If yu mitɔp sɔmbɔdi we yu nɔ wande sabi ɔ we yu nɔ yus to, yu nɔ go tɛl am se, “Jɔs tɛl mi ɛnitin we yu want lɛ a du, a go gladi fɔ du am.” Bɔt yu go tɔk dat to yu padi we yu lɛk. Tu pipul dɛn we na tayt padi kin du wetin dɛn kɔmpin want.

Di Baybul sho wi se Jiova kin du wetin i no se kin mek in savant dɛn gladi ɔltɛm. Fɔ ɛgzampul, Kiŋ Devid, we na bin Gɔd in tayt padi, bin tɔk se: “O Jiova mi Gɔd, yu dɔn du bɔku tin dɛn; yu wɔndaful wok dɛn ɛn di tin dɛn we yu de tink bɔt wi. . . . Dɛn tu bɔku!” (Sam 40:5) Apat frɔm dat, Jiova kin du gud to di wan dɛn we nɔ sabi am yet. I de gi dɛn tin fɔ it ɛn mek dɛn at gladi.—Akt 14:17.

Jiova lɛk fɔ du wetin de mek ɔda pipul dɛn gladi, so yu nɔ tink se di wan dɛn we want fɔ bi in padi fɔ du tin dɛn we go mek in “at gladi?” (Prɔvabs 27:11) Bɔt wetin rili yu go du fɔ mek Gɔd gladi? Di Baybul se: “Una nɔ fɔgɛt fɔ du gud ɛn sheb wetin una gɛt wit ɔda pipul dɛn, bikɔs Gɔd kin gladi fɔ dɛn kayn sakrifays ya.” (Di Ibru Pipul Dɛn 13:16) Fɔ se na fɔ du gud ɛn sheb wetin yu gɛt wit ɔda pipul dɛn, na in nɔmɔ go mek Jiova gladi?

Di Baybul se: “If pɔsin nɔ gɛt fet i nɔ go ebul fɔ du wetin Gɔd want fayn fayn wan.” (Di Ibru Pipul Dɛn 11:6) I fayn fɔ lɛ wi mɛmba se na afta “Ebraam . . . gɛt fet pan Jiova” na in dɛn bigin “kɔl am Jiova in padi.” (Jems 2:23) Jizɔs Krays insɛf bin tɔk se if wi want fɔ lɛ Gɔd blɛs wi, wi fɔ “sho se [wi] gɛt fet pan Gɔd.” (Jɔn 14:1) Bɔt aw yu go gɛt di kayn fet we Gɔd want lɛ in padi dɛn gɛt? Fɔs, i go fayn lɛ yu de stɔdi di Baybul ɔltɛm. We yu de du dat, yu go no “di tru tin dɛn we i want” ɛn yu go lan aw fɔ “du ɔl wetin fayn na in yay.” As yu de kɔntinyu fɔ lan bɔt Jiova ɛn du wetin yu de lan, yu go gɛt mɔ fet ɛn Jiova go kam nia yu mɔ ɛn mɔ.—Lɛta Fɔ Kɔlɔse 1:9, 10.