BƆKU pipul dɛn na Ist Afrika no dis parebul, ɛn bɔku pipul dɛn na di wɔl gri wit wetin dis parebul se. Na so yu kin fil we yu trɔs mɔni frɔm yu padi ɔ ɔdasay? Pan ɔl we sɔntɛnde i kin fayn fɔ du dat, yu tink se na gud tin dat? Wetin na di prɔblɛm dɛn we wi go gɛt if wi trɔs mɔni? Us trap wi go fɔdɔm insay if wi trɔs?

Wan ɔda Swaili parebul tɔk bɔt di men prɔblɛm we wi go gɛt if wi trɔs mɔni. I se: “Fɔ trɔs mɔni ɔ fɔ lɛnt pɔsin mɔni kin pwɛl padi biznɛs.” Fɔ tru, trɔs kin ambɔg padi ɛn famili biznɛs. Pan ɔl we yu kin rili plan fɔ pe, nɔto ɔltɛm tin kin kɔmɔt fayn lɛk aw yu want am. Fɔ ɛgzampul, if di tɛm rich ɛn yu nɔ ebul fɔ pe, di pɔsin we bin lɛnt yu di mɔni go vɛks bad. Una kin bigin kip grɔj ɛn di padi biznɛs we bin de bitwin una nɔ go tayt igen, ɛn ivin di padi biznɛs we bin de bitwin una famili dɛn nɔ go tayt igen. Wi dɔn si se fɔ trɔs mɔni kin briŋ prɔblɛm, so fɔ trɔs mɔni na di las tin we wi fɔ du we wi gɛt prɔblɛm, wi nɔ fɔ si am as izi we fɔ sɔlv wi mɔni prɔblɛm.

Fɔ trɔs mɔni kin pwɛl wi padi biznɛs bak wit Gɔd. Aw dat kin apin? Wɛl, di Baybul se na wikɛd pɔsin na in de trɔs mɔni, dɔn i nɔ gri fɔ pe bay wilful. (Sam 37:21) Di Baybul tɔk am klia wan bak se “di pɔsin we trɔs, na slev to di wan we trɔs am.” (Prɔvabs 22:7) Di pɔsin we trɔs di mɔni fɔ no se pas te i pe di mɔni bifo i fri. Wan ɔda tɔk de we dɛn kin tɔk na Afrika. Dɛn kin se: “If yu lɛnt pɔsin in fut, yu go go ɛnisay we i tɛl yu fɔ go.” Dis parebul de tray fɔ tɔk se di pɔsin we trɔs bɔku mɔni nɔ gɛt wan fridɔm fɔ du wetin i want.

So yu fɔ mek shɔ se yu pe bak wetin yu trɔs. If yu nɔ du dat, yu go gɛt prɔblɛm. Bɔku dɛt go mek yu gɛt bɔku prɔblɛm. I go mek yu nɔ ebul slip na nɛt, yu go de wok tumɔs, i go mek plaba de bitwin maredman ɛn in wɛf, i go mek famili dɛn skata, ɛn i go ivin mek yu gɛt polis kes we go mek dɛn put yu na sɛl. Lɛta Fɔ Rom 13:8 tɔk  sɔntin we mek sɛns. I se: “Una nɔ fɔ o ɛnibɔdi ɛnitin, pas di lɛk we una fɔ lɛk una kɔmpin.”

Frɔm ɔl wetin wi dɔn tɔk bɔt, i go fayn mek yu tink fɔs bifo yu trɔs mɔni. Fɔ sho se yu gɛt sɛns, i go fayn mek yu aks yusɛf dɛn kwɛstyɔn ya: A rili nid fɔ trɔs? Na fɔ mek a kia fɔ mi famili? Na fɔ lɛ a gɛt sɔntin we a nɔ nid ɔ na fɔ lɛ a bay sɔntin we a nɔ ebul fɔ gɛt? I go bɛtɛ mek yu satisfay wit di smɔl tin we yu gɛt bifo yu go trɔs.

Bɔt sɔntɛnde, sɔntin kin apin we kin mek yu trɔs, lɛk we prɔblɛm jɔs mit yu so nɔmɔ ɛn yu nɔ gɛt no we fɔ sɔlv am pas yu trɔs. Bɔt pan ɔl dat, if yu disayd fɔ trɔs, yu fɔ mek shɔ se yu du am di rayt we. Aw yu go ebul fɔ du dis?

