်လီၤ. အဃိ ဖဲအံၤပာ်ဖျါထီၣ်န့ၢ်ပှၤ လီၤတံၢ်လီၤဆဲးလၢ ကစၢ်ယွၤတိာ်ပာ်ဝဲလၢ နီၢ်အံၣ်အု, စီၤအၤဒၣ် ဒီးအဖိအလံၤခဲလၢာ်န့ၣ် ကအိၣ်မူဘၣ် လီၤထူလီၤယိာ်လၢ ဟီၣ်ခိၣ်အံၤလီၤ. တမ့ၢ်လၢမူခိၣ်ဘၣ်.
ဘၣ်မနုၤအဃိ ပဘၣ်သံလဲၣ်
လံာ်စီဆှံ ပာ်ဖျါန့ၢ်ပှၤလၢ ပှၤနီၢ်သးဖိတဂၤ ပူထီၣ်ထီဒါကစၢ်ယွၤ ခီဖျိလၢ အဝဲဂုာ်ကျဲးစၢး မၤဟးဂီၤဝဲကစၢ်ယွၤ အတၢ်ရဲၣ်တၢ်ကျဲၤလၢ ဧ့ၤဒ့ၣ်တၤသၣ်လီၢ်အဃိန့ၣ်လီၤ. လၢခံန့ၣ် ပှၤနီၢ်သးဖိတဂၤအံၤ ဘၣ်တၢ်သ့ၣ်ညါအီၤလၢ မုၣ်ကီၤလံၢ်န့ၣ်လီၤ. အဝဲမၤဝဲလၢကျဲဒ်လဲၣ်.
မုၣ်ကီၤလံၢ် ဟဲလ့ပစီဝဲ နီၢ်အံၣ်အုဒီးစီၤအၤဒၣ် လၢကပူထီၣ်ထီဒါဝဲ ကစၢ်ယွၤ ဒ်သိးဒီးအီၤန့ၣ်လီၤ. မုၣ်ကီၤလံၢ် ဒုးဆိကမိၣ်အဝဲသ့ၣ်လၢ ကစၢ်ယွၤန့ၣ် တဟ့ၣ်သုတၢ်လၢ အဂ့ၤခဲလၢာ်ဘၣ် ဒီးတၢ်အဂ့ၤဒီးတၢ်အအၢန့ၣ် သုပာ်ပနီၣ်လၢ သုနီၢ်ကစၢ်သ့ဝဲလီၤ. ဒ်ပသ့ၣ်ညါအသိး နီၢ်အံၣ်အု ဒီးစီၤအၤဒၣ် ဒိကနၣ်ဝဲမုၣ်ကီၤလံၢ်အကလုၢ် ဒီးပူထီၣ်ထီဒါဝဲ ကစၢ်ယွၤလီၤ. အဃိ ဒ်ကစၢ်ယွၤတဲတ့ၢ် အဝဲသ့ၣ်အသိး အဝဲသ့ၣ်ဘၣ်သံဝဲလီၤ. ဒီးအဝဲသ့ၣ်ဒုးလီၤမၢ်ကွံာ်ဝဲ အတၢ်ခွဲးတၢ်ယာ်လၢ ကအိၣ်မူဘၣ်လၢ ဟီၣ်ခိၣ်အံၤလီၤထူလီၤယိာ်န့ၣ်လီၤ.—၁ မိၤၡ့ ၂:၁၇; ၃:၁-၆; ၅:၅.
ခီဖျိလၢ နီၢ်အံၣ်အုဒီးစီၤအၤဒၣ် မၤကမၣ်တၢ်အဃိ မၤဘၣ်ဒိဝဲ အဖိအလံၤခဲလၢာ်လီၤ. ယွၤအကလုၢ်ကထါ တဲဝဲလၢ “တၢ်ဒဲးဘးဟဲနုာ် ဆူဟီၣ်ခိၣ်ချၢလၢပှၤတဂၤ [စီၤအၤဒၣ်] အဃိ, ဒီးတၢ်သံတၢ်ပှၢ်လၢ တၢ်ဒဲးဘးအဃိ အသိးန့ၣ်, ဒီးဒ်န့ၣ်အသိးပှၤခဲလၢာ်မၤတ့ၢ် တၢ်ဒဲးဘးသတးဒီး, ပှၤခဲလၢာ်ဘၣ်တၢ်သံတၢ်ပှၢ်” လီၤ. (ရိမ့ၤ ၅:၁၂) ပဘၣ်သံခီဖျိ ပဒိးန့ၢ်ဘၣ် တၢ်ဒဲးဘးဒီးတၢ်သံလၢ အဟဲလီၤစၢၤလၢ နီၢ်အံၣ်အုဒီးစီၤအၤဒၣ် အအိၣ်န့ၣ်လီၤ. တမ့ၢ်လၢ ကစၢ်ယွၤရဲၣ်ကျဲၤပာ်စၢၤဝဲလၢ ပကသံအဂီၢ်ဘၣ်.
