ဖဲ လါမ့ၤ ၂၂, ၂၀၂၃ န့ၣ် ဒီးကထၢၤ ထဲဒြီၤ အဲးဟနၢ ကဲဘြံၤဧစၢၤ လၢအမ့ၢ် ပှၤခိၣ်ပှၤနၢ်တဂၤလၢ ဟီၣ်ခိၣ်ဒီဘ့ၣ် တၢ်အိၣ်ဆူၣ်အိၣ်ချ့ ကရၢ န့ၣ်တဲဝဲလၢ “ခိၤရိၤနၤတၢ်ဆါ ကိညၢ်လီၤအဃိန့ၣ် အခီပညီတမ့ၢ်လၢ တၢ်လီၤဘၣ်ယိၣ်တအိၣ်လၢ ပှၤသးသမူအဂီၢ်လၢၤဘၣ်န့ၣ်ဘၣ်. . . . ခါဆူညါန့ၣ် တၢ်ဆါသံသတြိာ်လၢအဂၤ ရၤလီၤသးသ့ အဃိ ပကဘၣ် အိၣ်ကတဲာ်ကတီၤပသး.”

 လၢအပူၤကွံာ်န့ၣ် ခီဖျိ ခိၤရိၤနၤတၢ်ဆါအဃိ တုၤမုၢ်မဆါတနံၤအံၤ ပှၤအါဂၤန့ၣ် တူၢ်ဘၣ်ဒံးဝဲ တၢ်ဆူးတၢ်ဆါ လၢနီၢ်ခိတကပၤ ဒီးလၢအသးတၢ်တူၢ်ဘၣ် တကပၤစ့ၢ်ကီး. ပဒိၣ်ပပှၢ်တဖၣ် ဒီးတၢ်ကရၢကရိလၢ အကွၢ်ထွဲ ပှၤတၢ်အိၣ်ဆူၣ်အိၣ်ချ့န့ၣ် အမၤစၢၤပှၤ ဒ်သိး ပှၤကအိၣ်ကတဲာ်ကတီၤသးလၢ တၢ်ဆါသံသတြိာ်လၢ အကဟဲကဲထီၣ်သး ခါဆူညါတဖၣ် ကန့ၢ်ဝဲသပှၢ်တၢၢ်ဧါ.

 လံာ်စီဆှံပာ်ဖျါထီၣ်န့ၢ်ပှၤ တၢ်ပၢတၢ်ပြး တခါလၢ ကမၤဘျါ ပှၤဟီၣ်ခိၣ်ဖိတဖၣ် အတၢ်ဆူးတၢ်ဆါ. လံာ်စီဆှံ တဲဝဲလၢ “ကစၢ်ယွၤ လၢမူခိၣ် ကသူၣ်ထီၣ် ဘီမုၢ်တဘ့ၣ်” လၢအမ့ၢ် တၢ်ပၢတၢ်ပြးတခါ. (ဒၤနံးယ့လး ၂:၄၄) ပှၤလၢအအိၣ်လၢ ယွၤအဘီအမုၢ် အတၢ်ပၢဖီလာ်န့ၣ် “တတဲလၢ ‘ယဆိးက့’ နီတဂၤဘၣ်.” (ယၡါယၤ ၃၃:၂၄) ဒီးဖဲန့ၣ်န့ၣ် ပှၤကိးဂၤဒဲး ကအိၣ်ဆူၣ်အိၣ်ချ့ ဒီးကပှဲၤဒီး တၢ်ဂံၢ်တၢ်ဘါ ဒ်ပှၤသးစၢ်အသိး.​—ယိၤဘး ၃၃:၂၅.