Fɔs, wi nɔ fɔ tek advantej pan pɔsin jɔs bikɔs i gɛt mɔni. Wi nɔ fɔ tek am se bikɔs di pɔsin gɛt mɔni, i fɔ ɛp wi pawpa. Ɛn wi nɔ fɔ fil se bikɔs di pɔsin gɛt mɔni, wi nɔ fɔ pe am. Wi nɔ fɔ jɛlɔs di wan dɛn we gɛt bɔku mɔni.—Prɔvabs 28:22.

Dɔn mek shɔ se yu pe di mɔni we yu trɔs, ɛn yu nɔ fɔ westɛm fɔ du dat. If di pɔsin we trɔs yu di mɔni nɔ gi yu tɛm fɔ pe di mɔni, yu fɔ sho tɛm we yu go pe di mɔni ɛn yu fɔ pe di mɔni we di tɛm rich. I go fayn bak mek una rayt di agrimɛnt we una dɔn mek so dat prɔblɛm nɔ go kam tumara. (Jɛrimaya 32:9, 10) If i pɔsibul, i go fayn mek yusɛf sɛf go gi di mɔni bak so dat yu go tɛl di pɔsin tɛnki we yu de gi am di mɔni. We yu tray tranga wan fɔ pe di pɔsin we trɔs yu, dat go mek padi biznɛs de bitwin una. We Jizɔs bin de tich sɔm pipul dɛn ɔp wan mawnten, i bin se: “Jɔs mek yu ‘Yɛs’ bi yɛs, ɛn yu ‘Nɔ’ bi nɔ.” (Matyu 5:37) Pantap dat, i go fayn lɛ yu de mɛmba wetin Matyu 7:12 tɔk, we i se: “Ɔl wetin una want mek ɔda pipul dɛn du to una, na in una fɔ du to dɛn.”

Di Baybul gi wan simpul advays we go ɛp wi nɔ fɔ go trɔs mɔni. I se: “Bɔku bɔku bɛnifit de we wi de wɔship Gɔd wit satisfay maynd.” (Fɔs Lɛta To Timoti 6:6) Dis skripchɔ de tray fɔ tɛl wi se di bɛst we fɔ avɔyd di prɔblɛm dɛn we trɔs kin kam wit, na we wi gɛt satisfay maynd. Bɔt rili, i nɔ izi fɔ gɛt satisfay maynd na dis wɔl we ɔlman want ɔltin fɔ insɛf. Na dis mek i fayn fɔ de “wɔship Gɔd.” Aw dis wɔship we wi de “wɔship Gɔd” go ɛp wi?

Lɛ wi tɔk bɔt wan brɔda ɛn in wɛf na Eshia. We dɛn bin yɔŋ, dɛn bin de kɔle di wan dɛn we bin ebul fɔ gɛt dɛn yon os. So dɛn disayd fɔ bay os. Dɛn tek di mɔni we dɛn bin de kip, trɔs mɔni na bank, ɛn trɔs to dɛn fambul dɛn. I nɔ tu te, dɛn bigin stren fɔ pe di mɔni bay mɔnt. Dɛn fɛn ɔda wok dɛn fɔ ad pan di wan we dɛn bin de du, ɛn dɛn bigin fɔ wok fɔ lɔng tɛm. So dis bin mek dɛn nɔ bin gɛt bɛtɛ tɛm fɔ dɛn pikin dɛn. Di brɔda se: “Di yagba, di sɔfa, ɛn di slip we a nɔ bin de ebul slip, bin tan lɛk ebi lod na mi ed. I bin rili de mɔna mi.”

Leta dɛn mɛmba wetin Fɔs Lɛta To Timoti 6:6 se, ɛn dɛn disayd se dɛn fɔ sɛl di os bikɔs na dat nɔmɔ go sɔlv di prɔblɛm. I tek tu ia bifo dɛn ebul fɔ kɔmɔt pan dis prɔblɛm. Us lɛsin dɛn lan frɔm di tin dɛn we apin to dɛn? Dɛn tɔk se: “We yu si di tin dɛn na dis wɔl di we aw Jiova de si dɛn, dat go protɛkt yu.”

Bɔku pipul dɛn no da fɔs Swaili parebul we wi bin tɔk bɔt. Bɔt dɛn stil de trɔs. Frɔm ɔl wetin di Baybul dɔn tɔk, yu nɔ tink se i go mek sɛns fɔ tink gud wan bifo wi go trɔs mɔni?