စိၤခဲအံၤ ယဟိဝၤပှၤအုၣ်အသးတၢ်ကရၢကရိန့ၣ် စးထီၣ်ဖဲ ယၤဖှိၣ်နံၣ် ၁၉ ဘူးကလၢာ်န့ၣ်လီၤ. ဖဲန့ၣ်အဆၢကတီၢ်န့ၣ် လံာ်စီဆှံကၠိဖိတဖုလၢ အအိၣ်ဘူးဒီး ဖ့း(စ်)ဘၢး, ဖဲစဲၣ်ဘ့နံယါ, လၢအမဲရကၤကီၢ်စဲဖှိၣ်အပူၤတဖၣ်န့ၣ် စးထီၣ်ပဲာ်ထံနီၤဖးလံာ်စီဆှံလီၤ. အဝဲသ့ၣ်ထိၣ်သတြီၤဝဲ ခၠၢးၡ် အတၢ်သိၣ်လိသီလိဒီးလံာ်စီဆှံသိၣ်လိတၢ်နီၢ်နီၢ်တဖၣ်လီၤ. တၢ်လၢအဝဲသ့ၣ် သ့ၣ်ညါထီၣ်ဝဲတဖၣ်န့ၣ် စးထီၣ်ရၤလီၤဝဲလၢ လံာ်ပူၤ, လံာ်ပရၢပစၢၢ်ပူၤ, ဒီးကၠၢနၢၣ် လၢခဲအံၤပှၤကိးလၢ ပျိာ်ထီခီးတၢ်​—တၢ်ဘိးဘၣ်သ့ၣ်ညါ ယဟိဝၤအဘီအမုၢ်လီၤ.

 လံာ်စီဆှံကၠိဖိလၢအိၣ်ဒီးတၢ်သးတီတဖၣ်အကျါ ပိာ်ခွါလၢအမံၤမ့ၢ် ခၠါ(စ်)တ့းရးစဲ(လ်) အိၣ်တဂၤလီၤ. ဖဲရးစဲ(လ်)ကဲခိၣ်ကဲနၢ် တၢ်ဒုးသ့ၣ်ညါနၢ်ပၢၢ်လံာ်စီဆှံအတၢ်မၤဒီး ပျိာ်ထီခီးတၢ် အအဲးဒံးထၢၣ်အဆိကတၢၢ်အဆၢကတီၢ်န့ၣ်, အဝဲတမ့ၢ်ပှၤသူၣ်ထီၣ် တၢ်ဘူၣ်တၢ်ဘါအသီဘၣ်. ရးစဲ(လ်)ဒီး ပှၤတဖုလၢ ဖဲန့ၣ်ခါ ဘၣ်တၢ်သ့ၣ်ညါအီၤလၢ လံာ်စီဆှံကၠိဖိတဖၣ် အတၢ်တိာ်န့ၣ် ကမၤဒိၣ်ထီၣ်ထီထီၣ် ယ့ၣ်ၡူးအတၢ်သိၣ်လိတဖၣ်ဒီး ကမၤထွဲဝဲ နံၣ်တၢကယၤ ခရံာ်ဖိတၢ်အိၣ်ဖှိၣ် အတၢ်ဖံးတၢ်မၤတဖၣ်လီၤ. ယ့ၣ်ၡူးမ့ၢ်ပှၤသူၣ်ထီၣ်ခရံာ်ဖိတၢ်ဘူၣ်တၢ်ဘါအဃိ, ပထံၣ်အီၤဒ်ပှၤလၢသူၣ်ထီၣ် ပတၢ်ကရၢကရိလီၤ.​—ကလီးစဲ ၁:၁၈-၂၀.