Day na sɔntin we kin mek pipul dɛn nɔ fil fayn atɔl. So bɔku pipul dɛn nɔ kin lɛk fɔ tɔk bɔt am. Bɔt wande wande, day go mit wi, ɔ wi fambul, ɔ wi padi. Day na tin we kin mek wi fil pen na wi at ɛn i at fɔ bia.

Natin nɔ de we wi go du fɔ rɛdi wisɛf if wi mama ɔ papa, ɔ wi man ɔ wi wɛf, ɔ wi pikin day. Day kin apin tɛm we wi nɔ de tink se i go apin, ɔ i kin tek lɔng tɛm bifo i apin. Bɔt ilɛk aw i apin, nɔbɔdi nɔ go ebul avɔyd di pen ɛn pwɛl at we i kin kam wit.

Wan man we nem Antonio bin lɔs in papa pan aksidɛnt. I bin tɔk se: “Day tan lɛk we sɔmbɔdi lɔk lɔk yu os ɛn kɛr di ki dɛn go. Yu nɔ ivin ebul go bak na di os fɔ wan minit sɛf. Di wangren tin we yu gɛt, na di tin dɛn we yu de mɛmba bɔt di pɔsin. Naw, na so yu layf dɔn de. Yu nɔ go want fɔ biliv se dis kayn bad tin dɔn apin to yu. Bɔt pan ɔl dat, natin nɔ de we yu go ebul du.”

Di sem tin bin apin to wan uman we nem Dɔrɔti. We i bin ol 47 ia, in man bin day. Dis bin mek i want fɔ fɛn ansa to sɔm kwɛstyɔn dɛn. Dɔrɔti na bin Sɔnde-skul ticha, so i nɔ bin ɛva fil se we pɔsin day ɔltin dɔn dɔn. Bɔt i nɔ bin rili no wetin de apin to pɔsin we dɔn day. So i go aks wan bigman na di Anglikan Chɔch we i bin de go. I bin aks am se: “Wetin de apin to wi we wi day?” Di man bin tɛl am se: “Nɔbɔdi nɔ rili no wetin de apin to wi we wi day. Wi jɔs gɛt fɔ wet ɛn si.”

Fɔ se wi nɔ no wetin de apin to pɔsin we dɔn day, pas nɔmɔ fɔ “wet ɛn si”? Ɛnitin de we go mek wi no if fɔ tru, we pɔsin day ɔltin dɔn dɔn?