Jiova Witnɛs dɛn de tray tranga wan fɔ prich to pipul dɛn we de tɔk di langwej dɛn we dɛn de tɔk na Ayriland ɛn Briten. * Apat frɔm Inglish, dɛn de yuz Ayrish, Skɔtish Gelik, ɛn Wɛlsh fɔ prich to pipul dɛn.

Insay Sɛptɛmba 2012, di jw.org wɛbsayt we dɛn dɔn chenj in dizayn bin de insay bɔku langwej dɛn, ɛn sɔm pan dɛn langwej dɛn ya na Ayrish ɛn Wɛlsh. Dɛn bin ad Skɔtish Gelik insay Ɔgɔst 2014. Wi bin print bak difrɛn buk, magazin, ɛn ɔda tin dɛn insay dɛn langwej dɛn ya. Aw pipul dɛn fil bɔt dis tin we wi du?

Wan bigman na Chɔch bin tek wan trakt we dɛn rayt insay Skɔtish Gelik, i rid am lawd wan wantɛm wantɛm, dɔn i bigin fɔ kray. Wetin mek di man bin kray? I bin sɔprayz fɔ si se dɛn translet di trakt fayn ɛn i tɔk se: “Udat translet dis trakt? Dis trakt rili fayn!”

Insay di fɔs mɔnt we dɛn ad Skɔtish Gelik na jw.org, na lɛk 750 pipul dɛn bin go na di wɛbsayt fɔ go rid di tin dɛn we de insay da langwej de.

Wan lɛkchɔra na di National University of Ireland insay Galwe, bin tɛl wan Jiova Witnɛs se i nɔ rili want fɔ no bɔt rilijɔn. Bɔt we i kam fɔ no se i go ebul fɔ gɛt di buk we nem The Bible​—What Is Its Message? insay Ayrish, i bin aks fɔ mek dɛn gi am wan. I bin tink se ɔlman fɔ ebul gɛt ɛni buk we de tɔk bɔt Gɔd biznɛs insay dɛn yon langwej ɛn i tɛl Jiova Witnɛs dɛn tɛnki fɔ di wok we dɛn dɔn du we dɛn mek buk ɛn magazin dɛn we de insay Ayrish.

Wan mami bin sho se i gladi afta we i gɛt wan buk we de insay Wɛlsh, ɛn i tɔk se: “Fɔ tru, if na Inglish una bin fɔ gi mi, sɔntɛm a nɔ fɔ bin dɔn tek am bɔt a rili gladi we a gɛt dis buk insay mi yon langwej.”

Insay Ɔgɔst 2014, wi bin ad pan di buk, magazin, ɛn ɔda tin dɛn we de insay Wɛlsh na jw.org. Dat mek di pipul dɛn we go na di wɛbsayt fɔ rid di buk ɛn magazin dɛn we de insay Wɛlsh bin bɔku mɔ ɛn mɔ insay da mɔnt de.

Afta we Jizɔs bin ɛksplen di skripchɔ dɛn fayn fayn wan to tu pan in disaypul dɛn, dɛn bin gladi ɛn tɔk se: “Nɔto dat mek sɔntin tɔch wi at wɛn i bin de tɔk ɛn wɛn i bin de ɛksplen wetin dɛn rayt na Gɔd in Buk, wɛn wi de kam?” (Lyuk 24:​32) We pipul dɛn yɛri aw dɛn de ɛksplen fayn fayn wan di tru tin bɔt Gɔd in wɔd insay dɛn yon langwej, dat kin mek dɛn layf chenj.

Wan man we nem Ima, we kɔmɔt na Wels bin mared to wan Jiova Witnɛs bɔt i nɔ wande jɔyn in wɛf fɔ wɔship Jiova. I bin kam gɛt wan Jiova Witnɛs padi we nem Rɔsɛl. We Ima bin de tɔk bɔt wetin chenj di we aw i bin de biev, i bin tɔk se: “A bin gri fɔ stɔdi di Baybul gud gud wan we Rɔsɛl bin kam to mi wit di buk we nem, Wetin Rili di Baybul De Tich? * I gi mi wan kɔpi ɛn i tɔk se ‘dɛn rayt dis buk insay Wɛlsh. Frɔm naw, mi ɛn yu go de stɔdi dis buk togɛda.’ ” Wetin Ima bin lɛk bɔt di dayrɛkt we we Rɔsɛl tɔk to am? I bin tɔk se: “Na bikɔs wi de tɔk di sem langwej, wi gɛt di sem kɔlchɔ, ɛn wi ebul fɔ ɔndastand wisɛf.” Wetin Ima bin de lan bɔt di Baybul insay in yon langwej we na Wɛlsh, bin “tɔch” in at bikɔs i ebul fɔ ɔndastand wetin dɛn bin de ɛksplen to am klia wan.

Jiova Witnɛs dɛn go kɔntinyu fɔ ɛp pipul dɛn fɔ lan bɔt Gɔd insay dɛn yon langwej, dat na di langwej we de tɔch dɛn at.