LƐSIN 49

Aw Yu Famili Go Gɛt Gladi-At?—Pat 1

PLE

Pipul dɛn we jɔs mared kin op se di gladi-at we dɛn de gɛt di de we dɛn de mared go kɔntinyu fɔ de sote go, ɛn i pɔsibul fɔ lɛ dat bi. Kristian dɛn we dɔn mared fɔ lɔng tɛm ɛn we dɔn wok tranga wan fɔ fala di advays dɛn na di Baybul no se dis pɔsibul.

1. Us advays di Baybul gi to maredman dɛn?

Jiova dɔn pik maredman dɛn fɔ de oba dɛn famili. (Rid Ɛfishians 5:23.) Jiova ɛkspɛkt dɛn fɔ disayd fɔ du tin dɛn we go bɛnifit dɛn famili. Di Baybul advays maredman dɛn se: “Una kɔntinyu fɔ lɛk una wɛf dɛn.” (Ɛfishians 5:25) Wetin dis min? Maredman we lɛk in wɛf go trit in wɛf fayn, ilɛksɛf dɛn de na os ɔ dɛn de na pɔblik. I de tray fɔ kip am sef, mek i gladi, ɛn gi am wetin i nid. (1 Timoti 5:8) Wetin impɔtant pas ɔl, na in kin de bifo fɔ mek in wɛf gɛt tayt padi biznɛs wit Jiova. (Matyu 4:4) Fɔ ɛgzampul, i kin pre wit in wɛf ɛn rid di Baybul wit am. We maredman sho se i rili bisin bɔt in wɛf, i de mek in padi biznɛs wit Jiova tayt mɔ ɛn mɔ.—Rid 1 Pita 3:7.

2. Us advays di Baybul gi to mareduman dɛn?

Gɔd in Wɔd se wɛf “fɔ gɛt dip rɛspɛkt fɔ in man.” (Ɛfishians 5:33) Aw i go ebul du dat? I fɔ tink bɔt in man in gud kwaliti dɛn ɛn di tray we i de tray tranga wan fɔ kia fɔ in ɛn dɛn pikin dɛn. I kin sho rɛspɛkt bak bay we i sɔpɔt di tin dɛn we in man de disayd fɔ du ɛn bay we i tɔk fayn to am ɛn bɔt am, ilɛksɛf i nɔ de sav Jiova.

3. Aw maredman ɛn in wɛf go kɔntinyu fɔ mek dɛn mared-os go bifo?

Di Baybul tɔk bɔt maredman ɛn in wɛf se: “Dɛn tu go bi wan bɔdi.” (Matyu 19:5) Dis min se dɛn fɔ fɛt agens ɛnitin we go mek dɛn nɔ lɛk dɛnsɛf lɛk aw dɛn bin lɛk dɛnsɛf trade. Dɛn de du dis bay we dɛn de spɛn tɛm togɛda ɔltɛm, bay we dɛn de tɔk di tru to dɛnsɛf bɔt aw dɛn de fil ɛn sho se dɛn lɛk dɛnsɛf. Apat frɔm Jiova, dɛn nɔ de alaw ɛnitin ɔ ɛnibɔdi fɔ impɔtant to dɛn pas dɛn man ɔ dɛn wɛf. Dɛn de tek tɛm mɔ fɔ mek dɛn nɔ gɛt tayt padi biznɛs wit ɛni ɔda pɔsin we nɔto dɛn man ɔ dɛn wɛf.

LAN MƆ

Lan us Baybul prinsipul dɛn go mek yu mared-os kɔntinyu fɔ go bifo mɔ ɛn mɔ.

4. Maredman—lɛk yu wɛf ɛn tek kia ɔf am

Di Baybul se “maredman dɛn fɔ lɛk dɛn wɛf lɛk aw dɛn lɛk dɛn yon bɔdi.” (Ɛfishians 5:28, 29) Wetin dis min? Ple di VIDIO, dɔn una tɔk bɔt di kwɛstyɔn we de dɔŋ.

VIDIO: Maredman dɛn, Una Lɛk Una Wɛf Lɛk Unasɛf (9:53)

Wetin na sɔm we dɛn we maredman go sho se i lɛk in wɛf ɛn i kia fɔ am?

Rid Koloshians 3:12, dɔn una tɔk bɔt dis kwɛstyɔn:

Aw maredman go sho dɛn kwaliti dɛn ya na in mared-os?

5. Wɛf—lɛk yu man ɛn rɛspɛkt am

Di Baybul ɛnkɔrej wɛf fɔ rɛspɛkt in man ilɛk i de sav Jiova ɔ i nɔ de sav Am. Rid 1 Pita 3:1, 2, dɔn una tɔk bɔt dɛn kwɛstyɔn dɛn ya:

If yu gɛt man we nɔ de sav Jiova, no dawt nɔ de fɔ se yu go want am fɔ sav Jiova. Wetin yu tink se go ɛp am mɔ, na we yu de prich to am ɔltɛm ɔ na we yu de biev fayn ɛn sho se yu rɛspɛkt am? Wetin mek?

Maredman ɛn in wɛf kin disayd fɔ du di rayt tin togɛda. Bɔt sɔntɛnde, di wɛf nɔ go gri wit in man. I kin tek tɛm tɔk wit rɛspɛkt bɔt aw i de fil, bɔt i fɔ mɛmba se Jiova dɔn gi di man di wok fɔ disayd wetin gud fɔ di famili. I fɔ du in bɛst fɔ sɔpɔt wetin in man dɔn disayd. We i du dat, i de ɛp fɔ mek di wan ol famili gɛt gladi-at. Rid 1 Pita 3:3-5, dɔn una tɔk bɔt dis kwɛstyɔn:

Aw Jiova de fil we wɛf sho se i rɛspɛkt in man?

6. Una go ebul fɔ sɔlv prɔblɛm dɛn na una mared-os

No mared nɔ pafɛkt. So maredman ɛn in wɛf fɔ wok tranga wan fɔ sɔlv ɛni prɔblɛm we go kam. Ple di VIDIO, dɔn una tɔk bɔt di kwɛstyɔn dɛn we de dɔŋ.

VIDIO: Wetin Wi Go Du fɔ Lɛk Wisɛf Mɔ ɛn Mɔ? (5:44)

Insay di vidio, wetin na bin sɔm sayn dɛn we sho se di man ɛn in wɛf nɔ bin lɛk dɛnsɛf igen lɛk aw dɛn bin lɛk dɛnsɛf trade?
Wetin-ɛn-wetin dɛn du fɔ mek dɛn lɛk dɛnsɛf mɔ ɛn mɔ?

Rid 1 Kɔrintians 10:24 ɛn Koloshians 3:13. Afta una rid ɛniwan pan dɛn skripchɔ dɛn ya, una tɔk bɔt dis kwɛstyɔn: