Sam 118:1-29
118 Tɛl Jiova tɛnki, bikɔs i gud;In lɔv we nɔ de chenj go de sote go.
2 Lɛ Izrɛl tɔk se:
“In lɔv we nɔ de chenj go de sote go.”
3 Lɛ di wan dɛn we de na Erɔn in famili tɔk se:
“In lɔv we nɔ de chenj go de sote go.”
4 Lɛ di wan dɛn we de fred Jiova tɔk se:
“In lɔv we nɔ de chenj go de sote go.”
5 A kɔl Ja* di tɛm we a bin gɛt trɔbul;Ja ansa mi ɛn kɛr mi go na ples we sef.
6 Jiova de wit mi, a nɔ go fred.
Wetin mɔtalman ebul du mi?
7 Jiova de wit mi fɔ ɛp mi;*A go gladi fɔ si we di wan dɛn we et mi de fel.
8 I bɛtɛ fɔ go to Jiova fɔ aydPas fɔ abop pan mɔtalman.
9 I bɛtɛ fɔ go to Jiova fɔ aydPas fɔ abop pan prins dɛn.
10 Ɔl di neshɔn dɛn sɔrawnd mi,Bɔt a go yuz Jiova in nem,Fɔ drɛb dɛn.
11 Dɛn bin sɔrawnd mi, fɔ tru, dɛn bin sɔrawnd mi ɔlsay,Bɔt a yuz Jiova in nem,Fɔ drɛb dɛn.
12 Dɛn sɔrawnd mi lɛk ɔni dɛn,Bɔt dɛn day kwik kwik wan lɛk we faya de kech pan chukchuk.
A yuz Jiova in nem,Fɔ drɛb dɛn.
13 Dɛn push mi at at wan* fɔ lɛ a fɔdɔm,Bɔt Jiova ɛp mi.
14 Ja na mi sef ples, na in de gi mi trɛnk,Ɛn na in de sev mi.
15 Pipul dɛn yɛri gladi gladiNa di wan dɛn we de du wetin rayt dɛn tɛnt dɛn, Gɔd sev dɛn.
Jiova in raytan de sho in pawa.
16 Jiova in raytan de ɔp fɔ win;Jiova in raytan de sho in pawa.
17 A nɔ go day, nɔ, a go liv,So dat a go tɔk bɔt Ja in wok dɛn.
18 Ja kɔrɛkt mi siriɔs wan,Bɔt i nɔ alaw mi fɔ day.
19 Opin di get dɛn fɔ du wetin rayt fɔ mi;A go ɛnta de ɛn prez Ja.
20 Dis na Jiova in get.
Di wan we de du wetin rayt go ɛnta de.
21 A go prez yu bikɔs yu ansa mi,Ɛn yu sev mi.
22 Di ston we di wan dɛn we de bil nɔ gri fɔ yuzNa in dɔn bi di men ston na di kɔna.
23 Na Jiova dɔn du dis,Ɛn i wɔndaful na wi yay.
24 Na dis de Jiova dɔn pik;Wi go gladi pasmak.
25 Jiova sev wi, duya, wi de beg!
Jiova, duya mek lɛ wi win!
26 Blɛsin de pan di wan we de kam tinap fɔ Jiova in nem;Wi blɛs yu frɔm Jiova in os.
27 Jiova na Gɔd;Na in de gi layt.
Jɔyn di wan dɛn we de go na di fɛstival we ol branch dɛn na dɛn an,Te go na di ɔn dɛn we de na di ɔlta.
28 Yu na mi Gɔd, ɛn a go prez yu;Mi Gɔd, a go ɔnɔ yu.
29 Tɛl Jiova tɛnki, bikɔs i gud;In lɔv we nɔ de chenj go de sote go.
Futnot Dɛn
^ “Ja” na di shɔt we fɔ kɔl Jiova in nem.
^ Ɔ i kin bi, “wit di wan dɛn we de ɛp mi.”
^ Ɔ i kin bi, “yu push mi at at wan.”
