BƆKU pipul dɛn na difrɛn pat na di wɔl de sɛlibret difrɛn difrɛn ɔlide dɛn. Bɔt nɔto di Baybul dɛn ɔlide ya kɔmɔt. So na usay dɛn ɔlide ya kɔmɔt? If yu rid mɔ bɔt dɛn ɔlide ya, yu go sɔprayz fɔ si wetin difrɛn difrɛn buk dɛn tɔk bɔt dɛn. Lɛ wi tɔk bɔt sɔm pan di ɔlide dɛn.

Ista. Wan buk we dɛn kɔl The Encyclopædia Britannica tɔk se: “Nɔsay nɔ de [frɔm Matyu to Rɛvɛleshɔn] we de tɔk bɔt Ista.” So aw Ista bigin? Na frɔm pegan dɛn i kɔmɔt. Pan ɔl we pipul dɛn se dɛn mek di ɔlide fɔ mɛmba di tɛm we Gɔd gi Jizɔs layf bak, di tin dɛn we dɛn kin du insay dis ɔlide nɔto tin dɛn we de na di Baybul.

Nyu Ia De. Pipul dɛn gɛt difrɛn tɛm ɛn we aw dɛn kin sɛlibret Nyu Ia. The World Book Encyclopedia tɔk bɔt usay Nyu Ia De kɔmɔt. I se: “Insay di ia 46, di kiŋ we de na Rom we nem Juliɔs Siza, mek Janwari 1 fɔ bi Nyu Ia De. Di Roman pipul dɛn gi dis de to dɛn gɔd we nem Janus. Dɛn se na di gɔd we de fɔ get dɛn, domɔt dɛn ɛn we de bigin ɔltin. Na dis gɔd in nem dɛn gi di mɔnt we dɛn kɔl Janwari. Na gɔd we gɛt tu fes. Di wan de luk bifo ɛn di ɔda wan de luk biɛn.” So na frɔm pegan dɛn Nyu Ia De kɔmɔt.

Ɔda Ɔlide dɛn. Wi nɔ go ebul fɔ tɔk bɔt ɔl di ɔlide dɛn we pipul dɛn de sɛlibret ɔlsay na di wɔl. Bɔt Gɔd nɔ de gladi fɔ ɔlide dɛn we de mek mɔtalman ɔ mɔtalman ɔganayzeshɔn dɛn ay pas am. (Jɛrimaya 17:​5-7; Di Apɔsul Dɛn Wok [Akt] 10:​25, 26) Bɔku ɔlide dɛn de insay difrɛn difrɛn rilijɔn dɛn. Bɔt di say we di ɔlide kɔmɔt, go mek Gɔd gladi ɔ go mek i nɔ gladi. (Sɛkɛn Lɛta Fɔ Kɔrint 6:​17; Rɛvɛleshɔn 18:​4) Ɔda ɔlide dɛn de we nɔ kɔmɔt insay rilijɔn. If yu want fɔ no if Gɔd lɛk dɛn ɔlide ya ɔ if i nɔ lɛk dɛn, na fɔ rid Chapta 16 insay dis buk.