Lyuk 3:1-38
3 Insay di ia we mek 15 we Taybiriɔs Siza de rul, Pɔntiɔs Paylet na bin gɔvnɔ na Judia, ɛn Ɛrɔd* bin de rul na Galili distrikt. Ɛrɔd in brɔda Filip bin de rul na Ituria ɛn Trakonaytis distrikt, ɛn Laysinias bin de rul na Abilini distrikt.
2 Insay da tɛm de, Anas ɛn Keyafas na bin edman fɔ di prist dɛn, ɛn na da sem tɛm de Gɔd gi mɛsej to Jɔn, we na Zakaraya in pikin, we i de na di wildanɛs.*
3 So i go na ɔl di eria dɛn we de nia di Jɔdan de prich se pipul dɛn fɔ baptayz fɔ sho se dɛn dɔn ripɛnt so dat Gɔd go fɔgiv dɛn sin dɛn,
4 jɔs lɛk aw di prɔfɛt Ayzaya rayt insay in buk se: “Pɔsin de tɔk lawd wan na di wildanɛs* se: ‘Rɛdi Jiova* in rod! Klia in rod.
5 Ɔl di vali dɛn fɔ ful-ɔp, di mawntin ɛn il dɛn fɔ flat, di rod dɛn we bɛnbɛn fɔ stret, di rod dɛn we rɔf fɔ smut;
6 ɛn ɔlman go si di we aw Gɔd de sev pipul dɛn.’”
7 We bɔku pipul dɛn de kam mit am fɔ baptayz, i bigin fɔ tɛl dɛn se: “Una dɛn vaypa* pikin dɛn, udat dɔn wɔn una fɔ tray fɔ avɔyd di pɔnishmɛnt we Gɔd go briŋ?
8 Una du wetin de sho se una dɔn ripɛnt. Una nɔ tɛl unasɛf se, ‘Ebraam na wi papa,’ bikɔs a de tɛl una se Gɔd ebul mek dɛn ston ya bi Ebraam in pikin dɛn.
9 Di aks ɔlrɛdi de nia di tik dɛn rut. So dɛn go kɔt ɛni tik we nɔ de bia fayn frut ɛn ib am na faya.”
10 So di pipul dɛn aks am se: “Wetin wi fɔ du?”
11 I tɛl dɛn se: “Lɛ di wan we gɛt tu klos* gi wan to pɔsin we nɔ gɛt, ɛn lɛ di wan we gɛt tin fɔ it du di sem tin.”
12 Ivin di wan dɛn we de gɛda taks kam to am fɔ baptayz, ɛn dɛn aks am se: “Ticha, wetin wi fɔ du?”
13 I tɛl dɛn se: “Una nɔ fɔ ad ɛnitin pan di taks we pipul dɛn fɔ pe.”
14 Dɔn di wan dɛn we na soja bin de aks am se: “Wetin wi fɔ du?” I tɛl dɛn se: “Una nɔ fɔ siz advantej pan ɛnibɔdi* ɔ lay pan pɔsin, bifo dat, una fɔ satisfay wit wetin una de gɛt.”*
15 Ɔl di pipul dɛn bin de wet ɛn tɔk na dɛn at se, “Fɔ se na Jɔn na di Krays?”
16 So Jɔn tɛl dɛn se: “Mi de baptayz una wit wata, bɔt di wan we strɔng pas mi de kam, ɛn a nɔ fit fɔ lus di les na in sandal. In go baptayz una wit oli spirit ɛn faya.
17 I ol sɔntin na in an fɔ pul chafchaf. I go yuz am fɔ rili klin di say we i de pul di chafchaf. Dɔn i go put di wit* insay in stɔ, bɔt i go bɔn di chafchaf na faya we nɔ de ɔt.”
18 I gi di pipul dɛn bɔku ɔda advays dɛn ɛn kɔntinyu fɔ tɛl dɛn di gud nyuz.
19 Bɔt Jɔn bin dɔn tɔk pan Ɛrɔd we de rul di distrikt. I tɔk pan am bikɔs ɔf in brɔda in wɛf we na Ɛrodias ɛn bikɔs ɔf ɔl di bad tin dɛn we Ɛrɔd dɔn du.
