Bɔku bɔku pipul dɛn we bin kam di 2014 Rouen International Fair na di nɔt pat na Frans, bin rili gladi fɔ wetin dɛn si na wan bafa we gɛt di tim, “Di Baybul—Yɛstade, Tide, ɛn Tumara.”

Dɛn bin de ple fim bɔt dɛn fɔstɛm Baybul dɛn pan flat-skrin tɛlivishɔn dɛn na do na di but, ɛn bɔku pipul dɛn bin lɛk fɔ wach am. We dɛn go insay, dɛn lan bɔt di fayn advays dɛn we de insay di Baybul, di tru tin dɛn we i tɔk bɔt istri ɛn sayɛns, ɛn aw dɛn de sheb am to bɔku pipul dɛn.

Dɛn bin de sho bak aw pipul dɛn bin de kip kip Baybul dɛn so dat dɛn nɔ go pwɛl dɛn te naw bɔku bɔku pipul dɛn ebul fɔ rid di wan we dɛn dɔn print ɛn di wan dɛn we kin de na fon ɔ tablɛt. Di wan dɛn we bin kam, bin tek di New World Translation, fɔ fri. Na Jiova Witnɛs dɛn mek dis Baybul ɛn i pas 120 langwej dɛn we i de insay.

Bɔku pan di wan dɛn we kam bin tɛl Jiova Witnɛs dɛn tɛnki fɔ we dɛn bin de sheb di Baybul to pipul dɛn. Wan yɔŋ ledi we bin de wok de, bin wach di fim wit in kɔmpin dɛn, di ledi bin tɔk se: “Di Baybul na istri fɔ ɔlman. Na buk we gɛt layf. Ɛnitɛm a rid am, a de si ansa fɔ mi prɔblɛm dɛn.”

Wan grani we ol 60 ia bin sɔprayz fɔ no se na fri dɛn de gi di Baybul. I bin tɔk se: “Wi ɔl fɔ bigin rid am bak bikɔs wi ɔl nid am!”