I dɔn te we pipul dɛn no se Jiova Witnɛs dɛn de lan bɔt Gɔd. Spɛshal skul dɛn de fɔ di wan dɛn we de spɛn ɔl dɛn tɛm na di prichin wok. Dɛn skul dɛn de go ɛp payɔnia dɛn fɔ ebul “du ɔl wetin pɔsin we de wok fɔ Gɔd fɔ du.”—Sɛkɛn Lɛta To Timoti 4:5.

Payɔnia Savis Skul. We pɔsin we na rɛgyula payɔnia dɔn spɛn wan ol ia na di prichin wok, i kin go na wan skul we kin de fɔ siks dez. Na Kiŋdɔm Ɔl dɛn kin ol dis skul. I de fɔ ɛp payɔnia dɛn fɔ kam nia Jiova mɔ ɛn mɔ, fɔ no gud gud wan aw fɔ yuz difrɛn difrɛn we dɛn fɔ prich, ɛn fɔ kɔntinyu fɔ bi fetful to Jiova.

Skul fɔ Pipul dɛn We De Prich bɔt Gɔd in Kiŋdɔm. Dis skul kin de fɔ tu mɔnt. I de fɔ tren pipul dɛn we dɔn bi payɔnia fɔ lɔng tɛm ɛn we rɛdi fɔ go de na say we dɛn nid pipul dɛn fɔ prich. I go tan lɛk se dɛn de falamakata Jizɔs Krays fɔ se: “Luk mi! Sɛn mi.” (Ayzaya 6:8; Jɔn 7:29) Pɔsin we want fɔ go de ɔdasay, go nid fɔ yus to di we aw di pipul dɛn we de de, de liv. Di kɔlchɔ we dɛn gɛt, di wɛda we de de, ɛn di it we di pipul dɛn de it, kin difrɛn frɔm wetin di pɔsin bin dɔn yus to usay i kɔmɔt. Sɔntɛm, i go ivin nid fɔ lan nyu langwej. Dis skul go ɛp brɔda ɛn sista dɛn we nɔ mared ɛn di wan dɛn we mared we ol frɔm 23 to 65 ia, fɔ mek dɛn go ebul gɛt fayn fayn kwaliti dɛn we dɛn go nid na di prichin wok. I go ɛp dɛn bak fɔ lan difrɛn difrɛn tin dɛn we go mek dɛn ebul fɔ du ɛnitin we Jiova ɛn in ɔganayzeshɔn go want dɛn fɔ du.

Giliad Skul. Frɔm 1943 we dɛn mek dis skul, i dɔn pas lɛk 8,000 pipul dɛn we dis skul dɔn sɛn as mishɔnari dɛn fɔ go prich to “ɔlman na di wɔl.” We mishɔnari dɛn bin go fɔs na Peru, no kɔngrigeshɔn nɔ bin de de. Bɔt naw, dɛn gɛt pas 1,000 kɔngrigeshɔn dɛn de. Na Jepan bak, we mishɔnari dɛn bin fɔs go de, i nɔ bin rich tɛn Jiova Witnɛs dɛn we bin de de. Bɔt naw, dɛn gɛt pas 200,000 Jiova Witnɛs dɛn de. Di skul kin de fɔ fayv mɔnt. Insay ɔl da tɛm de, dɛn kin stɔdi Gɔd in Wɔd gud gud wan. Di wan dɛn we dɛn kin pik fɔ go dis skul na spɛshal payɔnia dɛn, mishɔnari dɛn, bɛtɛlayt dɛn, ɔ di wan dɛn we de du sakit wok. Di skul de tren dɛn gud gud wan fɔ mek dɛn go ebul fɔ sɔpɔt di prichin wok.

• Wetin di Payɔnia Savis Skul de fɔ?

• Wetin di Skul fɔ Pipul dɛn We De Prich bɔt Gɔd in Kiŋdɔm de fɔ?