20 Ɛrɔd nɔ tap de, i put Jɔn na prizin.
21 We Jɔn dɔn baptayz bɔku pipul dɛn, i baptayz Jizɔs insɛf. As Jizɔs de pre, ɛvin opin,
22 ɛn di oli spirit apia lɛk dɔv ɛn kam dɔŋ pan am. Dɔn wan vɔys frɔm ɛvin tɔk se: “Yu na mi Pikin, di wan we a rili lɛk; a gladi fɔ yu.”
23 We Jizɔs bigin in wok, i bin ol lɛk 30 ia so, ɛn pipul dɛn bin de tink sein papa na Josɛf,Josɛf in papa na Ilay,
24 Ilay in papa na Matat,Matat in papa na Livay,Livay in papa na Mɛlkay,Mɛlkay in papa na Janaay,Janaay in papa na Josɛf,
25 Josɛf in papa na Matatayas,Matatayas in papa na Emɔs,Emɔs in papa na Neɔm,Neɔm in papa na Ɛslay,Ɛslay in papa na Nɛgaay,
26 Nɛgaay in papa na Meat,Meat in papa na Matatayas,Matatayas in papa na Sɛmiɛn,Sɛmiɛn in papa na Josɛk,Josɛk in papa na Joda,
27 Joda in papa na Joanan,Joanan in papa na Risa,Risa in papa na Zɛrubabɛl,Zɛrubabɛl in papa na Shialtiɛl,Shialtiɛl in papa na Niray,
28 Niray in papa na Mɛlkay,Mɛlkay in papa na Ɛday,Ɛday in papa na Kosam,Kosam in papa na Ɛlmedam,Ɛlmedam in papa na A,
29 A in papa na Jizɔs,Jizɔs in papa na Ɛlieza,Ɛlieza in papa na Jorim,Jorim in papa na Matat,Matat in papa na Livay,
30 Livay in papa na Simyɔn,Simyɔn in papa na Judas,Judas in papa na Josɛf,Josɛf in papa na Jonam,Jonam in papa na Ilayakim,
31 Ilayakim in papa na Milia,Milia in papa na Mɛna,Mɛna in papa na Matata,Matata in papa na Netan,Netan in papa na Devid,
32 Devid in papa na Jɛsi,Jɛsi in papa na Obɛd,Obɛd in papa na Boaz,Boaz in papa na Salmɔn,Salmɔn in papa na Nashɔn,
33 Nashɔn in papa na Aminadab,Aminadab in papa na Anay,Anay in papa na Ɛzrɔn,Ɛzrɔn in papa na Pirɛz,Pirɛz in papa na Juda,
34 Juda in papa na Jekɔp,Jekɔp in papa na Ayzak,Ayzak in papa na Ebraam,Ebraam in papa na Tira,Tira in papa na Neɔ,
35 Neɔ in papa na Sirɔg,Sirɔg in papa na Riu,Riu in papa na Pilɛg,Pilɛg in papa na Iba,Iba in papa na Shila,
36 Shila in papa na Keaynan,Keaynan in papa na Apakshad,Apakshad in papa na Shɛm,Shɛm in papa na Noa,Noa in papa na Lemɛk,
37 Lemɛk in papa na Mɛtyusila,Mɛtyusila in papa na Inɔk,Inɔk in papa na Jerɛd,Jerɛd in papa na Maelɛliɛl,Maelɛliɛl in papa na Keaynan,
38 Keaynan in papa na Inɔsh,Inɔsh in papa na Sɛt,Sɛt in papa na Adam,Adam in papa na Gɔd.
Futnot Dɛn
^ Dat na, Ɛrɔd Antipas. Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Ɔ “bad bad snek.”
^ Ɔ “ɛkstra klos.”
^ Ɔ “fɔ pul sɔntin na pɔsin in an bay fos.”
^ Ɔ “wetin dɛn de pe una.”
^ Wit na tin we pipul dɛn de it.
