Dɛn sabi Jiova Witnɛs dɛn fɔ de prich frɔm os to os, bɔt naw dɛn kin tinap nia kat dɛn usay dɛn kin put buk ɛn magazin dɛn fɔ prich na say usay pipul dɛn kin bɔku.

Dis biɛn tɛm dɛn dɔn de ɛnkɔrej wi mɔ fɔ prich dis kayn we. Insay Novɛmba 2011, sɔm Jiova Witnɛs dɛn na Nyu Yɔk siti bin bigin fɔ yuz kat ɛn tebul dɛn usay dɛn kin put buk ɛn magazin dɛn fɔ prich to pipul dɛn bɔt di Baybul in mɛsej. Dis kayn we fɔ prich bin so fayn dat i nɔ te, ɔda siti dɛn bigin fɔ yuz dis sem we fɔ prich.

Frɔm di tɛm we dɛn bigin fɔ prich dis kayn we te to Mach 2015, dɛn bin gi 165,390 kat dɛn to Jiova Witnɛs dɛn na ɔl di kɔngrigeshɔn dɛn ɔlsay na di wɔl. Dɛn bin ebul fɔ gɛt bɔku bɔku tebul dɛn, kiɔs dɛn, ɛn fayn bafa dɛn.

Fɔ prich frɔm os to os na di men we we Jiova Witnɛs dɛn stil de yuz fɔ mek pipul dɛn no di tru tin na di Baybul. Bɔt kat dɛn usay dɛn kin put buk ɛn magazin dɛn dɔn rili ɛp wi fɔ du di prichin wok fayn. Lɛ wi si sɔm ɛgzampul dɛn.

Insay Pɛru, wan man we nem Raul bin go mit Jiova Witnɛs dɛn we bin de nia wan kat ɛn i tɔk se: “Usay una bin de? A dɔn de luk fɔ Jiova Witnɛs dɛn fɔ tri ia naw! We a si una kat, a tɛl Gɔd tɛnki.”

Pan ɔl we Jiova Witnɛs dɛn kin go ɔltɛm na di say usay Raul de, dɛn nɔ wande mit am na os. I bin tɔk se trade i bin dɔn de stɔdi di Baybul wit Jiova Witnɛs dɛn ɛn i want fɔ bigin stɔdi bak. Dɛn bin arenj fɔ stat di stɔdi.

Wan maredman ɛn in wɛf bin go na wan kat we de na Bɔlgeria ɛn tek di buk we nem The Secret of Family Happiness. Di ɔda wik dɛn go bak ɛn tek tu ɔda buk dɛn we na Mi Baybul Stori Buk ɛn Learn From the Great Teacher. Di brɔda we bin de nia di kat bin aks dɛn ɔmɔs pikin dɛn, dɛn gɛt. Dɛn tɔk se: “Wi nɔ gɛt pikin dɛn yet, bɔt we wi gɛt, wi go want fɔ tich dɛn bɔt Gɔd. Na dɛn buk dɛn ya wi rili nid.”

Insay Yukren, wan sojaman bin go mit sɔm sista dɛn we bin tinap nia wan kat we gɛt buk ɛn magazin dɛn. I se: “Duya una tɛl mi ustɛm Amagɛdɔn de kam.” Di man bin dɔn fɛt pan di wɔ we bin de na Yukren. Di tin dɛn we de apin na di wɔl, bin mek di man biliv se Amagɛdɔn de kam jisnɔ ɛn i bin de wɔnda wetin mek Gɔd nɔ bin dɔn du sɔntin yet. Di pɔblisha dɛn bin yuz di Baybul fɔ ɛksplen se Gɔd gɛt gud rizin we mek i nɔ stɔp di bad tin dɛn we mɔtalman de du ɛn i nɔ go te igen i go du sɔntin fɔ dɔnawe wit ɔl di wikɛd wan dɛn. Di man bin gri fɔ tek di Wachtawa, Awake! ɛn di buk we nem, Is There a Creator Who Cares About You?

Insay Masidonia, wan man bin tɛl Jiova Witnɛs dɛn we bin de nia di kat se i kin rid di magazin dɛn bɔt naw i go lɛk fɔ gɛt wan buk we nem, Wetin Rili di Baybul De Tich? I bin tɔk se i de go wantɛm na di laybri we de fɔ ɔlman ɛn bigin rid di buk.

Afta lɛk tu awa so, di man kam bak we i dɔn rid 79 pej dɛn na di buk. I bin tɔk se: “Dis buk de chenj pɔsin in layf! A dɔn kam fɔ no se bɔku tin dɛn we a bin biliv nɔto tru. Ɔl di tin dɛn we di buk de tɔk bɔt mek sɛns to mi. I rili dɔn mek a ɔndastand klia wan wetin layf min!”