Kwɛstyɔn dɛn we pipul dɛn kin Aks Ɔltɛm
Ɔda buk dɛn de apat frɔm di Baybul we sɔpɔt se Pɔntiɔs Paylet bin rili de?
Dɛn bin rayt Paylet in nem pan dis ston, insay Latin
Pipul dɛn we de rid di Baybul sabi Pɔntiɔs Paylet bikɔs in na wan pan di pipul dɛn we bin jɔj Jizɔs ɛn mek dɛn kil am. (Mat. 27:1, 2, 24-26) Apat frɔm dat, in nem de bak bɔku tɛm insay ɔda istri buk dɛn. The Anchor Bible Dictionary se di istri buk usay dɛn rayt bɔt Pɔntiɔs Paylet “big ɛn gɛt bɔku tin bɔt am pas ɛni ɔda Roman gɔvnɔ we dɔn rul na Judia.”
Paylet in nem apia bɔku tɛm insay Josifɔs in istri buk we i rayt. Josifɔs bin rayt bɔt tri patikyula tin dɛn we bin mek i nɔ izi fɔ Paylet di tɛm we i bin de rul na Judia. Wan man we nem Filo bin rayt bɔt di nɔmba 4 tin we bin apin to Paylet. Wan ɔda man we nem Tasitɔs, we bin de rayt bɔt di Roman ɛmparɔ dɛn, bin gri se Pɔntiɔs Paylet bin tɔk se mek dɛn kil Jizɔs di tɛm we Taybiriɔs bin de rul.
Insay 1961, pipul dɛn we de stɔdi bɔt mɔtalman dɛn we bin dɔn liv trade, bin de wok na wan big ples na Sizeria, nia Izrɛl, usay di Roman dɛn bin de ple gem. Dɛn fɛn wan ston we pipul dɛn bin de yuz, we gɛt Paylet in nem pan am, insay Latin. Di tin we dɛn bin rayt, (as yu si am na di pikchɔ) nɔ tu klia, bɔt dɛn tink se di tin we rayt de, na: “To di gɔd dɛn we gɛt ɔnɔ, Pɔntiɔs Paylet, we na prifɛkt na Judia na in gi am (dis) Taybirɔm.” Dis tin we Pɔntiɔs Paylet bin gi na bildin ɛn dis bildin go mɔs dɔn bi wan tɛmpul we dɛn bin mek fɔ ɔnɔ di Roman Ɛmparɔ Taybiriɔs.
Pɔblisha we na uman nid fɔ tay in ed if i de kɔndɔkt Baybul stɔdi usay ɔda pɔblisha de we na man?
Insay di “Kwɛstyɔn dɛn we Pipul dɛn Kin Aks” atikul we de na di Julay 15, 2002, Wachtawa, dɛn bin tɔk se sista fɔ tay in ed if i de kɔndɔkt Baybul stɔdi usay pɔblisha we na man, de ilɛksɛf di man baptayz ɔ i nɔ baptayz. Dɛn bin tink bɔt dis ɛn si am se i go fayn fɔ ajɔst wetin wi bin no bɔt dis.
If di brɔda we go wit di sista fɔ go kɔndɔkt Baybul stɔdi, baptayz, di sista fɔ tay in ed. If di sista du dis, i de sho rɛspɛkt fɔ di we aw Jiova arenj udat fɔ de oba di kɔngrigeshɔn, bikɔs di sista de du di wok we di brɔda fɔ du. (1 Kɔr. 11:5, 6, 10) If di sista want, i kin mek di brɔda kɔndɔkt di stɔdi, if di brɔda fit ɛn ebul fɔ du am.
If di sista go wit brɔda we nɔ baptayz yet ɛn we nɔto in man, di Baybul nɔ se pawpa i fɔ tay in ed. Bɔt sɔm sista dɛn kɔnshɛns kin mɔna dɛn fɔ tay dɛn ed, ilɛksɛf di brɔda nɔ baptayz yet.
