YU NO udat na dɛn man ya? Wetin dɛn de du? Dɛn de go fɛt, ɛn di man dɛn we de bifo de go ɛn siŋ. Yu no wetin mek di man dɛn we de siŋ nɔ ol sɔd ɛn spia fɔ fɛt? Lɛ wi si.

Na Jɛoshafat na di kiŋ fɔ di kiŋdɔm we gɛt tu trayb. I bin de di sem tɛm we Kiŋ Eab ɛn Jezibɛl bin de na di kiŋdɔm we gɛt tɛn trayb. Bɔt Jɛoshafat na gud kiŋ, ɛn in papa sɛf we nem Esa na bin gud kiŋ. So fɔ lɔng tɛm di pipul dɛn na di kiŋdɔm we gɛt tu trayb bin de ɛnjɔy.

Bɔt naw sɔntin apin we mek di pipul dɛn fred. Sɔm pipul dɛn kam tɛl Jɛoshafat se: ‘Bɔku bɔku sojaman dɛn dɔn kɔmɔt na Moab, Amɔn ɛn Mawnt Sia fɔ kam fɛt una.’ So bɔku Izrɛlayt dɛn kam na Jerusɛlɛm fɔ kam beg Jiova fɔ lɛ i ɛp dɛn. We dɛn kam na di tɛmpul, Jɛoshafat pre se: ‘E Jiova, ɛp wi, wi nɔ no wetin fɔ du. Wi nɔ ebul fɛt dɛn bɔku bɔku sojaman ya. Na yu nɔmɔ wi abop pan.’

Jiova lisin to dɛn prea, ɛn i mek wan pan in savant dɛn tɛl di pipul dɛn se: ‘Na Gɔd go fɛt dis fɛt. Una nɔ gɛt fɔ fɛt. Una jɔs wach ɛn si aw Jiova go sev una.’

So di ɔda mɔnin, Jɛoshafat tɛl di pipul dɛn se: ‘Una lɛ wi abop pan Jiova!’ Dɔn i mek di man dɛn we de siŋ de bifo in sojaman dɛn. We di sojaman dɛn de mach, dɛn man ya bin de go ɛn siŋ fɔ prez Jiova. Yu no wetin apin we dɛn rich nia di ples usay dɛn fɔ fɛt? Jiova mek di ɔda sojaman dɛn bigin fɛt dɛnsɛf. Ɛn we di Izrɛlayt dɛn rich de, dɛn mit ɔl di ɔda sojaman dɛn dɔn day!

Na sɛns tin Jɛoshafat bin du we i abop pan Jiova, nɔto so? Wisɛf go sho se wi gɛt sɛns we wi abop pan Jiova.