နအိၣ်မူလီၤထူလီၤယိာ်လၢ ဟီၣ်ခိၣ်အံၤသ့
တၢ်ပူထီၣ်ထီဒါ အိၣ်ထီၣ်လၢ ဧ့ၤဒ့ၣ်တၤသၣ်လီၢ် သနာ်က့ ကစၢ်ယွၤ အတၢ်တိာ်ပာ်လၢအခီၣ်ထံးလၢ ဟီၣ်ခိၣ်ဒီးပှၤဟီၣ်ခိၣ်ဖိအဂီၢ်န့ၣ် တဟးဂီၤဝဲနီတဘျီဘၣ်. ခီဖျိလၢ ကစၢ်ယွၤအိၣ်ဒီး တၢ်အဲၣ်လၢအလၢအပှဲၤ ဒီးမ့ၢ်ယွၤလၢ အတီအလိၤအဃိ ထိၣ်ဟူးထိၣ်ဂဲၤထီၣ်အီၤလၢ ကရဲၣ်ကျဲၤဝဲ ကျဲလၢအဂၤတဘိ ဒ်သိးပကထူၣ်ဖျဲးထီၣ်လၢ တၢ်ဒဲးဘးဒီး တၢ်သံအဂီၢ်န့ၣ်လီၤ. တၢ်မၢဖိပီလူး တဲဝဲလၢ “တၢ်ဒဲးဘးအဘူးအလဲမ့ၢ်တၢ်သံလီၤ. မ့မ့ၢ်ယွၤအတၢ်ဟ့ၣ်န့ၣ်, မ့ၢ်တၢ်မူအထူအယိာ် လၢပကစၢ်ယ့ၣ်ၡူးခရံာ်အဃိန့ၣ်လီၤ.” (ရိမ့ၤ ၆:၂၃) ခီဖျိလၢ ကစၢ်ယွၤအဲၣ်ပှၤအဃိ အဝဲ “ဟ့ၣ်လီၤကွံာ် အဖိခွါအိၣ်တဂၤဃီ [ယ့ၣ်ၡူးခရံာ်], ဒ်သိးကယဲၢ်ပှၤလၢ အစူၢ်က့ၤနာ်က့ၤအီၤတဂၤလၢ်လၢ်န့ၣ်, အသုတဟးဂီၤတဂ့ၤဒီး, ကန့ၢ်ဘၣ်တၢ်မူအထူအယိာ်လီၤ.” (ယိၤဟၣ် ၃:၁၆) ခီဖျိ ယ့ၣ်ၡူးသးအိၣ် ဟ့ၣ်လီၤအသးသမူလၢ ပဂီၢ်အဃိ တၢ်ခွဲးတၢ်ယာ်လၢ စီၤအၤဒၣ်မၤလီၤမၢ်ဝဲန့ၣ် ပဒိးန့ၢ်ဘၣ်က့ၤအီၤသ့ဝဲလီၤ. a
ကစၢ်ယွၤ အတၢ်အၢၣ်လီၤအီလီၤလၢ ဟီၣ်ခိၣ်ဒီဘ့ၣ် ကကဲထီၣ် ပၤရဒံစူးန့ၣ် တယံာ်တမီၢ် ကဟဲလၢထီၣ်ပှဲၤထီၣ်ဝဲလီၤ. နၤစ့ၢ်ကီး ခါဆူညါ နမ့ၢ်အဲၣ်ဒိးအိၣ်မူဘၣ် လီၤထူလီၤယိာ်န့ၣ် နကဘၣ်မၤထွဲ ယ့ၣ်ၡူးအတၢ်ကတိၤ လၢအတဲဝဲ “လဲၤနုာ်လၢကျဲစၢၤအအံၣ်န့ၣ်တက့ၢ်. အဂ့ၢ်ဒ်အံၤ, ကျဲစၢၤမ့ၢ်အလဲၢ်, ဒီးကျဲမ့ၢ်အဒိၣ်လၢ အဆှၢဝဲဆူတၢ်ဟးဂူာ်ဟးဂီၤန့ၣ်, ဒီးပှၤလၢအလဲၤနုာ်လၢအီၤတဖၣ် အိၣ်အါဂၤ. မ့မ့ၢ်ကျဲစၢၤမ့ၢ်အအံၣ်, ဒီးကျဲမ့ၢ်အဆံးလၢ အဆှၢဝဲဆူတၢ်မူန့ၣ်, ဒီးပှၤလၢအထံၣ်န့ၢ်အီၤတဖၣ် အိၣ်စှၤဂၤလီၤ.” (မးသဲ ၇:၁၃, ၁၄) နတၢ်အိၣ်မူခါဆူညါ ကမၤအသးဒ်လဲၣ်ဒ်လဲၣ်န့ၣ် သန့ၤထီၣ်အသးလၢ နတၢ်ဆၢတဲာ်အဖီခိၣ်လီၤ. အဃိ မ့ၢ်နကမၤဒ်လဲၣ်.
a ဘၣ်ဃးဒီး တၢ်ပှ့ၤက့ၤအဂ့ၢ်န့ၣ် နဃုသ့ၣ်ညါအါထီၣ်လၢ တၢ်မၤလိ ၂၇ လၢလံာ် အိၣ်မူလီၤထူလီၤယိာ် ပှဲၤဒီးတၢ်သးခု အပူၤသ့. ယဟိဝၤပှၤအုၣ်အသး ထုးထီၣ်ဝဲလံာ်တဘ့ၣ်အံၤ ဒီးနဒီလိးအီၤလၢ www.isa4310.com/ksw သ့.
တၢ်ဂ့ၤအဂၤလၢ နကဘၣ်သး
လံာ်စီဆှံ အတၢ်သိၣ်လိလၢ အရ့ဒိၣ်တဖၣ်
ဘၣ်မနုၤအဃိ ကစၢ်ယွၤတ့လီၤဟီၣ်ခိၣ်လဲၣ်.
ဟီၣ်ခိၣ်လၢပအိၣ်အံၤ ပှဲၤဝဲဒီးတၢ်ဃံတၢ်လၤလီၤ. ကစၢ်ယွၤပာ်လီၤဝဲဟီၣ်ခိၣ်ဒီး မုၢ်အတၢ်ဒ့ၣ်စၢၤန့ၣ် တယံၤတလၢ ဒီးတဘူးတလၢဘၣ်. ဒီးယွၤဒုးဒ့ခံဝဲဟီၣ်ခိၣ်အံၤ ဖဲအကြၢးအဘၣ်. ဒီးဟီၣ်ခိၣ်အံၤ တရံးဝဲမုၢ်န့ၣ် တချ့တလၢ ဒီးတကဘှၢတလၢ စ့ၢ်ကီးဘၣ်. ဘၣ်မနုၤအဃိ ကစၢ်ယွၤ တ့လီၤဝဲဟီၣ်ခိၣ်အံၤ ဂ့ၤထဲအံၤညါလဲၣ်.
တၢးထီခိးတၢ်
မ့ၢ်ဟီၣ်ခိၣ်ပၤရဒံစူး ကအိၣ်ဝဲအနီၢ်ကီၢ်ဧါ
လၢအခီၣ်ထံးလံၤလံၤန့ၣ် ပှၤအါဂၤဆိကမိၣ်ဝဲလၢ ဟီၣ်ခိၣ်ပၤရဒံစူးအိၣ်ဝဲတတီၤ ဘၣ်ဆၣ် လီၤမၢ်ကွံာ်ဝဲလံ. ဟီၣ်ခိၣ်ကကဲထီၣ် ပၤရဒံစူးဒံးဧါ.
