Malakay 1:1-14
1 Wan impɔtant mɛsej:
Dis na di mɛsej we Jiova gi Malakay* fɔ gi di Izrɛlayt dɛn:
2 Jiova tɔk se: “A dɔn sho se a lɛk una.”
Bɔt una aks se: “Aw yu dɔn sho se yu lɛk wi?”
Jiova aks se: “Isɔ na Jekɔp in brɔda, nɔto so? Bɔt a bin lɛk Jekɔp,
3 ɛn a bin et Isɔ; a dɔn mek nɔbɔdi nɔ de na in mawntin dɛn, ɛn a dɔn gi di say we i bin de to di jakal* dɛn na di wildanɛs.”*
4 Na dis Jiova we gɛt bɔku bɔku sojaman dɛn se: “Idɔm de tɔk se: ‘Dɛn dɔn pwɛl usay wi de, bɔt wi go go bak ɛn bil wetin dɔn pwɛl.’ ‘Dɛn go bil, bɔt a go pwɛl wetin dɛn dɔn bil, ɛn pipul dɛn go kɔl di ples “di say usay dɛn de du ɔlkayn wikɛd tin” ɛn dɛn go kɔl dɛn “di pipul dɛn we Jiova dɔn kɔndɛm sote go.”
5 Una go si am wit una yon yay ɛn una go tɔk se: “Lɛ Jiova gɛt ɔnɔ na Izrɛl.”’”
6 Mi, Jiova, we gɛt bɔku bɔku sojaman dɛn de tɔk to una dɛn prist dɛn we nɔ gɛt rɛspɛkt fɔ mi nem: “‘Bɔypikin de ɔnɔ in papa ɛn savant de ɔnɔ in masta. So if mi na una papa, wetin mek una nɔ de ɔnɔ mi? Ɛn if mi na una masta, wetin mek una nɔ de fred* mi?’
“‘Bɔt una de aks se: “Aw wi nɔ de rɛspɛkt yu nem?”’
7 “‘Bay we una de sakrifays fud* we nɔ klin na mi ɔlta.’
“‘Ɛn una de aks se: “Aw wi dɔn mek yu nɔ klin?”’
“‘Bay we una de se: “Jiova in tebul nɔto tin fɔ rɛspɛkt.”
8 Ɛn we una briŋ blayn animal as sakrifays, una de se: “I nɔ bad.” Ɛn we una briŋ animal we nɔ ebul waka fayn ɔ we sik, una de se: “I nɔ bad.”’”
Jiova we gɛt bɔku bɔku sojaman dɛn se: “Duya, una kɛr am go to una gɔvnɔ. Una tink se i go gladi fɔ una ɔ wɛlkɔm una fayn?”
9 Jiova we gɛt bɔku bɔku sojaman dɛn se: “Duya, una beg Gɔd fɔ lɛ i du gud to wi. Wit dɛn kayn sakrifays dɛn ya we una de briŋ kam, una tink se i go wɛlkɔm una fayn?”
10 Jiova we gɛt bɔku bɔku sojaman dɛn tɔk se: “Udat pan una rɛdi fɔ lɔk di domɔt* dɛn? Una nɔ de ivin layt mi ɔlta fɔ natin. A nɔ gladi fɔ una atɔl, ɛn a nɔ gladi fɔ di gift ɔfrin dɛn we una de gi.”
11 Jiova we gɛt bɔku bɔku sojaman dɛn tɔk se: “Di neshɔn dɛn go ɔnɔ mi nem frɔm we di san kɔmɔt te di san go dɔŋ.* Pipul dɛn ɔlsay go mek smok kɔmɔt pan dɛn sakrifays dɛn ɛn gi ɔfrin dɛn fɔ ɔnɔ mi nem. Na gift we a go gladi fɔ tek; bikɔs di neshɔn dɛn go ɔnɔ mi nem.”
12 “Bɔt una nɔ gɛt rɛspɛkt fɔ am* bay we una de tɔk se: ‘Jiova in tebul nɔ klin, ɛn dɛn nɔ fɔ tek in frut ɛn fud mek natin.’”
13 Jiova we gɛt bɔku bɔku sojaman dɛn tɔk se: “Una de tɔk bak se, ‘Wi taya.’ Ɛn una de twis una fes bikɔs ɔf di wok.” Jiova se: “Una de briŋ animal dɛn we dɛn dɔn tif, we nɔ de waka fayn, ɛn we sik. Una de briŋ dɛn kayn tin dɛn de as gift! Fɔ se a fɔ tek dɛn na una an?”
14 Jiova we gɛt bɔku bɔku sojaman dɛn tɔk se: “Swɛ go de pan di wan we kɔni, we gɛt man animal we nɔ gɛt wan bɔt, bɔt we de mek prɔmis ɛn sakrifays di wan we gɛt bɔt to Jiova. Mi na Kiŋ we gret, ɛn pipul dɛn na di neshɔn dɛn go rɛspɛkt ɛn fred mi nem.”
Futnot Dɛn
^ I min “Mi Mɛsenja.”
^ Na animal we tan lɛk dɔg.
^ I kin min ples we wanwan pipul dɛn ɔ plant de. Rid Baybul Wɔd dɛn Minin.
^ Ɔ “rɛspɛkt.”
^ Insay Ibru, “bred.”
^ I go bi di wok we dɛn gɛt fɔ lɔk di tɛmpul in domɔt dɛn.
^ Ɔ “frɔm ist to wɛst.”
^ Ɔ i kin bi, “nɔ rɛspɛkt mi.”
