Kwɛstyɔn dɛn we Pipul dɛn Kin Aks
Udat na di “uman” we Ayzaya 60:1 tɔk bɔt, ɛn aw i “grap” ɛn “sho [in] layt”?
Ayzaya 60:1 se: “E uman, grap, sho yu layt, bikɔs yu layt dɔn kam. Jiova in glori de shayn pan yu.” Di ɔda vas dɛn na Ayzaya chapta 60 sho se di “uman” na bin Zayɔn, ɔ Jerusɛlɛm we na bin di kapital siti fɔ Juda da tɛm de. (Ayz. 60:14; 62:1, 2) Di siti tinap fɔ di wan ol neshɔn. Di wɔd dɛn we Ayzaya tɔk mek wi tink bɔt dɛn tu kwɛstyɔn dɛn ya: Fɔs, ustɛm ɛn aw Jerusɛlɛm bin “grap” ɛn sho spirichwal layt? Sɛkɔn, fɔ se di wɔd dɛn we Ayzaya tɔk de kam tru insay wi yon tɛm pas aw i bin kam tru insay di Izrɛlayt dɛn tɛm?
Ustɛm ɛn aw Jerusɛlɛm bin “grap” ɛn sho spirichwal layt? Dɛn bin dɔn pwɛl pwɛl Jerusɛlɛm ɛn in tɛmpul ɛn di Ju dɛn bin de na ɛgzayl na Babilɔn fɔ 70 ia. Bɔt afta di Mid dɛn ɛn di Pashian dɛn win Babilɔn pan fɛt, ɔl di Izrɛlayt dɛn we bin de na di say dɛn we di Babilonian dɛn bin de rul bin fri fɔ go bak na dɛn om-tɔŋ ɛn bigin fɔ wɔship Jiova di rayt we bak. (Ɛzra 1:1-4) Insay di ia 537 bifo Krays, di wan dɛn we bin lɛf we bin fetful frɔm ɔl di 12 trayb dɛn bin du dat. (Ayz. 60:4) Dɛn bin bigin fɔ mek sakrifays dɛn to Jiova, fɔ sɛlibret di fɛstival dɛn, ɛn bil di tɛmpul bak. (Ɛzra 3:1-4, 7-11; 6:16-22) Jiova in glori bigin fɔ shayn bak pan Jerusɛlɛm we min Gɔd in pipul dɛn. So dɛn bin bi layt to di neshɔn dɛn we bin de na spirichwal daknɛs.
Bɔt na af pat pan Ayzaya in prɔfɛsi bin kam tru da tɛm de. Bɔku pan di Izrɛlayt dɛn nɔ bin kɔntinyu fɔ obe Gɔd. (Nɛi. 13:27; Mal. 1:6-8; 2:13, 14; Mat. 15:7-9) Leta, dɛn nɔ bin ivin gri fɔ biliv se na Jizɔs Krays na di Mɛsaya. (Mat. 27:1, 2) Insay di ia 70 afta Krays, dɛn bin dɔnawe wit Jerusɛlɛm ɛn in tɛmpul fɔ di sɛkɔn tɛm.
Jiova bin dɔn tɔk se dat go apin. (Dan. 9:24-27) Dis sho klia wan se i nɔ bin want fɔ yuz Jerusɛlɛm we de na dis wɔl fɔ mek ɔl di prɔfɛsi dɛn we de na Ayzaya chapta 60 kam tru.
Fɔ se Ayzaya in prɔfɛsi de kam tru insay wi yon tɛm pas aw i bin kam tru insay di Izrɛlayt dɛn tɛm? Yɛs, bɔt i de apin to wan ɔda uman we tinap fɔ “di Jerusɛlɛm we de ɔp.” Apɔsul Pɔl bin rayt bɔt am se: “Na in na wi mama.” (Gal. 4:26) Jerusɛlɛm we de ɔp na di pat pan Gɔd in ɔganayzeshɔn we de na ɛvin, we gɛt enjɛl dɛn we nɔ de kɔmɔt biɛn am. In pikin dɛn na Jizɔs ɛn di 144,000 anɔyntɛd Kristian dɛn we gɛt di op fɔ go de na ɛvin jɔs lɛk Pɔl. Di anɔyntɛd Kristian dɛn na di “oli neshɔn” dat na “di Izrɛl we na Gɔd in yon.”—1 Pit. 2:9; Gal. 6:16.
Aw Jerusɛlɛm we de ɔp bin “grap” ɛn “sho [in] layt”? I bin yuz in anɔyntɛd pikin dɛn we de na dis wɔl fɔ du dat. Kɔmpia di tin dɛn we bin apin to dɛn wit di prɔfɛsi we de na Ayzaya chapta 60.
Di anɔyntɛd Kristian dɛn bin nid fɔ “grap” bikɔs dɛn bin de na spirichwal daknɛs afta di apɔsul dɛn day we lay lay Kristian dɛn bin bɔku na di kɔngrigeshɔn. (Mat. 13:37-43) Da tɛm de, Babilɔn di Gret we tinap fɔ ɔl dɛn lay lay rilijɔn dɛn bigin kɔntrol dɛn. Di anɔyntɛd dɛn bin kɔntinyu fɔ de ɔnda in kɔntrol te “di tɛm want fɔ dɔn,” ɛn da tɛm de bin bigin insay 1914. (Mat. 13:39, 40) Jɔs afta dat, insay 1919, dɛn bin kɔmɔt ɔnda Babilɔn di Gret ɛn wantɛm wantɛm dɛn bigin fɔ sho spirichwal layt bay we dɛn bin de du di prichin wok. a Frɔm da tɛm de, pipul dɛn na ɔl di neshɔn dɛn dɔn kam ɔnda da layt de, ivin di wan dɛn we dɔn lɛf we de pat pan di Izrɛl we na Gɔd in yon, dat na di “kiŋ dɛn” we Ayzaya 60:3 tɔk bɔt.—Rɛv. 5:9, 10.
Tumara bambay, anɔyntɛd Kristian dɛn go sho di layt we de kɔmɔt frɔm Jiova pas aw dɛn de sho am naw. Aw? We dɛn dɔn dɛn wok na di wɔl, dɛn go de pat pan di “Nyu Jerusɛlɛm” ɔ Krays in yawo we na di 144,000 we go rul wit am as kiŋ ɛn prist dɛn.—Rɛv. 14:1; 21:1, 2, 24; 22:3-5.
Di Nyu Jerusɛlɛm go du impɔtant tin fɔ mek di prɔfɛsi we de na Ayzaya 60:1 kam tru. (Luk bak Ayzaya 60:1, 3, 5, 11, 19, 20 ɛn Rɛvɛleshɔn 21:2, 9-11, 22-26.) Jɔs lɛk aw Jerusɛlɛm na bin di ples we di kiŋ dɛn we bin de rul na Izrɛl trade trade bin de, na so Nyu Jerusɛlɛm ɛn Krays go rul di nyu wɔl. Aw Nyu Jerusɛlɛm “de kɔmɔt to Gɔd na ɛvin kam dɔŋ”? Na we i go du tin dɛn we go afɛkt di pipul dɛn we de na di wɔl. Pipul dɛn we de fred Gɔd na ɔl di neshɔn dɛn “go yuz in layt fɔ waka.” Dɛn nɔ go ivin sin ɛn day igen. (Rɛv. 21:3, 4, 24) Di tin we go apin na dat, “ɔltin [go] kam bak lɛk aw dɛn bin de,” jɔs lɛk aw Ayzaya ɛn ɔda prɔfɛt dɛn bin prɔfɛsay. (Akt 3:21) Da big big wok fɔ mek ɔltin kam bak lɛk aw dɛn bin de bin bigin di tɛm we Krays bi Kiŋ ɛn i go ɛnd di tɛm we di Wan Tawzin Ia we Krays go rul go dɔn.
a Izikɛl 37:1-14 ɛn Rɛvɛleshɔn 11:7-12 tɔk bak bɔt di tɛm we Gɔd in pipul dɛn go bigin fɔ wɔship am bak di rayt we ɛn dis bin apin insay 1919. Izikɛl bin tɔk bɔt di tɛm we ɔl anɔyntɛd Kristian dɛn go wɔship Jiova di rayt we bak afta dɛn bin dɔn de ɔnda Babilɔn di Gret fɔ lɔng tɛm. Di prɔfɛsi na Rɛvɛleshɔn de tɔk bɔt di tɛm we i bin tan lɛk se dɛn bɔn bak wan smɔl grup we na di anɔyntɛd brɔda dɛn we bin de bifo. Dat bin apin di tɛm we dɛn lɛf fɔ sav Jiova di we aw dɛn fɔ sav am fɔ shɔt tɛm bikɔs dɛn lay pan dɛn ɛn put dɛn na prizin. Insay 1919, dɛn bin pik dɛn fɔ bi di “slev we fetful ɛn gɛt sɛns.”—Mat. 24:45; Luk di buk we gɛt di taytul Pure Worship of Jehovah—Restored At Last!, pej 118.
